قلوب مجروحة



النهارده إن شاء الله ناوى أتكلم عن موضوع طويل ولكنه حيوى
موضوع يؤرق الشباب من الجنسين طبعا مش حب الشباب ولكنه بالفعل حب الشباب
عن فشل بعض العلاقات العاطفية
انا إتكلمت عن نفسى قبل كده ولكن النهارده ناوى أتكلم عن إصحابى
الفكرة إنى لقيت الموضوع بيتكرر كتير ومش هينتهى وبيسيب أثر جامد
ممكن نحاول نفكر مع بعض كده
صاحبى الأولانى
اتعرف على بنت فى سنه أولى وفضلوا مرتبطين عاطفيا لغاية سنة رابعة كده
وأى حد يشوفهم رايحين جايين مع بعض يقول يا سلام على الحب وبعدين فى سنة رابعة البنت جالها عريس واتخطبت له
وعادى جدا ولا أكن كان فى حاجة موجودة وطبعا صاحبى أتأثر جدا ويعينى قلبه إتجرح جامد
صاحبى التانى
ميفرقش كتير
إتعرف عليها فى سنة خامسه وهو من أوائل الدفعة برضه واتعلق بيها كتير وجابلها ورق ومذكرات ووعدها بالخطوبة بس فى الإمتياز
لغاية كده مفيش مشاكل لغاية قرب الإمتحانات كده
قالتله فرصة سعيدة إنى أتعرفت عليك وانا موعدتكش بحاجه وطبعا صاحبى أتأثر كتير خصوصا أنه إتصدم فى وقت إمتحانات ودى كانت أول بنت يكلمها ويتعرف عليها ولكن الحمد الله ربنا سترها معاه فى الإمتحانات ومتأخرش كتير فى الترتيب وربنا يكرمه السنه دى
صاحبى التالت
ده بقى اللى كانت صدمته أكبر من سابقيه برضه إتعرف عليها فى الكلية وكانوا متفقين على كل شىء تقريبا ولكن بما إنها كانت ميسورة الحال طبعا كان لازم يتقدم وهو واقف على رجله هو كمان بعد الكلية حفر فى الصخر وسافر فى الخارج _فى الخارج جدا _ علشان يقدر يكون واقف على رجله
ولكن لظروف بصراحه مش عارف تفاصيلها أوى
البنت أتخطبت قبل رجوعه من السفر
ورجع لقى كل شىء انتهى
القصص تقريبا متشابهة كتير وهتقلولى إنى متحامل على البنات ده بس من منطلق إن أصحابى أولاد وأوفياءكمان
وعلشان خاطركم هتكلم عن شكل آخر وده
صاحبى الرابع
فى الكلية كان بيتعامل بشىء من البساطة مع الأولاد والبنات يعنى كان له أصحاب بنات كتير وهو كان واخد الموضوع عادى ولكن فى بنت اتعلقت بيه جدا وصرحت له بالموضوع ولكن هو إتفاجىء بالموضوع وبالطبع مكنش فى دماغه حاجه
بس معرفش يصدمها وفضل ماشى معاها باقى السنة
لغاية وقت التخرج
قالتله تعالى كلم بابا بقى
قالها انا لسه متخرج ومش بشتغل قالتله ربنا يسهل إتقدم بس و تبقى تشتغل اى حاجه

قالها معنديش شقة
قالتله مش مشكله ممكن أعيش مع والدك ووالدتك وحتى بابا ممكن يساعدك وهو ميسور الحال
لكن صاحبى مكنش عنده استعداد اساسا إنه يتقدم فى الوقت ده ومش جاهز لتحمل المسئولية
طبعا الموضوع ده ترك عند البنت جرح كبير
تعالوا نحاول نشوف بعض الأسباب والحلول للمواضيع دى
انا عارف ان كلامنا هيكون نظرى وتنفيذه مش سهل
وانا عارف برضه إن كل شىء قسمه ونصيب
بس أكيد فى حاجات ممكن نتناقش فيها

ومثلما يقولون الوقاية خير من العلاج
1- هنلاقى فى عامل مشترك للقصص دى كلها وهو إن كلهم بدأوا حكاياتهم وهما فى الكلية وقبل ما يكون فى شىء رسمى ودى أولى خطوات فشل العلاقة

2-الظروف الإقتصادية طبعا ليها عامل أساسى أن الشاب بيكون قدامه فترة بعد التخرج على ما بيكون جاهز للخطبة وطبعا مفيش بنت بتستنى والمشكله دى ملهاش حل غير أن الأسره تكون متيسرة من الأول

3-تقليد اللى بيحصل يعنى مثلا تيجى تتمشى فى الجامعه تلاقى كل ولد قاعد جنب واحده وكده طبعا كل واحد بيقول فى نفسه إشمعنى انا تفتح التليفزيون تتفرج على المسلسلات تلاقى قصص الحب والغرام تقول اشمعنى انا
تفتح الراديو تلاقى أسامه منير قاعد بيسمع فى قصص الحب
وأول سؤال انتى مرتبطة
يعنى عندك قصة حب ومش يعنى مخطوبة أو متجوزة
أكنها أجرمت لو كانت مش مرتبطة
أو إن الطبيعى إن كل واحد أو واحدة لازم يكون عنده قصة حب

4-يمكن أصحابى عاطفيين بزيادة شويه وللمشكلة دى
اسمعوا الرسول قال إيه

{أحبب حبيبك هوناً ما ، عسى أن يكون بغيضك يوماً ما ، وأبغض بغيضك هونا ما ، عسى أن يكون حبيبك يوماً ما}

يعنى ياريت بلاش الإندفاع فى العواطف
ويا سلام لو نرتب أولوياتنا زى ما انا إتكلمت قبل كده يعنى لازم تكون لينا أهداف وأولويات محتاجة مجهود وتضحية أولى من المشاكل العاطفية دى أسود عريضوحابب أعيد حديث الرسول اللى كنت قولته قبل كده
((إِنَّكَ لَنْ تَدَعَ شَيْئًا للهِ إلاَّ أَبْدَلَكَ اللهُ بِهِ مَا هُوَ خَيْرٌ لَكَ مِنْهُ))



5- آخر شىء حابب أقوله ياريت نحاول نقيس كل شىء بنعمله من وجهة نظر الدين الأول يمكن كلامى فى شىء من المثالية شوية بس انا بحاول اناقش معاكم وأذكر نفسى وياكم علشان انا عارف ان المواضيع العاطفية دى كتير بتكون مؤلمة ياريت تحكولنا عن قصصكم واقترحاتكم عن هذا الموضوع الشائك جدا جدا جدا

هنا المحلة







ده مشهد النهاية يعنى مثلما يقولون فى الأفلام بعمل _ فلاش باك_
ولم أكن أعلم أن الفيلم سيكون درامى بهذا المنظر
كنت قد صورته من بدايته
معذره لا يوجد عندى سوى مشهد النهاية ولكن تخيلوا معايا
نرجع للفيلم من بدايته

منذ حوالى خمسه أو ستة أشهر تقرر صرف مبلغ مالى للصرف على مدينتى الجميله المحلة
الجميع استبشر بالأمر
طبعا هتسألوا لماذا المحله بالذات؟ _مش محتاج أقولكم _
راجعوا الأحداث

وبالفعل بدأ العمل على قدم وساق وبدأوا فى تجميل مدخل المحلة
وبالفعل تم تغطيه جزء كبير من مدخل المحلة فغطوا الرصيف بالبلاط
ووضعوه شجر وزرع بجواره
ووضعوا كراسى للإستراحه على الرصيف
وكذلك أعمده إناره وعليها مصابيح خضراء مستديره غايه فى الجمال
وأعادوا طلاء سور السكه الحديد _خلفية الرصيف_
جميع سكان المنطقة استبشروا بما حدث وسعدوا بهذا التغيير حتى أن بعضهم كان يقضى أمسيته على تلك الإستراحات خصوصا فور الإنتهاء منها تقريبا فى نهايه الصيف الماضى ويجلسون عليها مثلما يجلسون على الكورنيش _ولكنهم بالطبع يجلسون على الطريق السريع_
فاصل إعلانى
طريق المحلة طنطا

منذ عام فائت
ألات الحفر لإزاله الطريق ................................. ألات الرصف لرصف الطريق
ألات حفر أخرى لإزاله ما تم رصفه.........................ألات رصف لإعاده رصف ماتم حفره
تعاود ألات الحفر عملها مره أخرى ..........................منتظرة قدوم ألات الرصف لتعيد رصفه
رأى الناس ربنا يعينهم ما شاء الله بيصلحوا الطريق
سؤال الحلقة
ما هو الجزء المتبقى من الطريق الذى لم يتم رصفه حتى الآن؟؟؟؟؟؟؟؟؟؟؟؟
اذا علمت الإجابه اتصل على
009001200

نعود للفيلم
الصوره حتى الآن فى غايه الروعه وهنا استوقفنى واحد من أصحابى المتشائمين جدا
وقال لى لن يستمر المشهد بهذا الجمال
استغربت لقوله وقلت له سيتمر إن شاء الله بالعند فيك هذا المكان ليس عليه ضغط والإستهلاك مش كتير ولن يستهلك مثلما حدث فى الشوارع الرئيسيه _الشون وشارع البحر_
وانتهى الحوار هنا
ولكن منذ شهرين تقريبا بدأوا فى إطفاء أعمده الإناره قلت فى نفسى مش مشكله يمكن توفير برضه ولكن مشهد النهايه جاء بصور دراميه جدا لم يتوقعها أحد بدأ المشهد بألات الحفر التى بدأت فى حفر الطريق لرصفه قولنا كويس شىء كويس ولكن العجيب أن الألات لم تحفر لتزيل الطريق فقط ولكنها جاءت على الأخضر واليابس فأزالت الرصيف بأكمله بما عليه من أعمده الإناره _التى كانت مطفئة للتوفير_
وبالطبع أزالوا البلاط المغطى للأرضية وإزالوا كراسى الإستراحه
وما كان بجواره من زرع
وللأمانه
أبقوا على طلاء سور السكه الحديد حتى الآن
لينتهى المشهد نهاية مأسوية مخرج الفيلم طبعا محترف يعشق النهايات المفتوحة فترك لنا حرية التخيل عن سبب هذا الهدم وحرية تخيل ما سيحدث بعد ذلك
قولت أساعدكم شويه فى التخيل ده
سألت نفسى عن سببب منطقى لما حدث
لم أجد سوى هذا
المثل الشعبى
{اللى معاه قرش ومحيره يشترى به حمام ويطيره}
فكرت كمان شويه قولت يمكن لأن 6 إبريل قرب فقالوا نوفر على الناس بدل ما السكان يكسروا نغنى عنهم هذه المهمه ونقوم نحن بها نيابة عنهم فكرت كمان شويه قولت يمكن ........................................................................................................................................... لأ قولوا إنتوا أحسن
لن أمنع ذهنكم من التخيل
تنويه بسيط شكرا خاص جدا جدا لمن ساعدنى فى إلتقاط هذه الصور فجزاه الله خيرا

هناك فرق

دائما ما نسمع المهتمين بالتنميه البشرية يقولون أنه على الفرد أن يرتب أولوياته

وإهتمامات الفرد تعكس أولوياته
................................
مفيش حد فاهم حاجة
طيب هحطرح عليك سؤال
ماهو الشىء الذى كان مستحوذ على تفكيرك اليومين السابقين؟؟؟؟
وما هو الشىء الذى انشغلت فيه فى تلك الفترة؟؟؟؟
إجابتك عن السؤال يعكس بشكل مباشر عن أولوياتك وابرز اهتماماتك....
فكر فى إجابة السؤال
ولكن أثناء تفكيرك هذكر لك موقف بسيط
سيدنا مصعب بن عمير قبل إسلامه كان من أكثر شباب مكه تأنقا
يذكر أنه كانت له رائحه عطر مميزة يعرف بها من بعيد
ويقال أنه كان لا يرتدى الثوب مرتين _يرتديه وهو جديد فقط وبعد ذلك يتركه_
سيدنا مصعب بعد إسلامه
تغيرت وتحولت إهتماماته وأولوياته
فهو يعتبر بمثابه شعلة النور التى أنارت للمسلمين النور فى المدينة
والبذره التى نشأ بعدها المجتمع الإسلامى فى المدينة
فهو أول سفير للإسلام
أرسله الرسول مع المدينه ليدعو الناس إلى الإيمان وإلى الخير ويمهد لهجرة الرسول صلى الله عليه وسلم
عند وفاه سيدنا مصعب شهيدا فى المعركة
جاءوا ليغطوا جثمانه
لم يجدوا ما يكفى ليغطى جسده بالكامل فكان الثوب اذا غطى وجهه برزت رجليه
واذا غطى الثوب رجليه انكشف وجهه
فأمرهم الرسول بتغطيه وجهه وما برز من رجليه غطوه بورق إحدى النباتات

فرحمه الله عليك يا مصعب الخير
هل لاحظتم الفرق فى اهتمامات والأولويات عند سيدنا مصعب؟؟!!

تخيلوا معايا كده
لو انا قولت إنى نفسى أتزوج من فتاه لديها نفس أولويات سيدنا مصعب
طبعا لن اتزوج فى حياتى...........
كل بنت حاليا عندما تفكر فى الزواج
لازم هتقولك
انا عايزه شبكه زى فلانه صاحبتى


وعايزه أعيش فى شقه زى فلانه قريبتى
ومتنساش الأثاث لازم تجيبه من من دمياط زى بنت أم حسن
احنا مش أقل منهم

ده هو التفكير الغالب عند بناتنا
بس بينى وبنكم برضه
مش بس البنات اللى بيفكروا كده
ده الناس كلها كل تفكيرها أصبح مادى وبس
فعلا
هناك فرق

انا بحتفل!!!!


أولا انا لا حب الإختلافات
ولا أدعى الفتوى
ولكن لدى وجهة نظر
من فترة كده كانوا بيحتفلوا بعيد الحب
والنهارده ذكرى المولد النبوى
وبعد أسبوعين كده عيد الأم
وبعد كمان عيد شم النسيم
وتجد أن لكل مناسبة طقوس خاصه
وتجد العالم من حولك منقسم منهم من هو ملتزم تماما بتلك الطقوس
ومنهم من يتعصب لتحريم الإحتفال

وبنظره متأمله لما يمارس فى تلك الإحتفالات
ستجد انه شىء من ثلاث
إما أنه مناسب تماما مع الدين ومع الإسلام مثل تذكر سنه الحبيب المصطفى فى ذكرى مولده ومثل شراء هديه للوالده فى عيد الأم
أو
او شراء هديه للزوجه فى عيد الحب

او أن ما يمارس مخالف تماما للدين والشرع
مثل الخروج فى الزحام والإختلاط ومثل المواكب التى تسير فى الشوارع والتى لاهدف منها ومثل الذهاب الى الأضرحه وما شابه

فى ذكرى المولد
ومثل شراء هدايا لحبيبته والخروج معها وهما غير مرتبطان بارتباط شرعى بعد فى عيد الحب
ومثل الأزذحام المبالغ فيه ايام شم النسيم وما يتبع ذلك من مشاكل


أو أن ما يمارس لم يحرمه الدين وليس له علاق مباشره بالدين

مثل أكل حلاوه المولد فى ذكرى المولد أو أكل الفسيخ وما شابه فى شم النسيم

بعد كل هذا السرد ما هو رأيى فى هذا الأمر إذن؟؟؟
أظن أن الرسول كان قد حدد لنا أنه للمسلمين عيدان فقط هما ما يجوز الإحتفال بهما وهما عيد الفطر وعيد الأضحى
وكان من عادته صلى الله عليه وسلم أنه كان يخالف الكفار واليهود فى أعيادهم
إذن لا يجوز الإحتفال بشكل مباشر بأى من تلك الأعياد
وبما إن معظم الأطباء عمليين
إذن انا بستغل فرصه تلك الأعياد وبحاول أحتفل بها بطريقتى الخاصه
فأى شىء بجده مناسب مع الدين لا مانع منه بل إنه محبب مع تغيير النية وهو عدم الإحتفال ولكن من باب استغلال المناسبة والحديث الإعلامى فقط
يعنى مثلا
لا مانع من شراء هديه للأم فى عيد الأم ولكن ليس بنيه الإحتفال ولكن بنيه برها وإتباع أوامر الله ورسوله وإمعانا فى ذلك هو عدم شراء الهديه فى نفس اليوم الذى يحتفلون فيه ممكن قبلها بقليل
وهكذا لا مانع من تذكر ذكرى النبى ا اليوم مثلابل إنه شىء محبب
وأظن أنه لا مانع كذلك من تناول الحلوى أو ما شابه
ولكن ليس بنيه الإحتفال كذلك ولكن لإنها تكون متوفره وفى حاله جيدة فقط
بقى شىء واحد وهو البعد كل البعد عن كل ما يخالف الشرع فى تلك الأعياد
لأن المعصيه هنا لسببين
لأن هذا الأمر معصيه فى حد ذاته
ومعصيه الإحتفال كذلك
يارب تكون وجهة نظرى قد وضحت إليكم
وياريت تعرفونى وجهة نظركم كذلك فى هذا الأمر

أم أنت مثل هؤلاء؟؟


فى الموضوع السابق
طرحت سؤال عليكم؟؟
وكان فى ناس متردده فى إجاباتها.....
أمثلتى كلها الموضوع اللى فات كانت سيئه
المره دى حبيت أفكركم بأمثله يعتبروا قدوتنا
يمكن أنتوا عارفين المواقف دى

بس حبيت أفكركم بيها
النماذج دى وضعت فى موقف إختبار صعب ولكنهم نجحهم فيه
المره دى المقارنه بين ما الأمر الواجب وبين العاطفه
أبرز مثال
عندما رأى سيدنا إبراهيم فى المنام أنه يذبح إبنه عندما تيقن من أمر الله لم يتردد
بل والأحلى من ذلك عدم تردد ابنه إسماعيل

وقوله افعل ما تؤمر وتنفيذه الفورى لأمر الله
إلى أن أرسل الله الكبش الذى فداه به
المثال الآخر
هو سيدنا حنظله ابن أبى عامر
الذى تزوج ليله غزوه أحد وفى الصباح سمع نداء الجهاد ترك تزوجته فى الصباح ولم يكن قد اغتسل بعد
وخاض المعركه ونال شرف الشهاده
وعندما علم الرسول ذلك
((إني رأيت الملائكة تغسل حنظلة بن أبي عامر بين السماء والأرض بماء المزن في صحاف الفضة))
رحم الله غسيل الملائكه
المثال الثالث
ابن المنافق الكبير عبد الله بن أبى بن سلول وكان رجل صالح من خيار الصحابه
بعد حادثه الإفك ودور المنافقين فى إشعال القتنه
قال للرسول{يا رسول الله إن أردت قتله فمرنى بذلك ف؟أنا والله أحمل إليك رأسه}
ليس هذا فقط الذى واجه أباه بل يقال أن
الصحابي الذي روي أنه قتل أباه هو: أبو عبيدة عامر بن الجراح رضي الله عنه، والذي ورد أنه قتله في غزوة بدر، روى الطبراني والحاكم والبيهقي أن أبا عبيدة قتل أباه الجراح يوم بدر، جعل يتصدى له، وجعل أبو عبيدة يحيد عنه، فلما أكثر قصد إليه أبو عبيدة فقتله،
فنزل قول الله تعالى: {لا تَجِدُ قَوْماً يُؤْمِنُونَ بِاللَّهِ وَالْيَوْمِ الْآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءَهُمْ أَوْ أَبْنَاءَهُمْ أَوْ إِخْوَانَهُمْ أَوْ عَشِيرَتَهُمْ أُولَئِكَ كَتَبَ فِي قُلُوبِهِمُ الْأِيمَانَ وَأَيَّدَهُمْ بِرُوحٍ مِنْهُ وَيُدْخِلُهُمْ جَنَّاتٍ تَجْرِي مِنْ تَحْتِهَا الْأَنْهَارُ خَالِدِينَ فِيهَا رَضِيَ اللَّهُ عَنْهُمْ وَرَضُوا عَنْهُ أُولَئِكَ حِزْبُ اللَّهِ أَلا إِنَّ حِزْبَ اللَّهِ هُمُ الْمُفْلِحُونَ}
سبحان الله هؤلاء لم يترددوا فى تنفيذ أمر الله وإن كان التنفيذ على حساب أقرب الناس إليهم
وهنا السؤال
ما تفعل إذا تعارض أمر الله مع عاطفتك؟؟
هل ما زلت تفكر؟؟
هذا هو السبب إذن فى أنك لا تستشعر حلاوه الإيمان؟؟
حيث يقول الرسول
"ثلاث من كن فيه وجد بهن حلاوة الايمان : أن يكون الله ورسوله احب اليه مما سواهما وأن يحب المرء لايحبه الا لله وأن يكره ان يعود للكفر بعد ان انقذه الله منه كما يكره ان يقذف في النار "
أعلم أن السؤال النهارده صعب مثل سابقه
لذلك أترك لك الحكم على نفسك