النصف المفقود

طول عمرى فاشل جدا فى انى اكتب اى حاجه رومانسى وأى حاجه كتبتها قبل كده رميتها ومحدش شافها خالص........ حتى اصحابى المقربين جدا يعرفوا كويس انهم لما بيطلبوا منى ادعيلهم وهما يأمنوا ورايا......مبعرفش بحس ان ه حتى علاقة الانسان بربنا علاقةمن نوع خاص مبعرفش اعبر عنها او اخلى حد يشاركنى فيها.... دايما كنت بعتقد ان امور الحب دى بيتحس بيها وبتبقى واضحه جدا حتى لو الانسان معبرش بشكل صريح وكمان الواحد مبيعرفش يتحكم فى مشاعره يعنى كونه يحب او يكره مش بمزاجه أظن أنها كيميا محدش قدر يفهمها لغايه دلوقت خصوصا انها ملهاش قواعد ثابته
وللاسف هو ده اللى حصلى
طبعا مش هقدر اوصفهالكم علشان بصراحه هى أسمى من انها تتوصف وكمان مش هقولكم انا عارفها من امتى ؟؟؟؟؟؟؟ ولا هقولكم الموضوع فضل معايا قد ايه؟؟؟؟ علشان متتخضوش بس وانا خايف عليكم بصراحه طبعا هتسألونى وانت عملت ايه؟؟؟ انا كنت ساعتها طالب يعنى كنت لسه باخد مصروفى يعنى طبعا مينفعش أقدم على حاجه رسميه علشان كده ولا مره حاولت أقولها ولا مره حاولت أكلمها حتى أصحابى اللى كانوا عارفين اتهمونى بالسلبيه والضعف وأظن أنكم مش هتفرقوا كتير عنهم ولكن كان ردى عليهم ان اللى انتوا عازينى اعمله ده مينفعش وذكرتلهم حديث الرسول عليه الصلاه والسلام ((إِنَّكَ لَنْ تَدَعَ شَيْئًا للهِ إلاَّ أَبْدَلَكَ اللهُ بِهِ مَا هُوَ خَيْرٌ لَكَ مِنْهُ)) المهم انه السنه اللى فاتت تقريبا عرفت أنها اتخطبت حتى معرفش اذا كانت اتجوزت دلوقت ولا لسه
واحد صاحبى من يومين كده لما عرف قالى بس انت اكيد دلوقت زعلان منها ويمكن بتكرهها كمان
قولتله بص أمور الحب مينفعش تتشرى وملهاش مقاييس معينه .....
وانا مش نادم على اللى انا عملته لانى مقتنع انه كان مظبوط....
و هزعل منها ازاى وهى أصلا متعرفش وحتى لو كانت حاسه بالامر مينفعش تخالف أهلها لمجرد احساس

واذا كنت زمان بتمنى أنها تكون النصف الاخر ودلوقت انا بكن ليها كل احترام وتقدير لانها فعلا انسانه محترمه وممتازه وانا بتمنى لها التوفيق والسعاده فى حياتها الزوجيه المستقبليه بالنسبه ليا بصراحه بتمنى أن قلبى ميدقش تانى قبل مكون جاهز فعليا علشان بصراحه معنديش استعداد أنه ينجرح تانى..........رغم ان الامور دى برضه مش بمزاج الواحد علشان كده مش طالب منكم أكتر من أنكم تدعولىأن ربنا يحافظلى على قلبى لغايه لما أكون جاهز
وان ربنا يوفقنى وأقدر الاقى النصف التانى بدل النصف المفقود


39 رأيك يهمنا:

غير معرف 31 يناير 2009 9:53 م  

السلام عليكم
يا رب يا سيدى ربنا يحافظ لك على قلبك لحد ما تبقى جاهز لانه يدق
بس انا عاوز اقولك بلاش تتعب نفسك فى البحث عن غيرها
وحتى لو هتدور على غيرها فبلاش تدور على صورة منها
والسلام ختام

أحمد سعيد بسيوني 31 يناير 2009 9:53 م  

بسم الله

اية ده اية ده

من ورايا يا حمادة

ماشي يا فوزي وانا اللي كنت فاكر انك قايلي كل اسرارك

عموما ربنا يعوضك بخير منها ويزرقك بالزوجة الصالحة والتي تكون لك خير عون في حياتك الدنيوية

الدعوة دي استجابتها مشروطة باني اكون اول واحد يعرف اي موضوع قادم عشان عاوز اطمئن على مستقبلك قبل ما افكر في نفسي

دمت محباً

غير معرف 31 يناير 2009 10:14 م  

بسم الله الرحمن الرحيم
د/عرفه
ربنا يوفقك يارب وتلاقى نصك التانى ياسيدى
وعلى فكره ده بيبقى مكتوب عند ربنا يعنى مفيش حد بياخد اكتر من نصيبه

غير معرف 31 يناير 2009 11:45 م  

بسم الله الرحمن الرحيم
اظن ان سبب اى حب هى بدايته نظره ولانك شوفتها ممكن الاول اعجبت بيها ثم بتصرفاتها ثم ثم فنصيحتى ليك انك تحاول انك تغض بصرك على قد ماتقدر و اعرف ان الله لن يتركك ولا تنسى من يتقى الله يجعل له مخرجا ويرزقه من حيث لا يحتسب
صفاء
16 سنه

غير معرف 1 فبراير 2009 12:38 ص  

انك تقدر تبعد عنها ومش تكلمها كتير ميقدرش عليه
انها تكون من نصيب حد غيرك وتحترمها وتتمنالها السعاده
اكيد صعب عليك
ربنا يغنيك بالحلال عن قريب وبسعاده محلمتش بيها

kalamfady 1 فبراير 2009 3:53 م  

وانا اللى كنت فاكر انى انا لوحدى اللى غلبان يظهر الدفعة كلها كده...ربنا يعوض علينا

حسام غانم 1 فبراير 2009 7:46 م  

اللي انت عملته ده هو الصح فعلا

وإن شاء الله ربنا يبدلك خيرا منها

salma mohamed 1 فبراير 2009 8:51 م  

السلام عليكم
اخي في الله,عين العقل اللي انت عملته,
وانك تفضل تكن ليها الاحترام هو ده المطلوب,
ولازم تطمن لان امر المؤمن كله خير,يمكن تنجرح دلوقتي,بس ماحدش عارف لو كنتم ارتبطم حتى ولو في الحلال,كان ممكن ايه يحصل,ممكن ماكنتش طباعكم تتوافق,يمكن كان هيظهر لكل واحد فيكوا حاجه متريحش التاني,
علشان كده ربنا صرفك عنها,حتى لو اتالمت مع الايام هتنسى,وياما ناس حبوا بعض وارتبطوا فعلا,وانفصلوا وقتها الجرح بيكون اصعب سواء كانت خطوبة او زواج,وانت الحمد لله ربنا عافاك من ذلك,
واكيد ربنا هيعوضك بخير منها,لانك تركتها لله,
وان شاء الله هيجي اليوم اللي تكمل فيه نصف دينك بافضل نعمة في الدنيا الزوجة الصالحة.

shafeq ryad 2 فبراير 2009 10:15 ص  

احيانا بنضطر ندوس على قلبنا عشان اللى بنحبه واحيانا بنضطر نكتم مشاعرنا ونعيش مع الامنا لوحدنا عشان اللى بنحبه يبقى سعيد ومايعرفش حاجه ممكن تخليه بعد كده ندمان فى حياته المستقبليه وده مصيرك ومصير كل واحد دراسته وامكانياته مثلنا ومن قدم شىء بيداه التقاه وهنيالك يافاعل الخير والثواب ونسمع تملى معاك لعمرو دياب مع تحيات اسامه منير قصدى شفيق رياض dr.sheva

د/عرفه 2 فبراير 2009 10:30 ص  

الرفاق حائرون يتسائلون

من تكون ؟؟؟؟؟؟؟؟؟؟؟؟

طبعا بقولهم ينسوا ومش عايز حد يسالنى بعد كده

د/عرفه 2 فبراير 2009 10:35 ص  

غير معرف اول واحد
انا معاك طبعا انا مقتنع ان لكل انسان طعم ولون ورائحه خاصه بيه
وده اللى بيميز كل انسان عن التانى




اهلا بيك يا ابو حميد فى اول تعليق ليك فى المدونه رغم انه متاخر اوى بس مش مشكله
وان شاء الله هتكون اول واحد معزوم على الفرح بس ادعيلى بس انت

د/عرفه 2 فبراير 2009 10:41 ص  

الردود بعد كده غير معرف
يا ريت يكتبوا اى رمز علشان حتى اعرف اعلق بعديهم

المهم اول واحد غير معرف
طبعا الامور دى بتبقى نصيب وانا مقتنع بكده جدا

تانى واحده صفاء
انا معاكى جدا ان النظره سبب وانا والله مش بحاول اتامل فى حد بس فعلا مكنش بمزاجى


تالت واحد غير معرف
اهلا بيك وربنا يسمع منك
وتعليقك عجبنى جدا

د/عرفه 2 فبراير 2009 10:53 ص  

اهلا بيك يا محمد {كلام فاضى}
فعلا ممكن ان يكون فى ناس زى
بس ماظنش ان يكون فى حد كان بقاله مده اكتر منى




اهلا بيك يا حسام
وكويس انك ايدت اللى انا عملته





اهلا بيكى سلمى
انا مبسوط انك بتقرى كل المواضيع بتاعتى وبتعلقى عليها كمان يعنى مفروض انتى زائر سوبر
ويارب دايما
انا مقتنع جدا باللى انتى بتقوليه فعلا
وعسى ان تكرهوا شيئا وهو خير لكم وعسى ان تحبوا شيئا وهو شر لكم






اهلا بيك يا شفيق فى اول تعليق ليك فى المدونه
انا مش عارف انت تقصد ايه اوى
المهم مكنش ينفع اعمل حاجه اكتر من اللى انا عملته
ونعمل ايه لظروف الدراسه وظروف الامكانيات

salma mohamed 3 فبراير 2009 1:44 ص  

انا اللي بكون مبسوطه بجد لما بقرأ مواضيعك ,وانا مش بكون قارئه دائمه ولا معلقه مستمره الا في المدونات ذات الاسلوب الجذاب,وخصوصا بقى لما يكون اصحابها ناس محترمين وملتزمين.

iBRAHiM sAllAm 3 فبراير 2009 11:13 ص  

السلام عليكم يا دكتور

عجبتني قوي جملة "بصراحه بتمنى أن قلبى ميدقش تانى قبل مكون جاهز فعليا علشان بصراحه معنديش استعداد أنه ينجرح تانى"

بصراحة انت كده تمام التمام ,
الواحد برضه واخد عهد على نفسه ما يعملش زي ما غيره بيعمل و لا زي ما بيقولوا " يحجز " واحدة غير لما يكون جاهز فعلا و راجل مش بياخد مصروف من حد ,

و ساعتها إن شاء الله هيجيلك اللي أحسن منها إن شاء الله لأنه من نرك شيئا لله عوضه الله خيرا منه ,

و علشان ربنا يرزق الواحد بواحدة من " الطيبات " لازم يحاول بأقصى جهده إنه يكون من " الطيبين " ,

و ربنا يبعد عنا الشيطان و وساوسه و ما يلقيه في القلب من شر ,

بس خلاص :)

Hosam Yahia حسام يحى 3 فبراير 2009 7:29 م  

جميله المدونه

لى عوده ان شاء الله

القلم السكندري 3 فبراير 2009 7:49 م  

حين أتحركُ بين أحرفِ الحبِ أشعر وكأنني أتحركُ في حقل ألغامٍ وضعت علي ساحة قلب

تصرفك طيب .. وفيه عزيمةٌ وثبات.. زادك الله ثباتاً

والذي خلق في قلبك الحب قادرٌ علي أن يشفي جرحك منه.. وأن يعوضك خيراً وهو حسن الظن بالله


تقبل تحياتي

د/عرفه 4 فبراير 2009 1:00 ص  

الله يخليكى يا سلمى ويارب اكون عند حسن ظنك




اهلا بيك يا باش مهندس ابراهيم
ربنا يستجيب لدعائك ويارب اكون دايما من الطيبين

د/عرفه 4 فبراير 2009 1:03 ص  

اهلا بيك يا حسام بس مستنى رايك
الزياره دى مش محسوبه




اهلا بيكى اخى الاسكندرانى
فعلا الكلام عن الحب عامل زى حقل الالغام
بس يارب مينفجر فى وشى
يارب ارزقنى الثبات دايما

ابن الإخوان والأزهر 4 فبراير 2009 1:26 ص  

ياسلااااااااااااام

تدوينة في غاية الروعة

بص يا دكتور (( محدش بيتجوز مراة حد )) حطها قاعدة علشان تستريح زيي كده ، اللي مكتوبالك حتتجوزها

وأحييك على موقفك الأخلاقي أنك لم تتحدث معها

ربنا يوفقك في حياتك

salma mohamed 4 فبراير 2009 2:33 م  

د/عرفة
انا عاوزة استفسر على حاجة وياريت تساعدني لو ممكن,
انا عاوزة احط في مدونتي ساعة,وكل ما باجي احطها بيظهر حولينها مربع ابيض,مش بتظهر زي ساعة مدونتك,ومش عارفة ايه السبب؟
مع اني غيرت ساعات كتير بس كلهم بيظهروا بنفس الشكل!!؟

المعتصم 5 فبراير 2009 12:52 ص  

بسم الله الرحمن الرحيم
السلام عليكم ورحمة الله وبركاته
د/عرفه تحياتى
انا ايه اللى خلانى اجى هنا النهارده ياعم
قلبت علينا المواجع
اللى يحب مايكرهش ده صحيح جدا حتى بعد مااتجوزت بنتمنى لها السعادة ونظل نحمل لها كل الود والاحترام وايضاً الحب وبتفضل معانا لها الذكريات الجميلة بس
انت انسان محترم يادكتور وان شاء الله ربنا هيكرمك بالحب وبالانسانة اللى تستاهلك وتستاهل حبك فى الوقت المناسب ان شاء الله
ربنا يوفقك ويكرمك
تقبل مرورى وتحياتى
ودمت بكل خير وود
والسلام عليكم ورحمة الله وبركاته

د/عرفه 5 فبراير 2009 7:08 ص  

اهلا بيك ابن الاخوان
يا ريت تبقى تشرفنا على طول


اهلا سلمى انا رديت عليكى فى المدونه بتاعتك


اهلا بيك معتصم
متاسف ان كان كلامنا قلب عليك المواجع
وربنا يسمع منك
ومنتظر زيارتك على طول

خديجة عبدالله 5 فبراير 2009 10:38 ص  

فى مثل هذة المناسبات أحتار فى القول فعلا :(
تصرفك طيب وينم عن حس راقى وفاهم زادك الله علما وفهما قليل جدا من يدركون الصواب فيعملونه

بإمكاننا استخدام أقفال من نوع جيد حتى لا يسهل العبور منها لكن الظاهر أغلبها اليومين دول مغشوشة :)
ربنا يكرمك بالخير لك ويرزقك سعادة الدنيا والآخرة
ويهنيك بزوجة صالحة تكون قرة عين لك وأنت قرة عين لها واستمرارا بقه ذرية صالحة إن شاء الله

عذرا للإطالة : سررت جدا بمرورى بمدونة حضرتك ربنا ينفع بها

zainab 5 فبراير 2009 2:44 م  

السلام عليكم و رحمة الله بركاته

أخى د / عرفه

أولا ربنا يكرمك يارب و يحميك

ثانيا عجبنى قوى ردك على اصدقائك و ذكرك لكلام سيدنا محمد صلى الله عليه وسلم((إِنَّكَ لَنْ تَدَعَ شَيْئًا للهِ إلاَّ أَبْدَلَكَ اللهُ بِهِ مَا هُوَ خَيْرٌ لَكَ مِنْهُ))

فى نوع تانى من الشباب لوكان مكانك كان قال أنا أكلمها و عادى و فى الأخر يسيبوا بعض


لكن انت جزاك الله خيرا فكرت صح

وفقك الله لما يحب و يرضى و ان شاء الله ربنا يرزقك الزوجه الصالحه

تحياتى

د/عرفه 6 فبراير 2009 6:50 ص  

اهلا بزيارتك خديجه وان شاء الله متكونش الاخيره



اهلا بزيارتك زينب
ويارب كلامى يعجبك دايما




ويارب فعلا اكون عند حسن ظنكم
بس تدعولى كده دايما

rania 6 فبراير 2009 11:57 ص  

السلام عليكم ربنا يوفقك ان شاء الله وتلاقى نصفك الاخر وده كل شىء مكتوب واللى ليك فيها نصيب ان شاء الله تتزوجها وتكونوا اسره مسلمه وربنا يوفقك

د/عرفه 7 فبراير 2009 7:30 ص  

اهلا بيكى رانيا فى زيارتك الاولى للمدونه
وربنا يسهل واقدر الاقى الانسانه دى فعلا بس فى الوقت المناسب
بس مش دلوقت يعنى

مهندس / على درويش 7 فبراير 2009 9:58 ص  

ما شاء الله دكتور شئ جميل واحساس علية ودقة في اختيار الكلمات

غير معرف 7 فبراير 2009 6:10 م  

السلام عليكم
ربنا يوفقك وتلاقى نصك التانى
وربنا مايجرح قلبك ولا تجرح حد
والله ولى التوفيق

dr smirk 7 فبراير 2009 8:54 م  

قدامك اربعة اختيارات يا د عرفه
لاما تسيبك من المواضيع دي
لاما تسيبك بردك من المواضيع
لاما تسيبك اكيد من نفس المواضيع دي
و لا
محمد منير

د/عرفه 8 فبراير 2009 8:09 ص  
أزال المؤلف هذا التعليق.
د/عرفه 8 فبراير 2009 8:11 ص  

اهلا بيك مهندس على ومبروك على مدونتك الجديده
وشكرا على الكلمات الرقيقه



اهلا بيك غير معرف ومرحبا بيك انت وكل الغير معرفين اللى انا مش عارفهم ربنا يستجيب منك وان شاء الله مكنش سبب فى جرح حد



اهلا بيكdr_smirk
ان فعلا سايبنى من الحاجات دى خالص
ومتخافش عليا بس انت ادعيلى وخلاص

Tamer Diab 8 فبراير 2009 1:39 م  

مين الي قالك انك مش بتعرف توصل أحساسك !؟
أنت وصلتلي كل أحساسك بجد وربنا غن شاء الله يبدلك خيرا منها وانت راجل محترم ولا نزكيك علي الله
وصراحه من أفضل المدونات الي دخلتها لحد من الناس
علي فكرة انا كنت في نفس موقفك ده في يوم من الايام وربنا يكرمني انا كمان زيك

د/عرفه 9 فبراير 2009 8:56 ص  

اهلا بيك تامر
وشكر للاطراء الجميل ده
من ذوقك بس
وربنا يكرمنا ان شاء الله
وييسر لكل انسان طالب عفه

ايوشة 28 مارس 2009 1:27 ص  

هو ده الكلام ياريت الناس كلها تفكر زيك بس انا عندى اعتراض صغير ان الحب بيجى فجاة ومحدش بيقدر يتحكم فيه اعتقد انه يجى فجاة ماشى لكن التحكم فيه سهل وانت عملت كده وقدرت تتحكم فى نفسك

همس 12 يناير 2010 5:37 م  

انا مش مع اللى بيقول ان الحب مش بادينا
احنا لو عاوزين نحب هنحب لو عاوزين نوقف الحب دا هنوقفه
ربنا يربط على قلبك الا ان تاتى شريكه عمرك بس وقتها اوعىتبخل عليها بالمشاعر والحنيه

د/عرفه 13 يناير 2010 12:00 ص  

همس
أشكرك كتير على متابعتك

أنا شايف بس
أن الواحد يقدر يتحكم فى تصرفاته وردود أفعاله
ولكن مشاعره ىدى صعبة شوية
لان الحب ملهوش مقاييس او معايير ثابتة


زى بالظبط لما يكون عندك اتنين اصحابك بس بتحبى واحدة اكتر من التانية
مش هتعرفى تغيرى مشاعرك ناحيتهم
بس هتقدرى تتعاملى مع الاتنين كويس جدا زى ما انتى عايزة



ومتتخيليش كتابة الموضوع ده بالذات كانت صعبة عليا كتير



بالنسبة لبخل المشاعر
بعتقد ان الحب والمشاعر بتتحس اهم واولى من انها تتقال بشكل مباشر
كم من كلمة حب فقدت قيمتها من خلال تصرف قائلها

غير معرف 15 يناير 2011 12:36 ص  

إن شاء الله خير (أسماء)

إرسال تعليق