شريف وأمثاله

إبن عمى كان بيدور على شقة إيجار (عش الزوجية)وفعلا لقينا شقة مناسبة جدا فى الشارع عندنا وإتفقنا مع صاحب الشقة وكل شىء تمام وإتفقنا على إنه يدفع 350 فى الشهر ومقدم 1000

وقولنا خلاص نكتب العقد إن شاء الله بكرة

وفى الميعاد المتفق عليه تغير كل شىء ولقينا صاحب الشقة بيقولنا إنه فى ظروف خاصة عائلية وإنه مش هيأجر الشقة خلاص

قولنا مش مشكلة خير وبعدها بإسبوع نكتشف إنه إتفق مع مستأجر تانى بمبلغ أكبر ب 400جنيه فى الشهر ومقدم1500


أحد أقاربنا برضه كان بيدور على عروسة وفعلا وجد مبتغاه وبالفعل تمت قراءة الفاتحة والخطبة وكل شىء كان تمام وكانت العائلتين متفقتين تماما على كل شىء وبعد فترة وجدنا أسلوب التعامل إختلف وفى حاجات إتغيرت وبعدها على طول تم فسخ الخطبة لنكتشف بعد ذلك إنه كان فيه مهندس حالته المادية متيسرة وظروفه أفضل من قريبى هذا إتقدم لها و لو سألتها أكيد هتقول أنا أصلا مكنتش مستريحة مع خطيبى الأولانى وكان دمه تقيل ولبسه كان بلدى أوى وطريقته فى الكلام مش شيك وكمان بخيل ومش رومانسى خالص وكده كده كنت هسيبه من غير حاجة

كل دى طبعا محاولات للتبرير لإراحة الضمير وإبعاد أى إتهامات عنها


مسرحية بتحصل كل سنة ومش موجودة فى أى حتة فى العالم ألا عندنا

الزمالك يتفق مع لاعب معين والاعب بيكون موافق وناديه بيكون موافق وكل شىء تمام وباقى شىء واحد وهو كتابة العقد وفى لحظة يأتى الإتصال إياه من الباش مهندس الشيخ عدلى القيعى لتغير كل شىء فى دقائق بعد إغراء الاعب بمبالغ أكبر من تلك إتفق عليها ويتم خطف الاعب فى العربيات إياها ويقعد مع رجل المبادىءوالأخلاق الخطيب ويكتبوا العقد ويضربوا بكل ما إتفق عليه بعرض الحائط

وبعد كده يطلع الاعب علينا ويقول أنا طول عمرى أهلاوى وكان نفسى ألعب فيه من قبل ما أتعلم المشى وده شرف ليا إنى أتواجد فى نادى القيم والمبادىء واللى بيظبط أى لعيب بيلعب فيه

وبعد ما يقول الكلام ده ضميره يستريح ويحس إنه تمام وللأسف الكلام ده بيحصل كل سنة مع لعيب أو إتنين وأخرها طبعا شريف عبد الفضيل واللى سمعت أخوه أكد أكتر من مرة إن الاعب رغبته إنه يروح الزمالك ودى أمنيته وكلام من النوع ده والدليل إنه مضى على إستمارات رغبة إنضمام للزمالك وعلى عقود مبدئية وبعد كده تبدأ المسرحية فى العرض وتنتهى بإن الاعب طول عمره أهلاوى من أول لعبه فى ناشئين الإسماعيلى


بعد ما ذكرت الأمثلة السابقة أكيد هلاقى معترضين هيقولوا وفيها إيه مهو كل واحد لازم يشوف مصلحته مع اللى يدفع أكتر والدنيا ماشية كده الأيام دى

الماديات أهم شىءوإجعل شعارك فى الدنيا مصلحتك ثم مصلحتك ثم مصلحتك

أنا والله ما يفرق معايا شريف ولا غيره أنا بس بتكلم عن مبدأ معين وخلاص

الرسول عليه الصلاة والسلام كان واضح جدا فى الموضوع ده لما بيقول : (لا يخطب الرجل على خطبة أخيه) ]. أورد أبو داود ثم قال: (ولا يبع على بيع أخيه)




كلمة أخيرة

أنا مكنتش ناوى أكتب دلوقتى خالص وقولت هستنى لغاية لما النت يوصل وأكتب من البيت أحسن كتير

وبعدين لقيت الموضوع إتعطل وهيتأخر شوية كمان و الموضوع الأخير ده إستفزنى كتير ولقيت المدونة وحشتنى أوى وشكلها صعب عليا وهي من غير جديد كده من زمان

حابب أشكر كل الناس اللى سألت عليا الفترة اللى فاتت وبعتذرعن عدم ردى على باقى تعليقات الموضوع اللى فات وعن عدم متابعتى لمدوناتكم الجميلة

المشكلة إنى لسه بكتب من بره لغاية ما النت يوصل بالسلامة ربنا يسهل