my heart

طبعا كلكم لاحظتوا الصوره اللى انا حاططها فى ملف التعريف بتاعى لتعبر عن نفسى أكيد عندكم حق تسألوا عن السبب بصراحه القلب ده بيعبر عن 3 حاجات أول شىء وأهم شىء هو القلب اللى بيقول عنه الرسول صلى الله عليه وسلم
" إن في الجسد مضغة إذا صلحت صلح الجسد كله ، و إذا فسدت فسد الجسد كله ألا و هي القلب "

فانا بعتبر القلب أمير الجسد وملك الاعضاء فهو راعيها وقائدها وهو خط الدفاع الاول اذا انهار القلب انهارت خلفه باقى الجوارح وفعلا انا مهتم بطهاره القلب جدا علشان كده بحطه تحت الدش كل يوم مهو لما نسمع ربنا بيقول
{أُولِئك الّذِينَ لَمْ يُرِدِ اللهُ أنْ يُطَهِّرَ قُلُوبَهُمْ لَهُمْ في الدُّنيا خِزْيٌ وَلَهُمْ في الآخِرَةِ عَذابٌ عَظيْمٌ }
{فويل للقاسية قلوبهم من ذكر الله}
يعنى طهارته شرط صحته و انما سمى القلب من التقلب فالقلوب بين إصبعين من أصابعه يقلبها كيف يشاء ومن مات قلبه اولى بالعزاء ممن قد مات جسده فلا املك سوى الدعاء بما دعى به الرسول
{اللهم مصرِّف القلوب صرِّف قلوبنا على طاعتك}

تانى حاجه
بعبر بيه عن حبى للاشخاص المحيطين بيا وأخص بالذكر العيله بتاعتى طبعا
وبصراحه ماما هى احب انسان لقلبى فى الدنيا ونفسى اعرف اتجوز واحده زيها الحب ده
بخلاف وصيه ربنا سبحانه وتعالى لينا لما بيقول سبحانه
{وَوَصَّيْنَا الإِنسَانَ بِوَالِدَيْهِ حَمَلَتْهُ أُمُّهُ وَهْنًا عَلَى وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ}
وأكيد كلنا عارفين الموقف الشهيرعندما
جاء رجل الى رسول الله الى رسول الله وسأله من أحق الناس بحسن صحابتى قال أمك قال ثم من؟ قال أمك قال ثم من؟قال أمك قال ثم من؟قال أبوك.
ومش بس العيله بتاعتى لا طبعا أصحابى كمان وبصراحه احساس جميل جدا ان الواحد يحس ان جنبه أصحاب بيحبوه بجد
ويكونوا عون ليه على الطاعه وعمرنا ما اتجمعنا على معصيه مهو لما نسمع ربنا سبحانه وتعالى بيقول
{الأَخِلَّاْءُ يَوْمَئِذٍ بَعْضُهُمْ لِبَعْضٍ عَدُوٌّ إلا المُتَّقيْنَ }
ولما نسمع الرسول بيقول { لا تصاحب إلا مؤمنا ، ولا يأكل طعامك إلا تقي }
فيارب اجعلنا من المتقين الذين تحدثت عنهم واجمعنا دائما على الطاعه واصرف عنا وساوس الشيطان
الحاجه التالته والاخيره
هو أنه نفسى أكون دكتور cardio دكتور قلب يعنى
فادعولى أقدر اكمل واكون دكتور قلب نافع لدينى ولأمتى



24 رأيك يهمنا:

مذكرات مشاغب 6 فبراير، 2009 8:48 ص  

يا سيدي ياسيدي على المعاني
يعني حتى الصوره بتاعة البروفايل بتاعتك ليها اسبابها الكتيره
طيب واللهي كويس
انا عن نفسي مش حاطط الصوره بتاعتي لسبب معين
اللي كان قدامي ساعتها

طيب ايه رايك باه انا هدعيلك تطلع دكتور اطفال
انا حر باه
يعني هتزعل مني مثلا
انا عايزك تكون دكتور اطفال انت هتشاركني(وش بيغمز)
يارب يا عرفه ربنا ينولك اللي في نفسك والمعنى هنا يشمل الموضوع ده واللي قبله
اصلي مردتش عليه لاني للاسف كنت مسافر وبعدين كان عندي دور برد من النوع الجبااااااااار
بس الحمد لله دلوقتي
وكويس اني عوضتها باني اكون اول تعليق

تحياتي

غير معرف 6 فبراير، 2009 9:17 ص  

(مش بصراحة) انا فى شدة المفاجأة انك عارف أهمية القلب وانك بقلبك بتحب عيلتك واصحابك
اللى انا مش متفاجىء علشانه هو انك نفسك تبقى دكتور كارديو(يا عم دول ماليين البلد)
طبعا الكلام مقلوب
ويا رب تبقى يا سيدى



دكتور اوعية دموية (كارديو ايه بس )

غير معرف 6 فبراير، 2009 1:17 م  

انا قلت موضوع رومانسى تانى
بس طلع موضوع اجمل
حقيقى ان القلب هو الامير بس المشكله ان الامير له امانى واحلام وشهوات ومسئوليات وحاجات بيحبها ويتمناها وحاجات بيكرهها
مسئوليته صعبه اوى
اللهم يا مقلب القلوب ثبت قلوبنا على دينك
جميل جدا انك ليك صحاب كويسين وبتحهم ويحبوك
اتمسك بيهم اوى
لان فى زماننا ده الصحاب الصحاب بجد بقوا قليلين اوى

اخيرا ربنا يوفقك وتبقى اللى نفسك فيه
بس مش تنسى انك تجتهد دايما وتحاول توصل لحلمك مش تعتمد على الحلم وبس
لان ربنا سبحانه وتعالى قال فيما معناه لنهدين الذين جاهدوا فينا

شكرا

حسام غانم 6 فبراير، 2009 3:07 م  

كويس إن كل حاجة في حياتك يبقى ليها هدف ومعنى

وربنا ينولك اللي في بالك

وتطلع دكتور كارديو

أحمد سعيد بسيوني 6 فبراير، 2009 4:23 م  

طبعا أصحابى كمان وبصراحه احساس جميل جدا ان الواحد يحس ان جنبه أصحاب بيحبوه بجد ويكونوا عون ليه على الطاعه وعمرنا ما اتجمعنا على معصيه

يا رب نكون منهم

وينولك اللي في بالي و بالك

kalamfady 6 فبراير، 2009 10:57 م  

فيارب اجعلنا من المتقين الذين تحدثت عنهم واجمعنا دائما على الطاعه واصرف عنا وساوس الشيطان.................اللهم اّمين

يارب ياعم محمد تطلع دكتور cardio كبييييييييييييير
اللهم اجعلنا من الصالحين اّمين اّمين

salma mohamed 7 فبراير، 2009 1:23 ص  

السلام عليكم
اولا ربنا يطهر قلبك وقلوبنا كلنا من كل ما يطمس بريقها,علشان متبقاش من القلوب اللي بيتعمى من الران اللي عليها,
ثانيا ربنا يحفظلك عيلتك ومامتك,ويرزقك واحدة تكون زيها زي ما بتتمنى,
وربنا يديم عليك نعمة الصحبة الصالحة ويجمعكم في جنته,
ثالثا ربنا يحققك لك مناك وتكون دكتور قلب,صحيح هما مالين البلد وخصوصا المحلة,بس انا بحترم جدا التخصص ده وبحس انه فعلا هو اللي فيه ممارسة الطب بجد,ولان والدي هو احدهم.

د/عرفه 7 فبراير، 2009 8:33 ص  

اهلا بيك يا ابو حميد والف سلامه عليك من البرد
وحمد الله على السلامه

معنديش مانع يا سيدى اكون دكتور اطفال لو فى ده خير ليا



غير معرف رقم واحد
اللى هو مصطفى صاحبى
اهلا بيك يا مصطفى وايه اللخبطه اللى انت كاتبها دى
ومستنى مدونتك يا سيدى وربنا يرزقك من خيرها ويصرف عنك شرها

د/عرفه 7 فبراير، 2009 8:39 ص  

غير معرف التانى اللى انا مش عارفه
وياريت يسيب اى رمز ليه بعد كده علشان حتى اعرف اعلق بعديه
بس لو حابب يفضل كده مش مشكله واهلا بيه باى شكل
اظن كفايه رومانسيه اوى كده كفايه الموضوع اللى فات
مهو انا مش فاتح قلبى كوفى شوب
واهلابيك غير معرف على طول



اهلا بيك حسام والله انا بحاول فعلا ان كل حاجه فى حياتى يكون ليه هدف وغرض فعلا

د/عرفه 7 فبراير، 2009 8:51 ص  

اهلا بيبك احمد بسيونى يعنى لو مكنتش انت من اصحابى
امال هيكون مين يعنى؟؟؟؟؟؟؟؟




اهلا بيك محمد بتاع الكلام الفاضى و اللهم آآآمين

د/عرفه 7 فبراير، 2009 9:00 ص  

اهلا بيكى يا سلمى دايما
بس اظنك متحيزه شويه لدكتور القلب علشان خاطر والدك
متهيالى ان اى قسم برضه مش وحش
بس اللى اكيد ان دكتور قلوب بالمفهوم المعنوى اصعب كتير من دكتور قلب بالمفهوم العضوى




المهم ربنا يستجيب منكم جميعا لانكم دعتولى
بس اللى انا عايزه بجد انكم تدعولى بظهر الغيب
وجزاكم الله خيرا

فتافيت 7 فبراير، 2009 5:26 م  

اولا (فيارب اجعلنا من المتقين الذين تحدثت عنهم واجمعنا دائما على الطاعه واصرف عنا وساوس الشيطان)

اللهم امييييييييييييييين .. ويارب تحقق كل اللي نفسك فيه وتكون احسن من د. يعقوب في طب امراض القلب

تقبل مروري .. وان شاء الله هادخل هنا كتييير

سلام عليكم

غير معرف 7 فبراير، 2009 9:06 م  

انا عندي سؤال و نفسي اسمع الرد من القراء( قول استفتاء) مين نفسه تبقى شريكة حياته شبه الحاجه

موناليزا 7 فبراير، 2009 11:28 م  

اللهم يامقلب القلوب ثبت قلوبنا على دينك
ربنا يوفقك وتبقى اشطر دكتور قلب على مستوى العالم

المعتصم 8 فبراير، 2009 2:55 ص  

بسم الله الرحمن الرحيم
السلام عليكم ورحمة الله وبركاته
د/عرفة صديقى العزيز
تحياتى
بوست جمييييل جدا
فعلا القلب هو اهم عضو فى الجسم كله وسيبك من اللى يقولك العقل ومش عارف ايه
لان العقل من غير قلب بيبقى حاجه وحشه مالهاش لزوم وبتبقى الحياة بارده مافيهاش احساس ومالهاش طعم
ويابختك ياعم بالناس اللى بتحبهم ويابختهم بيك وربنا يخليكم لبعض ويديم بينكم المحبه فى الله ولله
وربنا يكرمك ويحققلك كل اللى بتتمناه يارب
(الا فوز الزمالك على الاهلى)
تقبل مرورى وتحياتى
ودمت بكل خير وود
والسلام عليكم ورحمة الله وبركاته

د/عرفه 8 فبراير، 2009 7:54 ص  

غير معرف اللى هو احمد
اهلا بيك
بالنسبه لسؤالك انا قولت رايى خلاص ممكن باقى القراء يشاركوا
واهلا بيك مره تانيه




اهلا بيكى موناليزا
وربنا يتقبل دعائك
وشكرا لزيارتك

د/عرفه 8 فبراير، 2009 7:57 ص  

اهلا بيكى صديقى المعتصم
فعلا الحياه من غير احساس ملهاش طعم
ده حتى العبادات بتاعتنا لازم تكون بالقلب كمان
شكرا لمرورك ودعائك
بس كفايه كده على الزمالك حرام عليك
يا عم سيبه يكسب شويه
ده كده ينزل درجه تانيه

sandy bel 8 فبراير، 2009 5:49 م  

جميل أوى كلامك يا دوك..
كنت كاتبة كلام جامد بس النت فصل..
مش هعرف اقوله تانى للأسف..
بس جميل و للأمام دايما...
و ربنا يخلي ماما..و يطول في عمرها..

wesoooooooooo 9 فبراير، 2009 9:48 ص  

بسم الله الرحمن الرحيم
بجد المره دى عشره على عشره
ويارب تبقى دكتور cardio قد الدنيا
وربنا يحققلك كل اللى بتتمناه بمافيه فوز الزمالك على الاهلى يااااااااااااارب

القلم السكندري 9 فبراير، 2009 7:00 م  

عجل اللهُ لك أمانيك

ووفقك لما يحب .. وما تحب


تحياتي يا دكترة

iBRAHiM sAllAm 10 فبراير، 2009 8:19 ص  

السلام عليكم ,
فعلا يا دوك ,
القلب ده حاجة مهمة جدا , رغم صغر حجمها ,
و فعلا هو سلطان الجوارح ,

ربنا يحقق لك اللي بتحلم بيه , و تبقى أحسن من مجدي يعقوب كمان :)

د/عرفه 10 فبراير، 2009 8:31 ص  

اهلا بيكى يا ساندى بس انا كنت عايز اشوف كل الكلام اللى اتشال
مليش دعوه
المهم ربنا يخليلنا ماما




اهلا بيكى وسام ويارب يسمع منك
خصوصا ان الزمالك تعبنا اوى

د/عرفه 10 فبراير، 2009 8:45 ص  

اهلا بيكى اخى المهندس الاسكندرانى
مرحب بزيارتك دائما وشرفت المدونه




اهلا بيك مهندس ابراهيم
فعلا القلب هو المسيطر والمتحكم
وربنا يستجيب
بس احسن من مجدى يعقوب صعبه شويه
بس اهم حاجه انى اكون نافع لبلدى ولامتى
شكرا لزيارتك ومنتظر مرورك على طول

Nour 9 أبريل، 2009 5:35 م  

السلام عليكم ورحمة الله وبــركاته ،،

يقول براين تراسى فى كتابة

( فلسفة تحقيق الأهداف )

" بالقلم والورقة يبدأ كل شىء"...

فمن الممتع ان نكون على علم بكل حروفنا قبل سطورنا ..

ربنا يوفقك..ويديم عليك نعمه ويشملك بكل الخير ..ويبارك لك فى اسرتك ..

دمت بخير..

Nour

إرسال تعليق