لا تكن مثل هؤلاء


دائما ما يقولون عن أن النظام المعمول به فى السياسه هو نظام المصلحه ونظام التلون على حسب الموقف
فهل اذا أتخذت مسار واحد ولون لا يتغير لا يصح أن تعمل فى السياسه؟؟؟؟
هناك بعض التصرفات التى تثير غيظ الواحد
فمثلا اذا لاحظ رؤساء تحرير الجرائد ال................. تجدهم يدافعون عن الحكومه أين كان قرارها
هذكر لكم موقف أيام الحكم على إبراهيم عيسى كتبوا عن أنه تجاوز الحدود ويستحق العقاب ومثل تلك الكتابات لا يصح أن تخرج من كاتب كبير
بعدها بيومين أصدر الرئيس عفو عن ابراهيم عيسى خرجوا يشيدون بحكمه الرئيس وعطفه ورحمته
يا جماعه انتوا رأيكم إيه بالظبط تريدوا سجنه أم العفو عنه؟؟؟؟
إجابه السؤال هو وفقا للمصلحه تكون الإجابه.....
الغريب أن تلك المواقف أصبحت غير مقصوره على الساسه فقط بل إمتدت إلى فئات كثيره من الشعب........
وهضرب لكم بعض الأمثله.......

مرتضى منصور ملأ الدنيا ضجيجا بأن حسن صقر إنسان نصاب وحرامى وأن فعل كذا وكذا ........
ثم تفاجأ بأنه بين عشيه وضحاها يخرج مرتضى ويقول
خلافى مع حسن صقر ده خلاف فى الرأى فقط
سبحان الله هناك أمور كثيره يمكن حدوثها فى تلك اليله
منذ شهر مضى كذلك

سمعت مدحت شلبى فى برنامجه التليفزيونى الأسبوعى
استغربت لهجومه الشديد على مسابقات 0900 ثم بعد ذلك وجدت أن الهجوم يزيد هو وضيوفه وأن تلك المسابقات تستنذف موارد الناس وأنها وسيله من وسائل النصب
قولت فى نفسى يمكن هذا هو رأيه فعلا؟؟؟
ولكن بعد بضعه أيام وجدت نفس القناة تعلن عن مسابقه للتعليق ووجدته يروج لها فى برنامجه خصوصا أنه رئيس لجنه التحكيم
قولت فى نفسى فعلا هناك أمور كثيره يمكن حدوثها
ولكن اذا سمعت القرآن وهو يتحدث عن مثل هؤلاء ستجد مدى عظمه القرآن
{ وإن يقولوا تسمع لقولهم }
لديهم براعه هائله فى الإقناع أسلوب معسول يقنعك بكلامه أين كان
ولكن الآيه القادمه تفضح المنافقين أيام الرسول
(وَمِنْهُمْ مَنْ يَلْمِزُكَ فِي الصَّدَقَاتِ فَإِنْ أُعْطُوا مِنْهَا رَضُوا وَإِنْ لَمْ يُعْطَوْا مِنْهَا إِذَا هُمْ يَسْخَطُونَ)
تأمل تلك الآيه ستجد أن هذا هو المبدأ الذى يتعامل به المنافقون دائما مبدأ المصلحه من أيام الرسول وحتى الآن

ولكن ما يثير غيظى حقا
هو أن تجد طالب زميلك بيتعامل بمثل هذا المنطق
فما هو السبب الذى يجعل بعض الطلبه تتعامل مع أمن الجامعه وتعطى لهم أسامى بعض الطلبه زملائهم؟؟؟؟؟
الإجابه حاجه من إثنتين
إما أنهم مثل أحمد ذكى فى فيلم البرىء_عذرا نسيت أنكم لا تشاهدون الأفلام_
فى أنه كان يعتبر هؤلاء هم أعداء الوطن وأظن أن هذا الإعتقاد يناسب عسكرى أمن مركزى مثلما كان أحمد ذكى فى فيلمه
ولا يناسب طالب جامعى
وإما أن هناك مصلحه ما يحصل عليها وهو أدرى منا بتلك المصلحه
فى النهايه أحب أن أذكر لكم ما قاله القرآن عن عقاب هؤلاء
{إِنَّ المُنَافِقِينَ فِي الدَّرْكِ الأَسْفَلِ مِنَ النَّارِ وَلَنْ تَجِدَ لَهُمْ نَصِيرًا * إِلَّا الَّذِينَ تَابُوا وَأَصْلَحُوا وَاعْتَصَمُوا بِاللهِ وَأَخْلَصُوا دِينَهُمْ للهِ فَأُولَئِكَ مَعَ المُؤْمِنِينَ وَسَوْفَ يُؤْتِ اللهُ المُؤْمِنِينَ أَجْرًا عَظِيمًا}
أخى الحبيب
إسأل نفسك سؤال واحد
ما هو تصرفك حقا إذا تعارضت مصلحتك مع ما أنت مقتنع به؟؟؟؟




42 رأيك يهمنا:

د/عرفه 26 فبراير، 2009 6:45 ص  

بحجز لنفسى أول تعليق برضه زى المره اللى فاتت
أول حاجه بعتذر عن الصوره انا عارف إن بعضكم رقيقى القلب ممكن الصوره تضايقه شويه
تانى حاجه متنسوش المدونه التانيه لو أى حد منكم عايز يدرج مدونته ضمن القائمه عندنا
http://advsarab.blogspot.com/
تالت حاجه
انا حاولت الموضوع ده احافظ شويه على اللغه
فعايز اعرف رايكم كده احسن ولا العاميه اللى قبل كده احسن
ولا انتوا لم تلاحظوا اى شىء من الاساس

wesoooooooooo 26 فبراير، 2009 8:45 ص  

السلام عليكم
بس على فكره فعلا معظم الناس دول بيبقى عندهم أقتناع تام انهم اللى صح والباقى غلط جدا
ودول بقى مش لازم نهاجمهم لا زم نقنعهم الاول
اما التانين بتوع المصلحه دول برضه مالهمش ذنب لانهم مقتنعين ان البلد كلها ماشيه بالمصلحه
وبعدين أساسا المشكله مش فى دول المشكله فى النظام
وحلوه الإسلوب الجديد بتاع المره دى

salma mohamed 26 فبراير، 2009 12:02 م  

الناس دول موجودين حوالينا في كل مكان,حتى الزملاء مع بعض,تلاقي لو واحد محتاج من واحد زميله حاجه يبقى صاحبه وحبيبه ويعد ينفخ فيه,
انما بقى لو معرفش ياخد منه اللي عاوزه يتقلب عليه وتلاقيه عمال يشتم ويتكلم عليه.
اما بقى عصافير الجامعة فدول انا مش بعتبرهم من الاساس بني آدمين لانهم باعوا اغلى حاجة عندهم اللي هي الضمير والوازع الاخلاقي للكائنات الامنية المتوحشة.
واجابة سؤالك فهي اني مش ممكن اضر حد علشان مصلحتي,
لكن احيانا اخطئ في حق نفسي فافعل ما اضرها وانا مقتنعه تماما بضرر ده عليا,زي اي ذنب باعمله,ربنا يغفرلي ويرحمني.

salma mohamed 26 فبراير، 2009 12:05 م  

اه نسيت اقول:
بالنسبة للاسلوب الفصحى فهو اكيد رائع,
لكن من الجميل التنوع في الاسلوب حسب الموضوع,وده اللي انا بعمله,
يعني الفصحى هنا موفقه وخصوصا انها بسيطة.

ايوشة 26 فبراير، 2009 2:22 م  

الحمد لله اتعلمت حاجة من خلال سنين عمرى ودى حاجة اهلى كانوا بيغرسوها فيا من زمان انى ااقول الحق ولو على رقبتى عمر الانسان ما يكون انسان لما يتلون زى الحرباء علشان يحقق مصالحه واهدافه طيب الحرباء بتتلون علشان تتخفى من اعداءها يعنى بتحمى نفسها
انما دول بيضروا غيرهم

ايوشة 26 فبراير، 2009 2:24 م  

بما انى مدرسة لغة عربية لا تفقه شئ فى اللغة العربية هههههههه ومع ايقاف التنفيذ بجد الاسلوب ممتاز جدا وبسيط وانا بحب الكتابات اللى بلغة العربية وخصوصا لو كانت بسيطة وبتوصل بسهولة للقارئ

iBRAHiM sAllAm 26 فبراير، 2009 5:43 م  

أيوة أنا نفسي أعرف ولاد الـ(تييييت) العصافير بتوع الكلية دول بيعملوا كده ليه ؟؟

ما هم مش أغبياء زي ما قلت و ما مخدوعين ,

الواحد لما يقعد يحاول يدخل جوة دماغ العيال دي ما يطلعش غير بكلمة واحدة ,

دول عالم ( ناقصة ) !!

تحيتي :)
و معلش على الانفعال , أصل أنا اتبلغ عني أمن الكلية و المدينة الجامعية و ناقص أمن الدولة :(

د/عرفه 26 فبراير، 2009 8:39 م  

أهلا وسام وشكرا لاهتمامك
متهيالى يا وسام أن الناس دى بتحاول تقنع نفسها إنها صح وهما من قراره نفسهم عارفين إنهم غلط
وبعدين المجموعه التانيه
اللى بتمشى زى الناس أظن إن ده مش مبرر برضه
يعنى لو كل الناس ماشيه غلط نمشى زيهم غلط
شكرا لمرورك على المدونه

د/عرفه 26 فبراير، 2009 8:42 م  

أهلا سلمى وبسعد بإهتمامك على طول
فعلا زى ما إنتى قولتى أن الأسلوب ده بقى منتشر بين الناس أوى
بالنسبه لعصافير الجامعه ربنا يهديهم ويهدينا
وكويس إن الاسلوب المره دى عجبك ويارب دايما
ومنتظر رأيك على طول

د/عرفه 26 فبراير، 2009 8:45 م  

أهلا أيوشه ومرحب بيكى
وانا حطيت المدونه بتاعتك ضمن القائمه بتاعتنا فى المدونه التانيه
ومفيش أحلى من كلمه الحق طبعارغم إنها احيانا بتكون مره واحيانا بتتعارض مع مصالحنا
ومرحب بالاستاذه أيوشه
ههههههههه
وعلى فكره والدتى مدرسه لغه عربيه برضه

د/عرفه 26 فبراير، 2009 8:48 م  

أهلا بالباش مهندس ابراهيم _صاحب الدماغ العاليه_ هههههههههههه
وبعدين أنت عرفت إزاى إنه اتبلغ عنك
أصل أنا نفسى أعرف اسمى موجود عندهم هو أكيد موجود
بس بيقولك كل اسم بيتبلغ عنه بيكون بلون على حسب تأثيره
فكان نفسى اعرف انا بأى لون
هههههههههههه

مهندس / على درويش 26 فبراير، 2009 10:46 م  

موضوع رائع يا دكتور

ولكن قليل من يستطيع الأجابه لأننا لا نعلم كيف سيكون حالنا وقت أتخاذ ذالك القرار

فأنت تعلم أن القلب سمي قلب من كثره التقلب

فنحن لا نعلم كيف سيكون حالنا وقتها حتي نجيب ؟؟؟


فنحن لا نملك إلا الدعاء

اللهم أرزقنا حسن الأختيار والثبات

خديجة عبدالله 26 فبراير، 2009 11:14 م  

هههههههههههه فكرتنا بالذى مضى :)
عن السياسة المشكلة إن البعض يفهم أن النفاق هو المرونة وشتان بينهما
بالنسبة بقه للعصافير دول قصة كبيرة عارف أنا كان عميد كليتى عصفور قديم ههههههه والله
بالنسبة للألوان لا تقلق كله فى الاعتقال واحد :)
المهم بس متحاولش تتأكد بنفسك :)

سألت نفسى السؤال الأخير طبعا لا ..المبادىء لا تتجزأ
لكن نسأل الله الثبات على الحق وألا يوردنا فتنة

طرح متميز كالعادة ماشاء الله بارك لك وفيك ودمت بأمان الله

جارة القمر 26 فبراير، 2009 11:19 م  

قلمك جرئ جدا لديك روح عالية احييك على شجاعتك..
العصافير حوالينا بكل مكان ولكنها بالأصل حيوانات مفترسة تنهش لحم اخوانها وأولاد بلدها
بالنسبة لسؤالك أنا غير مقتنعة بالجملة القائلة الغاية تبرر الوسيلة فحينا تتعارض مصلحتي مع مبادئي ساعتها سحقا للمصلحة ..
رائعة مدونتك بصدق وأسلوبك جميل بالحالتين
شكرا تقبل مروري

المعتصم 27 فبراير، 2009 2:19 ص  

بسم الله الرحمن الرحيم
السلام عليكم ورحمة الله وبركاته
ازيك يابشمهندز عرفه
تحياتى
ايه ياراجل اللى انت كاتبه ده
طب مااحنا لو قعدنا نتكلم عن الموضوع ده مش هنخلص ياعرفه
الناس الزباله دى تلاقيهم فى كل حته وفى كل مكان
والمصيبه انهم مش بس بيكونو مقتنعين انهم صح لأ دول كمان بيحاولو انهم يقنعو اللى حواليهم بأن ده هو الاسلوب الصح
اسلوب المصلحه والانتفاع حتى ولو على حساب المبادئ والقيم والاخلاق
ربنا عنده العفو
اما اجابة السؤال بقى :
انا مش هجاوب عليه بس هقولك حاجه
انا فى بعض الاحيان لما بيكون فيه شغلانه كده وممكن يطلع من وراها مصلحه كويسه بس انا بينى وبين نفسى بكون حاسس انها مريبه او مش مظبوطه بروح اقعد مع ابويا واقوله الله يسامحك ربيتنا زياده عن اللزوم
تقبل مرورى وتحياتى يادكترة
ودمت بكل ود وخير
والسلام عليكم ورحمة الله وبركاته

iBRAHiM sAllAm 27 فبراير، 2009 6:49 ص  

شوف ياسيدي ,
في المدينة , شايف " الغبي " بيحفظه و بيكتبه قبل حتى ما أعدي !!

و في الكلية واحد زميلي شافه لي بالصدفة لما كان بيخلص ورق من الحرس قالي كانوا بيشوفوا اسمه في كشوفات معينة و لمح اسمي فيها , أصلي أبجديا في الأول ,

الجدير بالذكر إني زي حالاتك مش عارف أنا لوني إيه ؟؟
حتى مش عارف أنا متاخد إخوان و لا سلفيين ... و لا إيه بالظبط ,
بس أديني خلصت الكلية و المدينة على خير و " نفدت بجلدي " :)

د/عرفه 27 فبراير، 2009 8:05 ص  

أهلا بيك مهندس على
فعلا لو كل واحد سال نفسه بصدق
بتكون الاجابه صعبه
فنسال الله تثبيت قلوبنا على الحق
ونساله الاخلاص فى القول والعمل
وبسعد بتعليقك معانا دايما




أهلا بيكى خديجه
أولا انا سعيد باهتمامك بمواضيعى
وفعلا عمر المرونه مهتكون زى النفاق
المبادىء لا تتجزأ

د/عرفه 27 فبراير، 2009 8:08 ص  

جاره القمر مرحب بيكى فى زيارتك الأولى
وشكرا على الإطراء
بالنسبه لجمله الغايه تبرر الوسيله
فلابد ان تكون الوسيله صالحه للوصول للغايه
فلا يصح استعمال وسائل فاسده حتى لو كانت الغايه صالحه




اهلاا بيك مهندس ابراهيم مره تانيه معانا
المشكله انى عارف بعضهم
والمشكله الاكبر ان كتير منهم زمايلى وعارفنى كويس
يعنى مش هيحتاجوا يحفظوا ولا حتى يسجلوا

د.آيه 27 فبراير، 2009 1:03 م  

بسم الله الرحمن الرحيم
أنا ببساطة رأيي زى رأى المعتصم .. اللي بيقول ان الناس دول كتيييير أوى حوالينا.. و شايفة إن الموضوع ده بيرجع للتربية و الأخلاق ..و التمسك بالدين ..
هو ده الأساس اللي ممكن يخلي الناس دول يعملوا كده.. لإن معندهمش مبادئ من الأساس..
أما بالنسبة للأسلوب .. فبصراحة أنا محستش بأي فرق ..
بس شكل الأسلوبين حلويين ..
تحياتى

د/عرفه 27 فبراير، 2009 1:13 م  

أهلا بيك أخى المعتصم
بسعد دايما بالتواصل معاك
وهارد لك على ماتش انبارح
وخيرها فى غيرها



أما بالنسبه لسؤالك
انت وآيه عن انهم كتير ونتجاهلهم
لما القرآن ذكرهم حب بس يفضحهم قدام نفسم
انا بحاول اعمل نفس الشىء
وبكتب بأسلوب اللى على راسه بطحه بيحسس عليها




شكرا آيه على متابعتك معانا
وشكرا على إطرائك على الأسلوب
وانا ردييت على السؤال بتاعك

fnoonh 27 فبراير، 2009 1:24 م  

دكتور عرفه
والله موضوعك مهم جدا ماتتخيلش قد ايه بتغاظ من الحكاية دي
دا انا على حد العيشة الانا قاعدة فيها بشوف بنات في المدرسة كده
يعني من ورا الابلة تلاقيها بتكرهها وتتكلم عليها كلام مش كويس ابدا
ولما تيجي الابله مش تقعد كده وخلاص لا دا بلاقي كلام المدح والثناء والحب مع الابله بطريقة تمخول الدماغ
يلا ربنا يعافينا من النفاق
تقبل تحياتي ودمت بخير

د. ياسر عمر عبد الفتاح 27 فبراير، 2009 3:14 م  

أنا دايماً أقول


*الخلاف فى الرأى قد يفسد للود قضية
خاصة لو طال المسائل العقائدية المسلم بها
أما الخلاف فى الود فهو الذى لا يجب أن يفسد للرأى قضية.

أما أمثال من تتحدث عنهم .. قكثير جداً
كثر من أن يحصوا
لكن لو مصمم تحصى .. فاحصى أصحاب الرأى السليم
اللى مبيتفيرش مع تغير الأهواء والمصالح
اللى رأيه جاى من قلبه وعقيدته ودماغه
مش من بطنه وكرشه وجيبه

دمت بود يا أخى

ghorBty 27 فبراير، 2009 10:09 م  

د/عرفه

موضوع هائل كالعاده

لو كل واحد عمل الي مفروض يعمله ومقنع به ما كنش دا هو الحال

بجد تحس ان الناس جالهم انفصام والا عايشين 100 وش متعرفيش فين وشه الحقيقي وهيبان امتي

بس كل مستور هيبان بس في وقت مش هينفع فيه الندم

ونسال الله السلامه

دائما ما اشيد علي العلماء الربانين انهم لا يخافون لومة لائم ويقولوا الحق ولا يكتمونه حتي لو علي رقابهم وهكذا نريد الكل

ولنا في الامام احمد بن حنبل قدوه نراه في مسأله خلق القرءان قد صمد بالرغم من التعذيب والضرب بالسياط والحبس والملاحقة والإغراء في سيبل قول الحق وما هو مقتنع به وما سوف يسأل عليه امام الله

فيجب علينا ان نعمل ما يحتمه علينا ضميرنا وما سوف نحاسب عليه حتي لو كنا ضد التيار

وهكذا دائما اهل الحق قله ولكن سيبقوا علي الحق ظاهرين

ربنا يهدي الجميع وينتهي النفاق اللي مش من طبع ولا اخلاق المسلمين

بوركتم

غربتي

موناليزا 27 فبراير، 2009 11:28 م  

سؤال وجيه جدا
ولان يلحق دائما باسمى قيم ومبادئ فمتهيألى الاجابة هتكون واضحة:)
اما عن الموضوع نفسه وانتشار هذه الفئات بكثرة فلا اجد سوى الدعاء لهم بالهداية والرشاد

نور الاسلام 28 فبراير، 2009 1:57 ص  

المنافقين دول للأسف موجودين على مر العصور

...وامثلتهم فى التاريخ كتير...والمشكله انى الناس ما

بقتش عارفه تميز بين المجامله والنفاق...

وضياع الاخلاق والقيم والمبادىء...أدى الى تفشى هذه

الصفه المقيته...

وبالنسبه لسؤلك الاخير. اولا المبادىء لما تكون عن

عقيده..تستطيع أن تضحى بأى شىء من أجلها...

وجزاكم الله خيرا..

محمد عبد الباسط 28 فبراير، 2009 4:41 م  

ما هو تصرفك حقا إذا تعارضت مصلحتك مع ما أنت مقتنع به؟؟؟؟
سؤال صعب بس لازم يكون دايما فى الاذهان وعلى فكره السؤال اجابتة نسبية وليست له اجابة قطعية عشان نكون صادقين مع انفسنا
او معنى اصح كل شئ يقدر بقدره

اللهم ارنا الحق حقا وارزقنا اتباعه وارنا الباطل باطلا وارزقنا اجتنابه
رائع موضوعكم اخى الكريم
تقبل تحياتي

حلم كبير

ألحان 28 فبراير، 2009 8:08 م  

اللهم أصل ولاة أمورنا للخير


اللهم آمين

فتافيت 28 فبراير، 2009 8:40 م  

كلام المعتصم انا متقفه معاه 100%

بجد بوست هااااايلة يا دكترة

ربنا يستر عليما من اي عصافير في الدنيا

كتر جدا في كل حته

مذكرات مشاغب 28 فبراير، 2009 9:06 م  

عجبني جدا جدا رد عبد الباسط
حسيت فيه بعمق شديد في التفكير
واحب اضيف عليه شوية حاجات كده
طبعا لا اختلاف اطلاقا ان معاك حق جدا
لو الريس قال يمين الصحف الحكوميه هتقول يمين
وحتى لو قال شمين برضه هيقوله شمين

بس ياترى الموضوع ده يقتصر على الحكومه بس
يعني المعارضه برضه مبتفكرش كده
وهضرب مثل بالاخوان المسلمين
لو لاحظت هتلاقي بينهم اتفاق رهيب في الاراء والافكار
اذا كان لو انا وواحد صاحبي ومتفقين في الكثير من الافكار لازم هنختلف في شوية افكار
مابالك بملايين من الناس في مصر وخارجها جميعهم مقتنعين بنفس التفاصيل الدقيقه التي تجمع بينهم
طبعا فيه بينهم نقاش وجدال واختلاف
لكن رايهم دايما في الخارج هو الاتفاق الكامل على جميع الاراء
ومفيش عقل يتقبل حقيقه زي كده

وعندك مثل تاني
انت اكيد طبعا بتشوف او شفت او سمعت عن برنامج هيكل على قناة الجزيره
تعرف ان الاستاذ هيكل ليه دراويشه او مؤيديه بشكل مطلق
يعني لو جادلت اي حد فيهم في اي حاجه هتلاقيه بينقلك نصا ما يقوله هيكل
على الرغم ان مفيش مصلحه مشتركه
وعلى رغم ان هيكل مش شخص كامل وما يخرج منه حكم لا تخطئ
على فكره انا من المحبين جدا لهيكل وكلامه
واستفيد استفاده كبيره جدا منه
لكن مش لدرجة عدم الاختلاف معاه في بعض النقاط


وعنك مثل تاني بجرايد المعارضه
هتلاقيها كلها تقطيع في الحكومه وذكر مساوئها
وكان الحكومه دي شيطان مبتعملش اي حاجه خالص صح
كلنا طبعا شايفين فساد رهيب وكل حاجه محدش يقدر ينكر ده
لكن اكيد برضه عملو اكيد حاجات كويسه
تلاقي جرايد المعارضه عمرها ما اتكلمت عن اي حاجه كويسه عملتها الحكومه بشكل كويس

وتلاقي الجريده اللي بتعبر عن فكر معارض معين مؤيده ليه برضه عى طول الخط
زي ما بتعمل جرايد الحكومه بالظبط

اللي انا عايز اقوله من الكلام ده كله
انه فعلا معاك كل الحق الحكومه بتعمل كده وده غلط
بس بتهيالي كل التكتلات في عالمنا العربي بتتصرف بنفس الطريقه

تحياتي

مذكرات مشاغب 28 فبراير، 2009 9:15 م  

معلش يا محمد هضيف كمان حاجه
المشكله دي مش مشكلة تكتلات بس
دي كمان مشكلة افراد
ولو لاحظت هتلاقي كل واحد فينا مقتنع عن رايه بشكل رهيب
ومش على استعداد انه يغيره
والدليل انك لو سالت نفسك في لحظة صدق
امتى انا غيرت رايي في قضيه بعد نقاش مع حد اقنعني
في راي
مش اعتذار لحد عن خطا انت ارتكبته مثلا
هتلاقي ان ده محصلش كتير ويمكن محصلش خالص

اللي عايز اقوله ان الديكتاتوريه في الراي دي مش على مستوى المجموعات بس على مستوى الاشخاص

معلش خرجت من الموضوع
وان كنت حاسس اني كنت فيه

اعتذر على الاطاله

تحياتي

د/عرفه 1 مارس، 2009 4:31 م  

بسم الله الرحمن الرحيم
أولا بعتذر كتير أوى على التأخير فى الرد
بس ده بسبب النت مش بمزاجى

فحاول أرد باختصار كده

مرحب بيكى أفنان معاكى حق انها كتير بين الطلبه حتى
شكرا لاهتمامك وزيارتك لينا



د/ياسر أهلا بزيارتك الأولى
أسعدتنا بزيارتك
وأكيد الواحد لازم يكون حكمه الاشياء من منطلق عقيدته وقلبه ودماغه مش كرشه ومصلحته
ومنتظرين زيارتك دايما




أهلا بيكى غربتى
ذكرتى نقطه حلوه بجد
وهما العلماء بتوعنا وفعلا احنا عاقدين عليهم الأمل
وبتكون الكارثه أعظم لما بيكون فيهم شخص من بتوع مصلحته وبس
تحياتى ليكى




أهلا بيكى موناليزا
شكرا لزيارتك
وربنا يهدينا ويهديهم

د/عرفه 1 مارس، 2009 4:41 م  

نور الإسلام
أهلا بيك معانا فى زيارتك الأولى
وشرفتنا بجد
وهنا السؤال ايه هو الفرق بين النفاق والمجامله؟؟
بس علشان نقول إن شخص منافق
لازم يكون بيضمر الشر فى داخله ويظهر لك خلاف ما يقره فى داخله من شر




محمد عبد الباسط يا مرحبا يا دكتور
الاجابه ممكن تكون نسبيه لو كان الحاجه اللى انت هتعملها لصالح مصلحتك مفيهاش حاجه حرام يعنى مش هتغضب ربنا
اما لو هتغلب مصلحتك على حاجه حرام اظن هنا مينفعش تكون الاجابه نسبيه





ألحان تشرفنا بزيارتك الاولى
وربنا يستجيب لدعائك
آآآمين

د/عرفه 1 مارس، 2009 5:07 م  

فتافيت يا مرحبا بيكى
نورتينا
واذا كان رايك زى المعتصم
فان شاء الله ردى هيكون زى الرد عليه
وتحياتى ليكى








اهلا باحمد المشاغب
ازيك دكتره
تعبتنى يا احمد كل ده رد وبعدين انا ردييت كتير وبعين اتمسح يلا خير
بص يا احمد
اولا مين قال ان فى شخص او جماعه كامله
كل حد عنده أخطاء
بس الكويس انك تحاول انه تكون اخطائك اقل ما يمكن وفى اضيق الحدود وتكون فى الفروع مش الاصول
وبعدين مين قال ان الاخوان مش بيختلفوا لا طبعا بيختلفوا بس يمكن مش واضح اكمنه بيكون فى الفروع
والاختلاف مش عيب ده شىء منطقى

وبعدين كون ان فى شخص مقتنع بكلام واحد معين مش مشكله
ومش دول اللى انا بتكلم عليهم انا بتكلم عن الناس اللى بتشوف الحقيقه والصح قدامهم وتعمل نفسها مش شايفاه علشان فى مصلحه ليهم من كده بس
يعنى مثلا لو العصافير اللى انا بتكلم عليهم مقتنعين ان اللى يعملوه ده صح_وان كنت اشك فى كده_
يبقى مش دول اللى انا بتكلم عليهم دول حاجه تانيه


وبعدين بالنسبه لكلامك ان الواحد يغيير رايه
اصحابى بيقولوا عليا انى مش بغير رايى بسهوله
يمكن انا فعلا بغيير رايى بصعوبه
بس لو شوفت الحقيقه واضحه هغير رايى طبعا
ومن الغباء انى اشوف الحقيقه واستمر فى خطأى
ده سيدنا عمر لما اصدر قرار وراجعته فى امرأه واكتشف إنه كان غلط
رجع فى كلامه
وقال اخطأ عمر وأصابت إمراه

بحـــر الدموع 1 مارس، 2009 11:51 م  

السلام عليكم

أخي د\عرفة
ستجد الكثير من المنافقين يعيشون بيننا وهم متغيروا الألوان متقلبوا المصالح تارة معك وتارة عليك
لا تأبه بهم فهم صغار العقول ..
وبالنسبة لسؤالك إذا وقفت فسأقف مع الحق ولو كان على حسابي ...

بارك الله فيك وجزاك ربي خير الجزاء


لا تنسوا اخوانكم في غــزة من دعائكم

||..بحــر الدموع..||

الحقيقه المصريه 2 مارس، 2009 4:53 ص  

بشرى ساره جدا لجميع المدونين المتضامنين مع الحقيقه المصريه في كفاحها ضد شركه او مصنع تراست للكيماويات مصنع الموت ببورسعيد اليوم الاثنين 2 مارس 2009
طلب احاطه علجل بمجلس الشعب مقدم من عضو مجلس الشعب الدكتور اكرم الشاعر ضد الشركه وسنحضر هذه الجلسه ان شاء الله وسنعرض تفصيلها لاحقا بمشيئه الله على مدونتنا الحقيقه المصريه تحياتي تامر مبروك لكل شريف ومحترم وقف معنا في هذه القضيه سواء كان بمصر او خارجها وهذه هي اولى الخطوات للتصدي لهذه الشركه التي تريد تدمير بورسعيد الباسله على حساب مكاسبها وارباحها التي تقدر بالمليارات لزيارتنا نرجو زياره مدونه الحقيقه المصريه
http://elhakika.blogspot.com/

نبض الحياة 2 مارس، 2009 11:57 ص  

للأسف هو دة بقى حال اكثرنا ومش هقول كلنا علشان مبقاش بنظر للأمور بنظرة بائسة بس اللى كتبته بقى هو دة الحقيقة ولو حتى مفيش مصلحة من ورا اللى بيعملوه بس تحس انهم غاويين اذية الناس او مبقوش بيحبوا الخير لبعض .ربنا يرحمنا ويعافينا .
تقبل مرورى
تحياتى.

dina 2 مارس، 2009 6:51 م  

سلام عليكم

معلش على التاخير بس هتعرف السبب من عندى هناك

بالنسبه للرد معلش المواضيع السياسيه شويه تقيله على قلبى ولسانى واحب احتفظ براى الرفيع لنفسى

وعاده ببقى مش فاهمه اوى :)
شكرا

د/عرفه 2 مارس، 2009 11:08 م  

بحر الدموع أهلا بزيارتك الأولى
ومرحب بيك
ويارب تتواصل معانا على طول
ومعاك حق فى كلامك طبعا



الحقيقه المصريه
مرحب بيك معانا
بس انا عامل المدونه التانيه بتاعتى اساسا
لاى حاجه شبه كده
وانا كنت متابع الموضوع على المدونه التانيه بتاعتى
ياريت تمدنا بآخر الأخبار
وان شاء الله هننشرها كمان
منتظرينك على المدونه التانيه
واهلا بيك فى اى مكان

د/عرفه 2 مارس، 2009 11:12 م  

نبض الحياه
أسعدنا التواصل معاكى
وأكيد كلامك صح
ربنا يهدينا ويهديهم




دكتوره دينا
ولا يهمك التاخير
مش مشكله
منتظرين تعليقاتك فى اى وقت
وبعدين مش كلامى كله سياسه وبعدين دى امور بنلاقيها فى حياتنا اليوميه مش سياسه وبس
دى موجوده كل يوم فى حياتنا
وشكرا لمرورك

غير معرف 5 مارس، 2009 1:32 ص  

القصه ومافيها اننا ببساطه شديده بنلعب على كل الحبال, كله بيلعب على كله , ومحدش عنده شجاعه انه يتمسك بكلامه , وده من الخوف من الخساره, كله بيخاف يخسر اى حاجه حتى لو كانت ولا حاجه,وقت منبقى نعرف احنا عايزين ايه هنوصل , واتقوا شرف الامعات
لاننا كلنا امعات محدش عنده شجاعه يقول راى حاسم كله بيسيب الباب متوارب يقولك عشان الظروف وتانى يقوللك ياعم متبقاش ناشف وقفل لاننا فهمنا انا اصحاب الرأى الحازم اقفال وان اللى مبيتنازلوش عن الصح فى سبيل المصلحه مبيفهموش , لما نقرب اوى من بعد واما بجد نخاف على بعض يمكن وخد بالك من يمكن دى نعلى حقيقى ونصبح اقوى شعوب الارض

د/عرفه 5 مارس، 2009 2:04 م  

غير معرف اهلا بيك
يا ريت تبقى تعرفنى انت مين
المهم رايك جميل فعلا
بس اللى انا عايز أكد عليه
انا الواحد لازم يكون صارم جدا فى اوامر ربنا سبحانه وتعالى ودى مفيهاش كلام
اما بالنسبه للاراء الشخصيه والاجتهادات
فدى لازم الواحد يكون مرن فيها
وجزاكم الله خيرا واسعدنا تعليقك كتير

جارة القمر 20 مارس، 2009 7:52 م  

كلمات رائعة فلقد ناقشت قضية حساسة دارجة في كل مجتمعاتنا..
كثيرون حولنا يتلونون حسب الظروف والمصالح ..أبدعت
شكرا

إرسال تعليق