ندافع أولا ثم نهاجم

النهاردة يوم تاريخى لإنى الحمد الله كده يعتبر إنتهيت من حياتى الطلابية وكان آخر يوم إمتحانات عندى
وبغض النظر عن اللى حصل فى الإمتحانات ولكن الحمد الله على كل حال
ومنتظرين النتيجة قريبا و بداية حياة عملية جديدة
إن شاء الله
بالنسبة لموضوع الحصاد
فى البداية لازم أشكر كل الناس اللى تفاعلت وشاركت بإيجابية وأشكر تقيمكم للمدونة ويارب أكون دايما عند حسن ظنكم
إسمحولى أدافع عن نفسى فى الإعتراضات على المدونة
1- بالنسبة لشكل المدونة كانت الآراء متباينة فيها وعن نفسى برغم إن الشكل عاجبنى إلا إنى مستغربه بعض الشىء لإنى فقط غير متعود عليه وأظنكم كذلك بالطبع
2-بالنمسبة إلى لغة المدونة وإنها بالعامية وبالرغم من ذلك طالب البعض بشىء من الروشنة فى المواضيع
عموما أنا بحاول أكتب بأسلوبى الطبيعى فى الحياة ممكن أستخدم العامية ولكنها غير سوقية أو مبتذلة وليست فى جميع المواضيع على حسب نوع الموضوع وأظن إنه هناك مواضيع بالعامية وأخرى بالفصحى
3-بالنسبة إلى إنى معتد برأيى ده شىء واضح جدا وهو إنى متمسك برأيى وإلا ما كنت قلته أو حاولت نشره
ولكن عدم قبول تغيره هذا غير وارد تماما لإنى مقتنع بإنه لا يوجد رأى صائب دائما
وبالفعل إذا إقتنعت إن رأيى خطأ فأنا أغيره فورعلمى بذلك
ومن الغباء التمسك بالخطأ رغم العلم بإنه خطأ
4-المدونة خالية من التنويع أظن إنى حاولت التنويع قدر الإمكان بين مواضيع شخصية أو رياضية أو سياسية أو دينية ولكن قد تدور جميعها فى إطار واحد وأظن إن هذا هو الإطار العام للمدونة
5-فى النهاية أغرب الإعتراضات على المدونة والتى لا أعتبرها إعتراضا أبدا بل أعتبرها مصدر تفاخر وتباهى
أولا لكونى زملكاوى وبصراحة يمكن يكون لزوج عمتى _والد بنت عمتى المذكورة فى أنا وهو وهى_ دور كبير فى الموضوع ده لإنه كان زملكاوى كبير وأنا كنت مرتبط معاهم وخلاف إن بابا كمان زملكاوى
ولكن أكتشفت إن الموضوع طبيعة شخصية عندى وهو إنى لا أحب أبدا المحتكر للبطولات أو المحتكر لأى شىءمتعاطف
دائما مع الطرف الضعيف ولذا لم أشجع البرازيل مثلا ولا مرة فى حياتى
ثانيا لكونى طبيبا وبصراحة أنا أرى إن مهنة الطب مهنة إنسانية فى المقام الأول ولكن للأسف جشع بعض الدكاترة وإهمال البعض الآخر كان له دور فى إن بعض الناس تكره الدكاترة
ولكن إن كان البعض مهمل أو جشع أو نصاب فأكيد هناك المقابل وفى أى مهنة كذلك هناك هذا وذاك

6-أنا سعيد جدا بإهتمام البعض بالمواضيع القديمة والتعليق على بعضها وبصراحة كان أكثر شىء رفع معنوياتى
الحمد الله كده تمام إنتهيت من الجزء الأول وهو الرد
إسمحولى أبدا فى الهجوم على أكثر ما يغضبى من التدوين
1- المجاملة وهذه أبرز نقطة
فللأسف قد تجد البعض غير معجب الموضوع ويراه تافه وضعيف وممتلىء بالأخطاء
ومقابل ذلك تجد رده موضوع راااااااائع بديع إيه الجمال ده كله
بصراحة شىء مستفز
وإن كان هذا الموضوع أقل نسبيا على الفايس بوك فالناس هناك أكثر صراحة وأكثر تحررا ومن يتضايق من شخص تانى يوم يحذفه من قائمة الأصدقاء عادى جدا
ولذا أتمنى دائما أن أعرف آرائكم دائما دون مجاملة
لإن الإنسان لن يستطيع أن يرى عيوبه إلا بعيون الآخرين
ولذا كان حزنى لإن الإعتراضات التى وصلتنى كانت قليلة جدا ومعظمها حتى فى الإستفتاء المنفصل
2-تساهل البعض فى الحديث مع الجنس الآخر وبصراحة بتضايق جدا لما ألاقى شاب يكتب لفتاة وحشتينى أوى ........وكيفك يا جميل..؟؟ وإزيك يا قمر.... وإنى أحبك فى الله......... والعكس طبعا
أكيد الكلام ده موجود وللأسف كلام من النوع ده ممكن يسبب مشاكل كتير أوى
لإن فيه ناس حساسة جدا وممكن تتأثر بأى كلمة ولو صغيرة ولو كان قائلها لم يشعرولم يبالى بالكلمة مطلقا أو كانت حتى مجرد لزمة فى كلامه
المهم ياريت نحاسب أوى فى الكلام ده
وطبعا الفايس بوك مشاكله من النوع ده أخطر كتير أوى
3-وده يمكن يكون إعتراض شخصى وخاص بصاحب المدونة فقط
يعنى شىء يمكن بيضايقنى أنا بس وهو وجود ملفات صوتية فى بعض المدونات سواء كانت قرآن أناشيد أغانى أى شىء لإنى فى الأغلب بكون مشغل أى شىء جنبى وعندما أفتح تلك المدونة تختلط الأصوات وأضطر لشىء من إثنين إما غلق المدونة أو غلق الصوت عندى نهائى
عمومت دى مشكلة بسيطة ويمكن تكون خاصة بعض الشىء
أكيد فيه عيوب تانية بس كفاية كده لإنى طولت عليكم أوى
عموما
ده الإستفتاء المنفصل مرة تانية للناس التى لم تشارك فى المرة الأولى
وطبعا فرصة للهجوم عليا من غير حساب ورغم كده كنت حاسس بمعظم الناس اللى شاركت فيه وكنت عارفهم
يعنى هاجم براحتك بس هعرفك هعرفك
ههههههههههههههههههههههههههههه
أنا بهزر طبعا أتمنى إن الناس كلها تكون محايدة وموضوعية
آخر شىء
إن شاء الله بكرة الجمعة هنزل ترشيحاتكم على المدونة التانية وطبعا مفيش ترشيحات وصلت لغاية دلوقتى خالص
إلا موضوع أو إتنين
عموما لو مفيش ترشيحات هختار أنا على مزاجى
وبراحتكم خالص
وهمارس سلطتى القانونية على المدونة

25 رأيك يهمنا:

ghorBty 21 يناير، 2010 8:15 ص  

السلام عليكم

اولا : ربنا ييسر في النتيجه وان شاء الله خير

ومبروك النيولوك الجديد

ثانيا : انت اتكلمت في كذا نقطه ومش عارفه اتكلم في ايه والا ايه بس فيه نقطه لفتت انتباهي اتكلمت عنها وكمان قريت في كذا مدونة عن نفس الموضوع موضوع التساهل في المعامله في المدونات وغيره  
دا في الاول والاخر بيرجع للشخص نفسه لازم يكون جواه قناعه ان الشئ دا لا يصح وان زي ما فيه حدود في الواقع هنا برضوه فيه حدود لا يمكن اننا نتعدها وممكن والله اعلم هما فاكرين انهم بيتعملوا كانهم اخوات وعيله واحده بس ديه مش حقيقه وان كان فالاحترام اولى

بس عندي رجاء لو فيه حد بعينه او ناس معينه يعني بيتصرف كدا ياريت نوجههم بالنصح بطريق مباشر بس طبعا في السر لعل وعسى انهم مش واخدين بالهم او مش قاصدين الفعل دا ....

وبالنسبه لمواضيع المدونه

عموما انا من وجهة نظري التدوين "حاله ورأي"بمعني ان اللي بيدفعني للكتابه حاله معينه او شئ حبيت اتكلم عنه من وجهة نظري .. يعني الحجر والانتقاد علي مدونات معينه وعن طريقه الكتابه فيها انا لا اؤيده كل انسان له الحريه في التعبير واللي بيكتبه ربنا وحده اللي هيحاسب عليه مش احنا احنا عندناالحق اننا نقفل المدونه ونتركها امالو مدونات معاديه للدين وفيه شئ مسيئ للاخلاق فمثل هذه المدونات اصلا مالهاش اي قيمه علشان اديها اهتمام او متابعه ...

  موفق والله يهدينا ويهدي الجميع الي ما يحب ويرضى

حسام غانم 21 يناير، 2010 9:22 ص  

موضوع راااااااااائع بديع إيه الجمال ده

احم

واحشني يا دوك

عملت ايه في الامتحانات

يا رب كده أشوفك السابع عالدفعة

حلو الستايل الجديد بتاع المدونة

الناس كلها غيرت الستايل ما عدا أنا ولا ايه

أم مالك 21 يناير، 2010 1:42 م  

الحمد لله ان الامتحانات خلصت على خير
يارب تاتى هنا قريبا تبشرنا بالنتيجة السارة
باذن الله
انت واحمد بسيونى ومصطفى كانى كنت بمتحن معاكم
ربنا يوفقكم
انا مع غربتى فى تعليقها علشان لااعيد الكلام
التدوين اصبح يمثل جهة اعلامية خطيرة
علشان كده لازم يتحلى بالتعامل النظيف
اتمنى ان يتم اللالتزام بنصيحتك

dody 21 يناير، 2010 2:05 م  

السلام عليكم ورحمة الله..ألف ألف ألف ألف مبروووووووووك إنتهائك من الإمتحانات ومن الحياة اطلابية ككل والحمدلله كلها كام شهر ونحصلك..وإن شاء الله بالتوفيق ونسمع اخبار سارة عن النتيجة ..ودمت في طاعة الله

well 21 يناير، 2010 5:16 م  

ربنا يوفقك فى الامتحنات يا رب
بالمناسبة المدونة ممتازة
تحياتى

المعتصم 21 يناير، 2010 5:34 م  

السلام عليكم ورحمة الله وبركاته
ازيك يادكترة
يارب تكون بخير
والف مبروك ياعم على انتهاء الامتحانات وان شاء الله نباركلك على النتيجه قريب وبعدها على طول على تعيينك معيد بكلية الطب بإذن الله
انت انسان محترم يامحمد وتستاهل كل خير وربنا هيكرمك ان شاء الله
شوف بقى ياعم
يعنى زمالكاوى وهنعديها
وديكتاتور وهنقول ماشى زميل مهنه
(بماانى زعيم حلف يعنى)
وتغير شكل المدونة مافيش مشاكل التجديد مطلوب برضو
انما بقى تخلى كتابة التعليق فى نفس الصفحه بتاعة البوست هو ده اللى بيضايقنى فى المدونة بتاعتك لانه فى ساعات كتير مش بعرف اعلق عندك
وكفاية عليك كده يللا ســـــــــــــــلام

Dr Ibrahim 21 يناير، 2010 5:40 م  

فعلا يا دكتورنا
المجاملة- تلاقى كلام ميتفهمش ولا ليه معنى وتلاقى المجيد والتعظيم للكاتب..وهذا إنما يدل على شىء واحد مجاملة من أجل المصلحة والتى تتدخلنا فى التساهل بين الجنسين فى الكلام فلابد من التساهل والمجاملة حتى يرضى الجنس الأخر عنه..وهذا مما أدى إلى انحطاط التدوين الهادف وهذا من رأييى..فقلما تجد إنسان يكتب وتكون كتاباته جديرة بالمتابعة ولكن لا تجد من يتابعه ليس إلا انه لا يجامل الأخرين فى كتاباتهم لانه صاحب مبدأ...
والله يا دكتور ساعات بحس ان مدونين الوورد بريس ليهم عظمة كده فى كتاباتهم..انما بتوع البلوج اسبوت معظمهم لا ممؤاخذة هجيصة إلا من رحم ربى..
وكفارة يا دكتور :)
وعقبالنا

المجاهد الصغير 21 يناير، 2010 5:41 م  

السلام عليكم
الحمد الله انك خلصت مبروك وحياه عمليه موفقه
وتنجح بامتياز ان شاء الله
ايه حكايه الترشيحات دى؟؟
وفقكم الله

المجاهد الصغير 21 يناير، 2010 5:51 م  

فهمت فهمت
خلاص كده بكره
معلش دخلت متأخره
ان شاء الله اشارك معكم
باذن الله
وفقكم الله

المجاهد الصغير 21 يناير، 2010 6:42 م  

انا رشحت فى المدونه التانيه

موناليزا 21 يناير، 2010 9:57 م  

عجبنى هجومك على التدوين ومتفقة معاك فى كل النقاط المذكورة
واسمحلى أسأل بقى بما انك خلاص انتهيت من الامتحانات النهائية ناوى تتخصص ايه؟
بالتوفيق دائما

حياتى نغم 21 يناير، 2010 11:26 م  

السلام عليكم ورحمة الله وبركاته

بالتوفيق والنجاح يا دكتور .
وبدون مجامله كانت تدونات حضرتك جديدة وجذابه ومفيده فى طريقة عرضها ومضمونها وغايتها .

جميل أن تكون معتز برأيك ولكن لا تنسى أن تكون محايداً وتترك حرية للآخر أن يقول رأيه وحرية اقتناعه به فقط اعرض وجهة نظرك دون تحمس .

حياه عمليه ناجحه ومتميزه ونافعه لدينك ووطنك آمين .

حياتى نغم 21 يناير، 2010 11:29 م  

اسمحلى يا دكتور اطلب مساعدتك وأتمنى منك أن تفيدنى كما سبق منك وجزاك الله خيراً .

بالنسبه للقالب الجديد دخلت وحاولت من فتره تحميل قوالب جديده ولم أنجح ممكن تدلنى طريقة التحميل .

همس 21 يناير، 2010 11:42 م  

السلام عليكم مبروك عليك المهنه باذن الله ونلاقيك احسن طبيب باذن الله ربنا يوفقك على فكره التعليق فى نفس الصفحه احسن من الاول ومنتظرين الجديد

عمرو جويلى 22 يناير، 2010 12:34 ص  

د/ عرفة
السلام عليكم
لقد كثرت المجاملات فى عالم التدوين
ولقد تدوينات حضرتك كانت جذابة
ومفيدة
وبلتوفيق يا دكتور
وعقبال عندما تعلن النتيجة فى المدونة
خالص تقديرى

Mohamed E.T 22 يناير، 2010 7:32 ص  

مبرو ك اولا يا دكترة علي النيولوك ,و مبروك علي التخرج الحمد لله و الشكر لله انا عارف كانت سكة طويلة و عبال ما نبارك لك علي الجواز قريب (:

مممم المجاملة ..للاسف اكتشفت كده متأخر ان البلوجر علق عندي عشان اعلق عندك و انتهينا... ساعات الي بيعلق اصلا لا يقرأ ..حاجة تزعل بس ايه الي مش بيزعل في زمانا ده (:
بالنسبة لانك اخترت مهنة الطب ..و الله دي اجمل مهنة ممكن الواحد يشتغلها حتعرف بفضل الله لما تشتغل
و اخير و ليس اخرا علي انك زملكاوي ربنا يكون في

عونك (: No offense ya lord
تحياتي يا طيب

حلم بيعافر 22 يناير، 2010 4:17 م  

مبروك يادكتور
والصراحة راحة موضوع التعلقات والمجاملات غايظنى انا كمان

بحر الإبداع 22 يناير، 2010 4:38 م  

السلام عليكم

أخي الكريم الحبيب محمد عرفة

أولاً أحب أن أقول لك كما نقول نحن " القافلة تمضي مهما تعالت أصوات الكلاب "
فهنا ستجد من يحبك ومن يكرهك(أسأل الله أن يجعل حبك في قلوب الجميع) فليس بالأمر الغريب عنا جميعاً ، فما تعانيه يعاني منه أغلب المدونين فلا تبتئس لذلك.

وبخصوص قالب مدونتك ، ليس مجاملة فهو جميل خفيف الالوان وهادئ المظهر.

دمت في رعاية الرحمن

norahaty 23 يناير، 2010 4:28 ص  

السلام عليكم ورحمة الله تعالى وبركاته
وصباح الخير والخيرات بأذن الله يادكتور
عرفه وبأذن الله نيجى بعد ظهور النتيجة
ونبارك ونزغرط لمّا نقول يابس وكمان نشرب
عصير مانجو (مش شربات لو سمحت ما بحبهوش معلش)
ثانيا عن رأيى فى شكل المدونة فهو جميل(مش بجامل
لكنه فعلاً عجبنى)ثالثاً عن تشجيعك للضعيف أو كرهك
للمنتصر دائماً فأنت كدهـ زيى والحمــد لله رابعاً:الملفات الصوتية لو يعرف اصحـاب
المدونات أد ايه بتقل المدونة وبتخليها
مش عايزة تتفتح-لو يعرفوا-كانوا
بطلوها .....اممممم فيه كمان
أتكلمت عنه؟؟؟ايوة المجاملة
مطلوبة الصراحة بس بحدود
لكن واحد او (واحدة)
بيقولك أديب وحأعمل
كتاب وبيكتب غلط
دا اقوله انت غلطان
فى الكتابة ازاى؟وهو او هى
فرحان موووووت باللى كتبه؟احبطه يعنى؟
صعب صراحة وبالتالى لأما مابردش لأما بقول رأى
بسيط وخلاص.
كفاية رغى كدة
وباذن الله تعالى حنيجى
بعد شوية ونبارك ونشرب المانجو (ماتنساش)

كلمات من نور 23 يناير، 2010 5:56 ص  

السلام عليكم ورحمة الله وبركاته

مبروك الامتحانات وعقبال ما نهني ونبارك على نتيجة مشرفة بأمر الله ..وعايزين نقعد مع بعض قعدة نشوف أكتر شكاوي المدونيين والمدونات كبار السن أمثالي وعليه تقرر تتخصص إيه ....على فكرة يا ولدي ..أنا ضد الشكر والمدح في غير موضعه نظلم رد زيارة للمدونة و زرت بعض المدونين والمدونات اللي أحسبهم على خير ولا أزكي على الله أحد ..وحينما رأيت في مدوناتهم ما لا يرضي الله سواء في التدوينة نفسها أو الرد فأنا كنت أقوم بمراسلتهم على الخاص أو إرسال تعليق لمدونات لديها إشراف و أكتب إن تعليقي مش للنشر ولله الحمد البعض تأثر من نصيحتي وعمل بها وشكر الله أنني أتحدث إليه بصراحة والبعض قرر هجر مدونتي و تحدث معي بأسلوب ساخر ...والله يا بني أنا دخلت عالم المدونات وكلي أمكل أن يكون عملي كله خالصا لوجه الله ...وصدقني لو مش عجبني حاجه عندك حتلاقيني باشد ودنك و اقولك بكل صراحة ..و أحيانا حتلاقيني بارد على بعض المدونيين في بعض المقالات والبعض الآخر لا وهو يفهم ويعي لماذا .ربي يهدينا ويوفقنا جميعا لما يحب ويرضى..

كلمات من نور 23 يناير، 2010 6:01 ص  

ملحوظة: بمناسبة كلمة ( تعليقات الأحبة ) اللي انت حاططها ..إيه رأيك نغير الأحبة دي ونخليها شيء يرتبط بالله عز وجل والعلاقة من خلال تعامل ديني سليم؟

يلا قلت انت عايز نقد فقلت انتقد (:

كلمات من نور 23 يناير، 2010 6:02 ص  

أما بالنسبة للزمالك فبلاش وخلي روحنا الرياضية عاليه بس الأهلي حديد.....

تأثير الفراشة 23 يناير، 2010 7:37 م  

ألف مبروك على نهاية الامتحانات و بالتوفيق فى المرحلة القادمة إن شاء الله

و الحقيقة انا متفقة مع حضرتك فى جزئية التعليقات المبالغة أو المتجاوزة ،

و أتفق معك أيضا فى جزئية الملفات الصوتية ، إنما هى على كل حال مدونة الشخص الذى يعبر فيها عن نفسه ، فكما ذكرت حضرتك إن النقطة دى بسيطة فعلا

و بالنسبة للكرة ، فأكيد كل واحد له حرية تشجيع الفريق اللى هو عايزه ،أهم شىء هو التنافس الشريف و نبذ التعصب ، و الحقيقة أنا فكرت فى نقطة الاحتكار اللى حضرتك ذكرتها ، هو الاحتكار لما بيكون حد بيستولى على حقوق الآخرين فى المنافسه و يستولى على الشىء لنفسه فقط بالقوة
، إنما المنافسة الرياضية ليس فيها احتكار ، فيها كسبان و فيها خاسر و كل مجتهد نصيب ، و نتمنى إن كل انديتنا تكون قوية لإن ده من شأنه رفع مستوى الكرة المصرية و اللى هيصب فى النهاية فى المنتخب المصرى اللى هو الهدف الرئيسى و الغاية الأساسية لكل هذه المنافسات بين الأندية

ألف مبروك للمدونة و عقبال كل سنة إن شاء الله

محمد سعد القويري 24 يناير، 2010 9:07 ص  

الأخ الفاضل :: د.عرفه ::

صباح الخيرات

وبعد

أمنياتي الصادقة لك بالتوفيق .. وحياة عملية مليئة بالجد والاجتهاد والنتاج ..


وبالنسبة للنقاط .. فلا غبار عليها ..

^^^ أنا مش أجامل ...

بس فعلا هي تعبر عن رأيك ووجهة نظرك وميولك ...


نترقب إبداعات السنة التدوينية الثانية ..

ودمت بخير

ريمان 27 يناير، 2010 7:14 م  

السلام عليكم

كويس ان الامتحانات خلصت

وخلصت خالص من الدراسه ودى اخر سنه

ربنا يوفقك يا رب و منتظرين النتيجه عشان نبارك باذن الله

وعلى فكره استايل المدونه الجديد حلو اوى

كله ذوق


ما شاء الله


تحياتى ليك

إرسال تعليق