شريف وأمثاله

إبن عمى كان بيدور على شقة إيجار (عش الزوجية)وفعلا لقينا شقة مناسبة جدا فى الشارع عندنا وإتفقنا مع صاحب الشقة وكل شىء تمام وإتفقنا على إنه يدفع 350 فى الشهر ومقدم 1000

وقولنا خلاص نكتب العقد إن شاء الله بكرة

وفى الميعاد المتفق عليه تغير كل شىء ولقينا صاحب الشقة بيقولنا إنه فى ظروف خاصة عائلية وإنه مش هيأجر الشقة خلاص

قولنا مش مشكلة خير وبعدها بإسبوع نكتشف إنه إتفق مع مستأجر تانى بمبلغ أكبر ب 400جنيه فى الشهر ومقدم1500


أحد أقاربنا برضه كان بيدور على عروسة وفعلا وجد مبتغاه وبالفعل تمت قراءة الفاتحة والخطبة وكل شىء كان تمام وكانت العائلتين متفقتين تماما على كل شىء وبعد فترة وجدنا أسلوب التعامل إختلف وفى حاجات إتغيرت وبعدها على طول تم فسخ الخطبة لنكتشف بعد ذلك إنه كان فيه مهندس حالته المادية متيسرة وظروفه أفضل من قريبى هذا إتقدم لها و لو سألتها أكيد هتقول أنا أصلا مكنتش مستريحة مع خطيبى الأولانى وكان دمه تقيل ولبسه كان بلدى أوى وطريقته فى الكلام مش شيك وكمان بخيل ومش رومانسى خالص وكده كده كنت هسيبه من غير حاجة

كل دى طبعا محاولات للتبرير لإراحة الضمير وإبعاد أى إتهامات عنها


مسرحية بتحصل كل سنة ومش موجودة فى أى حتة فى العالم ألا عندنا

الزمالك يتفق مع لاعب معين والاعب بيكون موافق وناديه بيكون موافق وكل شىء تمام وباقى شىء واحد وهو كتابة العقد وفى لحظة يأتى الإتصال إياه من الباش مهندس الشيخ عدلى القيعى لتغير كل شىء فى دقائق بعد إغراء الاعب بمبالغ أكبر من تلك إتفق عليها ويتم خطف الاعب فى العربيات إياها ويقعد مع رجل المبادىءوالأخلاق الخطيب ويكتبوا العقد ويضربوا بكل ما إتفق عليه بعرض الحائط

وبعد كده يطلع الاعب علينا ويقول أنا طول عمرى أهلاوى وكان نفسى ألعب فيه من قبل ما أتعلم المشى وده شرف ليا إنى أتواجد فى نادى القيم والمبادىء واللى بيظبط أى لعيب بيلعب فيه

وبعد ما يقول الكلام ده ضميره يستريح ويحس إنه تمام وللأسف الكلام ده بيحصل كل سنة مع لعيب أو إتنين وأخرها طبعا شريف عبد الفضيل واللى سمعت أخوه أكد أكتر من مرة إن الاعب رغبته إنه يروح الزمالك ودى أمنيته وكلام من النوع ده والدليل إنه مضى على إستمارات رغبة إنضمام للزمالك وعلى عقود مبدئية وبعد كده تبدأ المسرحية فى العرض وتنتهى بإن الاعب طول عمره أهلاوى من أول لعبه فى ناشئين الإسماعيلى


بعد ما ذكرت الأمثلة السابقة أكيد هلاقى معترضين هيقولوا وفيها إيه مهو كل واحد لازم يشوف مصلحته مع اللى يدفع أكتر والدنيا ماشية كده الأيام دى

الماديات أهم شىءوإجعل شعارك فى الدنيا مصلحتك ثم مصلحتك ثم مصلحتك

أنا والله ما يفرق معايا شريف ولا غيره أنا بس بتكلم عن مبدأ معين وخلاص

الرسول عليه الصلاة والسلام كان واضح جدا فى الموضوع ده لما بيقول : (لا يخطب الرجل على خطبة أخيه) ]. أورد أبو داود ثم قال: (ولا يبع على بيع أخيه)




كلمة أخيرة

أنا مكنتش ناوى أكتب دلوقتى خالص وقولت هستنى لغاية لما النت يوصل وأكتب من البيت أحسن كتير

وبعدين لقيت الموضوع إتعطل وهيتأخر شوية كمان و الموضوع الأخير ده إستفزنى كتير ولقيت المدونة وحشتنى أوى وشكلها صعب عليا وهي من غير جديد كده من زمان

حابب أشكر كل الناس اللى سألت عليا الفترة اللى فاتت وبعتذرعن عدم ردى على باقى تعليقات الموضوع اللى فات وعن عدم متابعتى لمدوناتكم الجميلة

المشكلة إنى لسه بكتب من بره لغاية ما النت يوصل بالسلامة ربنا يسهل

52 رأيك يهمنا:

ديالا 2 أغسطس، 2009 1:12 م  

فعلا عندك حق

كله بيدور علي مصلحته حتي لو علي حساب اخوه

وبعدين في امثله اكتر من كده كماااااااان ياابني الدنيا بجد فيها بلاوي

ويارب النت يرجع بالسلامه

بنجاواتى 2 أغسطس، 2009 1:50 م  

عرفة باشا

ياعم خليهم يشبعوا بيه
ما انت عارف ان اللعيبة اللى صفقاتهم ما بتمش بهدوء دول بيبقوا عاملين ازاى فى الملعب

عموما انا مش شايف مشكلة ان عدلى القيعى او الاهلى يعمل اللى بيعمله ده لكن احب بس لو يبطلوا يعملوا لى فيها نادى المبادئ والاخلاق اللى ما بيغلطش

سلام

dody 2 أغسطس، 2009 2:53 م  

السلام عليكم ربنا يوصلكم النت ويرجعهلكم بالسلامة مدربة بصراحة وعارفة الحالة...
بالنسبة للموضوع فهو بجد موجود بشكل كبير جدا وسببه طبعا قلة الإمانة وللأسف أنا شفت بنات بيخبوا دبلة الخطوبة عشان لو جالها عريس أحسن المجتمع كله قائم على كده إلا من رحم ربي وعشان منكرش أكيد الوجه الثاني موجود وجه الناس المحافظة على العهد وعلى أمانتها...ربنا يكرمك على الموضوع الرائع

حياتى نغم 2 أغسطس، 2009 4:01 م  

السلام عليكم / حمدا لله على سلامتك يا دكتور .
موضوع جميل يستحق التقدير وأجمل ما كتب أحاديث طيب الخلق صلى الله عليه وسلم .

د. ياسر عمر عبد الفتاح 2 أغسطس، 2009 5:19 م  

طبعاً أنا مقدر زعلك علي الموضوع ده
لكن طبعاً الموضوع مش كده
الأهلي والزمالك كانوا بيتفاوضوا مع اللاعب
وكل واحد عمل عرض
عرض الأهلي كان أكبر ,, لكن الإسماعيلي لعداوته للأهلي رفض
لكن اللاعب فضل مستقبله

بصراحة معجبنيش إنك تحط حديث البيعة علي البيعة
لأن ده محصلش بالمعني المقصود في الحديث
وكمان الزمالك دايماً هوه اللي بيدخل يزايد علي اللعيبة ,, والأهلي هوه اللي تفاوض مع شريف الأول علي فكرة

شوف يا دكترة
دفاعكم أقوي من دفاعنا
وعندكم إتنين حراس مرمي علي أعلي ما يكون
والدوري السنه دي بتاعكم تقريباً

تلميذة سلمان الفارسى 2 أغسطس، 2009 5:30 م  

بارك الله فيك
طالما الدنيا ماشيه على المصالح يبقى اكيد مفيش حاجه هتعجبهم

أم مالك 2 أغسطس، 2009 7:35 م  

دكتور عرفة
اولا حمد لله على السلامة
واضح ان موضوع اللاعب كان الحافز الاكبر للبوست
وبما انى مليش فى الكرة اؤيد انه لايجوز بعد
الموافقة على شخص الموافقة على شخص اخر الا بعد انتهاء الموضوع الاول والحديث بتاع الخطبة صح
ولكن نقول ايه انعدم الدين عند بعض الناس

لاسع افندى 2 أغسطس، 2009 10:24 م  

شوف مصلحتك



تحياتى

ঔღঔ نـــوارة ঔღঔ 2 أغسطس، 2009 10:46 م  

مواقف بتقهر والله

وبنسمع فيها كتير المصالح بقت اهم من اي حاجة

انا مش عارفة كيف بيرجعوا بكلامهم بقلة زوق

ومع ذلك ضميرهم بيبقى مرتاح ومقتنعين انهم عملوا الصح

ربنا يصلح الحال

والف الحمد لله على سلامتك

الحمد لله انك بخير وان شاء الله يرجع النت باسرع وقت وترجع تنور المدونات :)

بالتوفيق يارب

آيوشة 2 أغسطس، 2009 11:54 م  

حمد لله على السلامةيادكتور
معلش الدنيادلوقتى بقيت دى كلهاماشية كدا مصلحتك اولا والناس تبيع كل قيم وضمير علشان الفلوس

أديب درويش 3 أغسطس، 2009 3:33 ص  

يا عم مزعل نفسك كده ليه
يعنى هوا شريف عبد الفضيل اللى كان هيجيب
البطولات للزمالك
يا سيدى النادى أساسا خربان من جوا
شفت انتخابات الاهلى مرت بهدوء وسلاسه ازاى
مش زى انتخابات الزمالك
( طبعا أنا بقول الكلام ده علشان اضايقك وعلشان أنا عميل اهلاوى يعنى من الاعداء

المعلم محمد صاحب المطعم - طعمية سخنة 3 أغسطس، 2009 4:30 ص  

صباح الخير
بيتهيالي انت مشوفتش فيلم الزمهالوية

ههههههه عمرو زكي اتخطف هو و محمد شوقي !

هو ده الاحتراف !

اللاعب طبعا لازم يرفع شعار ابجني تجدني
امال عاوزينه يضيع مستقبله يعني !؟
و لو الاهلي معرضش اكتر و نادي تاني من بره هو اللي خده ... كنت هتكتب البوست ده :D?

موناليزا 3 أغسطس، 2009 5:43 ص  

بغض النظر عن موضوع اللعيبة والاندية المختلفة انا متفقة معاك جداً
لأن الكلمة تعتبر عهد غير موثق

مصطفى أبوزيد 3 أغسطس، 2009 11:54 ص  

ايوه شريف اهلااااوي
ههههههههههههه
واحشني جدا يا دكتور عرفه والله

المعتصم 3 أغسطس، 2009 3:43 م  

بسم الله الرحمن الرحيم
السلام عليكم ورحمة الله وبركاته
د/عرفه
تحياتى
والله يامحمد ليك وحشه كبيرة قوووووووى
وان شاء الله تقرر انت واحمد ومصطفى انكم تيجوا تحضروا اللقاء معانا يوم السبت هستناك ضرورى يابشمهندس
هههههههههههههههه
بص بقى ياعمنا
انا معاك فى موضوع انه الدنيا دلوقتى بقت مصالح
وعلى رأى اللى قال الدنيا مصالح ياسى صالح قوم شوف مصلحتك
بس انت دخلت حاجات فى حاجات
يعنى عيب قوى واحد يخل بشروط اتفاقه على الايجار مع الناس علشان 100 جنيه زياده
ومصيبه ان واحده تسيب خطيبها علشان واحد اغنى منه
انما الحقد الزمالكاوى الدفين جواكم بقى خلاكم تقارنوا بين الكارثه دى وبين موضوع شريف عبدالفضيل
الكل عارف ياباشا ان الاهلى بيتفاوض مع شريف من فترة كبيرة خالص
يبقى حديث البيعه هنا مكانه مش تمام
وكمان بصراحه مكنتش متوقع منك بالذات يامحمد وانت انسان متدين ومحترم انك تلقح بالكلام على الخطيب لمجرد كلام احنا بنسمعه واحنا مانعرفش الشخص ده يبقى ماينفعش اننا نتكلم عليه ولا ايه؟؟ ولا تكونش انت تعرفه معرفه شخصيه من ورايا وعشان كده بتقول بطريقة التهكم انه راجل القيم والمبادئ !!!!!
(احرجتك احرجتك)
هههههههههههههههههه
وبعدين خلى بالك
صحيح احنا مش هناخد الدورى السنه دى
بس برضو مش هياخدو الزمالك وانا قاعد وانت قاعد وهنشوف
ههههههههههههههههههههههههههههههههههههههههههههه
واحشنى بجد يامحمد ووحشانى المناكفه معاك
تقبل مرورى وتحياتى
وان شاء الله يوم السبت فى الازهر بارك
والسلام عليكم ورحمة الله وبركاته

saheda.com 3 أغسطس، 2009 8:49 م  

السلام عليكم
اظن ان هذه الاخلاق الغربية
التى ليس بها شئ من الاسلام
اتتنا عن طريق التليفزيون
والافلام والمسلسلات
التى حطمت القيم والمبادء
لدى الشعب
الحل الوحيد هو الرجوع للاسلام
اتذكر فى الاندلس عندما
كان التاجر يبيع
وجاره لم يبع
عندما ياتى مشترى
يقول له اذهب الى جارى فهو لم يبع شئ
نسال الله السلامة
وان شاء الله يعوضه الله باحسن منها
وقدر الله وما شاء فعل

حازم النبراوي 3 أغسطس، 2009 9:07 م  

الناس بقت مصلحتها فى المقام الاول

كلة يبيع ملة علشان كام قرش زيادة

المشكلة اننا دايما حالنا من سؤ لاسوأ

وربنا هو الهادى

تحياتى وتقديري

محبة الرحمن 3 أغسطس، 2009 10:57 م  

حمد الله على السلامه

وشكرا على زيارتكم الكريمه للمدونه

وقبل ما افصل النت

احب اعلق على الموضوع ده اللى بيناقش مشكلتين

اولهم نقص فى جانب الاخلاق

والتانى والاسؤء منه محاولات تجميل الصورة واقناع الانسان لنفسه انه اللى عمله مش غلط

وبجد ديه المصيبه

جزاكم الله خيرا على الموضوع

نتمنى ان تعودوا من جديد الى المدونه فى اقرب وقت

وردة 3 أغسطس، 2009 11:04 م  

حمد الله علي السلامة
الموضوع اللي عرضته ده كله موضوع ضمير
محدش بقي بيراعي ضميره خالص
بجد والله المسأله كلها مسأله ضمير
سواء صاحب الشقة او العروسة او اهلها او حتي النادي
مفيش ضمير
وصدقني
داين تدان
ومفيش حاجة بتروح عند ربنا
ابداااااااااااا

مستنين رجوعك يادكتور كفاية كده علي النت
ربنا معاك
سلام

norahaty 4 أغسطس، 2009 6:41 ص  

للاسف يادكتور عرفه
فى حياتنا الان
ســـواء
فى إيجار شقة
أو فى خطبـــــة
او حتى فى التعاقد مع(اللاعب)
منطق(أبجنى تعرفنى! ابجنى تعرفنى!)
هو السائد والماشى والمعمول به(:
ولا عزاء لكلمة الشرف والوعد والحاجات
الحلوة بتاعة زمــــــــــــــــــان دى (:

norahaty 4 أغسطس، 2009 6:42 ص  

المهم انت ذاكر
علشان تنجح وتخلص
ونفرح بك ولك.يارب

TIMMY !! 5 أغسطس، 2009 11:52 ص  

اللي معاه كتير .... يحمل و يشيل !!

مصلحتي ثم مصلحتي ثم مصلحة الآخرين إن كان فيها مصلحتي !!!

iBRAHiM sAllAM 5 أغسطس، 2009 2:53 م  

هي دي هيا , هي دي الدنيا ,
مصلحة و مصلحة و مصلحة :(

د/ رامي شهاب الدين 5 أغسطس، 2009 10:46 م  

حسبى الله ونعم الوكيل

بقى عايز تحط الرباط المقدس وسنة نبيك فى نفس منزلة إنتقالات الكورة والكلام الفاضى ده؟؟؟

المفروض يادكتور محمد تميز وتفصل بين ده وده..فالفارق بينهما كبييييييير

أما لو إتكلمنا فى موضوع الإنتقالات إللى مزعلك ده ..فبعيدا عن التشبيهات الغريبة إللى حضرتك أوردتها فأنا أرى إن إللى حضرتك قلته فى موضوع شريف عبد الفضيل مظبوط باستثناء حتة إنه كان عايز يروح الزمالك ، لأن رغبة اللاعب الكل عارفها إنها متجهة للأهلى ، لكن إدارة نادية كانت متهيبة من إنتقاله للأهلى نظرا لحالة الإحتقان المعروفة بين الناديين ، وخيروه إما الزمالك أو إحتراف خارجى أو تفضل فى ناديك الإسماعيلى

سيبك ياباشا من دا كله ، أنا متفق معاك إن إللى حصل بعيد تماما عن أخلاقيات الرياضة لكن من العدل والإنصاف إنى أقول إن ده زى مابيحصل فى الأهلى بيحصل فى الزمالك .. بل وفى كل أندية العالم

فزى ماخطف الأهلى شريف عبد الفضيل وسماكة وفتحى وغيرهم .. خطف الزمالك هانى سعيد ومحمود فتح الله ووليد عبد اللطيف والبقية تأتى

سيدى الفاضل .. أرجو أن تتخلى عن تعصبك الرياضى وإنتماؤك لناديك عند مناقشة موضوع كهذا حتى لاتخسر قراء ومتابعين لمدونتك أحسبنى واحدا منهم

وختاما .. أنا لاأبغى أى عداء أو تجريح ، بل جل ما أريده هو رؤية موضوع من وجهة نظرة محايدة بعيدة عن أى تعصب أعمى أو محاباة طرف على حساب طرف

دمت بكل الود .. تحياتى

حلم بيعافر 7 أغسطس، 2009 12:22 ص  

تشبيه جميل قوى يادكتور

وصل النت بقى وحشتنا

سمسم 7 أغسطس، 2009 11:59 ص  

السلام عليكم
كلامك صح لانو بيوافق كلام
الرسول صلى الله عليه وسلم
وميصحش الي الناس بتعملو ده
دي قلة امانة وخيانة معلنة
تعرف احنا قبل سنسن بعنا بيتنا
وبابا جاله زبون واتفقوا بس بالكلام على سعر
بعد ربع ساعة جه بون تاني
بسعر اكتر
وبابا رفضا انو يتفق معاه
وفضل عالسعر الاولاني
واكيد ده هو الصح
ربنا يباركلك

♥ Am fOpa'D ♥ 7 أغسطس، 2009 6:03 م  

لا حول ولا قوة الا بالله العلي العظيم
بيفكرني بحاجة سمعتها...مش فاكرة مسلسل ولا حاجة حقيقية حصلت
واحدة كل شوية ترجع بيت اهلها من نفسها عشان خناقات بسيطة مع زوجهااا واختلاقات لمشاكل وخلافه من هذه المشاكل,,,
عشان في الاخر بيقولوله صرااحة في عريس تاني احسن منك
وكان تعليق الزوج "جايبين عريس لمرااتي"


مش عارفة فين ابسط كلمة تتقال امانة للعرض وللكلمة و و و

استغفر الله من دي خصاال وده زمن

معلش ان شاء الله يكون خير لكل فرد,,,

بــــ الخطاب ــن 8 أغسطس، 2009 1:36 ص  

فعلا يادكتور الزمالك دايما غلطان وفعلا انتخابات الأهلى مرت بسلام مش زى الزمالك ماكانش حسن حمدى واخد النادى وكالة أنباء خاصة له ولا حاجه ولا كان ممنوع أن أى حد ينشر إعلانته على سور النادى دا كان حسن حمدى هو اللى بينشرهم إعلانتهم بنفسه
والله أنا عمرى ما استغربت للأهلى بيعمله لأن الزمالك مش هو البرئ الطيب بردوا
اللى مستغربله فعلا جماهير الناديين واللى بيعملوه فى بعض والله دا حرام لادى تنفع كوره ولادى تنفع نوادى ولا دول ينفعوا جمهور
سؤال يا دكتور لو شريف عبدالفضيل كان مضى للزمالك
كنت هتاخد حاجه من اللى كان هايخادها ؟
ولما مضى للأهلى حد من جماهير الأهلى استفاد حاجه ؟
ولو الدورى خده الأهلى ايه اللى هيستفاده الجمهور ولو خده الزمالك ايه اللى هيستفاده جمهوره
ولا أى حاجه ......
حاول تشجع كوره للكوره مش لأى حاجه تانيه
على فكره أنا زملكاوى جدا

أم مالك 10 أغسطس، 2009 2:41 م  

عودة تانية يادكتور
لك سؤال عندى فى المدونة
ياريت تدخل تجاوب عليه
تحياتى

محمد عبد الباسط 11 أغسطس، 2009 12:23 م  

طب والله منا معلق على موضوعك يا زملكاوى

ابقى قابلنى لو ختوا الدورى برده


حلم كبير

محمد سعد القويري 12 أغسطس، 2009 2:14 ص  

الأخ الفاضل :: د.عرفة ::
تحية مباركة طيبة
وبعد

أولاً : دعني أخبرك بأني اشتقت لمواضيعك المميزة ..
ثانيًا : في عالم الماديات لا تستغرب من أي شيء ..
ثالثًا : الرسول عليه الصلاة والسلام كان واضح جدا فى الموضوع ده لما بيقول : (لا يخطب الرجل على خطبة أخيه) ..
أتمنى أن يصل مفهوم هذا الحديث الشريف ..

تحياتي إلك

همسة ايمان 12 أغسطس، 2009 2:49 ص  

بعيدا عن الكورة وخلافتها

بس البوست جميل

وربنا يهدى الجميع

تقبـــــ مرورى واحترامى ـــــل

لو عرفوه هيحبوه 16 أغسطس، 2009 2:47 م  

السلام عليكم ورحمه الله وبركاته

نتمنى متابعتكم معنا للجزء الثانى من طفوله الحبيب صلى الله عليه وسلم

shoshooo 17 أغسطس، 2009 10:10 م  

السلام عليكم ورحمه الله
وحياة ربنا عندك حق دا انا كل ما بمشى خطوة بتكعبل فى حد مصلحنجى دول بئوا كتير اوى يا ترى ايه السبب. هى الناس دى هتتغير ولا هتفضل كدا زى ما هيا؟؟؟
يااااااااااااارب يتغيروا

Shimaa 17 أغسطس، 2009 11:57 م  

الأستاذ الفاضل الدكتور:محمد عرفة.
صاحب مدونة: 1-aim
" تحية طيبة" وبعد..
اعتذر عن الخروج من موضوع التدوينة، لقد أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية تشتمل على البيانات التي تساعدك على الإجابة عن الاستمارة.
أرجو الاهتمام والرد سريعا.
تحياتي وتقديري.
شيماء إسماعيل
باحثة بالماجستير- كلية الآداب جامعة القاهرة.

نور جديد 18 أغسطس، 2009 1:08 م  

السلام عليكم و رحمة الله
كل عام و انتم الى الله اقرب
انا مش عارفة دي اول زيارة ليا هنا و لا ايه
بس على كل حال
موضوع مميز و مهم الحقيقة قد نهتم بمواضيع ظاهرها اكبر من الموضوع ده
لكن هذا الموضوع باطنه عظيم لانه لا ينتج الا من مواضيع كبيرة
اقصد
ان واحد اخلف وعده قد يكون عادي في نظر بعض الناس او في اهم من كده ننشغل بيه
لكنه اخلف وعده نتيجة سوء خلق و نتيجة ضعف ايماني و نتيجة عدم مراقبة الله تبارك و تعالى
كل دي مواضيع كبيرة نتج عنها احد التصرفات
ربنا يتولانا و يرحمنا
و يجعل رمضان هذا العام مختلف على الامة كلها يارب
و يجعلنا جميعا من عتقائه من النار

وردة 19 أغسطس، 2009 12:38 م  

د/عرفه
كل سنة وانت طيب
رمضان كريم
سلام

وردة 19 أغسطس، 2009 12:42 م  
أزال المؤلف هذا التعليق.
Beram ElMasry 19 أغسطس، 2009 6:06 م  

رمضان كريم
أعاده الله عليكم وجميع الأهل والأحبة باليمن والخير والبركة

الحب بين العرب فطرة وشئ مألوف
ولا يحسدوه من الخلق غير القرد والحلوف

سجود 20 أغسطس، 2009 12:52 م  

كل عام وانتم الي الله اقرب وعلي طاعته ادوم

تأثير الفراشة 21 أغسطس، 2009 4:38 ص  

الحمد لله على السلامة يا دكتور

و تعقيبا على البوست، فمش هاقدر أقول غير اللهم اهدنا فى من هديت و عافنا في من عافيت، و اجعل خلقنا القرآن

كل سنة و حضرتك طيب و إلى الله أقرب إن شاء الله

متوقفة فترة رمضان و العودة بعده بإذن الله

تقبل الله منا و منكم

رمضان كريم

norahaty 21 أغسطس، 2009 10:15 ص  

كل سنة وانت بألف خير
يادكتور عرفه ودايماً موفق
فى دراستك إن شاء الله تعالى

أبو كريم 23 أغسطس، 2009 8:13 م  

والله العظيم موضوع جامد
عارف مشكلتنا إيه ؟
إن الدين بقى أخر حاجه الناس بتعمل حسابها
تيجى تقول لحد فولان الفولانى بيخاف ربنا وبيصلى ينفضلك
أنما لو عنده فلوس ومفيش زرة دين بيتفتح قدامة المسائل

وقال الشاعر

رأيت الناس قد مالوا لمن عنده مال
وما أن يذهب المال فعنه الناس قد مالوا
رأيت الناس قد ذهبوا لمن عنده ذهب
وما أن يذهب الذهب فعنه الناس قد ذهبوا
رأيت الناس منفضه لمن عنده فضه
وما أن تذهب الفضه فعنه الناس منفضه


اللهم أرحمنا ولا تؤاخذنا بما فعل السفهاء منا

المهاجر الى الله 24 أغسطس، 2009 11:50 ص  

السلام عليكم ورحمة الله وبركاته:
انا صحيح زملكاوى جدا .. زملكاوى بشكل غير عادى .. زملكاوى للابد ان شاء الله. ( لكنى مش متعصب)
وصحيح انك عندك حق فى بعض ما ذكرت الا انهفاتتك امور هامة
1- شريف عبد الفضيل مكنش هيفرق كتير مع الزمالك
والزمالك كان عنده اللى احسن منه وفرط فيه وهوه امير عزمى مجاهد ومن قبله ابراهيم سعيد والتفريط فى النجوم مسؤلية ممدوح عباس اللى عمال يصفى حساباته مع الاخرين على حساب فريق الكورة والنادى
2- فعلا شريف كان الاهلى بيتفاوض معاه فى نفس الوقت اللى كان الزمالك بيتفاوض معاه وفعلا كان مندوب النادى الاسماعيلى موجود بنادى الزمالك ومعاه الاستغناء الخاص بشريف الا ان مفيش حد عبره لفترة ليست بالقليل مع العلم بان كان فيه معاد مسبق ...يبقى ايه الحكاية بقه.. ممدوح عباس عمل كده ليه ..هل هوه سابه للاهلى فعلا ..ام ان الحكاية لا تعدوا ان تكون اهمال .
فى كلتا الحالتين تكون دى مصيبة.
اما عدلى القيعى فانا شخصيا تعاملت معه مباشرة وجلست معه فى مكتبه بالنادى قبل سفر فريق الاهلى لليابان اخر مرة بثلاثة ايام فوجدته شخصية محترمة ومهذب ودؤوب ونشيط ولا يعيبه ان يباشر عمله
المشكلة يا اخى ان الازمة فى الزمالك منذ الازل هى ازمة ادارة فلو عند الزمالك ادارة مثل ادارة الاهلى لما خسر النادى بطولة واحدة لمدة عشرين عاما على الاقل.
فالزمالك عامر بالنجوم ومتجدد ونجومه ليس لهم مثيل فى مصر بل فى افريقيا . ولا ينقصة سوى ادارة حكيمة تستغل مواهبة وقدراته.
هى دى المشكلة

غير معرف 27 أغسطس، 2009 11:12 م  

ولا يهمك يعيش الزمالك وياخد غيرها

norahaty 7 سبتمبر، 2009 10:16 م  

كيف حالك يادكتور ؟
طمنا على أخبارك وأحوالك.

norahaty 11 سبتمبر، 2009 2:15 م  

ولا يهمك ياطبيب
احسن شىء عملته
فصل النت اثناء
الشهور القادمة
الحكاية مش تهريج
وكمان صاحب بالين كذاب
وانا احسك (ومتنأكدة يعنى متأنكدة
انك لا كذاب ولا بتهرج)دى نصيحتى ما ترجع
النت الا لما تخلص الامتحانات خاااااااااالص
وربنا سبحانه وتعالى يوفقك انت والجميع .

norahaty 11 سبتمبر، 2009 2:17 م  

اللى فات دا تعليق
على التدوينة الجديدة
اللى انت قافل التعليق
عليها(ابقى اقفل الشبابيك
والابواب الخلفية للمدونة كويس
علشان محدش يلف من الجنينة زى حالاتى
كده)ربنا يوفقك ويوفق الجميع.
احتراماتى ياطبيب.

Beram ElMasry 18 سبتمبر، 2009 9:55 م  

الهم تقبل صيامكم وقيامكم وأجعله في ميزان حسناتكم وعيد سعيد أعاده الله عليكم باليمن والخير والبركة أنتم وجميع الأهل

** بيرم المصري

عالم حبيب 19 سبتمبر، 2009 11:52 ص  

مع ختام رمضان وقدوم العيد .. أدعوا الله أن يتقبل منا ومنكم الشهر ويهل علينا وعليكم والمسملين هلال العيد بسعادة واطمئنان وثبات على الطاعات بعد رمضان

أذكركم بصيام 6 من شوال لحديث النبي صلى الله عليه وسلم : من صام رمضان وأتبعه بست من شوال خرج كيوم ولدته أمه .. صحيح مسلم

كل عام وأنتم الى الله أقرب وعلى طاعته أدوم

لاسع افندى 19 سبتمبر، 2009 1:55 م  

تحيه وعيديه
وكحك وصحبه هنيه

عيد سعيد

اللؤلؤة 23 سبتمبر، 2009 4:25 م  

السلام عليكم
كل عام وحضرتك والأمة الإسلامية بخير
وكل عام وحضرتك إلى الله أقرب
وجهدمشكوووووووووووووووووور
دمت فى سعادة

إرسال تعليق