الحل متاح وموجود ولكن ........؟؟؟؟


كتير بسمع ناس بتتفاخر بهذا القول {انا طيب أوى مع الطيب وجدع أوى مع الجدع وابن ........... مع ابن ..............}

هل يرتضى الإنسان المسلم أن يكون ابن ............ حتى مع من أساء إليه ؟ أظن أنه على الإنسان المسلم أن تكون له معايير ثابتة يتعامل بها مع كل الناس وتلك المعايير يحددها الدين ولا شىء غيرذلك الرسول عليه الصلاة والسلام بيقول { لا يكن أحدكم إمعة يقول: إن أحسن الناس أحسنت، وإن أساءوا أسأت، ولكن وطنوا أنفسكم إن أحسن الناس أن تحسنوا، وإن أساءوا أن تجتنبوا إساءتهم }

أنا عارف إن الموضوع صعب

بس ممكن
طبعا عارفين قصة سيدنا محمد مع اليهودى الذى كان يترك مخلفاته يوميا عند بيت الرسول حتى جاء يوم ولم يجد الرسول شىء
فذهب إليه ليراه وعرف أنه مريض
وكان هذا الموقف سبب فى إسلام اليهودى
طبعا هذا هو خلق الأنبياء

نرجع لقصصنا الواقعية

طبعا بما إنى زملكاوى جدا وقبل كده مصرى كمان
زعلت جدا لما أسمع تراشق الألفاظ بين اتنين من كبار نجومنا المصريين فى الخارج
كل واحد نفسه غير صافية لأخيه ويضمر له بعض الحقد والغيرة
من الممكن أن يكون الموضوع بدأ من خلال وقيعة من الخارج
ولكن رد فعل كل واحد منهم هو أن يرد القول لأخيه بل يرد الصاع صاعين كمان وأصبح الموضوع شبيه بالحرب الباردة تخيلوا لو واحد منهم طلع وتنازل عن حقه ده لو كان له حق اساسا وطلع واعتذر على الهواء فى مثل جميل أوى بيقول {إن عزّ أخوك فهُن }

فى كلمة للإمام الشهيد حسن البنا بيقول

{مكسب الأصدقاء مقدم على مكسب المواقف}
يعنى لو فى موقف واختلفت مع زميل ممكن تتنازل عن حقك ف
ى الموقف ده وبكده هتكسب صديق
مش هينسى موقفك ده أبدا وخصوصا لو كان الحق معاك كمان وبكده تكسب صديق حميم ممكن يستمر معاك طول العمر


نرجع تانى للصحابة قدوتنا
الرسول عليه الصلاة والسلام كان جالس مع الصحابة وقال لهم
سيدخل عليكم رجل من أهل الجنة ودخل رجل عليهم من الأنصار وتكرر هذا الموقف أكثر من مرة
سيدنا عبدالله بن عمرو عجب من حال هذا الرجل وتعاهد ليعرف سر هذا الرجل
وتحجج بخلاف مع والده ليقيم معه فى المنزل ولما جلس معه فى البيت لم يلحظ جديدا على الرجل يؤدى الفرائض وبعض السنن مثل معظم الصحابة بل أن هناك من يجتهدون أكثر منه
بعد ثلاثة أيام أخبره سيدنا عبد الله بن عمروبالحقيقة ليخبره بالسر
فقال الرجل {لا شى غير أني أبيت ليس في قلبي غش على مسلم ولا أحسد أحداً من المسلمين على خير ساقه الله إليه،}
قال له عبد الله بن عمرو: تلك التي بلغت بك ما بلغت، وتلك التي نعجز عنها
حل بالفعل سهل ولكنا غافلون عنه لأن كل فرد منّا يتشدد فى حقه

ويقسم أن يأخذ حقه مضاعف كمان

فى موقف كمان

روي عن رسول الله صلى الله عليه وسلم أنه حث يوما على الصدقة فقام علبة بن زيد فقال: ما عندي إلا عرضي فإني أشهدك يا رسول الله أني تصدقت بعرضي على من ظلمني. ثم جلس فقال رسول الله صلى الله عليه وسلم بعد ذلك أين علبة بن زيد؟) قالها مرتين أو ثلاثا فقام علبة فقال له رسول الله صلى الله عليه وسلم أنت المتصدق بعرضك؟ قد قبل الله منك)
هذا الصحابى قد تصدق بعرضه على من ظلمه وقد قبل الله منه صدقته
هذا القول رأيته مرة أخرى فى إحدى المدونات المحببة لدى
وقد أعادت صاحبة المدونة قول هذا الصحابى
وأسعدنى هذا الموضوع جدا

أظن بإتباع تعاليم النبى هذه وصحابته معظم مشاكلنا وخلافاتنا ستحل بسهولة
فعلا الحل موجود ومتاح ولكن .........؟؟؟

86 رأيك يهمنا:

أحمد سعيد بسيوني 7 أبريل 2009 9:06 م  

مكسب الأصدقاء مقدم على مكسب المواقف

حكمة رائعة من حكيم

۩۝۩ Dr. Flavio ۩۝۩ 7 أبريل 2009 9:12 م  

موضوع رائع جدا يا محمد وانت بتستشهد بمواقف عظيمه جدا .. ياريت بس كل واحد فينا ينفذ ده واللي بنقول عليهم نجوم معتقدش حد فيهم هيهتم بحاجه زي كده لأنهم بيسعوا ورا حاجات تانيه

بس بيني وبينك ...


كل ده عشان لعبوا في النادي التيييييييت اللي بتشجعه

ههههههههههههههههههههههههههههههههههههه

عمر 7 أبريل 2009 9:16 م  

بسم الله الرحمن الرحيم
والله كنت متوقع اكون اول تعليق لأول مرة بس خير انا واحمد واحد

فعلا يا محمد لو كل واحد منا تقبل الاساءة بالإحسان كان وضعنا كأمة مسلمة وكشعب مصري خاصة تغير كثيرا

وكلنا عارفين قول الشاعر:
أحسن إلى الناس تستعبد قلوبهم
فطالما استعبد الإحسان إنسانا

وكما ذكرت : لنا في رسولنا - صلى الله عليه وسلم - وصحابته الكرام القدوة الحسنة
وفي هذا الموضوع أنصح قراءك الكرام بقراءة واحد من أفضل الكتب التي قرأتها في التعامل مع الناس وهو كتاب - استمتع بحياتك - لـ د محمد العريفي

تحياتي وحبي الدائمين

fnoonh 7 أبريل 2009 9:26 م  

جزاك الله كل خير دكتور عرفه على الموضوع الاكتر من رائع ده وجعله في ميزان حسناتك يوم القيامة

فعلا موضوع مهم ولازم نمشي في حياتنا ونعمل زي مارسولنا الكريم كان بيعمل نتبع سنته ونقتدي بيه
وساعتها مش هنخسر ابدا

دا الايام دي بقى الواحد لو غلط في التاني
التاني يرد على الكلمة بعشرة مش بزيها
ربنا يعافينا يارب
ويهدي كل الناس

تقبل خالص تحياتي وتقديري

واحد وخلاص 7 أبريل 2009 9:30 م  

موضوع جميل جدا كباقي مواضيعك,
لكن حاسس ان اختيار الموضوع ده النهارده ليه مناسبة معاك شخصيا,
لو فيه موقف حصل معاك جديد وضايقك ياريت تقوله علشان نستفيد منه,
وجزاك الله خيرا.

بنجاواتى 7 أبريل 2009 9:34 م  

السلام عليكم
والله يا دكتور العفو ده نعمة يمتن الله بها على الانسان وهو خلق يجب ان كل واحد يتدرب عليه حتى يناله
قال تعالى :
وان تعفوا هو اقرب للتقوى

وعلى فكرة نادى الزمالك ده نادى عريق ومش تييييييت يا عمنا!!!!!!

Ghreeb 7 أبريل 2009 9:59 م  

فعلا الحل موجود ومتاح ولكن
و لكن النفوس يوم بعد يوم بتتغير الحقد و الحسد بيزيد يوم بعد يوم ربنا يعفينا و يعف عنا يا رب العباد
تدوينة جميلة فعلا جزاك الله كل الخير

و بعيد عن الموضوع انا مش عارف ليه انا الوحيد الي حاسس ان ميدو مش لعيب كورة ممكن مذيع في الاعلام بس كورة مس ممكن و تصريحاته واضح انها غبرة من عمرو زكي الناجح الي حيروح نيوكاسل و يسيبهالهم خالص

موناليزا 7 أبريل 2009 10:15 م  

ربنا يكرمك وكان موضوعى تكملة لهذا الكلام الجميل
http://monaliza110.blogspot.com/2009/01/blog-post_25.html

ممكن توضيح:يعنى ايه يتصدق بعرضه؟
وايه معنى"ان عز أخوك فهُن"؟
ولكم منى خالص الشكر

بحـــر الدموع 7 أبريل 2009 10:49 م  

السلام عليكم

الحل موجود وماتح وظاهر للجميع ، بس إحنا بنحاول نغمض عينينا علشان ما نشوفه ،
يعني الحب في قلوبنا ، بس البعض بيحاول دمر هذا الحب وستبدله بالكره والبغض والحقد..
والله يا أخي حالنا منجميع الجهات لا يسر صديق ول عدو
في كل مناحي حياتنا متشتتين مهمشين ، قلوبنا مش على بعضينا ، بنخاف على مصلحة العدو أكبر من خوفنا على مصلحة أخونا المسلم
يا رب سلم سلم.

بارك الله فيك أخي د.عرفة ودمت في حفظ الرحمن

لا تنسوا اخوانكم في غـزة من دعائكم

||..بحــر الدموع..||

حازم النبراوي 7 أبريل 2009 11:10 م  

ما شاء الله عليك
دائما مواضيعك مميزة
تقبل تحياتى

حسام غانم 7 أبريل 2009 11:38 م  

فعلا والله يا عرفك

كلامك صححح جدا

والموضوع بسيط

بس محتاج تغيير طريقة التفكير في الخلافات دي

القدر و انا 7 أبريل 2009 11:52 م  

د.محمد
موضوعك رائع ياريت كلنا نعمل بيه
اكيد اللى يسامح حيكون اهدأ ونفسيته انقى
يعنى حتى لو تسامح فى حقه حيكسب نفسه
وهى دى قيم الاسلام التى نتمنى غرسها فى نفوس اولادنا
علمت ابنى يتسامح وله صديق فى النادى
اقسم ان ابيه وامه جادلونى اانى مخطئة فى حقه
وابنهم تعلم ان يرد الاهانة او الضرب او الشتيمة مضاعفة
ورايهم حتى لا يطلع ضعيف
الولد7سنوات ويضرب بالقدم واليد فى وقت واحد
وبلا ادنى تفاهم
هذا هو الجيل الجديد
عموما تحياتى على موضوعك الجميل يا زملكاوووووى

::Dr.ShaboMania:: 8 أبريل 2009 12:24 ص  

موضوع جميل ياعرفه .....الي الامام ان شاء الله

د. ياسر عمر عبد الفتاح 8 أبريل 2009 3:02 ص  

موضوع قيم ومفيد
وفى وقته
تسلم إيدك

norahaty 8 أبريل 2009 3:57 ص  

السلام عليكم ورحمة
الله تعالى وبركاته
وكمان صباح الخيرات
(وتلك التي نعجز عنها)
قالها ابن عمر رضى الله عنهما
ساعة الغضب والعياذ بالله الواحد
مابيبقى شايف الا رد (الصاع صاعين)!
لكن لو قدر يمسك نفسه ولو دقيقة او اتنين
اكيد اكيد اكيد وكمان واحدة اكيد
حيلاقى الحكاية بسيطة وما تستحقش
حتى مجرد التفكير فيها لكن
تعمل ايه فى الغضب؟؟

norahaty 8 أبريل 2009 3:59 ص  

الحمد لله اننا اطمئننا عليك
كنت قلقانة من المشاكل اللى
سمعت انها حصلت فى المحلة ربنا يستر
على الجميع يارب .اميييييييييييين

تامر علي 8 أبريل 2009 5:45 ص  

والله في هذا الزمان فعلاً استطيع ان اقول ان الموضوع ده صعب جداً ..خصوصاً ان الناس بتصنف اللي له وازع ديني بيمشي بيه على انه ضعيف أو (أهبل) مش بياخدوها من زاوية الدين أو الأخلاق وساعتها الانسان يتحول الى (ملطشه):)

بصراحة أنا رأيي ان الانسان لازم يوازن بين المواقف وياخد موقف حازم لما يستدعي الأمر ..أما في التعامل مع ذوي الأرحام والقرابات والمقربين فطبعاً متفق معك تماماً

تحياتي وتقديري

Sunlight 8 أبريل 2009 5:50 ص  

موضوع جمييل جعلنى افكر فى اشياء كثييره بس ساعات كتييره اووى صعب والواحد من كتر ما يكون مثلا انجرح من الناس بيبقى صعب اووى خلاص اللى هيا عملية انفجار
ياريتنا نقتدى برسولنا
ربنا يبارك فيك

TIMMY !! 8 أبريل 2009 6:15 ص  

عندك حق و الله يا د.عرفة ,

كانوا بيقولوا لنا زمان : " اللي بيحترم , بيحترم نفسه " ,

يعني لما بنعامل الآخرين كويس و باحترام , فده بيرتد علينا مرة تانية ,
و طبعا العكس بالعكس ,










آه معلش يا د.عرفة ,
حديث " لا يكن أحدكم إمعة " أنا لسه حاطه في آخر بوست عندي , و كاتب إنه ضعيف , و لا تصح نسبته لرسول الله صلى الله عليه و سلم ,
" لا تكونوا إمعة ، تقولون : إن أحسن الناس أحسنا ، و إن أساؤوا أسأنا ، و لكن وطنوا أنفسكم ، إن أحسنوا ( أن تحسنوا ) ، و إن أساؤوا أن لا تظلموا "

الراوي: حذيفة بن اليمان - خلاصة الدرجة: ضعيف - المحدث: الألباني - المصدر: ضعيف الجامع -

الصفحة أو الرقم: 6271

جزاك الله خيرا

د/عرفه 8 أبريل 2009 9:51 ص  

أولا انا سعيد جدا
ان أول ثلاث تعليقات من زمايلى فى الدفعة
بصراحة حاجة تفرح جدا
بشكركم جدا وكمان زمايلى اللى اول مرة يزورونا
ومعانا فى الدفعة برضه زى دكتور محمد

أحمد سعيد منورنا يا أحمد وسعيد بانك تكون اول تعليق
فعلا قول حكيم من رجل حكيم
تسلم

د/عرفه 8 أبريل 2009 9:53 ص  

دكتور فلافيو
اهلا بيك محمود
فعلا النجوم دول عندهم اهتمامات تانية وهما قدوتنا اللى لازم نقتدى بيهم على طول
بالنسبة للنادى اللى بنشجعه
ملكش دعوة بيه خالص
يا متعصب
ههههههههههههه

د/عرفه 8 أبريل 2009 9:56 ص  

عمر اهلا بيك
وتعليقك جميل فعلا يثرى الموضوع
فعلا كان حالنا اتغير كتير
بالنسبة للكتاب انا مستعيره من واحد صاحبى فعلا بالصدفة كده
بس لسه مقريتهوش
بس ناوى ان شاء الله اقراه
تسلم عمور

د/عرفه 8 أبريل 2009 10:02 ص  

أفنان
شكرا لتعليقك واهتمامك
فعلا الواحد الايام دى حريص انه ياخد حقه مرتين وتلاتة ويرد الإساءه باكثر منها
علشان كده مشاكلنا بتزيد ومش بتقل
سعدنا بتواجدك معانا

د/عرفه 8 أبريل 2009 10:04 ص  

واحد وخلاص
اللى اظن انه احد زمايلى برضه
سعيد جدا باهتمامك
ولكن الموضوع مش شخصى ابدا
الكلام ده انا مقتنع بيه جدا
وبحاول انه يكون شعارى
ممكن اكون اتاثرت شوية بخلاف زكى وميدو
ولكن الموضوع مش شخصى ابدا

د/عرفه 8 أبريل 2009 10:11 ص  

بنجاواتى حبيبى
دكتور.........
احد اصحابى اللى اسعدونى فى البوست ده
فعلا هو خلق الواحد لازم يعود نفسه عليه
وفعلا النادى ده عريق ومش عايزين دخلاء علينا
ههههههههه

د/عرفه 8 أبريل 2009 10:15 ص  

غريب
اهلا بيك واسعدنا مرورك
فعلا الحقد والغيرة من اخطر امراض العصر
ربنا يبعدهم عننا

بالنسبة لميدو هو فعلا شكله هيكون اعلامى جامد هو بتاع شو جامد اوى وبالفعل اظن انه اشنغل فى الاعلام وحلل ماتشات فى قنوات رياضية عالمية
وبالنسبة لعلاقتهم
اظن ان كلاهما مخطىء
لان كل منهما قلبه غير صافى لزميله
اظن ان عمرو برضه كانت عنده غيره من شيكابالا لما تالق فى الزمالك
الغيرة دى مرض صعب ربنا يصرفه عننا

د/عرفه 8 أبريل 2009 10:23 ص  

موناليزا
أهلا بيكِ
وسعيد باهتمامك بالمواضيع عندنا
موضوعك جميل وهو فى نفس السياق فعلا
بالنسبة للقول القائل
ان عزّ أخوك فهُن
معناه ان اصبح اخوك عزيز يعنى متمسك بقوله ومتمسك بحقه وبشدة
فهن اى تهاون معه وكن لين فى حوارك وتعاملك معه لانه متمسك بقوله وبحقه جدا
يارب تكون فكرتى وصلت


بالنسبة لقول الصحابى
انه تصدق بعرضه
اى انه متسامح مع اى شخص يخوض فى عرضه
وهو اعلى درجات التسامح اللتى نتمنى ان نصل اليها جميعا
وياريت تتطلع على بوست خيخة اللى انا زودته فى الموضوع
http://nouranelshamly.blogspot.com/2009/03/blog-post_14.html

يارب تكون الفكرة وصلت
ولو فى اى استفسار كمان انا مستعد
سعيد بحرصك على الفهم
تحياتى

د/عرفه 8 أبريل 2009 10:28 ص  

بحر الدموع
سعيد بتعليقك جدا
فعلا للاسف الوضع مقلوب حاليا اصبحنا نتعزز على اخوانا بينما نتهاون فى حقوقنا مع اعدائنا
شوف وصف القران لاصحاب النبى
{محمد رسول الله والذين معه اشداء على الكفار رحماء بينهم }
ولكن الوضع بالمقلوب حاليا
تلم بحر الدموع وربنا ينهى الدموع دائما حبيبى

د/عرفه 8 أبريل 2009 10:33 ص  

حازم النبراوى
اهلا بيك حازم
سعيد بتعليقك جدا
فعلا الموضوع محتاج شوية تغيير من طريقة تفكيرنا
تسلم

د.عصماء 8 أبريل 2009 10:41 ص  

جزاك الله خيرا مقال رائع ولا تنسى اخى ان اقل مراتب الحب فى الله سلامة الصدر وهم من السبعة الذين سيظلهم الله فى ظله يوم لا ظل الا ظله.(رجلان تحابا فى الله اجتمعا عليه وتفرقا عليه)ربنا ولا تجعل فى قلوبنا غلا للذين آمنوا.رزقنا الله واياكم قلبا سليما منيبا

د/عرفه 8 أبريل 2009 10:45 ص  

حسام غانم
اهلا بيك دكترة
طبعا الحل بادينا ولازم نعيد طريقة تفكيرنا فى الموضوع
تسلم حسام

د/عرفه 8 أبريل 2009 10:47 ص  

القدر وانا
اهلا بيك وسعيد بمرورك على المدونة
المهم بالنسبة لابن حضرتك
مهم اوى ان احنا نربى الطفل على التسامح
بس برضه مهم اوى انه يعرف يحمى نفسه ويحافظ على نفسه
ويسامح من منطلق انه قوى والعفو عند المقدرة
برضه مهم ان الابن مش يطلع ضعيف
ربنا يعينك على تربيته التربية السليمة

د/عرفه 8 أبريل 2009 10:50 ص  

dr shabomania
اهلا بيك دكتور محمد سعيد اوى بزيارتك الاولى دى
ويارب مش تكون الاخيرة
ربنا يكرمك حبيبى

د/عرفه 8 أبريل 2009 10:51 ص  

دكتور ياسر
سعيد بتعليقك وتواجدك معانا
ربنا يكرمك

د/عرفه 8 أبريل 2009 10:53 ص  

دكتورة نور
بتنورين دايما
سعيد باهتمامك بالمواضيع هنا اوى
فعلا اهم شىء ان الواحد يمسك نفسه وقت الغضب
وده اهم شىء

بالنسبة للمحلة اظن ان السنة دى الوضع هادى جدا
عكس السنة اللى فاتت
ربنا يكرمك دكتورة

د/عرفه 8 أبريل 2009 11:16 ص  

تامر على
اهلا بيك تامر
سعيد بوجودك معانا
المشكلة ان الانسان المتسامح بيقال عليه ضعيف
علشان كده بقول ان الواحد يعفو من منطلق قوة
يعنى يكون
عفو عند المقدرة
واظن ان كده مناسب اوى
تسلم تامر

د/عرفه 8 أبريل 2009 11:18 ص  

sunlight
سعيد بتواجدك معانا
نورتينا
فعلا الاقتداء بسنة النبى هتريحنا من اشياء كتيرة اوى
ونحاول كده نعفو عن اصحابنا
هنلاقى راحة كبيرة
سلام

د/عرفه 8 أبريل 2009 11:24 ص  

TIMMY
اهلا بيك هندسة سعدنا بتواجدك معانا
بالنسبة للحديث
اولا انا مش عالم حديث الحديث اللى بسمع عنه ومش عارف نصه بدور عليه فى جوجل وبجيب نصه بالكلمل وفقا لما هو مذكور فى المواقع والمنتديات الاسلامية
ولو كتبت الحديث كما هو
هتلاقيه موجود
حتى هتلاقيه فى ردود بعض المفتيين
والله اعلم والله انا بحاول اجيب النص بالكلمل خصوصا
فى الاحاديث والايات القرانية
والله اعلم

د/عرفه 8 أبريل 2009 11:26 ص  

د. عصماء
سعداء بتعليقك على الموضوع
وشكرا لاهتمامك
ورزقنا الله واياكم منزلة الحب فى الله ونكون من الذين يظلهم الله فى ظله يوم لا ظل إلا ظله
سلام

وردة 8 أبريل 2009 1:19 م  

حلو اووووي الموضوع يا دكتور
ربنا يكرمك
العفو عند المقدرة
جميل لو نقدر نتكلم مع بعض بنفوس صافية وقلوب مفتوحة
في مقولة دايما بتتردد جوايا صحيح مش بعمل بيها دايما لاني مش ملاك بس اهه ساعات يعني بأخد بيها
التمس لاخيك 70عذر فأن لم تجد فأعلم ان لديه عذر انت لا تعرفه
ربنا يكرمك
ويجعل البوست ده في ميزان حسناتك
سلام

iBRAHiM sAllAM 8 أبريل 2009 2:31 م  

أيوة كده يا محمد , مزل الموضوع بقى :)
أنا كنت شفته في الريدر من كام يوم بس شكلك رجعت في كلامك و شيلته , و آديك رجعته تاني و الحمد لله :) ,

بالنسبة لكلامك , أتفق معاك طبعا ,
بس انت عارف , كلنا أكيد هنتفق معاك , لأن الكلام صح , المشكلة بتكون في التطبيق ,

فكرني كلامك بقصة كنت قرأتها عن عمر بن عبد العزيز أن رجلا سبّه , فقال له عمر : " لولا يوم القيامة لأجبتك " !!

رحم الله الجميع ,
و رزقنا اتباعهم على طريق الخير ,

نبض الحياة 8 أبريل 2009 3:57 م  

موضوعك رائع ومفيد جدا ليتنا حقا هكذا
وانا مرة قريت حكمة وكان نفسى تكون امام اعيننا جميعا وانا كتباها فى مدونتى وهى
كن كالنخيل مرتفعا عن الاحقاد وان رماك شخص بحجر فلا ترمى الا اطيب الثمار
لكن نصحنى كتير ان الحكمة دى مش مع كل الناس وللأسف طلع دة صحيح
بس برضه لازم يكون لنا منوال واحد فى التعامل
ربنا يهدينا جميعا للخير حيث كان .
وعلى فكرة انا والنت لسة كويس عندى كان بوست التاج عندك مش بيفتح وللأسف بعدها النت بقى مش شغال فمعرفتش اعلق ع التاج .
دمت اخى الفضل بخير .

محمد القويري 8 أبريل 2009 6:41 م  

أخي د.عرفة
بداية.. تحياتي على هذا الموضوع الموفق والهام
في الحقيقة المرء فعلاً يحتار ..
أنا طيب أوي مع الطيب - هذي سهلة وكلنا نقدر عليها
وطيب مع ابن ......... - هنا الصعوبة
برأيي الصعوبة تكمن في كيفية ضبط النفس ومقاومة المشاعر الانتقامية والشيطانية .. من ناحية أخرى عدم استشعار الأجر وكذلك غياب القدوة الحية ..
ويبقى في النهاية أن قمة السمو الأخلاقي أن تعفو عمن ظلمك وتحسن غلى من أساء إليك ..

تحياتي

فتافيت 8 أبريل 2009 7:31 م  

هو فعلا موجود ومتاح ولكن مافيش حد عايز ينفذه
ربنا يبارك فيك بوست حلو اوي بجد.. جعله الله بيمزان حسناتك

TIMMY !! 8 أبريل 2009 9:54 م  

شكرا جزيلا يا د/عرفة ,
و أنا برضه مش عالم حديث ,
بس بدل ما بدور في جوجل و أجيب من المنتديات اللي ممكن يكون فيها أحاديث ضعيفة ,
بدور في موقع متخصص بيجيب لي نص الحديث برضه ,
و بيجيب لي كمان إن كان صحيح و لا ضعيف ,
عموما أنا ببحث في موقع :
http://www.dorar.net

http://www.dorar.net/enc/hadith/%D8%A3%D8%AD%D8%AF%D9%83%D9%85+%D8%A5%D9%85%D8%B9%D8%A9/+wj

و جزاك الله خيرا على الاهتمام و التحري في نقل حديث رسول الله , ربنا يجازيك خير على ذلك ,
و شكرا مرة تانية على ذكرك للمدونة في مدونتك الأخرى :) ,

حياتى نغم 8 أبريل 2009 9:55 م  

السلام عليكم / موضوع مهم جداً يا دكتور عرفه ويبين كرمك وسماحتك وجميل أخلاقك ، قال تعالى { ولمن صبر وغفر إن ذلك لمن عزم الأمور } جميل أن يظل الفرد يحتفظ بجميل أخلاقه ولا يظلم أو يحقد أو يقبح أحد ، ولكن أن ينسى ويغفر ويتحمل الأذى والقسوة والشر فهو أمر صعب جداً ومن عزم الأمور ولا يتحمله إلا شديد الإيمان جعلنا الله منهم آمين وأصلح حال كل المسلمين . وأحب أن أسجل إعجابى بإستشهادك بكلمة للإمام الشهيد حسن البنا رحمه الله .
وفقك الله فى كل شئونك يا دكتور .

د/عرفه 9 أبريل 2009 12:27 ص  

وردة
سعيد بزيارتك جدا
وربنا يتقبل مننا
وحكاية التماس الاعذار دى مش موجوده فعلا دلوقتى خالص
تحياتى

د/عرفه 9 أبريل 2009 12:37 ص  

ابراهيم سلام
سعيد بتواجدك معانا
معذرة للخل اللى حصل قبل كده
انا مكنتش جهزت الموضوع كله واتنشر عن طريق الخطأ بس
وبعدين مهو انت نرت التاج وبعدين مش لاقين البوست ده خالص
وشكلك مش حابب الهدية
هههههههههههه
بالنسبة للموضوع ربنا يعينا على تنفيذاوامر النبى
واتباع صحابته

د/عرفه 9 أبريل 2009 12:39 ص  

نبض الحياة
سعيد بتعليقك معانا
واهلا بيكِ
مثال رائع ما ذكرتيه فى تعليقك
بالنسبة للموضوع السابق
ولا يهمك
بس يارب يكون كان معقول

د/عرفه 9 أبريل 2009 12:43 ص  

محمد القويرى
اهلا بيك محمد
وسعيد انك كنت عايز تشوف الموضوع لما ظهر عن طريق الخطأ قبل معاده
هههههههه
المهم فعلا اصعب شىء هو كظم الغيظ وخصوصا عند الغضب
ربنا يرزنا واياكم الخلق الحسن

د/عرفه 9 أبريل 2009 12:49 ص  

فتافيت
شكرا لزيارتك
وده من ذوقك بس
وربنا يتقبل ان شاء الله

نور الاسلام 9 أبريل 2009 1:51 ص  

السلام عليكم

اعتقد يا اخى ان سبب من اسباب تأخرنا هو اننا سوء الاخلاق..يعنى بعيدا كمان عن انك بتخسر ناس كتير ..انت بتأخر الامه ..ولا نهضه لامه بدون حسن خلق...للأسف فى بعض من الناس الملتزمين بتقع فى مثل هكذا مواقف ..وده اللى انا بحزن ليه بشده ..لأن هؤلاء بمجرد التزمهم اصبحوا قدوه ...وبالتالى هم يسيئوا لغيرهم من الملتزمين..اللى عايزه اوصله انك لما بتتعامل مع الناس برحمه وتسامح ده ما يبقاش معناه ((هبل وطيبه خيبه))زى ما بيقولوا ..لا ده ممكن يغير ناس كتير حوليك ويجبرهم على احترامك..يعنى مثلا انا كان ناس قربين منى بيعملونى بطريقه مش كانت بتعجبنى ..وبما انهم ناس قربيين منى ما كنش ينفع اتجنبهم وفى نفس الوقت ما كنش ينفع اعاملهم بنفس الاسلوب لانى برده اخلاقى مش تسمح بكده ..وبدأت معاهم بطريقه جميله اوى وهى انى اعمالهم بالحسنى اى اخذ النيه فى الاول لله ..وبعدين بقيت اجبلهم هدايا من باب حديث الرسول عليه الصلاة والسلام تهادوا تحابوا ..وبالكلام الحسن ..والله مش عايزه اقولك هما بيحبونى دلوقتى اد ايه ..الحمد لله يعنى اقصد انى الكلام اللى بيقول ابقى كويس مع الكويس وحش مع الوحش ده كلام غير صحيح تماما ..والمثل اللى انا حاكيته يوضح كده ..

جزاكم الله خيرا على البوست ..جعله الله فى ميزان حسناتك ...

معذرة على الاطاله .

د/عرفه 9 أبريل 2009 7:34 ص  

TIMMY
جزاكم الله خيرا
شكرا على حرصك هندسة
سعيد على حرصك على صحة الاحاديث وان شاء الله نتاكد من صحتها من هذا الموقع الجميل
ومنتظرين دايما ابداعاتك علشان نتكلم عنها
تحياتى ليك هندسة

د/عرفه 9 أبريل 2009 7:35 ص  

حياتى نغم
سعيد بزيارتك ويا مرحب بيكِ
فعلا هذا من عزم الامور يارب ثبتنا دائما على الحق
وكلمة فعلا حكيمة من رجل حكيم
تحياتى

د/عرفه 9 أبريل 2009 7:41 ص  

نور الإسلام
سعيد بزيارتك
وسعيد اكتر بمشاركتك الايجابية وتفاعلك مع الموضوع
قصتك واقعية وياريت الناس كلها تتعلم منها كمان
تحياتى

مذكرات مشاغب 9 أبريل 2009 11:56 ص  

انت طبعا كلامك صح جدا جدا
لكن الانسان كتير جدا بتيجي عليه لحظات مبيقدرش يفكر كويس في اللي بيعمله
وبيتصرف بشكل خطا
اتمنى فعلا ان الواحد يقدر فعلا يفكر بعقله صح في كل المواقف

تحياتي

تلميذة سلمان الفارسى 9 أبريل 2009 12:12 م  

جزاكم الله خيرا
أذلة على المؤمنين أعزة على الكافرين
لو طبقناها لتبتدل الحال تماما

ghorBty 9 أبريل 2009 8:49 م  

السلام عليكم

ما شاء الله بجد قلت كل حاجه

بس كل دا هينفذ امتي ؟ كل شئ سهل ومتاح بس يبقي التنفيذ ودا لازم ينبع من داخل كل واحد فينا

بيستوقفني قول الله تعالي في سورة الشوري

(وَجَزَاء سَيِّئَةٍ سَيِّئَةٌ مِّثْلُهَا فَمَنْ عَفَا وَأَصْلَحَ فَأَجْرُهُ عَلَى اللَّهِ إِنَّهُ لَا يُحِبُّ الظَّالِمِينَ{40} وَلَمَنِ انتَصَرَ بَعْدَ ظُلْمِهِ فَأُوْلَئِكَ مَا عَلَيْهِم مِّن سَبِيلٍ{41} إِنَّمَا السَّبِيلُ عَلَى الَّذِينَ يَظْلِمُونَ النَّاسَ وَيَبْغُونَ فِي الْأَرْضِ بِغَيْرِ الْحَقِّ أُوْلَئِكَ لَهُم عَذَابٌ أَلِيمٌ{42} وَلَمَن صَبَرَ وَغَفَرَ إِنَّ ذَلِكَ لَمِنْ عَزْمِ الْأُمُورِ{43)

فيسلام لو كل واحد صبر وغفر لمن اساء اليه سوف يسود الحب بيننا ولم نسمع ما نسمع عنه

واتعجب ممن يرفع يده ويقول ربي اغفري وارحمني وهو لا يغفر ولا يرحم من هم دونه

ربنا يردنا اليه مردا جميلا

(ومن عمل صالحا فلنفسه ) اللي بيعمل بيعمل لنفسه مش لحد تاني ..

بوركتم وتقبل الله منكم

زهرة الأمل 9 أبريل 2009 11:51 م  

جزاك الله خيراً يا دكتور

التسامح صفه جميله جداً بس مش موجوده كتير حالياً

zainab 10 أبريل 2009 12:35 ص  

أخى د/ عرفه

جزاك الله خيرا و جعله فى ميزان حسناتك

تحياتى

د/عرفه 10 أبريل 2009 8:54 ص  

مذكرات مشاغب
دكتور احمد
وحشنى يا احمد فعلا من زمان
فعلا الواحد احيانا بيحتاج وقت شوية علشان يفكر كويس فى اللى بيعمله

د/عرفه 10 أبريل 2009 8:58 ص  

تلميذة سلمان الفارسى
فعلا آية عظيمة
ولكن غير مطبقة فى حياتنا للأسف
اسعدنا تواجدك معانا
ومنتظرينك دايما

د/عرفه 10 أبريل 2009 9:03 ص  

غربتى
ما شاء الله
دائما ما تكون ردودك إثراء للموضوع
جزاكم الله خيرا
وبنسعد بتعليقك دايما

د/عرفه 10 أبريل 2009 9:04 ص  

زهرة الأمل
سعدنا بمرورك
ويارب يديم هذه الصفة عندنا جميعا
جزاكم الله خيرا

د/عرفه 10 أبريل 2009 9:11 ص  

زينب
اهلا بيك
اسعدنا مرورك جدا
وربنا يتقبل ان شاء الله

أنا حر 10 أبريل 2009 2:23 م  

موافقك جدا ومؤيدك لاني زملكاوي جدا زي حضرتك ولان كمان الاخلاق يجب ان تسود في كل تصرفاتنا
تحياتي

جارة القمر 10 أبريل 2009 10:18 م  

موضوع أكثر من رائع ومفيد جدا
تناولت مايحدث بحياتنا ومررت بحياة الصحابة والرسول عليه الصلاة وأفضل السلام
استمر بالعطاء
باركك الله

kalamfady 11 أبريل 2009 3:36 ص  

عندك حق يا دكتور لا تكن امعه

د/عرفه 11 أبريل 2009 9:34 ص  

انا حر
سعدنا بمرورك وتواجدك معانا
ولازم ان الخلق الحسن ده يكون شعارنافعلا

د/عرفه 11 أبريل 2009 9:35 ص  

جارة القمر
اهلا بيكِ ومنورانا
شكرا على الإطراء

د/عرفه 11 أبريل 2009 9:38 ص  

دكتور محمد كلام فاضى
سعدنا بتواجدك معانا
ومنتظرين زياراتك على طول

محمد الجرايحى 11 أبريل 2009 2:57 م  

الأخ الفاضل: د/ عـــرفة
السلام عليكم ورحمة الله وبركاته
أحييك على هذا الطرح الطيب والرائع وعظيم الفائدة
نعم أخى إسلامنا ملئ بالكنوز ولكننا مع الأسف نجهلها كما أنه يقدم لنا الحلول لكل مشكلاتنا المستعصية
اللهم ارشدنا سبل الهداية والرشاد
اللهم آمين

norahaty 11 أبريل 2009 3:13 م  

السلام عليكم ورحمة الله تعالى وبركاته
ومعلش دكتور عرفة وعفواً للازعاج
لكن حبيت اخبرك ياولد عمى عرفة
انى انا جاوبت التاججججججج الهدية
بتاع حضرتك ويسعدنى ويشرفنى تيجى
تشوف بت عمك الدكتورة جاوبت ازاى
فى الامتحان وجالت ايه؟عند الامتحان
يكرم المرء او يهان وبأذن الله ربنا
حيكرمك انت وكل الطلبة فى الطب وغيره
ربنا ما بيخيب ابدا تعب او دعوة انسان
سلام الان وحاشوفك عندنا بالبلوج حين ما تسمح
ظروفك.سلااااااام

ريمان 11 أبريل 2009 6:33 م  

السلام عليكم

مش عارفه قاولك ايه يا دكتور

بس عارف فى الزمن ده الواحد بقه بيفضل انه يعامل كل واحد بمعاملته

وبيعطى لكل واحد قدره

محمد عبد الباسط 11 أبريل 2009 8:05 م  

موضوع رائع واستشهادات اكثر من رائعه لاخ احتسبه عند الله من الفائزين

دعواتك اخى الكريم

عندى ليك بقى خبر بمليون جنية

فى واحد زملكاوى زميلنا ومتعصب كمان كان جاى معانا ماتش الاهلى والاتصالات من يومين وكان قاعد فى مدرجات الاهلى شكله قلب اهلاوى عايزك تشوف الموضوع ده لاحسن لو سكت ممكن يتطور ويبقى من مشجعى التراس كمان

حم كبير

محمد عبد الباسط 11 أبريل 2009 8:06 م  

نسيت اقول لك عندى صور تثبت صحه كلامى مصورينه عشان تبقى حجه عليه

معتز شاهين - باحث تربوي 11 أبريل 2009 9:50 م  

أنا حتكلم من خلال تخصصي يادكتور
نفسيا اللي لا يحمل هم ولاهو ( مقفول ) من فلان ولا علان
بيبقى صحيح بدنيا وجسمانيا ونادرا ماتصيبه الأمراض
يعني حتى لو مكنتش مهتم بصديقك ومش عايز تخسره ياسيدي اهتم بصحتك
الله ينور بوست هايل ويارب يكون في ميزان حسناتك
ويبقى التواصل يادكتور

محبة الرحمن 11 أبريل 2009 10:18 م  

ما ذاد العبد عفوا الا عزا

ربنا يصلح قلوبنا ولا يجعل فيها غلا للذين امنوا

والله نفسى بجد نكون كده

يكون عندنا تسامح وتقبل للاخر

جزاكم الله خيرا على الموضوع

د/عرفه 12 أبريل 2009 1:39 ص  

استاذ محمد الجرايحى
اهلا بيك
ومنور المدونة
فعلا الدين بتاعنا فيه كل شىء محتاجينه

د/عرفه 12 أبريل 2009 1:43 ص  

دكتورة نور
اهلا بيكِ
سعيد بحرصك على تنبيهى
وانا مهتم طبعا حتى من غير ما تقولى
وطبعا اجاباتك
متميزة جدا
تطلعى بيها الاولى وبمرتبة سفنج جامدة
هههههههههه

د/عرفه 12 أبريل 2009 1:45 ص  

ريمان
سعيد بزيارتك
ومنودرة المدونة
ممكن الواحد يعامل الناس بطرق مختلفة
بس جميعها متوافق مع الدين وبالخلق الحسن
اظن ان سوء خلق الناس حوالينا لا يجرفنا لان نكون مثلهم

د/عرفه 12 أبريل 2009 1:47 ص  

محمد عبد الباسط حبيبى
منور يا محمد
جزاكم الله خيرا على الاطراء الجميل ده

وبعدين صاحبنا الزمالكاوى
ده لما ابقى اشوفه
يظهر انكم اديتوله مخدر ولا حاجة
هههههههههههه

د/عرفه 12 أبريل 2009 1:48 ص  

معتز شاهين
اهلا بيك استاذ
منورنا برايك السليم جدا
ياريت الناس تعمل بيه
شكرا لزيارتك

د/عرفه 12 أبريل 2009 1:49 ص  

محبة الرحمن
سعيد بزيارتك الأولى للمدونة
بجد منورانا جدا
كلامك مظبوط
العفو عند المقدرة لا يزيد الفرد الا عزا
شكرا لزيارتك

احمد 16 أبريل 2009 12:13 م  

السلام عليكم ورحمة الله وبركاته
ماشاء الله عليك د. عرفة

نعك صفاء النفوس وسلامة القلب تجاه الناس
مفتاح لكل خير ..

بارك الله فيك

أخوك / احمد

تأثير الفراشة 22 مايو 2009 9:34 م  

بوست جميل جدا يا دكتور، أحيى حضرتك عليه

المعانى و المواقف اللى حضرتك ذكرتها أكثر من رائعة و ربنا يعيننا على التسامح
أشكرك جدا لأنك عرفتنى بالبوست و أسعدتنى زيارة حضرتك للمدونة

جزاك الله خيرا

إرسال تعليق