1aim

منى وخالد وصبحى

2011-06-02T18:10:00.005+02:00

أتفهم إنه خطاب أوباما مثلا يحظى بتغطية كبيرة
ولكن الذى لا أفهمه إنه لقاء واحد لشخص ما يتم تقطيعه لأكثر من جزء ونصنع بها فديوهات على اليوتيوب لتتم نشرها
ونناقش هذا الكلام لأكثر من أسبوعين متواصل فى 50 لفاء تلفزيونى وأكتر من ३०० مقال فى الصحف
زمان وأنا صغير كنت بتفرج على سلسلة أفلام (فانتازيا) بتصور العماليق وبعد كده الأقزام

لم أتفهم وجود أشخاص بتلك الأحجام
سألت ماما وقتها؟هو فيه ناس بالحجم ده ؟
فكان ردها إنهم نفس الأشخاص بس مجرد بنقرب الكاميرا أوى أو نبعد الكاميرا أوى
هذا هو تعامل الإعلام حاليا مع أى خطأ خصوصا من التيار الإسلامى
الخطأ الصغير نقعد ننقاشه ونتكلم فيه وبعد مناقشته ننقاشه تانى وبعد كده نعيد سرده وبعد كده نعمله فديوهات وبعد كده نجمع الفديوهات دى ونعمل فديو أكبر بالقديم والجديد
لغاية لما نوصل للناس كلها المعنى اللى الإعلام عايز يوصله
فيه مثل زمان بيقول (الزن على الودان أمر من السحر )
وأنا فعلا فى فترة من الفترات بدأت أقتنع إنه السلفيين عالم متوحشة فقدوا عقولهم
طيب أعمل إيه أفتح التلفزيون دول قطعوا ودان واحد أفتح الجرايد دول هدموا أضرحة أفتح النت دول إتظاهروا قدام الكنيسة وإقتحموها وحرقوا اللى فيها

ولغاية لما عرفت الحقيقة بعد كده وإنه كل اللى إتقال ده لا علاقة لهم به

وسألت نفسى طيب إيه السر للهجوم والتضخيم والتهويل ده؟

نرجع للقاء الشهير إياه بتاع العاشرة مساءا (منى وخالد وصبحى ).؟

فى البداية شعرت إنه إختيار البرنامج لصبحى صالح فى الوقت ده بالتحديد إنما هو إختيار لأسد جريح لتعميق جرحه والقضاء عليه نهائيا

صبحى صالح فى مؤتمره الشعبى خانه التعبير عن مشروعه الإسلامى من الممكن إستعمال نفس اللغة فى لقاء إخوانى مغلق

هتكلم فى ثلاث نقاط :-

الأولى :-

هل صبحى أخطأ فى حواراته سواء قبلها أو بعدها ؟

أكيد طبعا فيه غلط لا يوجد إنسان معصوم

غلط فى إستعمال الآية القرآنية (أتستبدلون الذى هو أدنى بالذى هو خير ) ولما حاول يصلح كلامه فى البرنامج قال يعنى ياخدوا بنات من على الرصيف

ولكن فى نفس الوقت كلامه اللى كان موجه للإخوان غرضه النصيحة

مثلا زى أيام زمان لما كانوا بيتجوزوا من نفس العيلة واللى يخرج من العيلة يكون عيب

أو حبه أن تكون زوجته عونا له فى الدعوة والحفاظ على نفس مستوى الإلتزام عنده من باب فاظفر بذات الدين

أما حكاية الإستعلاء أو العرق الطاهر ؟

فهى كلمات لا محل لها فى قاموس الإخوان فالبنا نفسه صاحب القول الشهير (كم فينا وليس منا وكم منا وليس فينا ) وجميع الإخوان يدركون إنه يوجد الكثير والكثير خارج الإخوان وأفضل منهم

فالأصل هو رضا الله عزوجل فرب أشعث أغبر ولو أقسم على الله لأبره

طيب رد فعل الإخوان إيه ؟

أولا :- الإخوان بيدافعوا عن دعوة وعن منهج مش بيدافعوا عن أشخاص .

الشخص يخطىء ويصيب ولكن منهج القرآن والسنة هو الأساس

ثانيا:- نحن نثق فى شخص صبحى صالح ولكن هذه الثقة ليست معناها أن نصدق على جميع أقواله وأفعاله

الثانية:-

موقف د خالد منتصر ....؟

هذا الرجل صاحب فكر علمانى كاره لأى تواجد دينى أو رأى شرعى فى الحياة العامة فكره هذا من نوع (دينك جوه بيتك أو مكان عبادتك ملناش دعوة بيه )

وأى متتبع لمقالاته سيجد الكثير والكثير من الأخطاء الرهيبة ويكفى هذا المقال للحكم على طريقة تكفيره

ويكفى كذلك رد دار الإفتاء هذا على مقولته الشهيرة فى اللقاء إيه دخل الله فى السياسة

الثالثة :-

موقف منى الشاذلى فى البرنامج ؟

الطبيعى فى الإعلامى أن يكون محايدا ويتخلى عن ميوله الشخصية خصوصا فى المناظرات الفكرية

منى وقعت فى خطأ فادح عندما غضبت واتشنجت فى البرنامج لتؤكد إن صبحى صالح قد حلف بالله كذبا هى أكدت ذلك رغم إنه فيه إحتمالية إن الراجل لم يسمع إتصالك الهاتفى أو إنه قد نسى كلامك أو لم يكن يعملم أنها مناظرة بهذا الشكل فيها القديم والجديد وحساب على كل كلمة وحرف بالفعل كانت (محكمة تفتيش )

تأكيدك للمشاهد لإحتمال واحد وتعمدك تشويه الضيف وإحراجه والتأكيد على ذلك إنما هو موقف بعيد تمام عن المهنية وعن الحياد الإعلامى

الجماعة3

2011-06-02T01:30:00.004+02:00

لا توجد جماعة معصومة .....ولا يوجد شخص فوق النقد
ولا يحق لأحد أن يحتكر الحديث بإسم الدين
_طيب إيه لازمة الجماعة مهو كلنا مسلميين ...؟
_ دول مجرد أشخاص بتتجمع بتجمعهم أهداف ومبادىء واحدة (ناس حلمها ترجع حضارة الإسلام اللى نورت أوربا _ ترجع للأمة مكانتها_إنه الدين مش مجرد حركات أو تلاوات وخلاص ده منهج حياة )
الهدف الكبير صعب يحققه واحد أو إتنين لازم تكون فيه مجموعة تعيش الحلم وتحلم بيه
_يا عم دول ناس عايزة توصل للسلطة وبيستغلوا الدين وخلاص ...؟؟
حضرتك طرحت السؤال وزى ما يكون السلطة هدف غير مشروع
أى مشتغل بالسياسة الوصول للسلطة هدف من أهدافه
عرضت عليك الحلم الرومانسى اللى بيحلموا بيه تفتكر تحقيقه ممكن يكون حقيقة من غير ما تحلم إنك تتحكم فى قرارات البلد
حسن البنا فى الأول حلم بفكرة الفرد المسلم الواعى بتعاليم لدينه بعد كده الأسرة المسلمة ثم المجتمع المسلم وفى الآخر الأمة المسلمة
كان بيحلم إن المجتمع لما يفهم تعاليم دينه ويحاول يطبق المفاهيم دى على أرض الواقع فهيختار قراره بإيديه
_إنتوا كل حاجة هدخلوا فيها الدين وهتحرموا علينا كل حاجة والدنيا هتبقى ضلمة خالص ؟
الأصل فى الدين الإباحة يعنى كل حاجة هتكون متاحة بس فيه ثوابت فى الدين جميع علماء الدين مييختلفوش عليها وهو ده الأصل بتاعنا أما الأمور المختلف عليها لن يوجد بها أى شىء ملزم
_طيب هو الشعب كله مسلم مهو معانا ناس مسحيين كمان؟
_ مهو المسحيين عايشين معانا من أيام عمرو بن العاصى ولهم حقوق زيهم زى أى واحد فى البلد
_سيبك بقى من ده كله شكلكوا بقى وحش جدا بعد يوم 27 اللى فاتت إنتوا كده بعتوا الثورة ومفيش حد بقى يثق فيكوا تانى وشعبيتكوا قلت جدا.....؟؟
_إنت لما يكون معاك واحد صاحبك عشرة عمر وإنت عارفه كويس ووقف معاك فى محن أصعب من دى وشال عنك كتير وجه فى يوم من الأيام وسابك تواجه موقف صعب لوحدك رد فعلك إيه؟
أكيد هسمع منه الأول ؟
_ شوف ياسيدى حصل سوء فهم وهو إن الدعوة للثورة التانية كان هدفها أصلا الثورة على المجلس عسكرى والمطالبة بدستور جديد ومجلس رئاسى مدنى وبعد إئتلاف شباب الثورة عدل المطالب بحيث تكون توافقية ويوافق عليها الجميع وقال إنها وقفة لغاية الساعة6 بس يعنى زيها زى أى يوم جمعة بعد الثورة تبقى إيه لازمة إسم الثورة التانية والأسامى الكبيرة دى فقالوا طالما فيه خلط فى المطالب فبلاش ننزل أصلا
وفرضا الجماعة غلطت فى قرارها اليوم ده نتهمها بالخيانة على طول كده والبلتاجى نفسه إعترف بخطأالبيان اللى نزل قبلها بيوم
إحنا ممكن نوحد جهودنا لمصلحة مصر فى الوقت الحالى بدل ما مجهودنا كله يضيع فى خناقاتنا مع بعض وتضيع معاها أحلامناو أهداف الثورة ودماء الشهداء
_برضه مش مستريح ....الأفعال مش زى الأقوال ....؟
_ طيب نكمل بعدين

الجماعة2

2010-09-28T03:53:00.003+03:00

تحدثت فقط فى المرة السابقة عن الجلسة والوقفة فقط

ربما إن إستمر مقتصرا على جلسات العلم والحفظ فقط لإتصرف البعض

فالأطفال يحبون اللعب كثيرا ويكرهون الحفظ

أجدهم بعد فترة بيتفقوا على لعب الكرة صباحا فى ملعب قريب

نجتهد جميعا فى الإستيقاظ باكراونحاول إيقاظ بعض

فاليوم هو يوم اللعب

نجتمع قبل اللعب ونقف فى حلقة شبيهة بوقفة العشاء

فتسمع البعض يهمس يوووووووووه عايز نقسم بقى يا أستاذ فالحماس يملأ الجميع

لكنك تجده فى كل مرة قبل اللعب يؤكد على أمر ما ويتكرر الكلام فى كل مرة قبل اللعب

وبعد ذلك لاحظت إن الحديث يتكرر قبل أى شىء يقومون به ليس فقط اللعب بل أى عمل

يبدو إن الأمر مهم حقا

وهو أمر النية سؤال يكررونه دائما -هذا العمل الذى تقوم به ما هو غرضك منه ..؟؟

ما هو هدفك منه .....؟؟؟

أى عمل.........؟؟؟ نعم أى عمل لابد له من نية

عن أمير المؤمنين أبي حفص عمر بن الخطاب رضي الله عنه ، قال : سمعت رسول الله صلى الله عليه وسلم يقول : ( إنما الأعمال بالنيّات ، وإنما لكل امريء مانوى ، فمن كانت هجرته إلى الله ورسوله ، فهجرته إلى الله ورسوله ، ومن كانت هجرته لدنيا يصيبها ، أو امرأة ينكحها ، فهجرته إلى ما هاجر إليه ) . رواه البخاري و مسلم في صحيحهما

فمثلا قبل اللعب نذكر بعض بنية اللعب.....

وهل للعب نية............؟؟

نعم نية مثل تقوية البدن على طاعة الله فالمؤمن القوى خير وأحب إلى الله من المؤمن الضعيف

نية مثل التعارف فلابد من وجود وجوه جديدة فالجميع يحب اللعب وربنا كانت بداية البعض من ملاعب الكرة

يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا

نية زيادة الحب والتآخى بينا

ممكن كمان نية الترفيه وأخذ هدنة من العمل - رفهوا عن قلوبكم ساعة بعد ساعة , فان القلوب اذا كلت عميت

وهكذا أى نية صالحة مقبولة

وهكذا علمت

إنه أى شىء تقوم به نتوقف أمامه قليلا ما هى نيتك.......؟؟؟

وهكذا تجعل حياتك كلها لله فالإسلام منهج حياة وليست مجرد عبادات وفقط

ولهذا كان شعار الإسلام هو الحل

بالطبع لعبت قبل كده مع إصحابى

أكيد نيتنا قبل ذلك هو الفوز وتسجيل الإجوان وفقط لذا تجد الصياح والعصبية ولا مانع من بعض الشتائم والزجر

ولكن معهم اللعب مختلف قد تجد الكثير من الحماسة ولكن مقابل ذلك لا توجد عصبية أو شتائم

وإن شعر الأستاذ ببعض الحماسة الزائدة أو شىء من العصبية تجده يقول للجميع إستغفار 10 مرات

يراود البعض فى نفسه _هو ده وقت إستغفار يا عم الحكم مش عادل والفريق مش عارف يلعب-

ولكن بالفعل بعد الإستغفار يهدأ الجميع بعض الشىء ويحاولوا فى الملعب مرة أخرى

ولكن الشىء الأبرز هو بعد تسجيل الهدف يهتف الفريق الفائز _الله أكبر ولله الحمد_

بصراحة هذا الهتاف يجلب حماسة وفرحة لا مثيل لها

قد يأخذ اللعب فى الصيف شكل دورات ويأخذ كل فريق إسم معين من الممكن أن يكون إسم صحابى أو إسم صفة معينة ويدرس الفريق طوال فترة البطولة معنى الإسم ويجمع أكبر قدر من المعلومات عنه ليناقشواه فيما بينهم

تشعر بعد اللعب إنك كنت فى فترة طاعة وليست فترة لعب

نفس العمل وهو اللعب مثلا الذى كنت تقوم به من الممكن أن تأخذ عليه حسنات وهو نفسه ممكن أن تأخذ عليه سيئات

فقط نيتك فى العمل وطريقة أدائك له

ومن باب رد الحق لأصحابه بالفعل لقد تعلمت منهم الكثير والكثير جدا

ونستكمل فى حلقة قادمة إن شاء الله

فاصل إعلانى

ما قامت به الأهرام من نشر لصور السيد الرئيس -حفظه الله ورعاه- فى المقدمة ومن خلفه أوباما ومحمودعباس ونيتنياهو وذلك بعد إستعمال الفوتو الشوب وتغير الصورة الحقيقة التى يتصدرها أوباما ويتذيلها السيد الرئيس

وتبرير ذلك بإن الصورة رمزية عن دور السيد الملهم إياه القيادى فى القضية الفلسطينية

ولكن ذلك ما هو إلا صورة رمزية لمدى الضحك على الدقون

الجماعة 1

2010-09-13T01:33:00.007+03:00

يتوقف معجبا بالمشهد ليتأملهم أطفال صغار يجلسون فى حلقة كبيرة

يتوسطهم شاب فى أواخر العشرينات قصير القامة لحد ما قمحى اللون

يفترش أرض المسجد مع الأطفال

يتكرر وقوف والدى بعد صلاة العصر يوميا ليتأملهم

بعد فترة يسأل والدى أحد أقاربنا الشباب -هما بيعملوا أيه فى الحلقة دى..؟؟-

فيرد عليه عادىبيحفظوا قرآن

-طيب أنا عايز محمد يروح يقعد معاهم-

وقتها كنت فى الخامسة من عمرى تقريبا

لأكون بعد ذلك واحد من أولئك الأطفال الفترشين أرض المسجد

لأتعامل مع شاب ممتاز يتعامل معنا كل على حدة فى حفظه للقرآن على حسب مستواه فى الحفظ

وبعدها يبدأ فى شرح بعض معانى القرأن

فى البداية كان يصعب علىّ قهم الشرح ولكن فيما بعد بدأت أفهم بعض الشىء

بعدها يذكر حديث قصير أو دعاء من أدعية الرسول ونسجله فى كراسة صغيرة نحملها معنا يوميا وتكرر الحديث إلى أن نحفظه ونفهم معناه

قد يتبقى لنا بعض الوقت-وهو الوقت الذى كنا نحبه جميعا-

إنه وقت اللعب نعم كنا نلعب فى المسجد بعض الألعاب البسيطة ونحن جلوس

ألعاب تعتمد على سرعة البديهة او رد الفعل أو الذكاء

وفى النهاية كالعادة توزع الحلوى على المجيدين سواء فى الحفظ أو حتى فى اللعب أو حتى فى تنفيذ بعض الوصايا اليومية مثل طاعة الوالدين أو ما شابه

هذا مثال صغير لما كان يحدث فى الحلقة أو كما كنت أحب أن أسميها دائما الجلسة

أصبح إرتباطى بذلك الشاب ليس إرتباط تلميذ بأستاذه لا بل إرتباط أخ بأخوه

فلم تكن الجلسة فقط هو ما يجمعنا بل كان اللقاء شبه دائم فى معظم الصلوات فى المسجد

وخصوصا صلاة العشاء

فكان التجمع خارج المسجد فى الأغلب وبالطبع هنا لا تسمى جلسة لإننا وقوف فيتغير الإسم إلى وقفة العشاء

فى معظم الوقت كنت أحب حضور تلك الوقفة ما عدا طبعا وقت حضور اللعب كنت أتركهم للعب فى الشارع مع أصحابى

فكانت الوقفة تتناول بعض الخواطر أو المواقف التى مرت بأحدهم ويحب أن يذكر بها الحضور وكان النقاش مفتوح للجميع بقول أى شىء يريد قوله

كطفل صغير لازلت أذكر كل تلك المشاهد بل أذكر بعض الكلمات وبعض الشرح الذى قيل لى وأنا فى هذه العمر الصغيرة

كتا أرقبهم من بعيد وأرى كل واحد من هؤلاء الوقوف ناجح فى عمله

فهذا مدرس مشهور فى المدرسة الفلانية وهذا طالب ثانوية وحاصل على مجموع مرتفع وهذا صاحب مصنع كبير وهذا ....... وهذا................

دائما ما كنت ألاحظ على شفاههم إبتسامة دائمة ولا تفارقهم إلا فى التقصير فى الحفظ أو عند بعض تصرفاتنا الصبيانية

والجميل تواجدهم فى صلاة الجماعة فى المسجد بشكل دائم

حتى وإن كان هذا التواجد فى منتصف صلاة الجماعة بعد مرور ركعة أو ركعتين

علاقتى معهم لم تكن فقط فى الجلسة أو الوقفة أو صلوات الجماعة

بل أكبر من ذلك سأذكره فى الحلقات القادمة إن شاء الله

كل سنة وإنتم طيبين

2010-09-10T04:33:00.000+03:00

يااااااااااااه

المدونة وحشتنى

ووحشنى الكتابة هنا

فترة طويلة بعيد فيها عن التدوين كله

أكيد الدنيا إتغيرت

الفترة اللى فاتت كانت جديدة عليّ

ّ وإتعلمت منها حاجات كتير

وغيرت فىّ حاجات كتير

المهم إن شاء الله هحاول إنى أرجع أكتب هنا من تانى

بس ده كل ما أنزل أجازة بس

يعنى حوالى كل أسبوعين أو تلاتة

وهتكون بداية كمان يومين كده

بسلسة هتستمر معانا أكتر من حلقة إن شاء الله

وكل سنة وإنتم طيبين

وما الجديد فى ذلك ........؟؟؟

2010-04-21T03:50:00.002+02:00

يجلس بتكاسل شديد أمام الجهاز لا شىء يريد ان يفعله

ولكن لا شىء أمامه سوى الكمبيوتر

يحاول أن يكتب أى شىء

عقله لا يريد حتى التفكير

يعلق بذهنه كلمة دكتور عكاشة أمس وهو

الإحساس بإنعدام العدالة يعتبر السبب الأول والرئيسى للأمراض النفسية فى مصر

يتذكر كم المواقف التى تنعدم فيها العدالة .........؟؟

ومن كثرتها يشعر بأنها لا تعد ولا تحصى

يتصفح مواقع النت

الإعلان عدم عقوبة بركات

يقول فى نفسه ومنذ متى تتم معاقبة لاعبى الأهلى - بغض النظر إن كان بركات يستحق العقاب أو لا-

ينشر الموقع كم المواقف المشابهة للاعيبين سابقين وحجم العقوبات عليهم

ويقارن نفس المصدر بين ألفاظ عاشور وأفعاله مع الحكم وكذلك وائل جمعة فى مباريات سابقة وخروجهم دون أنى عقاب

وما عوقب به عمرو ذكى سابقا وكذلك لاعبى الزمالك فى مباراة الشرطة

حجم عقوبات لم نراها من قبل

يعاود الحديث لنفسه

وما الجديد فى ذلك............؟؟؟؟

إنها الحكومة الحمراء

يستمر فى التصفح

المطالبة بإطلاق النار على المتظاهريين

هذا المطلب كان لأحد أعضاء مجلس الشعب المصرى

يعتبر نشطاء 6 إبريل مثل اليهود يجب قتالهم بالرصاص الحى

عفوا لقد أخطأت فاليهود لهم كافة الحقوق فى ممارسة كل شىء- كل شىء على الإطلاق- هنا فى مصر

بالفعل لقد ظلمت اليهود فها هو المبارك يقدم برقية تهنئة بيوم إستقلالهم وإحتلال فلسطين

وفى نفس مكان هذا الخبر

إختطاف النشط فلان الفلانى من محطة المترو بعد خروجه من بيت النشط فلان الفلانى

وجدير بالذكر إنه قد خرج لتوه من المعتقل أول أمس فقط

- شوفتوا الرحمة يومين بحالهم يشم نفسه هينهب صحيح-

عاوده التساؤل

وما الجديد فى ذلك...........؟؟؟؟

يتذكر مشهد هذا الصبى الصغير القادم إلى الطوارىء قادم فى عربة الإسعاف بفقدان فى الوعى من أول وهلة شك فى تعاطيه مواد مخدرة

خمس دقائق كانت كافية لإستعادة وعيه

بدا عليه علامات الضحك والإبتسام بسبب وبدون سبب

وفى ساعده علامة إصابة مكان الحقن إياها

فلم يساوره الشك فى تعاطيه للمخدرات

ودار حديث قصير علم منه أنه فقد وعيه أثناء ذهابه للعمل الذى يأخذ منه حوالى 80 جنية فى الأسبوع يعنى حوالى 320 جنية فى الشهر يعنى أكثر من المبلغ الذى يأخذه هو الدكتور 230 جنية

تنهد تنهيدة عميقة

تذكر بعدها ذكرياته الماضية

يستشعر بمدى إستنزاف قلبه وعدم المقدرة أو حتى الرغبة فى البدء من جديد

يتذكر كلمة دكتور عكاشة

يسجد لله شكرا على إنه مازال قادرا على الضحك والإبتسام

ولم يجن حتى الآن

وللحب أنواع

2010-03-26T15:17:00.003+02:00

الساعة حوالى الثالثة فجرا يغالبنى النوم ولكنى رافض للذهاب الى السرير لان هذا معناه ضياع صلاة الفجر تأخذنى غفوة بين وقت لآخر

شغلت وقتى بالكاد حى آذان الفجر

بابا نازل شكله رايح يصلى فى المسجد

وهو نازل بينادى عليا

-محمد.......... محمد

- أيوة يا بابا

- متنساش تجيب عيش بعد الصلاة

- أنا مش نازل يا بابا أصلى هصلى هنا

- واحنا عايزين عيش روح صلى وبعدها هات عيش

- وانا هصلى هنا يا بابا

- خلاص هات العيش ومتصليش

وقتها كنت فى قمة خنقتى وكنت متعصب على آخرى وكان واضح على ملامحى جدا رغم انى ما إتكلمتش بعدها

طبعا روحت صليت وجبت العيش بابا حاول يكلمنى أول ما وصلت ويقولى كلام من نوع يثاب المرء رغم أنفه وكده

وأنا مشيت على طول ومعلقتش

الفكرة بقى إن إحنا قعدنا حوالى 3 أيام فى حرب باردة

أنا متضايق من الموقف اللى حصل وبابا زعلان منى

وقتها مكنتش فاهم هو زعل ليه........؟؟؟؟

رغم إنى كنت مقتنع إنى نفذت كلامه وعملت اللى هو عايزه حتى ما إتكلمتش بعدها

ولكن بعد فترة فهمت هو كان زعلان ليه........؟؟؟

.........................................................................................

لو عندنا مدير شركة وعنده إتنين موظفين

واحد بيحب رئيسه جدا وبيحب الشغل وبيحاول يرضيه بأى طريقة وينفذ كل أوامره

والتانى برضه بينفذ كل الأوامر لكنه مش بيحب الشغل خالص وبيكرهه

ياترى لو فيه تقصير عند الإتنين موظفين .......؟؟

مين فيهم اللى ممكن المدير يسامحه ويقبل تصرفه.......؟؟؟

ياترى لو فيه ترقية أو منحة

مين فيهم اللى هياخدها........؟؟؟

الكلام ده لو كان بينفذ الأوامر فما بالك للناس اللى مش بتنفذ من أساسه

.......................................................................................

نفس الكلام ده فى علاقتك مع ربنا

كل الناس بتقول أنا بحب ربنا وبحب الرسول عليه الصلاة والسلام

ويعملوا أغانى وأناشيد وهكذا

ورغم كده مفيش ولا أمر من الأوامر بينفذوه

ولو نفذوا بيكون على مضض

يعنى مثلا مواقف بتحصل لنا كلنا

قاعد بتتفرج على الماتش أو التمثلية والآدان يدن - وقت الصلاة-

رد الفعل يووووووووووووووووه

يلا نقوم نخطف الصلاة على السريع كده علشان نلحق الباقى

أو

إن شاء الله نقوم بين الشوطين أو بعد التمثلية

ده لو كان بيصلى من الأساس

ومثلا لو فى رمضان

يااااااه إمتى رمضان يخلص

أو على الأقل بيبقى كل الناس مستنية المغرب من أول ما يصحوا

وكل واحد بيحلم إن المغرب بيدن

كانت أحاديث الرسول واضحة

فالرسول عندما تحدث عن السبعة الذين يظلهم الله فى ظله يوم لا ظل إلا ظله

قال ورجل قلبه معلق بالمساجد

أى فى كل مرة يذهب فيها إلى المسجد يكون مشتاق للعودة مرة أخرى

وكذلك قال الرسول عن الإيمان

( لا يُؤمن أحدكم حتى يكون هواه تبعا لما جئت به )

وهذا هو مفهوم الإيمان ان تكون أوامر الله والرسول هى ما تحب وما تفضل

وكذلك قال

(ثلاث من كن فيه وجد بهن حلاوة الإيمان وذكر منها - أن يكون الله ورسوله أحب إليه مما سواهما)

الحب اللى إتكلمت عليه ده من أسمى أنواع الحب

ومش أى حد يقدر يطبقه وأسمى أمانينا إن الحب ده يكون أساس حياتنا

فاللهم حبب إلينا الإيمان وزينه فى قلوبنا وكره إلينا الكفر والفسوق والعصيان

....................................................................

1 مارس

2010-03-02T01:23:00.003+02:00

النهاردة 1 مارس

يعنى بداية سنة جديدة مختلفة عن كل اللى فات

يعنى بداية الإمتياز وبداية الحياة العملية

ورغم إنى لسه ما بدأتش فعليا الإمتياز إلا إنى فى الفترة القليلة أوى اللى فاتت إتعلمت منها حاجات كتير

فى البداية كانت مشكلتى فى التعامل مع الناس

فلو إتعاملت ببساطة مش هيقتنعوا بيك ولو إتعاملت جد هيكرهوك

والتناقض ده كان عايش جوايا بين محمد عرفة اللى واقف بالشورت والفانلة فى ملاعب الكورة بيلعب زى ما هو متعود وبين محمد عرفة اللى لابس البلطو وواقف فى الطوارىء

بعد كده

بدأت أحس إن طريقة تعامل زمايلى مع بعضهم بدأت تتغير خصوصا لما يكون فى شغل مابينهم سواء فى عدم الثقة بينهم وبين بعض

أو إن كل واحد بيدور على مصلحته وخلاص

أو كلام النفاق اللى كل واحد بيقوله للمسئول أيا كان هو مين علشان يمشى أموره معاه بعد كده

أو إن كل واحد عايز يبين إنه فاهم وأبو العريف وممكن يحرج زميله لإنه إتعلم شىء قبله أو عرف حاجة زميله مش عارفها

ياااااااااااااااااااااااااااه

يمكن زى ما زمايلى بيقولوا بينهم وبين بعض إن الإمتياز بداية الندالة

رافعين شعار نيم اللى جنبك ودور على مصلحتك

كل ده رغم إنى لسه مبدأتش من الأساس أمال بعد كده

عموما

أنا بعتذر لتقصيرى فى متابعة أى مدونة لإنى فعلا كنت مشغول جدا وكنت مسافر

والأهم إن مزاجى مش مظبوط خالص بقاله فترة

كمان فى الفترة اللى جاية أنا ناوى أقضى فترة الإمتياز فى القاهرة يعنى مش هعرف أقعد على النت إلا فى فترة الأجازات بس

علشان كده أنا قفلت المدونة التانية ومش هعرف أكتب هنا كمان ألا فى الأجازات بس

يمكن مرتين فى الشهر ولا حاجة ربنا ييسر

دعواتك إن ربنا يعدى الفترة دى على خير

حكم من طالب الإبتدائى

2010-02-17T08:13:00.001+02:00

أيام الطفولة من أجمل أيام حياتى خصوصا مرحلة الإبتدائى ولكن فيه مشاهد معينة لا تنسى

وحابب أحكيها

كان عندنا فى حوش المدرسة -فى الهواء الطلق- حنفيات المية لا قصدى مواسير المية لإن الحنفيات كانت دايما مش موجودة

وكنا نقف كده جنبها تقعد تسمع صوت المية وهى نازلة على طول أكنك واقف جنب شلال مي

ة وعلشان تشرب لازم تكون رياضى لإنك هتقف فوق سور حوض المية بإحدى قدميك أو كلتاهما فسور الحوض عالى على تلاميذ الإبتدائى

أو إنك بن ذوات ومعاك زمزمية المية وبتشرب منها وبتملاها بسهولة من مواسير المية

ورغم كل ما سبق ذكره

فقد كانت تجربتى اليومية مع الشرب من تلك المواسير ممتعة وبصراحة كانت المياه دايما ساقعة وطعمها جميل

بعد حوالى 3 سنين بدأوا فى التطوير وبنوا مبنى جديد من خمس طوابق فى الحوش

ولغوا دورة المية دى قصدى مواسير المية دى وعملوا فى الطابق الأرضى دورة مياة فيها حوالى حوضين مية

كل المدرسة فرحت بالتطوير

وتمنى الجميع بدء الدراسة

ولكن ما إن بدأنا حتى صدمنا بإن فصلنا فى الطابق الأخير وهى مسافة قاسية لطالب إبتدائى وبعد أن كانت جميع مبانى المدرسة من طابقين فقط إنتقلنا إلى هذا المبنى الجديد ذو الطوابق الخمسة

قلنا مش مشكلة الفصل شكله جميل وأحسن كتير من اللى قبل كده

ونزلنا الفسحة وهنا كانت المشكلة الكبرى فوجئنا بدورة المياه التى فى الدور السفلى بدون نوافذ ورائحة الطلاء عالقة بها بشدة وكذلك مكان أحواض المياه مجاورة تماما لدور الخلاء ولك أن تتخيل دور الخلاء لتلاميذ إبتدائى

ورغم المحاولات المكثفة للمحافظة على نظافتها إلا إنهم فشلوا فى القضاء على جميع الروائح لإن دورة المياه أساسا بدون نوافذ كافية

وخلاف ذلك فكانت مواسير المية فى نفسى جهة الشمس يعنى المية سخنة على طول

وفضيت سنتين مش عارف أشرب كويس فى المدرسة

وجلسنا نتحسر على أيام المواسير والقفز والشلالات

نفس الفكرة

شاهدتها السنة اللى فاتت فى حلقات الشوقيرى

لما عمل حلقة كاملة عن دورات المياه فى اليابان

بصراحة كنت مبهور جدا جدا بالنظافة والنظام وكان بيحكى على زراير للموسيقى وأخرى للأنغام وأخرى للعطور وأشياء أخرى كثيرة فى غاية الإبهار

بعد الحلقة بحكى لبابا عن اللى شاهدته رد عليا وقالى شوف كل ده ورغم كده هما بيستعملوا المناديل بس ومش بيستعملوا المية فى الحمامات وطبعا صدمت جدا

وعرفت إنه

ليس كل ما تراه مبهرا يمكن أن يلائمك

وليس كل تطوير وتجديد يكون للأفضل

ربما يلائمك الشىء القديم المتهالك أكثر من أى شىء آخر فلاتبادر بالتذمر والإعتراض دايما

.......................................................................................

إن شاء الله فى المستقبل نكمل حكاوى الإبتدائى

ومعذرة للإنشغال الفترة السابقة وربما كذلك اللاحقة

إستمراى فى الكتابة على المدونة هيكون يشكل متقطع على حسب الظروف

وشكرا على متابعتكم

أجااااااااااازة

2010-02-04T04:18:00.006+02:00

بعد أى مرحلة فيها ضغط وشدّة عليك
لازم الإنسان بيحتاج بعدها لفترة راحة
الكلام منطبق على كل شىء حتى الجماد
إذا زاد الضغط بإستمرارعلى أى شىء ولم تترك له شىء من التهوية سينفجر لوحده تلقائى ده مبدأ كونى
حتى إن ربنا سبحانه مثلا بعد شهر رمضان -شهر الصيام والقيام والإجتهاد- جعل لنا بعده العيد للتهانى والتقابل وأخذ تلك الراحة المنشودة
حاليا أظن إن معظم الناس إنتهت من الإمتحانات وبدأت مرحلة الأجازة
طبعا كما أوضحت الراحة شىء مطلوب جدا لإمكانية الإستمرار بعد كده
ولكن للاسف قد تجد بعض الملتزمين رافضين لأى نوع من أنواع الترفيه حتى إنى قرأت فى إحدى المدونات إنه لا يجوز الترفيه إلا فى تأديب الفرس وملاعبة الأهل ورمى القوس والنبل
وروي عن عائشة- رضي الله عنها- أنها كانت مع النبي- صلى الله عليه وسلم- في سفر قالت: فسابقته فسبقته على رجلي، فلما حملت اللحم، سابقته فسبقني فقال: "هذه بتلك"
وكذلك روى عن رسول الله
أنه قال لأبو بكر عندما اعترض على لعب بعض المسلمين"دعهم يا أبا بكر لتعلم يهود أن في ديننا فسحة
وكذلك روى عن الصحابة أنهم كانوا يتصارعون فى مسجد رسول الله كنوع من الترفيه- طبعا هما كانوا بيهزروا بالمصارعة طبعا مش تبعنا الكلام ده الناس عندنا بيغمى عليها لو شافت نقطين دم-
الأصل فى أى شىء عندنا هو الإباحة ما لم يذكر غير ذلك
حديث الرسول واضح فى المفهوم ده
(روحوا عن القلوب ساعة بعد ساعة فإن القلوب إذا كلت عميت)
بس برضه الحديث واضح انها ساعة بعد ساعة
لإن برضه للأسف أكبر وقت لإرتكاب المعاصى والمخالفات هى برضه فترة الأجازات والأعياد لإن الناس خرجت من مفهوم الترفيه المباح إلى غير ذلك
مش حابب إن الموضوع يقلب موضوع تعبير
لكن بجد عايز أقول شىء لكل إخوانى الشباب
قيمتك فى سوق العمل تقدر بقدر ما تكتسبه من مهارات وعلوم
ما تتحصل عليه من خلال دراسة ما هو إلا الجزء اليسير مما هو مطلوب منك فى الحياة العملية
قيمتك عند ربنا تقدر بقدر ما تتحصل عليه من عبادات وطاعات لربنا
فى واقع حياتنا لا شىء يسمى بالفراغ فكوب الماء الماء مثلا إذا فرغ من الماء إمتلأ تماما بالهواء
أنا مقتنع جدا بالمقولة القائلة
نفسك إن لم تشغلها بالحق شغلتك بالباطل
فقلبك إذا فرغ من كل ما هو نافع ومفيد يصبح مرتعا للأمراض والعلل من حقد وحسد ووساوس ومعاصى وآثام
ابن مسعود بيقول : (ما ندمت على شيء ندمي على يوم غربت شمسه، نقص فيه أجلي، ولم يزدد فيه علمى )
المشكلة بقى اللى بجد إنك تلاقى الناس ممكن تتحمس فى الأول ويكون فى دماغها ألف حاجة وأول ما تبدأ الأجازة كل شىء يطير ومفيش حاجة تتعمل
عموما عندما سئل الرسول عن أي الأعمال أحب إلى الله ؟ قال : ((أدومها وإن قل ))
يعنى أهم شىء الإستمرار ولو بالقليل من الأعمال
ولكن برضه للأسف الشيطان شاطر وبسهولة جدا العزيمة بتقل وتضعف
فكانت نصيحة رسول الله لنا :
((إن الشيطان ذئب الإنسان كذئب الغنم يأخذ الشاة القاصية والناحية فإياكم والشعاب وعليكم بالجماعة والعامة والمسجد ))
الموضوع مطروح للنقاش ومنتظر إضافتكم وإقتراحتكم للموضوع
آخر شىء
نفسى أشوف ترشيحات كويسة هناك قبل يوم الجمعة
ولكم جزيل الشكر

نظرة ونظرة

2010-01-28T01:49:00.005+02:00

كنت خارج مع بنت عمتى وكانت بتزور واحدة صاحبتها ورغم إن المكان اللى كنا فيه مش أوى
كانت شقة تحت الإنشاء
إلا إنى أول ما شوفت صاحبتها قولت فى نفسى إيه الجمال ده كله بصراحة كانت جميلة جدا
حتى إنى طول ما أنا قاعد منزلتش عينى من عليها {شكل عينى كانت زايغة من صغرى }
حتى إنى همست لبنت عمتى قولتها صاحبتك جميلة أوى كده ليه وقالتلها
وزى أى بنت فرحت بكده حتى لو كان الغزل من عيل صغيركنت حوالى 4 أو 5 سنين وقتها
المهم بعد المشوار ده بإسبوع تقريبا بنت عمتى قالتلى أنا رايحة لو واحدة صاحبتى تيجى معايا قولت فى نفسى قشطة
وسيبت اللعب وجهزت نفسى بسرعة
وقولتلها هنروح لنفس صاحبتك إياها قالتلى لأ
قولت مش مشكلة أهو برضه تغيير
وأول ما روحنا وشوفت صاحبتهاأصابتنى حالة هيستيريا وقعدت أصرخ وأعيط لأاااااااااااااااااا
مش عايز أقعد أنا عايز أمشى وطبعا صاحبتها مش فاهمة أنا بصرخ ليه بس أكيد إنتوا فهمتوا لإن صاحبتها المرة دى مش زى صاحبتها التانية خاااااااالص
فعلا والله الموضوع ده حصل بنفس التفاصيل وبعدها حلفت لبنت عمتى قولتلها مش رايح معاكى أى مشوار تانى خااااالص
المهم اللى أنا عايز أقوله
ده المنطق والفكر عند العيال الصغيرة أظن إنه عيب أوى إنه يكون عندنا نفس الفكر السطحى ده
أنا هقولكم قصة جميلة أوى لصحابى عظيم
كان فى مجلس الرسول صحابى فقير معدم وكان فى جهه دمامة
فسأله الرسول لماذا لم تتزوج ..؟؟ فرد عليه ومن يرضى بى يا رسول الله لا مال ولا جاه ولا جمال
فأنا كاسد فى سوق الأزواج
فرد عليه الرسول ولكنك عند الله ليس كذلك فأرشده إلى بيت أحد الأنصار وأخبره بأن يقول للصاحب الدار
أن الرسول يقرؤه السلام ويطلب منه تزويج إبنته
فتردد الرجل فى القبول وعندما أخبر زوجته رفضت على الفور وقالت كيف ذلك ونحن رفضنا فلان وفلان
ولكن عندما سمعت الإبنة بإنه قادم من رسول الله وافقت على الفور وقالت كيف ترفضون من هو قادم من عند رسول الله وقالت رسول الله لن يضيعنى أبدا
وبارك الرسول الزفاف ودعا لهما ( اللهم صب عليهم الخير صبا ولا تجعل عيشهما كدا)
فحظيا بحياة زوجية سعيدة جدا وكيف لا وقد حظيا بدعوة مباشرة من رسول الله
وفى أحدى غزوات الرسول سألهم رسول الله عن المفقودين فقالوا نفقد فلان وفلان وفلان
فقال لهم رسول الله لكنى أفتقد فلان
فلما رآه رسول الله وهو شهيد والتراب علي رأسه نفض التراب من عليه وهو حزين ثم تبسم وقال أنت منى وأنا منك
بالطبع كان حزين لمقتله ولكنه تبسم عندما رأى منزلته فى الجنة
وبالطبع الكثير من لا يعلم هذا الصحابى إنه جليبيب عليه السلام
و رحمة الله عليه وعلى جميع صحابة رسول الله
فقدر الانسان لم يكن ابد بالشكل أو بالمنظر
فالرسول عليه الصلاة والسلام بيقول
{رب أشعث أغبر لا يأبه له ذو طمرين مدفوع بالأبواب لو أقسم على الله لأبره }
وعندما سخر الصحابة من قدم سيدنا مسعود وهو يصعد للنخلة لإنها كانت دقيقة
فقال لهم رسول الله إن قدمه أثقل عند الله من جبل أحد
عندما سمع الرسول عليه الصلاة والسلام أحد الصحابة بينادى على سيدنا بلال وقال له يا إبن السوداء
إنزعج منه الرسول وقال له
{ إنك إمروء فيك جاهلية}
ياترى كم واحد فينا لسه بيفكر بمنطق العيال الصغيرة...........؟؟؟؟
ملاحظات أخيرة
الصورة الرمزية للموضوع ملهاش علاقة بالموضوع ولكنها عجبتنى أوى
قصة سيدنا جليبيب بها شىء من التصرف والإختصار
المدونة التانية أنا إتكلمت فيها عن ترشيحات الاسبوع اللى فات
وأتمنى إنكم تشاركونى فى ترشيحات الأسبوع اللى جاى
ولكم جزيل الشكر

ندافع أولا ثم نهاجم

2010-01-21T04:56:00.001+02:00

النهاردة يوم تاريخى لإنى الحمد الله كده يعتبر إنتهيت من حياتى الطلابية وكان آخر يوم إمتحانات عندى
وبغض النظر عن اللى حصل فى الإمتحانات ولكن الحمد الله على كل حال
ومنتظرين النتيجة قريبا و بداية حياة عملية جديدة إن شاء الله
بالنسبة لموضوع الحصاد
فى البداية لازم أشكر كل الناس اللى تفاعلت وشاركت بإيجابية وأشكر تقيمكم للمدونة ويارب أكون دايما عند حسن ظنكم
إسمحولى أدافع عن نفسى فى الإعتراضات على المدونة
1- بالنسبة لشكل المدونة كانت الآراء متباينة فيها وعن نفسى برغم إن الشكل عاجبنى إلا إنى مستغربه بعض الشىء لإنى فقط غير متعود عليه وأظنكم كذلك بالطبع
2-بالنمسبة إلى لغة المدونة وإنها بالعامية وبالرغم من ذلك طالب البعض بشىء من الروشنة فى المواضيع
عموما أنا بحاول أكتب بأسلوبى الطبيعى فى الحياة ممكن أستخدم العامية ولكنها غير سوقية أو مبتذلة وليست فى جميع المواضيع على حسب نوع الموضوع وأظن إنه هناك مواضيع بالعامية وأخرى بالفصحى
3-بالنسبة إلى إنى معتد برأيى ده شىء واضح جدا وهو إنى متمسك برأيى وإلا ما كنت قلته أو حاولت نشره
ولكن عدم قبول تغيره هذا غير وارد تماما لإنى مقتنع بإنه لا يوجد رأى صائب دائما
وبالفعل إذا إقتنعت إن رأيى خطأ فأنا أغيره فورعلمى بذلك
ومن الغباء التمسك بالخطأ رغم العلم بإنه خطأ
4-المدونة خالية من التنويع أظن إنى حاولت التنويع قدر الإمكان بين مواضيع شخصية أو رياضية أو سياسية أو دينية ولكن قد تدور جميعها فى إطار واحد وأظن إن هذا هو الإطار العام للمدونة
5-فى النهاية أغرب الإعتراضات على المدونة والتى لا أعتبرها إعتراضا أبدا بل أعتبرها مصدر تفاخر وتباهى
أولا لكونى زملكاوى وبصراحة يمكن يكون لزوج عمتى _والد بنت عمتى المذكورة فى أنا وهو وهى_ دور كبير فى الموضوع ده لإنه كان زملكاوى كبير وأنا كنت مرتبط معاهم وخلاف إن بابا كمان زملكاوى
ولكن أكتشفت إن الموضوع طبيعة شخصية عندى وهو إنى لا أحب أبدا المحتكر للبطولات أو المحتكر لأى شىءمتعاطف دائما مع الطرف الضعيف ولذا لم أشجع البرازيل مثلا ولا مرة فى حياتى
ثانيا لكونى طبيبا وبصراحة أنا أرى إن مهنة الطب مهنة إنسانية فى المقام الأول ولكن للأسف جشع بعض الدكاترة وإهمال البعض الآخر كان له دور فى إن بعض الناس تكره الدكاترة
ولكن إن كان البعض مهمل أو جشع أو نصاب فأكيد هناك المقابل وفى أى مهنة كذلك هناك هذا وذاك
6-أنا سعيد جدا بإهتمام البعض بالمواضيع القديمة والتعليق على بعضها وبصراحة كان أكثر شىء رفع معنوياتى
الحمد الله كده تمام إنتهيت من الجزء الأول وهو الرد
إسمحولى أبدا فى الهجوم على أكثر ما يغضبى من التدوين
1- المجاملة وهذه أبرز نقطة
فللأسف قد تجد البعض غير معجب الموضوع ويراه تافه وضعيف وممتلىء بالأخطاء
ومقابل ذلك تجد رده موضوع راااااااائع بديع إيه الجمال ده كله
بصراحة شىء مستفز
وإن كان هذا الموضوع أقل نسبيا على الفايس بوك فالناس هناك أكثر صراحة وأكثر تحررا ومن يتضايق من شخص تانى يوم يحذفه من قائمة الأصدقاء عادى جدا
ولذا أتمنى دائما أن أعرف آرائكم دائما دون مجاملة
لإن الإنسان لن يستطيع أن يرى عيوبه إلا بعيون الآخرين
ولذا كان حزنى لإن الإعتراضات التى وصلتنى كانت قليلة جدا ومعظمها حتى فى الإستفتاء المنفصل
2-تساهل البعض فى الحديث مع الجنس الآخر وبصراحة بتضايق جدا لما ألاقى شاب يكتب لفتاة وحشتينى أوى ........وكيفك يا جميل..؟؟ وإزيك يا قمر.... وإنى أحبك فى الله......... والعكس طبعا
أكيد الكلام ده موجود وللأسف كلام من النوع ده ممكن يسبب مشاكل كتير أوى
لإن فيه ناس حساسة جدا وممكن تتأثر بأى كلمة ولو صغيرة ولو كان قائلها لم يشعرولم يبالى بالكلمة مطلقا أو كانت حتى مجرد لزمة فى كلامه
المهم ياريت نحاسب أوى فى الكلام ده
وطبعا الفايس بوك مشاكله من النوع ده أخطر كتير أوى
3-وده يمكن يكون إعتراض شخصى وخاص بصاحب المدونة فقط
يعنى شىء يمكن بيضايقنى أنا بس وهو وجود ملفات صوتية فى بعض المدونات سواء كانت قرآن أناشيد أغانى أى شىء لإنى فى الأغلب بكون مشغل أى شىء جنبى وعندما أفتح تلك المدونة تختلط الأصوات وأضطر لشىء من إثنين إما غلق المدونة أو غلق الصوت عندى نهائى
عمومت دى مشكلة بسيطة ويمكن تكون خاصة بعض الشىء
أكيد فيه عيوب تانية بس كفاية كده لإنى طولت عليكم أوى
عموما
ده الإستفتاء المنفصل مرة تانية للناس التى لم تشارك فى المرة الأولى
وطبعا فرصة للهجوم عليا من غير حساب ورغم كده كنت حاسس بمعظم الناس اللى شاركت فيه وكنت عارفهم
يعنى هاجم براحتك بس هعرفك هعرفك
ههههههههههههههههههههههههههههه
أنا بهزر طبعا أتمنى إن الناس كلها تكون محايدة وموضوعية
آخر شىء
إن شاء الله بكرة الجمعة هنزل ترشيحاتكم على المدونة التانية وطبعا مفيش ترشيحات وصلت لغاية دلوقتى خالص
إلا موضوع أو إتنين
عموما لو مفيش ترشيحات هختار أنا على مزاجى
وبراحتكم خالص
وهمارس سلطتى القانونية على المدونة

رسالة الحصاد

2010-01-10T23:00:00.003+02:00

من أسبوعين كده تقريبا كان عيد ميلادى ال23 أما النهاردة فهو عيد ميلاد المدونة الأول

وبصراحة المدونة من الحاجات اللى كانت مميزة جدا عندى فى السنة اللى فاتت يمكن كنت بعتبرها جزء منى
لأنها عبرت بشكل ما عن حاجات كتير أوى كان نفسى أقولها وأنشرها
وده كان هدفى الأساى انى أنشر أى فكرة أو خبر جيد ومتميز علشان كده أنا عملت المدونة التانية
وكمان معنديش أى مانع أنه أى زائر يأخد أى موضوع عندى وينشره فى أى منتدى أو أى مكان براحته جدا
وأنا واثق فى زوار مدونتى وفى إنهم مش هيحرفوا المضون
حتى أنا بكون فرحان جدا لو نشرت لينك أو خبر على الفايس بوك ولقيت أصحابى بعد كده أعادوا نشره وده حصل كتير وبكون فرحان بيه مش زعلان أبدا
وخلال السنة دى إتعرفت على ناس محترمة كتير وكنت سعيد بيهم جدا
منهم اللى كان بيتابعنا من أول ما بدأت ولا زال مستمر وبيشاركنا بالتعلقيات كمان
و اللى كان بيتابع وفاجأة إنقطع عن التدوين وأصبحت زياراته للمدونة بظروفها ومن غير تعليق
وزمايلى فى الدفعة اللى كتير منهم بيتابع ومش بيعلق ولكن بسعد جدا بآرائهم فى المواضيع لما بقابلهم سواء كانت بالسلب أو بالإيجاب
وكمان زمايلى اللى على الفايس بوك واللى بيتابعوا المدونة كل فترة ولكن للأسف مش دايما بعرف آرائهم ولكن زيارتهم للمدونة بتسعدنى جدا
وكمان المدونين اللى حاطين مدونتى ضمن قائمة المدونات عندهم رغم إنهم بيكتفوا بمتابعة المدونة من غير تعليق خالص ورغم كده أنا بكون فرحان جدا بإهتمامهم ومتابعتهم للمدونة
عموما أنا بشكركم كتير أوى وبتمنى دوام زياراتكم
طيب علشان الناس اللى مكنتش متابعة للمدونة ده هيعتبر عرض مفصل لمواضيع السنة اللى فاتت المدونة أحداث جارية وكانت بدايتنا السنة اللى فاتت مع أحداث غزة وكتبت فيها
مصر من غير هدوم
وإجابات المفتش كرومبو
وسمعت ناس بتقول
وعندما لا تموت
وإذا سكت الزمان
وذكرى ولكنها مستمرة
وكلها رؤى مختلفة عن الوضع فى غزة
وكمان إتكلمت عن شهيدة الحجاب الدكتورة مروة فى وجهة نظر مختلفة
وكانت للرياضة دور معانا فى
الحل موجود ومتاح ولكن ......
وشريف وأمثاله
وأحداث مباراة الجزائر فى لقطات على مشهد النهاية
وكانت المواضيع السياسية لها دور معانا فى
ضد الشعبية
ولا تكن مثل هؤلاء
وإستقرار أم ركود
والمجنون
وطبعا مغامراتى الشخصية كانت موجودة معانا فى
النصف المفقود
وذكريات قديمة
والملاكم
و أنا وهو و.......
ولعلنا نلتقى
وأنا وهو وهى
وبعض المواضيع كانت ردود على أصحابى وتفاعل معاهم زى
إجاباتى على أسئلة التاج (إتكلمت فيه عن نفسى شوية)
وقلوب مجروحة
و ماذا بعد....؟؟؟؟
وهل أنا متناقض....؟؟؟
وبعض المواضيع كانت مثيرة للجدل جدا والتناقش عليها كان كتير لدرجة إنه فيه بعضهم كتبته فى جزئين علشان أوضح وجهة نظرى تانى
الشبح والتعقيب عليه
ولتزداد قوة
بين الشرع والتقاليد والتعقيب عليه
وللكبار فقط وجزئه التانى
وكانت فيه مواضيع دينية مباشرة زى
مهمة فى المدينة
وأنا بحتفل
وحتى إذا
والتضحية وقت الأضحية
كفاية كده لأنكم أكيد زهقتم منى بس لازم تجابوا على الأسئلة..؟؟؟ وبصراحة ومن غير مجاملة
لإنى مقتنع بالرأى القائل لن تستطيع أن ترى عيوبك إلا بعيون الآخرين
1-لازم تجاوب على الإستفتاء الصغير هنا....؟؟
2-ما هو أكثر موضوع ضايقك وتتمنى حذفه..؟؟
3-وما هو أكثر موضوع عجبك وأثر فيك....؟؟؟
4-ما هى ملاحظتك على أسلوبى سواء فى الكتابة أو فى تعليقاتى...؟؟
5-شىء تتمنى تعديله على المدونة بشكل عام....؟؟؟
6-ما هو الشىء السلبى الذى تراه جليا فى شخصيتى من خلال رؤيتك الشخصية..؟؟
7- سؤال نفسك تسأله لىّ ولو حتى شخصى إن شاء الله هجاوب عليه...؟؟
إن شاء الله هشوف كل ملاحظتك وكل الأسئلة ومهجاوب فى موضوع منفصل مع ملاحظاتى أنا بقى على المدونات الأشياء السلبية اللى أنا شايفها وكده
فقط أتمنى إجابات كاملة ومن غير مجاملات وبلاش حكاية حلو وكويس وتمام وبس لأ أنا عايز وجهة نظر نقدية كاملة
وآخر شىء
متنسوش مشاركتكم فى المدونة التانية واللى أنا بعتبرها بتاعتكم مش بتاعتى
منتظر إختياراتكم لأفضل المواضيع الجيدة فى أى مدونة لغاية يوم الجمعة 22 يناير وهكذا هنستمر فيها كل أسبوعين إن شاء الله
مع ملاحظة إن إسم المدونة إتغير من أعلن عن مدونتك إلى ملتقى المدونين نظرا للتغيير النسبى فى نشاط المدونة وأإتمنى إنكم تغيروه عندكم كمان
وتحياتى للجميع وربنا يعينكم فى الإجابات

إفتتاح جديد

2010-01-07T07:04:00.001+02:00

إفتتاح جديد
للمدونة
منتظرين مشاركتكم

ذكرى ولكنها مستمرة

2009-12-30T01:30:00.000+02:00

نسترجع الذكريات ونرجع بالذاكرة لسنة فاتت
ده موضوع كتبته فى نفس التوقيت ده بس من سنة بالظبط
الناس فى الايام الاخيره بتسال دايما احنا ممكن نعمل ايه لغزه ؟؟؟؟؟؟
وطبعا شوفت كل الكلام اللى اتكتب فى الموضوع ده
معظم الكلام كان منحصر فى الدعاء والمقاطعه والتبرع
طبعا الحاجات دى مهمه بس اغلب الناس سمعت الكلام ده كتير قبل كده
ونفسها تعمل حاجه جديده؟؟؟؟؟؟؟؟؟
وانا فى رأيى ان الموضوع ده يعتبر من أهم الادوار اللى الواحد مفروض يقوم بيها
هخرج من الموضوع شويه وهكلمكم فى شويه حاجات
مره من المرات إحتجزوا بعض كهنة الصين فى غرف تحت الصفر الكهنه خرجوا من الغرفه بيتصببوا عرق
طيب ليه؟؟؟
سيدنا عمر فى إحدى المرات لما سمع بعض ايات النارأصابته الحمى ولازم الفراش فترة من الزمن
عده ايام
طيب ليه؟؟؟؟؟؟؟
واحد صاحبى بيحكيلى وهو بيشوف سباق المارثون فى دوره الالعاب الاوليمبيه كان بيوصل لدرجه انه ينهج ويعرق اثناء المشاهده فقط فى التلفزيون
طيب ليه؟؟؟؟
فى القصص اللى فاتت باختلافها مشتركه فى حاجه واحده ان عقل كل واحد منهم انفصل عن الواقع اللى هو عايش فيه وراح يعيش فى واقع تانى مختلف تفاعل معاه أكنه موجود فيه بالضبط
وده اللى انا اقصده اذا كنا مش عارفين نجاهد بس نفسنا نجاهد يبقى خلاص نعيش حياه المجاهدين
نحاول نوصل بمستوى ايمانا لأعلى درجه ممكنه حتى علشان لو دعينا ربنا يبقى عندنا امل ان ربنا يستجيب
عايز مستوى الادرنالين يوصل فى دمنا الى نفس النسبه اللى هو موجود فيها فى دم المجاهدين فى أرض المعركه
طيب فى ناس مش عارفه توصل للدرجه دى من المعايشه يبقى تحط الموضوع فى دماغها ويكون مستحوذ على عقلها تماما وتحدث بيه نفسها على طول وهتوصل للدرجه اللى انا بقصدها من المعايشه
علشان حتى لما ربنا يسالنا يوم القيامه نقدر نقوله حاجه وربنا يبقى يحاسب اللى مانعين أجسادنا عن الجهاد
بس عمرهم مهيقدروا يمنعوا عقولنا عن ده
ثانيا عايز اوضح امر مهم ان الصراع بين الخير والشر ده صراع ابدى
ودايما ان شاء الله الخير بينتصر يعنى نصر ربنا ان شاء الله قادم
بس امتى؟؟؟؟؟؟؟؟؟
الله اعلم
ربنا سبحانه وتعالى بيقول
وان تتولوا يستبدل قوما غيركم ثم لا يكونوا امثالكم
فيارب اجعلنا أهلا لنصرةالاسلام والمسلمين
يارب استعملنا ولا تستبدلنا
يارب ارزقنا الاخلاص فى القول والعمل
آآآآآآآآآآآآآآآآمين

الموضوع ده لما كتبته كانت لسه المدونة مش موجودة فمش كتير كانوا شافوا الموضوع
وأحداث غزة كانت سبب رئيسى فى إنى أعمل المدونة علشان كده بعدها على طول عملت المدونة
وكان أول موضوع فيها
مصر من غير هدوم
وبعد سنة بالتمام والكمال شكل مصر مش ناوية تلبس لسه
بعد اللى بتعمله ده من بناء لجدار فولاز على حدودها مع غزة وكمان تقف فى طريق قافلة شريان الحياة وتعترض طريقها فى حين إن قصر الرياسة مفتوح لإستقبال قيادات اليهود كل يوم
إعادة نشر الموضوع مناسب أوى علشان نفتكر
إن غزة لن تموت وموضوعها مستمر معانا على طول ولازم نعايش معاه
وكمان مناسب لىّ جدا علشان مش فاضى أكتب حاجة جديدة

للكبار فقط ( الجزء الثانى)

2009-12-21T03:33:00.005+02:00

كان لازم نتكلم عن الجزء التانى من ال vicious cycle اللى إتكلمنا عنه فى الجزء الماضى
وهى مشكلة إطلاق البصر وتصفح تلك المواقع الإباحية ومشاهدة تلك الأفلام الجنسية
وبتخيل إنها أكبر وأخطر من سابقتها وتحريمها جاء صريحا وواضحا جدا لا يقبل أى مجال من الشك
أنا ممكن أتكلم معاكم وأقول أدلة ووعظ مباشر فى الموضوع ده وأذكر آية غض البصر اللى موجودة فى سورة النور
(وقل للمؤمنين يغضوا من أبصارهم.......................)
وكلام مثل (النظرة سهم من سهام إبليس...) ولو كملت الموضوع بالشكل ده هتزقوا منى وتقولوا إحنا عارفين الكلام ده كويس
طيب ندردش مع بعض شوية ونتكلم بصراحة:-
- لو إتكلمنا على مدى إنتشار مثل تلك المواقع قد نجد أرقام مذهلة
مثلا كل ثانية أكتر من 28000 يشاهدون الإباحية على النت
372 يكتبون كلمة إباحية على مواقع البحث
كل 39 دقيقة يصدر فيلم إباحى فى الولايات المتحدة الأمريكية
يعنى من الآخر كده مينفعش ندفن رأسنا فى التراب ونقول الدنيا زى الفل
طبعا الفراغ واليأس وإنعدام المسئولية وسهولة الوصول لتلك الأفلام كلها أسباب مباشرة جدا
- مسألتش نفسك مرة هو إيه السبب فى الإنتشار ده .....؟؟؟؟
كله طبعا يا جماعة معظم تلك الأفلام إنتاج أمريكى وصهيونى ومؤسسات كبيرة بتوجه كل جهودها ناحية الشباب العربى كى يبقى وضعهم كما هو الحال فى المؤخرة مغيب عن الواقع مشغول دائما بما يشبع شهواته وأهواءه
هل ترضى لنفسك أن تكون عونا لهؤلاء فى مشروعهم.....؟؟؟
فلا تكن عونا لأعداء الله بمعصية الله
- فى المعتقلات لما بيحبوا يعذبوا المسجونين بيمنعوا عنهم المية يوم بحاله مثلا ويوقفوهم فى الشمس ويكبوا المية قدامهم على الأرض علشان يكون عذابهم مضاعف
وهو ده بالظبط اللى بتعمله فى نفسك لأن إطلاق البصر يورث الحسرة فى القلب
فهل يا ترى مشاهدة مثل تلك الأفلام يشبع نفسك ويجعلك مستقر نفسيا وسلوكياوبدنيا ..........؟؟؟؟؟
- فى فيلم الكيف كده فى آخره تقريبا كان المخرج بيتسائل إزاى الناس ممكن تقدر تسمع وتنسجم من تلك الأغانى العابطة ذات المستوى الردىء جدا وكان الرد برضه فى الفيلم إنه ممكن الأغنية تكون فى البداية مش كويسة ولكن مع تكرار سماعها تبدأ تعلم فى الدماغ والناس تحفظها وتنسجم منها وده اللى حصل فى مشهد النهاية وهو إن كل الناس مشغلة الأغنية الهابطة وبتسمعها
كانت بداية إنتشار الفاحشة فى قوم لوط هو إن الشيطان صور موضوع الفاحشة ده لواحد وبعد كده عجبه الوضع الشاذ ده
لغاية لما تحول الأمر الشاذ ده إلى أمر طبيعى وسائد عندهم
وتحول الناس الطاهرين إلى ناس أغراب ( أخرجوا آل لوط من قريتكم إنهم أناس يتطهرون...........)
يعنى مشاهدة الأمور الشاذة الموجودة فى تلك الأفلام قد تحول إنسان مستقر سوى إلى آخر شاذ مجرم وبالفعل قرأت تصريحات كتيرة لكبار المجرمين فى العالم كانت بدايتهم مع تلك الأفلام والمخدرات كذلك
- قريب جدا سمعت كلام من دكتور نفسانى كبير بيقول إن هناك شريحة عريضة وكبيرة من الشباب مدمنين نت ومن علاماته الإرتباط الزائد بالنت وقضاء أوقات ضخمة على النت أكثر من حوالى 38 ساعة أسبوعيا وأكثر المواقع التى تجعل الشباب مدمن عليها هو مواقع الشات والمواقع الإباحيية
معظم هؤلاء عرضة سهلة جدا للإكتئاب وغيرها من الأمراض النفسية وخصوصا المدمنين على زيارة مثل تلك المواقع
- تخيلوا معايا إنسان مدمن زى ده علاقته وسلوكه الأسرى مع زوجته وأولاده هيكون عامل إزاى..........؟؟؟
معظم تلك العلاقات الأسرية بتنتهى بالفشل والطلاق
-أخى الكريم لا تظلم نفسك
لإنك ستجد إن المحصلة النهائية من الموضوع ده كله خسار وخسارة كبيرة كمان ( فقد خسر الدنيا والآخرة.............)
-فالحياة هى إمتحانك الصعب
فهل تقبل التحدى.......؟؟؟
الحل موجود دايما عندك أنت صاحب القرار
فى الموضوع اللى فات ذكرنا بعض الحلول والنهاردة ممكن نقول شوية كمان
ولكن كلها مجرد معينات والقرار النهائى والأكيد داخلك أنت فقط
-مهم أوى تبعد عن أى مصدر قد يثيرك ولو كان بسيط لإنه قد يوصلك لمرحلة لا تستطيع التحكم فيها على نفسك وتجد نفسك مدفوعا بشكل لا إرادى للرجوع إلى ما كنت عليه
- ضع جهاز الكمبيوتر مثلا فى الصالة فى مرمى نظر الجميع وإبتعد قدر الإمكان من الجلوس وحدك عليه
-ممكن تنزل بعض البرامج التى تمنع تصفح مثل تلك المواقع
-ممكن تجعل صورة بروفايلك مثلا على الفايس بوك أو توقيعك فى المنتدى بتاعك مثلا صورة دينية تحمل رمز أو معنى يذكرك دايما ويحفزك على الإستمرار فيما نويت عليه
-كل يوم بالليل إبدأ إكتب مذكراتك الشخصية بالتفصيل وما فعلته على مدار اليوم بأكمله وإتكلم شوية كده مع بنفسك ومع الورقة والقلم
-مهما يكن لا تجعل من معصيتك مجال لترك عبادتك يعنى حتى لو كنت مدمن لتلك المواقع أو الأفلام لا تترك أبدا صلاتك أو صومك مهما كانت الظروف
-كل ما ذكرته هنا أو فى الموضوع السابق مجرد وسائل والأهم وضعها فى نطاق التنفيذ
............................................................................
الموضوع السابق مرتبط إرتباط جذرى بالموضوع ده علشان كده
زى ما أنا إتعودت فى المواضيع المرتبطة مع بعضها بيكون التعليق على واحد منهم بس
بالنسبة للموضوع اللى فات أنا كنت قريت وسمعت كلام عجيب يتداوله البعض فى الأمر الفقهى للمارسة العادة السرية وأحاديث ضعيفة وأقوال غريبة
عموما هو العلماء الثقات إختلفوا فى مدى حرمانية الموضوع وأظن إن الحرمانية الأساسية تكمن فيما قد تؤدى إليه العادة بعد كده زى ما وضحت فى الموضوع اللى فات
ولكنها بأى حال من الأحوال لا تقارن بالزنى لذا أباحها بعض العلماء عند خشية الوقوع فى الفاحشة وبالطبع لا ينطبق الكلام علي الأغلبية العظمى من رواد المدونة
وربنا يحفظ شباب المسلمين جميعا

أنا كنت كاتب فى موضوع سابق عن شخص عزيز جدا ( الباشمهندس أحمد) فى موضوع المجنون
الحمد الله الأمور إستقرت عنده بعض الشىء
وده حوار له على إحدى المواقع الإلكترونية يروى تفاصيل ما حدث له

للكبار فقط

2009-12-15T04:20:00.004+02:00

عندنا فى الطب حاجة مشهور جدا إسمها vicious circle
ومعناها إن عرض معين موجود عند المريض ويتسبب فى ظهورعرض آخر وهذا العرض الجديد يزيد من سوء العرض الأول
أى يستمر الإثنان فى الزيادة معا طالما تواجدوا معا
يعنى من الآخر كده حلقة مفرغة
ويستوجب لعلاج المريض علاج الإثنان معا وقطع تلك الحلقة المفرغة
وهكذا هو الوضع مع موضوع اليوم
فى إحصائية فى إحدى البلاد عن نسبة ممارسة الذكور للعادة السرية قبل الزواج ولو مرة واحدة ؟؟
النسبة وصلت لأكثر من 98 فى المية
يعنى واضح إنها مش سرية أبدا بل معلومة لدى الجميع يمكن الإسم مأخوذ من سرية الممارسة فقط
وللأسف قد يجد البعض لنفسه مبررا لتلك العادة كى يطفىء نار شهوته ولكنها كما قلت حلقة مفرغة
فإطلاق البصر والنظر للمحرمات يزيد من نار الشهوة فتدفعه لتلك العادة السيئة وتلك العادة قد تدفعه لإطلاق بصره للمارسة أى أنها حلقة مفرغة تماما يؤدى كل منهما للأخر وقد تكون بداية لما هو أكبر
كل ّالمصائب مبداها من النظر ومعظم النار من مستصغر الشررِ
والمرء ما دام ذا عين يُقلبها في أعين الغيد موقوف على الخطر
كم نظرة فعلت في قلب صاحبها فعل السهام بلا قوس ولا وتر
ربنا سبحانه وتعالى بيقول
وَالَّذِينَ هُمْ لِفُرُوجِهِمْ حَافِظُونَ*إِلَّا عَلَى أَزْوَاجِهِمْ أَوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ*فَمَنِ ابْتَغَى وَرَاءَ ذَلِكَ فَأُولَئِكَ هُمُ الْعَادُونَ
واضح من الآية مجالات إفراغ الشهوة فقط على الزوجة أو ما ملكت اليمين ولم تذكر الآية أى شىء أخر
الرسول عليه الصلاة والسلام يقول
(من يضمن لى ما بين لحييه_أى فكيه_ وما بين فخذيه_ أى فرجه_ أضمن له الجنة)
وبالتأمل فى الحديث نجد أن المعاصى التى نرتكبها باللسان ما أكثرها من كذب ونفاق ورياء وغيبة ونميمة ونشر الأفكار الفاسدة ياااااااااااااه كتير أوى ومنتشرة جدا
فى حين كيف يضمن الإنسان فرجه هل فقط بالبعد عن الزنا الذى هو غير منتشر بالشكل الضخم
بالتأكيد يحفظه عن ما هو منتشر ومتفشى أى بالبعد عن تلك العادة السيئة
لإن الجنة غالية ومهرها لازم يكون غالى برضه
فيه حديث للرسول عليه الصلاة والسلام
(البر حسن الخلق والإثم ما حاك فى نفسك وكرهت أن يطلع عليه الناس)
يا سلاااااام الرسول بيرسخ مبدأ تمشى عليه فالمعصية هى ما تحاول أن تخفيه عن أعين الناس وتفعله فى الخفاء
وأظن إن تحذيرالرسول متوافق تماما مع ما يفعل عند ممارسة تلك العادة السيئة
تقول الحكمة
إحفظ منيك ما إستطعت فإنه ماء الحياة يصب فى الأرحام
وإن كانت تلك العادة لا تورث عمى البصرولكنها تورث عمى البصيرة وإن كانت لا تؤذى الأعضاء فهى تؤذى الحواس
وإن سببت راحة للنفس لوهلة قصيرة فإنها تؤذيها آمادا عدة وإن لم تتعب البدن فإنها تتعب الإيمان والوقار والإستئناس
برضى الله
تبرير غير منطقى لدى البعض بإن يسمح لنفسه بممارسة تلك العادة مدعيا قرب وقوعه فى الفاحشة
رغم إن بينه وبين الفاحشة مسافة ضخمة ولكنه يستسهل الأمر ويسارع بها مدعيا أنها تطفىء شهوته رغم أنها حل وهمى فمن يمارسها يشعر برغمة دائمة فى الإستمرار عليها فما إن يطفئها يوما حتى يعود إليها فى اليوم الذى يليه فينهمك فى تلك العادة حتى ينهك جسده
فما الحل لعلاج تلك العادة..؟؟
أنا ممكن أكتب 1-2-3 لغاية مية ولكن لا معنى لها إن لم تبدأ فى التنفيذ ثق تماما أن الحل بيدك وحدك ولا أحد غيرك ومفيش حاجة إسمها مستحيل أو لا أستطيع بل تستطيع
الرسول عليه الصلاة والسلام كان يجلس مع شخص يأكل بيده اليسرى فقال له الرسول كل بيمينك قال لا أستطيع فرد عليه الرسول لا إستطعت ما منعه إلا الكبر قال الراوى فما رفعها إلى فيه
يعنى هتقدر إن شاء الله بمزيد من العزيمة والإرادة فقط هناك بعض المعينات على ذلك
-بغض البصر والإبتعاد عن كل كل مكان وكل وسيلة قد تثير الغريزة فى نفسك
فإياك إياك أن تغتر بعزمك على ترك الهوى مع مقاربة الفتنة فإن الهوى مكايد
- الإنشغال الدائم بكل ما هو مفيد فلا تترك نفسك للفراغ أبدا أن تشغل نفسك بالدعوة وبإكتساب مهارات وثقافات جدية تستحوذ على طاقتك
فنفسك إن لم تشغلها بالحق شغلتك بالباطل
-الصحبة الصالحة التى تجنب الفرد الوحدة والفراغ اللذان هما أكبر دافع لإنهماك فى كلك العادة السيئة
-عند الذهاب للنوم حاول تلتزم بآداب النوم التى حث عليها الرسول أن تكون متوضىء على جنبك الأيمن ذاكرا لأذكار النوم
ومن الأفضل أن تنام عند الشعور التام بالتعب بعد يوم شاق من العمل النافع كى تخلد للنوم سريعا فلايترك لك الشيطان مجالا ليشغل بالك
-لا تقلل أبدا من قيمة الصوم فأنت فى فترة الشباب وهى العبادة الأكثر ملائمة لتك الفترة والتى حث عليها الرسول للشباب الغير متزوج- وبالتأكيد إن كان الزواج فى إستطاعتك فخير
-لا تيأس أبدا وتحلى بالصبر والمثابرة فحتما ستنجح يوما فقط كن دائما فى معية الله ملتزما بالصلوات الخمس فى وقتها داعيا الله تعالى دائما أن يحفظك من كل سوء
نصيحة هامة
اليأس مشكلة لأن هناك الكثير ممن يأسوا فإنتكسوا فقطعوا الأمل بالله والشيطان قد يأتى للفرد ويقول له أنه منغمس فى المعاصى والذنوب فلايصح أن يستمر مع هؤلاء الصالحين أو أن يجالس هؤلاء الطيبين فلا يزال الشيطان يقترب منه حتى يبعده عن إخوانه
بالفعل تلك الطرق ليست علاج سحرى وبالفعل قد لا يبدو سهلا ولكن عليك دائما بالمثابرة فإن رجعت وعدت للذنب فالمسارعة للطاعة ومعاودة الإستغفار واجب فإن الحسنات يذهبن السيئات
آخر كلمة فى الموضوع
بعد الكلام اللى فات واضح إن تلك العادة فيها من المعصية الكثير ولكن من رحمة ربنا إنه لم يحدد تماما مقدار تلك المعصية
لذا تجنبها يسد على النفس الكثير والكثير من أبواب المعاصى
وأتمنى لو فيه أى حد عنده تجربة شخصية فى الموضوع أو أى مشكلة متعلقة بتلك العادة إنه يكتبلنا علشان الجميع يستفيد

إلى جميع الزوار
المدونة وحشتنى جدا وده السبب الرئيسى اللى خلانى أقطع فترة الراحة النهاردة بس
وهكمل فترة إنقطاعىلظروف خارجة عن إرادتى جدا وإن شاء الله نرجع بنشاط لما أقدر أخد نفسى الأول
وبعتذر للجميع على عدم إستطاعتى متابعة أى مدونة
إنى أحبكم فى الله

التضحية فى وقت الأضحية

2009-11-27T01:55:00.000+02:00

الحياة أصبحت مادية جدا
والجميع حاليا يفكر بمنطق الكسب والخسارة وتجده قبل أى شىء يتسائل قائلا طيب وإيه المقابل
أظن إنه تفكير مشروع جدا
وإنت كمان لازم تفكر بالمنطق ده
ولكن الغبى هو من ينتظر المقابل مباشرة حتى وإن كان ضئيلا
والذكى هو من يعمل للكسب الكبير وإن كان متأخرا
أكبر مقابل ممكن الواحد يتحصل عليه إيه......؟؟
لن يكون بأى حال من الأحوال أفضل من الجنة ونيل رضا الله عز وجل لذا يهون أى شىء مقابل ذلك
وقد صرح الرسول صلى الله عليه وسلم بذلك حين قال
(ألا إن سلعة الله غالية ألا إن سلعة الله هى الجنة)
الرسول تعامل معانا بنفس المنطق
فكما يقولون من خطب العلياء لم يغله المهر
لذا تهن أى صعاب للحصول على تلك الجائزة الكبرى
................................................................
سمعت كلام من أكتر من واحد من أولئك الذين إعتقلوا ظلما فى أمن الدولة
يقول له أحد الضباط أعلم إنك مظلوم ولكن دعنا نكمل التحقيق للروتين ليس أكثر
وأخر يبكى من فرط إحساسه بمدى حقارة ما يفعل
وأخر يتفاعل معهم ويغنى معهم تلك الأناشيد الحماسية التى قد يخففون بها عن آلامهم
خصوصا بعد مخالطتهم ومعاشرتهم فى المعتقلات
وإذا سئلتهم عن سبب ذلك يكون الرد واحد
أنا عبد المأمور وما باليد حيلة أنا فقط أنفذ الأوامر
وإذا سألته ما الذى يدفعك على الإستمرار؟؟
يتعلل بالرزق والمكسب والعيال
يقول تعالى
(وَإِنْ خِفْتُمْ عَيْلَةً فَسَوْفَ يُغْنِيكُمْ اللَّهُ مِنْ فَضْلِهِ إِنْ شَاءَ)
سجّان سعيد بن جبير-آخر الشيوخ العلماء الذين قتلهم الججاج بن يوسف الثقفى- شعر بتأنيب الضميرفسأل الشيخ
هل أنا يمكن إعتبرارى من أعوان الظالمين؟؟
فرد عليه سعيد بل أنت من الظالمين أنفسهم وأعوانهم هو من يعد الطعام والملبس وما شابه ذلك
...................................................................................
سيدنا إبراهيم عندما جاءه أمر ربنا بذبح ولده
لم يتردد-لم يناقش -لم يتعلل-بدأ فى التنفيذ
ده رد الفعل الطبيعى لأى إنسان مؤمن

البعض يقول هذا نبى وإستعداده بالتضحية بولده شىء عظيم ولكننا لسنا كالأنبياء
سحرة فرعون أول اللقاء
قائلين "وجاء سحرة فرعون قالوا إن لنا لأجر إن كنا نحن الغالبين "
بعد موقف العصا بلحظة واحدة آمنوا وإستعدوا للتضحية بأرواحهم من أجل إيمانهم هذاولم يرهبهم تهديد فرعون
(لأقطعن أيديكم وأرجلكم من خلاف، ولأصلبنكم في جذوع النخل..)
هؤلاء السحرة لم تتجاوز مدة إيمانهم دقائق
....................................................................
البعض يقول هذه التضحيات قوية جدا قد لا تتاح للفرد التضحية بولده مثل سيدنا إبراهيم أو التضحية بأعضاءه ونفسه مثل سحرة فرعون
ولكن يمكنك التضحيك بوظيفتك إن كانت حرام يمكن التضحية بوقتك من أجل طاعة الله يمكنك التضحية بمالك من أجل الفقراء
آخر مثال لتضحية تبدو بسيطة جدا جدا ولكنها قد تكون سببا فى دخول الجنة
عن عائشة رضي الله عنها قالت : دخلت على امرأة ومعها ابنتان لها تسأل ، فلم تجد عندي شيئاً غير تمرة واحدة ، فأعطيتها إياها فقسمتها بين ابنتيها ولم تأكل منها ، ثم قامت فخرجت ، فدخل النبي صلى الله عليه وسلم علينا ، فأخبرته فقال : (( من ابتلي من هذه البنات بشيء فأحسن إليهن كن له ستراً من النار ))
وفى رواية أخرى لموقف مشابه
قال: جاءت امرأة إلى رسول الله صلى الله عليه وسلم ومعها ابناها، فسألته فأعطاها ثلاث تمرات لكل واحد منهم تمرة، فأعطت كل واحد منهما تمرة، فأكلا، ثم نظرا إلى أمهما فشقت التمرة نصفين، وأعطت كل واحد منهما نصف تمرة، فقال النبي صلى الله عليه وسلم: قد رحمها الله برحمة ابنيها.
ياسلام على رحمة الإسلام الموزقف مش محتاج تعقيب بصراحة
آخر الكلام
كل سنة وإنتم طيبين
إن شاء الله هريح شوية كده عن الكتابة الفترة اللى جاية
دعواتكم

لقطات على مشهد النهاية

2009-11-19T00:34:00.003+02:00

كرة القدم مثال مصغر للدنيا يوم لك ويوم عليك طبيعى جدا أن نحزن على الخروج من الحلم اليوم
ولأن هذه هى طبيعة دنيانا التى نحياها لا تسير أبدا كما نريد أو كما نتخيل
يقول بن عطاء
(لا تستغرب وقوع الأكدار ما دمت فى هذه الدار فإنها ما أبرزت إلا ما هو مستحق وصفها وواجب نعتها)
فلنحزن قليلا ولنسترجع حياتنا سريعا
ومهما يكن فهناك الكثير من الأمور تستوجب الحزن أكثر من الكرة
ولنجعل دعوتنا دائما
(اللهم لا تجعل مصينتنا فى ديننا)
......................................................
المباراة إنتهت ولكن هناك الكثير من الأمور لا يجب أن تمر مر الكرام هناك نقاط بعيدة عن المباراة نفسها واجب التعليق عليها
كان واضحا جدا الخلل الإعلامى فى تناول المباراة من الطرفين فكان يخرج علينا أحدهم ويدعى على الجزائر ويقول اللهم نكد عليهم اليوم وتتناول المجموعة بعض المشاهد من بعض مشجعى الجزائر وعمل حلقات كاملة على تصرفاتهم
كان لابد من تجاهل تلك التصرفات فهذه هى طريقتهم فى التشجيع وطالما إقتصر الأمر على فديوهات أو أخبار لديهم كان لابد من تجاهلها لإنه لكل فعل رد فعل
والتعامل بمنطق إحنا اللى عملنا وإحنا اللى سوينا ومفيش حد زينا وهكذا
فكان الرد الجزائرى أكثر غباءا فإدعوا وفاة مشجعين لديهم وإدعوا إنتهاك أعراض نساء وقالوا اللعب فى إسرائيل أرحم من مصر فكان الرد مباشرا من جماهير الجزائر بالإعتداء على كل ما هو مصرى أمامهم
كذلك رفض رئيس إتحادهم روراوة مصافحة سمير زاهر رئيس إتحادنا والهروب منه
الجميع مشترك فى إثارة الفتنة وإن كانوا هم أكثر وضوحا لإنهم شعب ثورى بطبعه
وربنا يحفظ جمهورنا اللى فى السودان ويترحم من جمهور الجزائرالمتعصب الثائر دائما
فما حدث فى السودان شىء مدبر جدا لأنهم قد أرسلوا آلاف المشجعين الهمج والرعاع حاملين الأسلحة البيضاء
وكذلك حين تسمع تصريحات وزرائهم المسئولين فقد تحولوا إلى مشجعين
وقمة الأسى حين يأتى الخلل من المسئولين والتدبير لتلك المهزلة المهينة

...................................................
نأتى لمشكلة أخرى وهى التذاكر لن أتكلم عن السوق السوداء أو سرقة التذاكر من قبل بعض الإداريين ولكن أن تطبع تذاكر أكبر بكثير من سعة الإستاد فهذا يسمى سرقة أو نهب علنا وأن يترك آلاف المشجعين حاملى التذاكر خارج الإستاد دون الدخول فى المبارة الأولى فهذا إستكمال لمنظومة الفساد لدينا
والأغرب من ذلك هو تأكيد المسئول عن الإستاد فى حوار قبل المباراة بساعات وقوله سنغلق الإستاد عندما تمتلىء سعته مباشرة أى أنه يعلم أن هناك الكثير لن يدخل وهو حامل للتذكرة
...................................................
بعد المباراة الأولى بدأت حملات النفاق والتلميع لجمال مبارك وبدأوا فى تناول مدى دعمه ومساندته للفريق ومدى فرحته بعد الهدف وإنصهاره بين طبقات الشعب رغم جلوسه فى مقصورة كبار الزوار
وخرجت الطائرات والوفود من مصر محملة بشباب الحزب الوطنى وإنتشر الهتاف
(يا جمال قول لأبوك الفراعنة هيشرفوك) وذلك بعد المباراة الأولى وقبل مباراة السودان
يبدو أن السيد جمال مبارك مسئول فقط عند الإنتصار وعند الفوز وغير مسئول عن كل قضايا الفساد والهزائم التى يتجرعها الشعب واحدة تلو الأخرى
يبدو إن هناك الكثير من الخلط يحدث فى بعض الأمور خصوصا وإن الجمهور المسكين ممكن أن يقول أى شىء فى ظل نشوته وفرحته ويتناسى جميع أحزانه مع مباريات الكرة
وقد وصل غرضهم تماماوهو التعامل مع السيد جمال مبارك بإعتباره الرئيس القادم
.................................................................
جمهور الجزائر فى السودان حمل معه عبارة مكتوب عليها (سنفتح معبر رفح)
ومن خلال تعليقات بعض القراء فى الكثير من المواقع العربية بدأت أستشعر مدى كره الكثير من العرب لمصر وقد يكون ذلك سبب مدى ضعف المسئولين وتهاونهم فى أمورهامة من قبل مثل إغلاق معبر رفح وتصدير الغاز لإسرائيل والضعف البارز خلال فترة الحرب على غزة
وبنفس الطريقة تناولت صحف الجزائر الرئيس المصرى وإعتبرته مثل فرعون فى تعامله معنا مثل
أليس لى ملك مصر وهذه الأنهار تجرى من تحتى
وما أريكم إلا ما أرى وما أهديكم إلا سبيل الرشاد
إن الرئيس مبارك مثل فرعون فالجميع الرؤساء العرب لا يختلفوا عنه كثير فالجميع فى الضعف والفساد سواء الجميع ينجح فى الإنتخابات بنفس النسبة إياها
وإن تولى جمال بعده فستقوم باقى الدول العربية بنفس السيناريو وتوريث السلطة
وإن كان عندنا فرعون فعندهم شبيهه الذى لا يختلف عنه كثيرا
حملوا معهم كذلك بعض العبارات المهينة والتى أخل حتى أن أتفوه بها مع أقرب أصحابى مضمونها إن مصر بلد العرى والرقص والدعارة
يبدو إن ما تنتجه مصر من أعمال فنية هابطة يأخذها البعض على إنها سلوك عام للشعب ولا أظن أن إنتاجهم الأدبى أكثر إحتراما من عندنا بأى حال من الأحوال إن كان لديهم إنتاج أدبى
فمصر بها كل شىء فكما تتواجد الأعمال الهابطة يتواجد بها كذلك أعظم علماء الأمة العربية
بصراحة هناك أسباب كثيرة للكراهية قد لا أعلمها كذلك
.........................................................
كلمة أخيرة
اللى فات كانت مجرد خواطر متعلقة بالمباراة وإن كانت بعيدة كل البعد عن المستطيل الأخضر
أتمنى أن لا نفرط فى الحزن ونشغل تركيزنا أكثر فى الإستفادة بتلك الأيام المباركة القادمة وإسترجاع روح رمضان والخروج منها بأكبر إستفادة لأن هذا هو الفوز الحقيقى الذى يستحق التعب من أجله
فقال رسولنا الكريم
(ما من أيام العمل الصالح فيها أحب إلى الله من هذه الأيام قالوا:ولا الجهاد في سبيل الله؟ قال(ولا الجهاد في سبيل الله إلا رجل خرج بنفسه وماله فلم يرجع من ذلك بشيء)
وكل عام وأنتم بخير

دعونا نحتفل

2009-11-15T02:17:00.002+02:00

كنت ناوى أكتب النهاردة أو بكرة
ولكن حبيت أحتفل معاكم النهاردة ولغاية يوم الأربع إن شاء الله
ونكون وصلنا لكأس العالم بخير إن شاء الله
وبعدها الواحد يقدر يكتب برؤية أفضل لإن بصراحة فيه حاجات كتير أوى عايز أعلق عليها
نأجلها شوية
وربنا ييسر لشبابنا وولاد مصر الملتزمين
(منتخب الساجدين)

لتحميل الهدف الأول لعمرو ذكىفى الجزائر هنا
ولتحميل الهدف الثانى لعماد متعبفى الجزائر هنا

بالنسبة للموضوع اللى فات طبعا بشكر مشاركتكم ذكرياتى
ولكن طبعا فيه شكر خاص جدا لتعليق صاحبة الشأن ( أبلة نهى ) على الموضوع وأكيد فرحت جدا بالتعليق ده

النهاردة مفيش تعليقات نأجلها لما بعد الإحتفالات

أنا وهو وهى

2009-11-06T23:30:00.002+02:00

كانت متعلقة بيا جدا وأنا كمان كنت مرتبط بيها بطبيعة الحال
حتى إنها كانت بتيجى عندنا على طول بعد الكلية حتى فى أيام الشتا كمان
أما أنا بقى كنت على طول بتغدى عندهم يوم الجمعة وفى المناسبات وكان أول بيت أدخله فى العيد طبعا كان عندهم
ويا سلام بقى لما كنا بنخرج مع بعض كانت لازم تكون شيك جدا ولابسة جزمة بكعب كمان مش عارف كنت بصمم على كده ليه
وكنت لازم أركب معاها تاكسى وبرفض أى ميكروباص أو نتمشى حتى وأروح أوقف أنا التاكسى وهى اللى تدفع وكنت أختار دايما أغلى حاجة مش علشان غالية ولا علشان هى اللى هتدفع لأ علشان ده اللى عاجبنى
وفى يوم الجمعة اللى كنت دايما مقيم فيه عندهم أروح بعد صلاة الجمعة وبعد شوية كده أقعد أزعق
أزاى الأكل لسه مش جاهز وأقولها فيه حد لغاية دلوقتى لسه مجهزش الأكل فى حين إن رجالة البيت أخوها وأبوها ساكتين ومش بيتكلموا خالص بس أنا كنت معزور لأنه ورايا جلسة تحفيظ بعد العصر
الدنيا كانت تمام لغاية لما إتخطبت طبعا أنا كنت شخص غير مرغوب فيه بالنسبة لخطيبها وكان دايما بيرخم عليا وكنت بستحمل كنت طيب وقتها أوى
المشكلة بقى أنى كنت سبب فى مشكلة عندها فى أول أسبوع جواز لإنها كانت حاطة صورتى على المرايا عندها وكانت لما تصحى تعد تكلم مع الصورة وتصبح عليها وفى اليوم اللى بعده صحيت لقيت الصورة مقلوبة
وإزاى ده يحصل وكده وكانت مشكلة
وعلشان يصالحها كان لازم يروح يجبنى من البيت وأروح أتغدى معاهم وبالفعل فوجئت بالموضوع وروحت معاه أتغدى عندهم فعلا هو أه أينعم إترميت بعدها فى الصالة لوحدى قدام التلفزيون لغاية لما نمت على روحى
بس
ياااااه كانت أيام
صحيح أوعى يكون فى حد لسه مش فاهم أنا كنت وقتها 4 أو 5 سنين كده وطبعا هى كانت بنت عمتى وكانت لسه مخلصة كلية تقريبا
وماشاء الله ولادها حاليا فى الثانوية كده ربنا يصلح حالهم
وحاليا لما بتنزل أجازتها من السعودية لازم نفتكر الذكريات دى
طبعا فى حاجات كمان كتير
زى مثلا لما كنت بروح معاها المدرسة
هى كانت مدرسة تعيين جديد وأنا حوالى 4سنين وشوية كده
كنت بقعد معاها فى الفصل طبعا مش فاهم حاجة
وأقعد أكلم العيال جنبى وأتعرف عليهم والكلام خدنى مع الواد اللى جنبى
وسألته أمك إسمها إيه ؟؟ ورد عليا
عجبتنى الفكرة قولت خلاص أسأل العيال كلها فى الفصل هى إمك إسمها إيه
وطبعا قلبت الفصل تهريج قامت مزعقة فى الفصل
وقالتلى روح أقف فى آخر الفصل وإرفع إيدك لفوق
وروحت وقفت هناك وشوية كده وإيدى وجعتنى
قمت قايلها ينفع كده توقفى ابن خالو حبيبو الوقفة دى
هههههههههههههه

تعليق أخير
اللى أنا عايز أقوله إن الغيرة شعور جميل ومطلوب فى معظم الأحيان بس دايما الشىء إذا زاد عن حده بيتقلب لضده
الزوجة مثلا بتحب جدا إن زوجها يغير عليها ويحافظ عليها بس يعنى مش لازم يغير من عيل صغير ولا يغير من حاجات بسيطة
والغريب إنى بلاقى حاليا إن الإصحاب حتى بيغيروا من بعض وخصوصا البنات
والبنت تقول إزاى هى بتخرج مع فلانة ومش بتخرج معايا وإزاى بيتفسحوا مع بعض لأ وكمان بتكلمها فى التليفون أكتر منى أكيد بتحبها أكتر منى
وتغير من صاحبتها وممكن يكون مشكلة كمان

ياريت بس كل شىء عندنا نقيمه ونوزنه بالقدر المناسب له مش زيادة أوى ولا قليل أوى

حاليا طبعا جوزها حبيبى جدا وربنا يباركله فى عمله فى السعودية
وبيقعد معانا يفتكر الذكريات وأيام ما كان بيرخم عليا
ههههههههههههه

موضوع النهاردة كان خفيف ننوع بيه المواضيع هنا ونخفف شوية من توتر الأحداث الجارية وكده
ولو فيه أى حد لسه عنده تعقيب على الموضوع اللى فات ممكن يعلق هنا أو على الموضوع الرئيسى اللى قبله
ومش معنى إنى قفلت التعليقات عليه إنى مش عايز تعقيب أنا بس كنت عايز أريحكم
تحياتى

لازم نوضح

2009-11-04T23:42:00.000+02:00

كما توقعت تماما الأراء تنوعت وتباينت بشكل كبيرأوى فى الموضوع السابق
فى البداية أنا حابب أشكر كل الناس اللى تفاعلت معانا وأبدت رأيها سواء كان تأيد أو إعتراض
كنت فعلا سعيد جدا بالتعليقات دى
الموضوع أكبر من إنه ينتهى فى موضوع واحد أو من مرة واحدة
طيب أنا هحاول أتكلم من خلال أرض ثابتة مشتركة ومنختلفش فيها
أول نقطة
إنه الأساس عندنا هو الشرع أين كان رأى العرف والتقاليد والقرآن والسنة هما مصادرنا الرئيسية واللى لازم نعتمد عليهم ولاقيمة للعادات بجوارهم
أنا عايزك بس تتخيل شعورك كده
لو إنت روحت فى زيارة لصديق وبعد كده خرجلك وقالك معلش مش هعرف أقابلك دلوقتى ومش فاضى
رغم إنه فيه نص صريح جدا بكده
قال الله سبحانه (يا أيها الذين آمنوا لا تدخلوا بيوتا غير بيوتكم حتى تستأنسوا وتسلموا على أهلها ذلكم خير لكم لعلكم تذكرون * فان لم تجدوا فيها أحدا فلا تدخلوها حتى يؤذن لكم وان قيل لكم ارجعوا فارجعوا هو أذكى لكم والله بما تعملون عليم )
طيب تخيل شعورك لو سافرت فى عمرة فى رمضان ولقيت واحد فى السفينة معاك بيفطر فى نهار رمضان
رغم برضه إنه فيه نص صريح بكده
قال الله سبحانه ( يا أيها الذين آمنوا كُتب عليكم الصيام كما كُتب على الذين من قبلكم لعلكم تتقون أياما معدودات فمن كان منكم مريضا أو على سفر فعدة من أيام أخر وعلى الذين يطيقونه فدية طعام مسكين فمن تطوع خيرا فهو خير له وأن تصوموا خير لكم إن كنتم تعلمون)
خلاص كده النقطة دى واضحة ومفيهاش نقاش
النقطة التانية
وهى الأمور التى إعتاد عليها المجتمع ولم يذكرها الشرع مطلقا
بغض النظر عن الأمثلة التى ذكرتها فى الموضوع السابق والتى رآها البعض محرجة
تخيل معايا داعية إسلامى فى التلفزيون بيتكلم ولابس مثلا تيشيرت ملون ولا لابس مثلا تيشيرت عليه جمجمة
طبعا مش هتسمعه أبدا بل هتسخر منه كمان
على الرغم إن مفيش حد يقدر يقول إن كده حرام زى ما قولتوا إن لبس الكت وحرام فى الموضوع اللى فات
يبقى الموضوع ده متعلق بحاجات تانية بس ملهاش علاقة بالشرع
بتخيل إنه ممكن يكون متعلق بالحياء أو ما أفضل أن أسميه بالذكاء الإجتماعى
لإن الإنسان المسلم لازم يكون نموذج يقتدى به ويألفه المجتمع المحيط أما إذا قام بعمل غريب أو شاذ مخالف لما إعتاده الناس سيلفظه المجتمع وإن كان هذا العمل حلال شرعا
وتماشيك مع مجتمعك المحيط يعطى لك مساحة أكبر من التفاعل معهم والتأثير عليهم
لذا أنا مثلا لا أتعمد الخروج للبلكونة بالهيئة التى ذكرتها وهو بالفانلة الكت ولكن فقط عند الحاجة لإنى لا أفضل أن أكون غريبا أو شاذا عن المألوف وإلا لكنت خرجت للشارع بتلك الهيئة أو جلست مع جميع الضيوف بذلك
يعنى مثلا
لو أنا سافرت السعودية سأرتدى مثلهم الجلباب والعمامة أما لو سافرت أمريكا مثلا سأرتدى التيشيرت طالما إن كلا الأمرين حلال شرعا
وأظن إن هذا السبب بالتحديد هو سر شعبية ونجاح الإخوان المسلمين وسط الشارع المصرى لإنك تجدهم متعايشين ومتماشيين مع المجتمع فى مشاكله وظروفه وكافة أحواله لذا سهل عليهم التأثير على الناس
ولكن لازم أوضح
لو كان الشائع فى المجتمع هو أمر حرام شرعا وحرصك على الحلال سيكون غريبا أو شاذا فنعم هذا الفعل الشاذ
فكما قال سيدنا الرسول
(بدأ الإسلام غريبا وسيعود غريبا فطوبى للغرباء )

يارب تكون كده الفكرة واضحة والكلام متفق عليه معاكم

مفيش تعليقات النهاردة ولو فيه تعقيب ممكن تعقب على الموضوع اللى فات
إن شاء الله هيكون فيه موضوع خفيف وطريف جدا بكره أو بعده نخفف بيه حدة النقاش ده
وجزاكم الله خيرا

بين الشرع والتقاليد

2009-10-29T04:00:00.005+02:00

لم أكن أنوى الكتابة اليوم مطلقا ولكن لظروف تأجيل إمتحان أعمال السنة للجراحة فقد توفر لدى القليل من الوقت ولمواقف أخرى سيتناولها الموضوع فيما بعد
الموضوع اليوم مثير للجدل وربما يكون صادم للبعض ولكن المهم
1- إنه قبل قرأة الموضوع عليك بإعمال عقلك والنظر للموضوع بمنطقية وحيادية تامة
2- الموضوع معبر عن رأيى فقط والذى قد يقبل الصواب والخطأ ويقبل كذلك التغيير إذا ثبت الخطأ

هناك بعض الأمور التى قد ترفضها التقاليد رفضا تاما بينما لم يحرمها الشرع أو يتحدث عنها
يعنى مثلا طوال الصيف يكون جلوسى فى المنزل دائما بالفانلة الداخلية وشورت طويل أو ربما برمودا ومن الممكن أخرج للبلكونة بهذا المنظر وربما يكون جلوسى مع أصحابى المقربين أيضا بهذا المنظر وربما أصلى كذلك فى المنزل بهذا الشكل
طبعا لا أسلم من كلام مثل
عيب يا إبنى ما يصحش - إيه اللى إنت عامله فى روحك ده -مفكر نفسك عنتر زمانك يعنى
وكلام كتير لا داعى لذكره
أظن إنه الكتف لدى الرجل ليس بعورة حتى أنه أثناء الحج يكشف الرجال عن أكتافهم وكذلك كانوا قديما فى عهد الرسول فقد كان يدعو حتى ليظهر بياض إبطيه كيف يظهر ذلك إن لم تكن زراعه مكشوفة
والعجيب كمان إنك تلاقى الناس فى المصايف متقبلة الوضع جدا رغم إن الرجالة بيكون بالمايوه فقط مش مجرد كتف عارى
وكذلك بعض الكلمات مثل a7a والتى لو تفوهت بها إعتبرت قولا فاحشا وجرم لا يغتفر وتصبح قليل الأدب
بينما قد لا تحمل الكلمة أى معنى سوى وسيلة للإمتعاض أو الإعتراض عن شىء معين لذلك قد تقبلها بعض المدن مثل الإسكندرية بشكل طبيعى جدا ودون أى مشكلة
وكان الدافع فى قبول هذا ورفض ذاك فقط التقاليد والعرف
ومثلا فى السعودية إذا سارت المرأة هناك كاشفة عن وجهها أصبحت بذلك آثمة ومخالفة ولا يتقبلها البعض رغم تأكيد الكثير من العلماء إن إرتداء النقاب سنة أو فضل أى أنه ليس بفرض
بينما يبدو العكس مثلا فى مصر فقد تبدو المنقبة لدى البعض ومنهم شيخ الأزهر نفسه -سامحه الله -خارجة عن المألوف بل يعتبرها رجال الأمن -ربنا يخلصنا منهم- خطر على الأمن الداخلى للبلد
وكان الدافع فى قبول هذا ورفض ذاك التقاليد والعرف فقط
ونأتى للسبب الرئيسى لموضوع النهاردة صورة رفعتها من يومين على الفايس بوك الصورة إعتبرتها طريقة إعتراض مبتكرة وطريفة بعض الشىء ولم أرى فيها أى إثم فى نشرها سوى إنها قد تكون مخالفة للتقاليد والعرف وبعد يوم واحد من عرضها حذفتها لما وجدته من إعتراضات البعض
ولذلك لم أنشرها فى الصفحة الرئيسية للموضوع وسأترك لينك للصورة فى أول تعليق
ولكن هناك تحذير-مثل الذى يتركونه فى الأفلام فوق18- لمن مشاعره حساسة زيادة شوية أو التقاليد ليها وزن كبير عنده لا ينصح بمشاهدة الصورة
لذلك لا إريد إعتراضات عليها لإنى قد حذرته من البداية
وهنا يبقى السؤال
هل التقاليد بالفعل بمثابة الشرع ....؟؟؟
لا أظن ذلك مطلقا فقد تركت لنا كوارث متواجدة فى واقعنا ونتقبلها للأسف تحت شعار التقاليد
مثلا عندما يأتى عم الأولاد إلى منزل أخوه ولم يجد سوى زوجته بمفردها تقتضى التقاليد بدخول العم وإنتظار الزوج حتى يحضر من الخارج وإن لم تسمح له بالدخول تعتبره التقاليد عيبا صارخا بينما هذا هو عين الصواب فى الشرع
والحديث واضح جدا قال رسول الله صلى الله عليه وسلم : " إياكم والدخول على النساء ، فقال رجل من الأنصار : يا رسول الله أفرأيت الحمو ؟ قال : الحمو الموت
والحمو هو قريب الزوج
وبنفس المنطق تجد الخطيب يجلس مع خطيبته بمفرديهما فى المنزل أو فى النادى أو السينما أو غير ذلك
فالعرف يعطى تصريح لها بذلك وإذا إعترض أحد الطرفين على ذلك يعتبر معقد
رغم إن الرسول بيقول
(ما من رجل إلا ومعه قرينه -يعني شيطان- فلما قالوا له: ولا أنت يا رسول الله؟ قال: ولا أنا، إلا أن الله تبارك وتعالى أعانني عليه فأسلم)
وقال أيضا
(ما اختلى رجل بامرأة إلا كان الشيطان ثالثهما)
وكذلك فى الأفراح أصبحت من التقاليد لدى الجميع هنا فى مصر تشغيل الأغانى الهابطة والتجمع والرقص عليها وتخلى العروس عن حجابها رغم أنها فى الأساس محجبة والإختلاط والتزاحم بشكل قد يدعو للأسى بل والأغرب من ذلك هو ما تفعله البنات فى مثل تلك الأفراح من وضع الأحمر والأصفر والأخضر والفوشية والبمبة والروز مش عارف بيجبوا الألوان دى كلها منين أملا فى أن تجد عريس لها والأغرب أنها قد تجد ذلك المغفل الذى قد إنخدع بمظهره
هذه هى التقاليد عندنا فتبا لمثل تلك التقاليد التى نتفاخر بها
ياااااااااه هناك الكثير والكثير من تلك التقاليد البالية مثل زيارة القبور يوم العيد وزيارة مقابر الأولياء والصالحين والتمسح بها وتقديم القرابين لها
أشياء كثيرة لا أساس لها من الصحة سوى "بل وجدنا آبائنا كذلك يفعلون"
كلمة أخيرة
أحيانا بتكون التعليقات مثل الماء للأرض الجافة وفعلا فيه مواضيع كتيرة حسيت فيها بالمعنى ده زى الموضوع اللى فات وانا سيبت تعليق مجمع لكل تعليقاتكم وعلى فكرة صحيح الإنسان العزيز اللى نصحنى اللى إتكلمت عنه ده باش مهندس كبير وشيخ فاضل وبعتبره قدوتى فعلا يعنى مش صاحبى كما توهم البعض ودى فرصة إنى أقوله ربنا يبارك فيك
والموضوع ده محتاج رأيكم فيه فعلا وخصوصا المثقفين منكم وياريت بلاش تعصب فيه وأنا هتقبل النقد
وجزاكم الله خيرا

هل أنا متناقض....؟؟

2009-10-20T19:47:00.004+02:00

جملة وجهها إلىّ أحد الأصدقاء من فترة كده
هو إنت متناقض ولا إيه..؟؟ لما شعره من أخطاء لدى
فكرت فى الكلمة دى كتير أوى وفعلا قولت لنفسى أنا فعلا أكيد مش بالقدر ده من الإلتزام اللى بتكلم بيه ومش بالمثالية الموجودة فى كتاباتى
وتسائلت هل الكلام ده -المواضيع الدينية- ممكن يتحسب عليّ ومش لصالحى
والموضوع ده سببلى أزمة لفترة طويلة
فأكيد أنا مقصر مع ربنا ودايما بحس إنى مقصروأكيد الواحد فى محاولاته إنه يكون ملتزم بيصيب وبيخطىء وأنا وضحت الكلام ده فى موضوع الملاكم قبل كده
الرسول عليه الصلاة والسلام بيقول
(سددوا وقاربوا)
يعنى لو معرفتش توصل للمثالية قرب منها بقدر الإمكان ولإن ربنا سبحانه عالم بتقصيرنا وعالم بكثرة المفاسد من حوالنا
فقال سبحانه
( فإتقوا الله ما إستطعتم.....) إلى أخر الآية الكريمة
بن عطاء كان له أثر كبير أوى فى رفع همتى قريت الفترة اللى فاتت بعض الكلمات الرائعة منه
(إذا وقع منك ذنب لا يكن سببا ليأسك من حدوث الإستقامة مع ربك فربما يكون ذلك أخر ذنب قدر عليك)
وقال
(من إستغرب أن ينقذه الله من شهوته وأن يخرجه من غفلته فقد إستعجز القدرة الإلهية)
وقال هذا الحكيم كذلك
(ربما فتح لك باب الطاعة وما فتح لك باب القبول وربما قضى عليك بالذنب فكان سببا فى الوصول)
متتخيلوش كلمات بن عطاء كنت فرحان بيها قد إيه وفعلا بعتبر كلامه من أروع الكلام اللى قريته بعد الكتاب والسنة.
وسألت إنسان عزيز عليا جدا فى الموضوع ده وهوبصراحة اللى رفع من معنوياتى كتير وقالى كلام كنت محتاج أسمعه فعلاوقالى
أنظر دائما على المحصلة النهائية للموضوع
ماذا ستؤل إليه الأمور فى النهاية ستتوقف عن الكتابة مثلا وماذا بعد ..؟؟
الشىء اللى كان ممكن يذكرك شوية إمتنعت عنه أملا فى عودتك للكتابة فى المواضيع الدينية إذا شعرت بكامل إلتزامك وهذا لن يحدث بل على العكس من الممكن أن تسوء بك الحال أكثر
وأخبرنى إن هذا الأمر ربما يكون مدخل من مداخل الشيطان كى يثنيك عن كتاباتك
مثلما يأتى الشيطان لإنسان خاشع فى صلاته ويطيل فيها ويخبره أنه يفعل هذا رياء كى يراه الناس فقط كى ينهى صلاته سريعا
ويأتى إليه كذلك حين يريد إخراج مال كصدقة يأتى إليه ويخبره الجميع ينظر إليك الآن أجل تلك الصدقة لوقت أخر ويثنيه عن عمله
وكان السلف الصالح لمواجهة مثل هذه الأمور كانوا يفادونها
بالمغالبة
يعنى مثلا عندما يأتيه الشيطان ليقول له ذلك كان يعاند شيطانه أكثر ويطيل أكثر فى صلاته ويتعمد إخراج الزكاة
ويقول لن تكون أبدا حريصا على مصلحتى هكذا ويغالب شيطانه بأن يزيد فى الأمر
أى أنه عليا أن أزيد فى الكتابة فى مثل هذه الأمور وألا أتوقف عنها
قديما كانوا يقولون
(على شارب الكأس أن ينكر على الجلاس)
يبدو الأمر متناقض جدا ولكن هذا هو الواجب
إنه على الفرد أن ينكر على الناس المعصية ويذّكرهم بمدى الخطأ وإن كان مقترفا لها
عسى أن يهديهم الله يوما ما
فالدعوة أمر واجب وأظن إنى وضحت ده فى موضوع وماذا بعد ...؟؟
عموما أنا كنت دايما مش بحب أتكلم فى موضوع إلا لما أكون مقتنع بيه تماما وبحاول أعمله دايما أما الأمور اللى أنا مقصر مكنتش بتكلم فيها خالص
بعد حوارى مع أستاذى العزيز ممكن أغير رأيى وأبدأ أتكلم فيها وأجمع معلومات عنها وأذكر نفسى بيها معاكم دايما
ربنا يهدينا وإياكم لما يحبه ويرضاه

كلمة أخيرة
أكيد الجميع مقدر تقصيرى فى المتابعة والكتابة والرد بس مش بإيدى فعلا
والله المستعان

لعلنا نلتقى

2009-10-05T06:05:00.005+02:00

دايما بعتقد إنه ممكن تكون فيه علاقات بين الناس خلاف تلك المتعارف عليها من تحادث وتخاطب وتعامل بدليل إنك ممكن تنجذب لإنسان دون أن تنحدث معه مطلقا ويجول بخاطرك دائما محادثته والتعرف عليه
ومن الممكن كذلك أن تتعامل مع إنسان لمرة واحدة فقط ويكون نفسك أن لو يكون من المقربين إليك وتتعامل معه دائم
هذا هو ما أريد أن أتحدث عنه اليوم
إنسان لم أتحدث معه سوى مرة واحدة
فى البداية كان تجمعنا فى ملاعب لكرة القدم فى مكان قريب بالمحلة العدد ضخم وشباب من أعمار متقاربة من أماكن مختلفة تماما بعد اللعب إتفقنا على ميعاد نتقابل فيه وكان معاناواحد آخر
كنت تقريبا فى بداية الثانوية العامة ولكنه كان يكبرنا بعشر سنوات كاملة أما ثالثنا فكان مثلى فى الثانوية وصرنا أصدقاء مقربين فيما بعد وكنا معا من أوائل المدرسة ولكنه دخل طب المنصورة وذهبت أنا إلى طنطا
نرجع للحديث عن هذا الشاب الذى يكبرنا فكان من سكان إحدى القرى بجوار المحلة وكان يعمل أعمال حرة كان لقائنا فى مكان هادىء جدا فى المحلة وكان معنا (لب وسودانى) كان الحديث شيق جدا وممتع للغاية وشعرت معه براحة عجيبة جدا
ولكنى لاحظت شىء غريب بعض الشىء
كنت أنا وصاحبى نتناول اللب والسودانى ونلقى بالباقى على الأرض فقد كنا نجلس على أرض نجيلة وكان المكان شبه مظلم أى أن تلك البقايا لن تترك أثرا على الأرض بينما هو فلا ظل محتفظا بالبقايا فى يده طوال فترة لقائنا وأنا فى غاية الإندهاش من عمله هذا وبعد اللقاء سيرنا لنبحث مكان لنلقى بتلك البقايا لم نجد إلا بعد حوالى نصف ساعة
برغم ما كان فى حوارنا من إستفادات إلا إنى تأثرت كثيرا بموقفه هذا
ومن يومها لم ألقى بورقة واحدة فى الشارع بل أظل أحتفظ بها فى شنطتى إلا أن أجد المكان المناسب لذلك
وهنا تذكرت المقولة القائلة
(عمل رجل فى ألف رجل خير من قول ألف رجل لرجل)
ولذلك إن لم تكن قادرا على الوعظ والخطابة فيكفى سلوكك المثالى وحده فى أن يؤثر على الآخرين
ولكن
وللأسف لم ألتقى بهذا الإنسان الجميل سوى تلك المرة فقط وبالفعل أتمنى أن لو نلتقى مرة أخرى فإن لم يكن لقائنا فى الدنيا ففى الأخرة إن شاء الله
كنت ناوى أتحدث عن لقاء أخر لإنسان أخر ولكن يبدو أن الوقت ضيق بعض الشىء
فنسألكم الدعاء

المجنون

2009-09-26T05:23:00.000+02:00

كنت خارج من المعهد وقتها تقريبا كنت فى الإعدادى وكان معايا إصحابى ومروحين مع بعض
وإحنا فى الطريق قابلنا واحد مجنون (مختل عقليا) والظاهر إنه كان منفعل جدا كانت العيال الصغيرة بتضايقه جامد وكانوا قاعدين يشتموه من بعيد ويطلعوا يجروا
المهم وإحنا ماشيين لقيت إصحابى خدوا جنب كده ومشيوا بعيد شوية ولكن
أنا قولت فى نفسى وقتها أنا ما مش معاهم أنا معملتلهوش حاجة
ومشيت فى نص الطريق عادى جدا ولقيته بيتحرك قدامى يمين وشمال بعصبية ومفيش حد قدامه إلا أنا
المهم مسكنى ووقعتى على الأرض وقعد يخبطنى فى الأرض ويضرب
الحمد الله إنه ما طولش معايا لأنه كان فيه واحد كبير إبن حلال مسك الجنون ده وهداه شوية وبعده عنى قبل مايحصلى مشكلة
الحمد الله الموضوع إنتهى على خير من غير إصابات
الفكرة إنى مكنتش مستوعب الموقف بس لأنه مر بسرعة جدا المهم إنى إتعلمت شىء مهم أوى وحكمة فى دماغى على طول
{إنه مش معنى إنك برىء إن الجنون ممكن يسيبك فى حالك }
بس أنا إيه اللى خلانى أحكى المشهد ده اللى كان من أسوء مشاهد حياتى
إنه من أكتر من شهر كده لقيت عربية أمن مركزى عندنا فى الشارع إيه يا جماعة العربية دى ليه وبعدين دى واقفة قدام البيت اللى فيه فرح قولت يمكن مخالفة كهرباء أو مخالفة إزعاج جيران رغم إنه كان فرح هادى جدا
وبعدين أكتشف إنهم واقفين علشان يمسكوا الباشمهندس أحمد
الباشمهندس ده يا جماعة مثال للإحترام والأدب والعلم والثقافة والنجاح يعنى من الأخر كده قدوة حسنة لأى شاب طموح وأنا كنت بحبه جدا جدا الفكرة إنه كان لسه خارج من المعتقل ومكملش أسبوعين بره
وكنت أنا يومها كنت لسه مسلم عليه فى صلاة العشا وكنت فرحان جدا إنى قابلته لأنه بالإضافة لإنه كان فى المعتقل ومشفتهوش ن زمان إنه نقل مسكنه من الشارع عندنا وكان موجود بس علشان يحضر فرح بنت أخوه
وبعدين ألاقى الناس واقفة فى البلكونات بتفرج على عربية الأمن المركزى بدل ما كانت مفروض تتفرج على الفرح إيه يا جماعة العربية واقفة ليه الظاهر إنهم مش لاقيين الباشمهندس فى الفرح
طبعا إقتحموا البيت ودخلوا على العريس والعروسة وهما بيتعشوا وكان مشى من الفرح خلاص وفضلوا واقفين قدام البيت لغاية الساعة3 فجرا
وبعدين أسمع إنه لما حضر الفرح مشى هو وزوجته وأولاده للإسكندرية يقضوا فترة راحة كده شوية بس الظاهر إنه مش مكتوبله يرتاح -وإن شاء الله تكون راحته الحقيقية عند ربنا-ووقتها كان ماشى بعربيته على الكورنيش وبعدين يوقفوا الكورنيش كله والطريق كله من الناحيتين علشان يمسكوه وبعدين لما وقفوا عربيته خرجوه من العربية من وسط زوجته وولاده ومسكوه معاهم
ياااااااااااه كل ده بتهمة إيه كل الموضوع ده علشان هو إنسان ملتزم ومؤثر ومتيسر ماليا طيب إيه ذنب أطفاله الصغيرين -اللى نفسى أولادى يكونوا زيهم كده فى الأدب والثقافة - وإيه ذنب زوجته الدكتورة إنها تربى عيالها من غير زوجها ويقضوا رمضان والعيد من غيره
وللأسف أكيد اللى مسكوه مش عارفين هما ماسكينوه ليه وإن شاء الله لما يطلقوا سراحه برضه هيكونوا مش عارفين هما سابوه ليه
ساعتها إفتكرت المشهد السىء بتاعى وعرفت
{إنه مش معنى إنك برىء إن المجنون ممكن يسبك فى حالك }

rehablitation

2009-09-20T03:45:00.002+02:00

rehablitation

تعنى إعادة تأهيل المريض وهى تلك المرحلة التى تأتى غالبا بعد العمليات الكبرى

تأتى أهمية هذه المرحلة من دورها فى نجاح العملية أو فشلها حيث يتعين على المريض الإلتزام بتعليمات الطبيب لفترة معينة بعد العملية وأى خلل فى التعليمات أو تقصير فيها يؤدى إلى فشل العملية بل إن المريض قد تسوء حالته أكثر مما كانت عليه وهذا ما يدعى
(relapse)
وبذلك يكون المريض قد خسر الكثير لمجرد عدم إلتزامه فى تلك الفترة الحساسة
وفى المقابل إنه قد تكون العملية ليست كما يبغى ولكن إلتزام المريض ومحافظته فى تلك الفترة قد تغطى على أى قصور كان متواجد أثناء العملية
ولكن ما مناسبة ذكر هذا الكلام الطبى الغير مفهوم
هذا الكلام موجه لكل إنسان إجتهد فى رمضان ورفع من همته فهو بالتأكيد قد منّ الله عليه بعملية (غسيل ذنوب)فليس هذا كلامى بل هذه بشرى المصطفى صلى الله عليه وسلم الذى قال
(من صام رمضان إيمانا ً واحتساباً غفر له ما تقدم من ذنبه)وقال أيضا
((الصلوات الخمس والجمعة إلى الجمعة ورمضان إلى رمضان مكفرات ما بينهن ما اجتنبت الكبائر))
فندعو الله أن يكون قد تقبل منّا الإجتهاد فى رمضان
وهنا نأتى لتلك المرحلة الصعبة التى كانت عنوانا للموضوع والتى تبدأ من بعد رمضان مباشرة
حيث تخرج الشياطين من أسرها لتحاول بشكل سريع ومباشر تعويض الفترة الضائعة فى رمضان وبالفعل للأسف قد نرى خروج سريع عن المألوف من الشباب من أول ليلة وهى ليلة العيد فقد يرتكبوا بعض الأخطاء والمعاصى فى تلك اليلة ما لا يرتكبونه خلال العام
وهنا أول تحذير من خطورة الشياطين فى أولى اليالى من الدخول فى معصية وذنب كبير
- فرضا جدلا وقع ما نخشاه فى إرتكاب ذنب على الفور يحب إتباع الذب بحسنة الإستغفار بشكل مباشر
وفى وقته حيث إنه كلما جاء الإستغفار سريع وبعد الذب مباشرة يمنع الذنب من أن يكتب من الأساس
حيث يقول رسولنا الكريم
(اتق الله حيثما كنت واتبع السيئة الحسنة تمحها وخالق الناس بخلق)ويقول سبحانه أيضا
{إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِين}
خطورة عدم الإسراع بالإستغفار وهو إن الفرد قد يحدث نفسه ويقول لا أمل من إصلاحى بعد كل المجهود فى رمضان ها أنا ذا أعود لأعصى ربى فيتمادى فى المعصية ويحدث ما تحدثنا عنه وهو ال
relapse
أما بالنسبة لمن لم يرضى عن نفسه فى رمضان فقد حفزه الرسول عليه الصلاة والسلام بقوله
{من صام رمضان فأتبعه بست من شوال؛ فكأنما صام الدهر}
لذا يجب الإسراع فى صوم تلك الأيام من شوال
بقى شىء أخير
ربما يبدو الوضع فى رمضان محفزا تماما للطاعة والإلتزام وربما كذلك قد تكون بعد العادات الحسنة خلال الشهر الكريم مثل قراءة القران وصلاة الترويح فلا تفقد تلك المتعة وتلك النعمة التى منّ الله بها عليك ربما لن تستطيع أن تستمر بنفس الحماسة
لا مشكلة ولكن وجب عليك الإلتزام قد تكفى صفحة واحدة يوميا وركعتان بالليل قبل النوم هذا الحد الأدنى
ولكن عليك الإستمرار فخير الأعمال أدومها وإن قل
بقى شىء واحد وهو إن كل إنسان طبيب نفسه وهو أدرى بنقاط ضعفها وكيفية علاجها
وبينى وبينكم كده
كل سنة بيقولوا العيد فرحة
لكنى بعد اليوم الأول من العيد بشعر بضيق صدر عجيب
أظن إنه السبب الرئيسى حزنى على حالتى وحالة الناس حولى والتى تغيرت بشكل عجيب وسريع
لذا فأنا قد كتبت تلك الكلمات لنفسى بشكل رئيسى
أعاننا الله وإياكم على الثبات بعد رمضان
أنا كنت ناوى أكتب موضوع خفيف كده على العيد ولكن أحيانا الظروف بتحكم
وكل سنة وإنتم طيبين

إعترافات متهم

2009-09-10T02:35:00.003+02:00

هقولكم على سر بس يكون الموضوع بينى وبينكم بس ومش عايز فضايح
السبب الرئيسى فى إنى أفصل النت عندى هو إنى كنت عايز أفصل النت عن بابا أساسا لأنى كنت تعبت منه أوى لأنه كان بيقعد على النت تقريبا كل يوم لفترات كبيرة أوى كانت بتوصل ل7 أو 8 ساعات معظهم كان بيلعب فيها شطرنج (yahoo games) فى اليوم ومكنتش عارف أعمل معاه إيه وفى يوم حصل مشكلة كده مع الراجل اللى موصلين معاه وعلشان نوصل لازم مع واحد تانى ويوميها عملت بطل وقولت لا مش هنوصل نت مع حد وكل اللى فى البيت إستغرب أوى ومش مصدقين نفسهم قولت فترة نريح فيها من النت ويكون نسى الشطرنج أصل كمان أنا الشهر ده كنت مسافر أكتر من مرة
الشهر الأولانى عدى حلو أوى مهو أنا اللى قاصد أفصله وجه الشهر التانى كنت عايز أرجعه وما عرفت كنا مقدمين على خط لوحدنا انا وجارى ولغاية دلوقت لسه ما رجعش مع إنه مفروض يجى خلال إسبوعين بس وأهو قعد أكتر من شهرين وكل ده مستنين أمر الشركة والحمد الله إنه لسه واصل النهارد
والجزاء من جنس العمل
ورب ضارة نافعة
كانت تجربة مش كلها سلبيات فعلا كانت فيها حاجات إستفدت منها كتير
هو إنى مثلا كنت أكثر هدوءا وأكثر تركيز وبصراحة دى أكتر حاجة كنت مفتقدها وأنا موصل نت كنت حاسس إن دماغى مشغولة ومليانة حاجات كتير على طول لدرجة إنى كنت بحس إنها على وشك الإنفجار
وأكيد طبعا رجعت ألعب فيفا زى الأول وأتفرج على التلفزيون اللى كنت نسيته خالص ده قبل رمضان طبعا
بالنسبة للمذاكرة يعنى مش فارقة كتير كده كده بضيع وقت بس الفرق بس هو إنى كنت بذاكر ودماغى رايقة علشان كده مش عايز أقعد على النت لفترات طويلة هنحاول نخليها بشكل محدود أوى وأسيب بابا يقعد يلعب براحته
بالنسبة للمدونة أنا حاولت إنى أستمر فى الكتابة بس صعب أوى إنى أكتب من بره لبيت بس بجد كان إحساس رائع أوى وأنا حاسس إن فيه ناس بتسمعك وبتشاركك أفكارك ومشاغلك ويقعدوا يتابعوك على طول بجد كنت بفرح أوى بمتابعتكم للمدونة وبشكركم على السؤال والإهتمام طوال الفترة اللى فاتت وحابب أقولكم شىء واحد وهو إنى
(إنى أحبكم فى الله)
ولكن بما إننا بدأنا فى الربع الأخير من السنة أو الربع المظلم وهو ربع الإمتحانات يعنى الفترة اللى جاية كلها إمتحانات
يعنى مش هكون فاضى خالص
وهتكون مواضيعى كل ما أكون فاضى شوية أو لما أحس إنى عايز أقول حاجة بشكل ضرورى
وللأسف هتكون متابعتى للمدونات برضه بشكل محدود أوى
ومش هعرف أعلق على تعليقاتكم عندى كمان إلا عند الضرورة
المشكلة هتكون فى مدونة الدعايا
أنا داخل النهاردة بس علشان أقولكم
( كل سنة وإنتم طيبين )
وطبعا لغيت التعليقات علشان مش عايز حد يفرح فىّ ولا حد يضحك علىّ
عندى طلب واحد بس
لا تنسونا من صالح دعائكم إن شاء الله خصوصا فى تلك العشر الأواخر

شريف وأمثاله

2009-08-01T23:51:00.009+03:00

إبن عمى كان بيدور على شقة إيجار (عش الزوجية)وفعلا لقينا شقة مناسبة جدا فى الشارع عندنا وإتفقنا مع صاحب الشقة وكل شىء تمام وإتفقنا على إنه يدفع 350 فى الشهر ومقدم 1000

وقولنا خلاص نكتب العقد إن شاء الله بكرة

وفى الميعاد المتفق عليه تغير كل شىء ولقينا صاحب الشقة بيقولنا إنه فى ظروف خاصة عائلية وإنه مش هيأجر الشقة خلاص

قولنا مش مشكلة خير وبعدها بإسبوع نكتشف إنه إتفق مع مستأجر تانى بمبلغ أكبر ب 400جنيه فى الشهر ومقدم1500

أحد أقاربنا برضه كان بيدور على عروسة وفعلا وجد مبتغاه وبالفعل تمت قراءة الفاتحة والخطبة وكل شىء كان تمام وكانت العائلتين متفقتين تماما على كل شىء وبعد فترة وجدنا أسلوب التعامل إختلف وفى حاجات إتغيرت وبعدها على طول تم فسخ الخطبة لنكتشف بعد ذلك إنه كان فيه مهندس حالته المادية متيسرة وظروفه أفضل من قريبى هذا إتقدم لها و لو سألتها أكيد هتقول أنا أصلا مكنتش مستريحة مع خطيبى الأولانى وكان دمه تقيل ولبسه كان بلدى أوى وطريقته فى الكلام مش شيك وكمان بخيل ومش رومانسى خالص وكده كده كنت هسيبه من غير حاجة

كل دى طبعا محاولات للتبرير لإراحة الضمير وإبعاد أى إتهامات عنها

مسرحية بتحصل كل سنة ومش موجودة فى أى حتة فى العالم ألا عندنا

الزمالك يتفق مع لاعب معين والاعب بيكون موافق وناديه بيكون موافق وكل شىء تمام وباقى شىء واحد وهو كتابة العقد وفى لحظة يأتى الإتصال إياه من الباش مهندس الشيخ عدلى القيعى لتغير كل شىء فى دقائق بعد إغراء الاعب بمبالغ أكبر من تلك إتفق عليها ويتم خطف الاعب فى العربيات إياها ويقعد مع رجل المبادىءوالأخلاق الخطيب ويكتبوا العقد ويضربوا بكل ما إتفق عليه بعرض الحائط

وبعد كده يطلع الاعب علينا ويقول أنا طول عمرى أهلاوى وكان نفسى ألعب فيه من قبل ما أتعلم المشى وده شرف ليا إنى أتواجد فى نادى القيم والمبادىء واللى بيظبط أى لعيب بيلعب فيه

وبعد ما يقول الكلام ده ضميره يستريح ويحس إنه تمام وللأسف الكلام ده بيحصل كل سنة مع لعيب أو إتنين وأخرها طبعا شريف عبد الفضيل واللى سمعت أخوه أكد أكتر من مرة إن الاعب رغبته إنه يروح الزمالك ودى أمنيته وكلام من النوع ده والدليل إنه مضى على إستمارات رغبة إنضمام للزمالك وعلى عقود مبدئية وبعد كده تبدأ المسرحية فى العرض وتنتهى بإن الاعب طول عمره أهلاوى من أول لعبه فى ناشئين الإسماعيلى

بعد ما ذكرت الأمثلة السابقة أكيد هلاقى معترضين هيقولوا وفيها إيه مهو كل واحد لازم يشوف مصلحته مع اللى يدفع أكتر والدنيا ماشية كده الأيام دى

الماديات أهم شىءوإجعل شعارك فى الدنيا مصلحتك ثم مصلحتك ثم مصلحتك

أنا والله ما يفرق معايا شريف ولا غيره أنا بس بتكلم عن مبدأ معين وخلاص

الرسول عليه الصلاة والسلام كان واضح جدا فى الموضوع ده لما بيقول : (لا يخطب الرجل على خطبة أخيه) ]. أورد أبو داود ثم قال: (ولا يبع على بيع أخيه)

كلمة أخيرة

أنا مكنتش ناوى أكتب دلوقتى خالص وقولت هستنى لغاية لما النت يوصل وأكتب من البيت أحسن كتير

وبعدين لقيت الموضوع إتعطل وهيتأخر شوية كمان و الموضوع الأخير ده إستفزنى كتير ولقيت المدونة وحشتنى أوى وشكلها صعب عليا وهي من غير جديد كده من زمان

حابب أشكر كل الناس اللى سألت عليا الفترة اللى فاتت وبعتذرعن عدم ردى على باقى تعليقات الموضوع اللى فات وعن عدم متابعتى لمدوناتكم الجميلة

المشكلة إنى لسه بكتب من بره لغاية ما النت يوصل بالسلامة ربنا يسهل

وجهة نظر مختلفة

2009-07-07T23:32:00.000+03:00

تابعت مثل الكثير حادثة مقتل الدكتورة مروة فى ألمانيا وواضح إنها ليست الحادثة الأولى من نوعها فى العالم فقد سبقها الكثير والكثير من الأعمال المسيئة والمهينة للمسلمين ووالواضح كذلك أن رد الفعل واحد مع الجميع
عندنا فى الطب الدكتور المتميز هو من يعالج سبب المرض وليس من يعالج أعراضه فقط
والمشكلة إنه علاجنا دايما بيكون للأعراض فقط ولذا يكون العلاج مؤقت وبعد فترة تعاود الأعراض للظهورمرة أخرى
مثلا بعد كل حادث مسىء للإسلام أو للمسلمين نجد إن رد الفعل منحصر على أعمال رفض وإستنكار وممكن بعض المظاهرات والجميع يتعامل مع الموقف من منطلق ولن ترضى عنك اليهود والنصارى حتى تتبع ملتهم وهكذا نكن لهم الكره والبغض
أنا حبيت أشوف الموضوع من زاوية تانية خالص يعنى مثلا أنا شايف إنه إحنا مثلا مسئولين وبنسبة كبيرة على عدم توصيل الصورة السليمة للإسلام للعالم يعنى هذا الشاب الذى إعتدى على الطبيبة وزوجها أظن إنه السببب الرئيسى فى كده هو فكرته السيئة عن الإسلام والمسلمين وإنهم إرهابيين وقتلة ويستحقوا عقاب لما يفعلونه
سؤال بسيط كده
لماذا يلقى اليهود تعاطف كبير من العالم الغربى رغم إنهم معتدين وبشكل لا يقبل التشكيك فيه..؟؟؟
أكيد طبعا لأنهم عرفوا ينشروا أفكارهم وعرفوا يظهروا بصورة الضعيف الذى لا وطن له ويحتاج للرعاية ويحتاج لمقابل لما حدث لهم أثناء هتلر
يعنى عملوا بالمثل القائل
(ضربنى وبكى وسبقنى وإشتكى)
يعنى مش كل مرة نقول هما بيكرهوا الإسلام ونعد نشتم فيهم وكده
لإنهم كرهوا الإسلام لإنهم معرفوش الإسلام أساسا
لأ
نحن نتحمل جزء من المسئولية لإننا مطالبون بنشر الإسلام وفقا لمقدرة كل فرد
كمان فى نقطة مهمة بالنسبة للإخوة الملتزمين
لما تشوف إنسان عاصى أو إنسان من دين أخرمثلا متتصورش نفسك أعظم منه أو أفضل منه وتأنف من التعامل معه أو مخالطته لأنك أعظم منه أو ما شابه
لأ أبدا المفروض إنك تحمد ربنا إن ربنا خلقك من أبوين مسلمين وفى بيئة نقيمة سليمة وعرفت تكون إنسان ملتزم خلالها
وهذا الإنسان العاصى ربما يكون أفضل منك فى يوم من الأيام لا تعلم بأى حال ستكون نهايته وربما يوفقه الله بعمل صالح يدخله الجنة فى حين إنك لا تعلم هل ستستمر على إلتزامك هذا أم لا وعلى أى هيئة ستكون نهايتك
الخلاصة هو إنه علينا أن نتعامل مع الإلتزام هذا بإعتباره نعمة
(وأما بنعمة ربك فحدث)
وأن يكون تعاملك مع الأخر من منطلق حب الخير للغير وليس بغض وكره
أخر شىء
بجد سعيد جدا بإستمرار متابعتكم للمدونة
ويارب كده دايما ومش هقدر أقولكم أكتر من جزاكم الله خيرا
وإن شاء الله المدونة الأخرى ستعود للنشاط الشهر القادم

خواطر على الأسبوع الماضى

2009-07-02T23:17:00.004+03:00

فى البداية أنا حابب أعرفكم إنى عملت بنصيحة أحد الأصدقاءفى إنى أفصل النت من عندى وفعلا نفذت النصيحة دى لأسباب شخصية وعائلية
ويمكن كمان علشان أكون عملت أول تمرين من تمارين لتزداد قوة وأكون فعلا طبقت الموضوع على نفسى فعلاده خلاف التمارين التانية اللى عملتها
ده لإنى مش بحب أكون متعلق بشىء زيادة عن اللزوم
المهم إنى مش حابب أبدا أقفل المدونة دى لأنى بكون سعيد جدا بالتواصل معاكم لكن المدونة التانية أكيد هتتوقف عن العمل
وكمان بطلب منكم إنكم تقبلوا إعتذارى فى إنى مش هعرف أبدا أتابع مواضيعكم إلا فيما ندر لإنى هكون بكتب من بره إما من عند واحد صاحبى أو من الكلية
وهكون سعيد جدا لو لقيت متابعتكم للمواضيع زى ما هيا لأن ده هيكون مقياس حبكم للمدونة فعلا لأنكم هتابعوا المدونة وإنتم متأكدين إنه صعب جدا أتابع مدوناتكم وبشكر مقدما الناس اللى هتهتم وتابع المواضيع إن شاء الله
كانت عندى خاطرة كده بسيطة
مشهد إتكرر معايا السنة دى حوالى 3 مرات لغاية دلوقتى
ليلة الإمتحان فى إتصال هاتفى مع واحد صاحبى
-ألو إزيك حبيبى إيه أخبار إمتحان بكرة إن شاء الله
-لا تمام الإمتحان سهل جدا وتمام كل الداكترة كويسين جدا ماعدا فلان الفلانى بس ده اللى كانت درجاته وأسئلته صعبة كتير
-شكرا منتحرمش منك أبدا
فى اليوم التانى زحمة وأنا واقف مستنى لجنة الإمتحان وبعدين ألاقى الدكتور فلان الفلانى بتاع إمبارح ماشى فى الطرقة ويدخل المكتب بتاعه وبعدين ينادى الدكتور المعيد من رقم كذا لرقم كذا عند الدكتور فلان الفلاني وأكيد طبعا رقمى معاهم وأدخل اللجنة نفس الهيئة كل مرة
دكتور فوق الستين صوته مبحوح نظرته صارمة ملامحه جامدة جدا لا تعبيرات على الإطلاق وبمجرد إنه يبصلى بس أنسى الكلمتين اللى كنت مذاكرهم ويسألنى سؤال عادى مش صعب فعلا المعلومات تدخل فى بعض وأطلع شوية كلام مش مرتب أبدا وأحاول أرتب أفكرى تانى إستحالة تترتب وهو يزداد قرف فوق قرفه أساسا وميعجبهوش الكلام طبعاويتخنق منى وبعدين أطلع من اللجنة وأشوف كل زمايلى اللى دخلوا معايا نفس اللجنة وكتير منهم متميز ولكن ألاقى كل واحد منهم بيطلع بنفس الوجه كل مرة
سألت نفس سؤال بسيط كده إذا كان ده حالنا وإحنا مستعدين ومذاكرين كويس ومجرد عبد من عباد الله يعمل فينا كده ويرهبنا ويخلينا ننسى الكلمتين اللى إحنا مذاكرنهم أساسا
أمال الإمتحان الحقيقى واللى بحق وحقيقى مش خايفين منه ليه ولا كمان بنستعد له خالص
مع إن الموقف أصعب بكتير أوى
(عجبا لحال الإنسان يخشى من عبد مثله ولا يخشى الخالق سبحانه)

يا جماعة محتاج مساعدتكم شىء فى شىءمحيرنى جدا و مؤرق مضجعى طوال الأسبوع الماضى والظاهر إنه مش أنا بس اللى بسأل
لا
بل الرفاق حائرون يتسائلون
ياترى شريط عمر الجديد الأحسن ولا شريط تامر ..؟؟
يا جماعة حد يساعدنى أنزل أشرى أنه شريط كده مش هينفع خالص
بس هو أنه الأحسن تسريحة عمر ولا تامر أظن إن تسريحة عمر المرة دى مفيهاش شىء مميز
لا بس واضح إن الجيم عامل شغله مع عمر أوى المرة دى ما شاء الله والفانلة الكات كمان شديدة
ولا إنتوا رأيكم إن بدلة تامر البيضا هى الأحسن بس واضح إنه يا عينى خس شوية وبطل يروح الجيم ولا البدلة بس هى اللى مغطية على عضلاته
ياترى يا جماعة إيه المنتدى اللى إنفرد فى إنه ينزل الألبوم الأول شكله منتدى شديد وصاحب سبق خطير ..؟؟؟
وياترى مين من إصحابك كان له السبق فى إنه يعرفك أول ما الألبوم نزل على المنتديات ..؟؟
يا أهل العلم والذكر
أقصد يا
أهل المغنى والرقص
أفيدونى يرحمكم الله

ملاحظة صغيرة

يبدو إن فيه ناس فهمت سؤالى غلط

أنا قصدت من سؤالى بس إنى أستنكر الإهتمام الشديد بالألبومات الجديدة

ده وإمتى هتنزل وكده

والأغرب من كده هو إن كل جمهور كل مغنى يبدأ يهاجم المغنى الأخر

زى ما بيشجعوا فرق الكورة تمام

خلاص الناس مش بتتقبل الأخر حتى فى الغنا

ربنا يكرهنا فى الغنى والأغانى

حتى إذا + تحديث

2009-06-24T14:31:00.005+03:00

أكيد كلنا وإحنا طلبة كنت بتلاقى بعض زمايلك بيتقربوا ليك أوى وقت الإمتحانات علشان عارفين إنه معاك ورق محاضرات ولا علشان هتعرف تشرحلهم جزء صعب
ولكن حتى إذا ما إنتهت الإمتحانات وجدت إنهم كما كانوا سابقا بعدين عنك ولا أكنهم يعرفوك

وأكيد لو إنت زوج وزوجتك مضايقاك كتير
ولكن عندما تريد منك تنفيذ شىء معين تجد المعاملة الطيبة اللينة والطعام الذى تريده وكل شىء تمام
حتى إذا ما نفذت المهمة المطلوبة منك تجدها تعود لسابق عهدها من الخلق السىء

ولو إنت مسئول فى الشغل
أكيد برضه هتلاقى بعض زمايلك بدأوا يتقربوا ليك بشدة لإنك أصبحت مسئول وتملك قرارات الشغل فتجد الهدايا تهبط عليك والثناء والشكر على كل لسان
حتى إذا ما إنتهت مهمتك وأصبحت على المعاش مثلا تجد الكثير قد إبتعد عنك

لو إنت مكان الطالب الشاطر هذا أو مكان الزوج أو مكان المسئول شعورك بيكون إيه تجاه هؤلاء
ممكن تنفذلهم طلباتهم فعلا ولكنك عارف فى قرارة نفسك إن حبهم ده مش صادق وإن حبهم ده لمصلحة شخصية لهم
أكيد مش كل الناس كده بس أنت سهل تعرفهم وبتكون حاسس بيهم أوى

ولكن للأسف فيه ناس بتتعامل مع ربنا بنفس المنطق ده
مثلا وقت الإمتحانات تجده محافظ على الصلاة فى المسجد ويعد يدعى ربنا مع كل صلاة
ومحافظ على علاقته الطيبة مع والديه ومبتعد عن كتير من المعاصى اللى بيعملها
ولكن حتى إذا ما إنتهت الإمتحانات تجده يعود لسابق عهده من ترك الصلاة ومن فعل المعاصى
وهكذا عندما تكون مريض أو أحد من أقاربك مريض
تجد الجميع يكثر من الدعاء والإبتهال ويبدأفى تعديل نواياه والعزم على بداية صالحة جديدة
ولكن للاسف تجد الكثير يعود على ما كان عليه إذا أتم الله عليه الشفاء أو على قريبه هذا

تخيل أنت كان بيكون شعورك إيه تجاه هؤلاء من يسعون لمصلحتهم فقط
لو أنت بتتعامل مع ربنا بنفس المنطق ده ربنا هل ربنا ممكن يكون سعيد بيك
لما ربنا يتكلم عن المواقف دى فى القرآن ومش فى موقف واحد ولا حتى إتنين ده فى مواقف كتير أوى
عايزكم بس تقروا الأيات دى

(وَإِذَا مَسَّ الإِنسَانَ الضُّرُّ دَعَانَا لِجَنبِهِ أَوْ قَاعِداً أَوْ قَآئِماً فَلَمَّا كَشَفْنَا عَنْهُ ضُرَّهُ مَرَّ كَأَن لَّمْ يَدْعُنَا إِلَى ضُرٍّ مَّسَّهُ كَذَلِكَ زُيِّنَ لِلْمُسْرِفِينَ مَا كَانُواْ يَعْمَلُونَ ) [يونس 12]

(فَإِذَا رَكِبُوا فِي الْفُلْكِ دَعَوُا اللَّهَ مُخْلِصِينَ لَهُ الدِّينَ فَلَمَّا نَجَّاهُمْ إِلَى الْبَرِّ إِذَا هُمْ يُشْرِكُونَ ) [العنكبوت 65]

(وَإِذَا غَشِيَهُم مَّوْجٌ كَالظُّلَلِ دَعَوُا اللَّهَ مُخْلِصِينَ لَهُ الدِّينَ فَلَمَّا نَجَّاهُمْ إِلَى الْبَرِّ فَمِنْهُم مُّقْتَصِدٌ وَمَا يَجْحَدُ بِآيَاتِنَا إِلَّا كُلُّ خَتَّارٍ كَفُورٍ) (32) ( لقمان

(وَإِذَا مَسَّ الْإِنسَانَ ضُرٌّ دَعَا رَبَّهُ مُنِيباً إِلَيْهِ ثُمَّ إِذَا خَوَّلَهُ نِعْمَةً مِّنْهُ نَسِيَ مَا كَانَ يَدْعُو إِلَيْهِ مِن قَبْلُ وَجَعَلَ لِلَّهِ أَندَاداً لِّيُضِلَّ عَن سَبِيلِهِ قُلْ تَمَتَّعْ بِكُفْرِكَ قَلِيلاً إِنَّكَ مِنْ أَصْحَابِ النَّارِ ) [الزمر 8]

(وَمَا بِكُم مِّن نِّعْمَةٍ فَمِنَ اللّهِ ثُمَّ إِذَا مَسَّكُمُ الضُّرُّ فَإِلَيْهِ تَجْأَرُونَ (53) ثُمَّ إِذَا كَشَفَ الضُّرَّ عَنكُمْ إِذَا فَرِيقٌ مِّنكُم بِرَبِّهِمْ يُشْرِكُونَ) (54) ( النحل

(إِنَّ الْإِنسَانَ خُلِقَ هَلُوعاً (19) إِذَا مَسَّهُ الشَّرُّ جَزُوعاً (20) وَإِذَا مَسَّهُ الْخَيْرُ مَنُوعاً (21) إِلَّا الْمُصَلِّينَ) (22) ( المعارج)

أظن الأيات معبرة أوى ومش محتاجة تعليق بعدها

أخر شىء
أولا
مبروك لكل الناس اللى كسبت الأسبوع الماضى
وعقبال كل أسبوع
ثانيا
أنا بعتذر لأنى مش فاضى أبدا الشهر ده
ممكن أعرف أكتب وممكن برضه أتابع
بس قليل جدا جدا
الله المستعان

بموضوعية (2)

2009-06-16T18:19:00.005+03:00

صاحبى حسام غانم عمل موضوع بعنوان بموضوعية ذكر فيها بضعة أمثلة من حياتنا اليومية وظهر جليا فى إننا لا نتناول أحداث حياتنا اليومية بموضوعية ونفتقد للحكم العادل فى كثير من أمورها حتى تعليقات الزوار تباينت وتقبل بعضهم بعض الأمثلة فى حين رفض البعض الأخر
الطريف إن إمام المسجد عندنا تناول نفس الموضوع وإتضح إنه لازم نعيد حساباتنا فى الحكم على الأمور حيث أنه للأسف العاطفة ومقاييس الحب والكره تتدخل كثيرا فى أحكامنا
ربنا سبحانه وتعالى بيقول { كونوا قوامين لله شهداء بالقسط ولا يجرمنكم شنئان قوم على أن لا تعدلوا اعدلوا هو أقرب للتقوى }
ويقول سبحانه فى موضوع أخر
{و لا يجرمنكم شنآن قوم أن صدوكم عن المسجد الحرام أن تعتدوا}

يجرمنكم أى يحمّلنكم
شنئان أى كرهكم أو بغضكم
أى أن ربنا سبحانه وتعالى بيقولنا إن الكره أو البغض لا يجب أن يكون سببا فى أن نظلم أشخاص معينين أو أنه يكون سببا فى الإعتداء عليهم
هذكر بضعة مواقف من تراثنا الإسلامى العظيم
بعد حادثة الإفك سيدنا أبو بكر كان معتادا إطعام أحد المساكين( مسطح بن أثاثة) وكانت له صلة قرابة كذلك وكان مسطح أحد الذين ساهموا بشدة فى نشر حديث الإفك ولذلك إمتنع سيدنا أبو بكر عن الإنفاق عليه فنزل فيه قول الله سبحانه
{وَلَا يَأْتَلِ أُوْلُوا الْفَضْلِ مِنكُمْ وَالسَّعَةِ أَن يُؤْتُوا أُوْلِي الْقُرْبَى وَالْمَسَاكِينَ وَالْمُهَاجِرِينَ فِي سَبِيلِ اللَّهِ
وَلْيَعْفُوا وَلْيَصْفَحُوا أَلَا تُحِبُّونَ أَن يَغْفِرَ اللَّهُ لَكُمْ وَاللَّهُ غَفُورٌ رَّحِيمٌ }
فعندما سمعها سيدنا أبو بكر قال (والله إنى لأحب أن يغفر الله لى) فرجع إلى الإنفاق عليه وقال( والله لا أنزعها منه أبدا)

السيدة عائشة كذلك بعد حادثة الإفك عندما كان يذكر سيدنا حسان بن ثابت وهو كذلك أحد المساهمين فى حديث الإفك بالسوء فى مجلسها كانت ترفض ذلك وبشدة وتقول يكفى أنه كان يدافع عن الرسول بشعره

مشهد أخر
بعد غزة خيبر أرسل الرسول عليه الصلاة والسلام سيدنا عبد الله بن رواحة إلى اليهود فقال لهم
(والله أنى تركت أحب الناس إلى قلبى ولأنتم أبغض الناس إلى قلبى ولكن لن يمنعى حبى له وكرهى لكم فى أن أحكم بينكم بالعدل)
يعنى هذ تقريبا مضمون ما قاله

موقف أخر من الحياة منذ فترة قصيرة تقريبا شاهدت فيلم أجنبى وتقريبا أنا بإعتبره من أروع الأفلام الأجنبى اللى شاهدتها فى حياتى إسمه The.Boy.In.The.Striped.Pyjamas
المهم الفيلم ده كان بيحكى عن المعسكرات اليهودية ومحارق اليهود أيام النازية وهتلر وما شابه قولت لواحد صاحبى نفترض جدلا إن المحارق كانت بالسوء ده
هل ما فعله هتلر سليم ؟؟
رد عليا بسرعة طبعا أه يستاهلوا

كان رأيى العكس تمام لا يمنعنا كرهنا وبغضنا على اليهود فى أن نحكم بالعدل فإذا كان ما نراه فى الأفلام سليما يصبح بالطبع هتلر قد إرتكب جريمة إنسانية
مشهد أخير لكن هذه المرة بالعكس
عندما أسلم عبد الله بن سلام وكان يهوديا طلب منه الرسول إبلاغ قومه فطلب من الرسول أن يسألهم عليه أولا فسألهم عن رأيهم فى عبد الله فقالوا له
(خيرنا وبن خيرنا وسيدنا وبن سيدنا)
فلما أخبرهم عبد الله بإسلامه قالوا
بل شرنا وبن شرنا وإنتقضوه
ده كان موقف اليهود لاحظتم التناقض فى الحكم والإختلاف فى أقل من دقيقة واحدة على نفس الشخص
أظن انا حاولت أجمع مواقف من الكتاب والسنة ومواقف من حياتنا العامة برضه بعد كل ده
هل تستشعر بأنك فاقد للمصداقية؟؟
هل ستتدخل أهوائك وعاطفتك فى حكمك على الأمور؟؟؟
هل ستكون أرائكم وتعليقاتكم مترددة مثلما كانت عند حسام..؟؟

فى الأخر منتظر مشاركتكم فى الإستفتاء
وأكيد بطلب منكم الموضوعية التامة فى الإختيار
وأظن مش محتاجين أتكلم فى النقطة دى تانى
منتظر مشاركتكم الإيجابية

لتزداد قوة

2009-06-09T19:07:00.004+03:00

فى الدنيا الإنسان دايما بيتطلع للأفضل ودايما بيكون عنده طموح للزيادة دايما
و رغم إنه ممكن يحقق طموحه ده ولكن للأسف ليست هذه هى السعادة الحقيقية لأنه لا توجد سعادة كاملة فى الدنيا
مثلا
إذا إنتقلت من منزلك الصغير لمنزل أكبر فى البداية ستشعر بالفرق وتستمتع به ولكن بعد فترة ستألف الوضع ويكون شىء عادى بالنسبة لك
وبالمثل إذا إشتريت مثلا سيارة جديدة فى البداية ستشعر بالفرق ولكن بعد فترة ستألف الوضع ويكون شىء عادى جدا
سوف تتطلع إلى ما هو أعلى من منزلك الجميل أو سيارتك الجديدة

ننقل على مشهد أخر

الرسول عليه الصلاة والسلام بيقول
{ المؤمن القوى خير وأحب إلى الله من المؤمن الضعيف وفى كل خير}
هل القوة المقصودة هى القوة البدنية فقط؟؟
بتوقع _وده إجتهاد منى_ إن فيه نوع أخر من القوة أهم من القوة البدنية كمان
وهى القوة النفسية
وهو إن الإنسان يكون قادر على الصبر والجلد ومواجهة أصعب المواقف فالدنيا لا تسير أبدا بشكل منتظم بل هى مليئة بالمتغيرات والمفاجئات

عندما يريد الفرد زيادة قوته البدنية يذهب إلى صالات الجيم وممارسة الرياضة
ولكن ليزيد قوته النفسية ماذا يفعل؟؟
ممكن نجرب شىء ممكن نمارسه مع بعض
فى البداية
حاول تجاوب على هذا السؤال
ما هو أكثر شىء ممكن إنه يسبب للإنسان ضيق وألم ؟؟
أظن إن معظم تلك الأشياء سببها الرئيسى هو إن الإنسان فقد شىء بيحبه ومتعلق بيه بشدة
فكر بينك وبين نفسك
ما هو أكثر شىء إنت متعلق بيه فى حياتك اليومية ؟؟
وجرب تستغنى عنه وتبتعد عنه فترة من الزمن
مثلا
هعرفكم بشوية تمارين كده ممكن نعملها
-حاول كده تجرب يوم بأكمله من غير نت وكمبيوتر نهائى رغم إن الجهاز سليم والنت موجود
-كل يوم بتروح الشغل أو الكلية بسيارتك الخاصة أو بالتاكسى جرب تروح يوم بالمواصلات أو سيرا إذا كان ممكنا
أكيد التمرين ده مش هعمله علشان أنا كل يوم مواصلات
-كل يوم ما شاء الله بتتغدى لحمة أو فراخ جرب يوم كده تقضيه من غيرهم
وتجرب أى أكل بسيط أخر
-والدتك كل يوم بتجهز الأكل على طول جرب يوم تجهز لنفسك فطار من غير ما تستنى والدتك تحضره
-كل يوم مثلا بتنام على سريرك الكبير فى حجرتك الخاصة
جرب يوم كده تفترش على الأرض وتنام عليها
وكما قال سيدنا عمر رضى الله عنه {إخشوشنوا فإن النعمة لا تدوم }
وأبرز التمارين الفعالة جدا الصيام
- الصيام بتاعنا بيدعم الفكرة دى أوى
وهو إن تحرم نفسك من الأكل والشرب ومن زوجتك لفترة رغم إنهم موجودين فى البيت
ممكن نجرب نصوم يوم مثلا فى الأسبوع فى أيام الحر دى
انا عارف ما شاء الله إن معظم زوار المدونة هنا محترمين جدا
وأكيد بيتصدقوا كتير
ولكن ممكن نجرب صدقة من النوع المؤثر شوية
معظمنا لما بيتصدق بيحاول يتبرع بالشىء الفائض لديه والزائد عن حاجته
ممكن نجرب نتصدق بالشىء اللى بنحبه أوى ومتعلقين به بشدة
ربنا سبحانه وتعالى بيقول
{لَنْ تَنَالُوا الْبِرَّ حَتَّى تُنْفِقُوا مِمَّا تُحِبُّونَ}
ملاحظات هامة
1- دى كانت شوية إجتهادات منى بالتمارين دى وأكيد كالعادة تعليقاتكم بتكون متميزة فمن لديه تمرين أخر
ممكن يعرفنا بيه نجرب نعمله مع بعض
2- ياريت كلامى ده ميكونش مجرد كلام نظرى ياريت يكون للتنفيذ
وكل واحد وهو بيعلق يأكد على النقطة دى فى إنه هينفذ فعلا أو إنه بالفعل بدأ فى التنفيذ
3- كان مفروض أسافر بكرة بس يظهر عين وصابت الرحلة بتاعتنا
المهم مفيش سفر والموضوع ممكن يتأجل أو يتلغى
4- منتظر ترشيحاتكم هناك إن شاء الله ياريت مفيش حد ينسى وياريت تكون ترشيحاتكم رائعة كالعادة
بصراحة بكون فعلا فرحان بالمواضيع اللى بترشحوها وياريت الناس اللى عايزة ترشح نفسها ياريت ترشح معاها مواضيع تانية
علشان الصوت بتاعها يتحسب وميكونش صوت باطل

كفاية كده
طولت عليكم
سلام

أنا وهو و.............

2009-06-03T23:00:00.000+03:00

نرتاح شوية من المواضيع المثيرة للجدل بصراحة تعبت من المناقشات فى المواضيع الأخيرة دى
وبعتذر للأخوة الملتحين والأخوات المنقبات لو كانوا زعلوا منى فى الموضوع الأخير
أكيد أنا لم أقصد الهجوم أبدا ولكن كلامة من منطلق حبى ليهم وإنى بتمنى دايما إنهم يكونا قدوة حسنة لباقى الناس
وبعتذر كمان لأصحابى الأهلاوية اللى زعلوا
أكيد الأهلاوية كالعادة مش بيحبوا أى حد يتكلم عنهم
هحكى شوية معاكم شوية ذكريات قديمة
كنا فى أجازة الثانوية تقريبا
فى الصيف برضه
بس الجو كان جميل أوى بعد صلاة العشاء
قعدت مع محمود صاحبى ولعبنا دورين شطرنج حلوين فى الشقة بتاعتى _ اللى بقعد فيها على طول_
وكنت فرحان أوى إنى كسبته وطلعت فوق الشقة عندنا بعد ما خلصنا
لقيت بابا وأختى بيبصولى وبيضحكوا كده ضحكة خبيثة مكنتش فاهم حاجة وقتها
ولقيت بابا بيقولى أختك زى ما يكون كده شافت حاجة فى البلكونة
قولت هيكون فيه إيه يعنى
ودخلت زى العبيط
وأول ما دخلت على طول لقيتهم قفلوا الباب ورايا على طول وبإحكام كمان
بصيت قدامى لقيت اللى بيبصلى
بصيت حواليا لقيت جيرانا معظمهم واقفين فى البلكونات _ صيف بقى والجو فى البلكونة جميل _
بصيت وراى لقيت الباب إتقفل جامد خلاص
مفيش هروب
البحر أمامك والعدو خلفكم
ومفيش قدامى خيار لازم أواجهه
وأضرب يمين ويهرب
شمال ويهرب
شوية وينط على الجدار
طاخ ............ طاخ..............طاخ
المهم الحمد الله عرفت أموته فى الأخر

أكيد طبعا مكنش فار أمور زى ده
ده كان ما شاء الله
ربنا كان مبارك فيه

المهم
فى حاجات كتير أوى فى حياتنا لما نيجى نتخيلها نقول إستحالة نعرف نعملها
لا لا مش أنا اللى أعرف أعمل ده
لكن لما الموضوع يكون واقعمفاجىء ومفيش هروب
وقتها مدى ثباتك هو اللى بيفرق معاك
وممكن تلاقى نفسك عارف تعمله وكويس جدا كمان
على فكرة دى طريقة بيعالجوا بيها مرضى الفوبيا وهو إنهم يواجهوهم مرة واحدة
أمام الأمر الواقع واللى بيخافوا منه
ومع شوية دعم كتير منهم بينجح وبيتخلص من مرضه للنهاية
على فكرة
بعد حوالى ست سنين من القصة دى
إتكرر الموضوع
ولكن وقتها
قالولى فى فأر فى البلكونة ومستنيك علشان تموته
وطبعا أنا بقيت خبرة ودخلت المرة دى وانا عارف إنى هقدر أموته إن شاء الله ومفيش مشاكل خالص
كل واحد فينا عنده إمكانيات مختفية محتاجة الظروف بس علشان تظهر ويقدر يكتشفها

كلمة أخيرة
سعيد بنجاح فكرة الترشيحات اللى موجودة فى المدونة التانية
واللى أكيد ناجحة بيكم وبمشاركاتكم الإيجابية
مستنى ترشيحاتكم النهاردة وبكرة إن شاء الله
سلام

خواطر على مشهد متكرر

2009-05-27T20:59:00.001+03:00

مشهد متكرر كتير فى حياتنا
شاب ملتحى متحمس يجادل من حوله فى فرضية اللحية وتقصير الثوب والنقاب
ليس هذا الشاب فقط بل هناك بعض الشيوخ لا حديث لهم إلا فى مثل هذه الأمور الجدلية
هناك الكثير من الأمور فى حياتنا الدينية لن ينتهى عندها النقاش وسيظل الجدل يكثر حولها
رأيى أنه مثل تلك الأمور التى إختلف عليها العلماء لن تستطيع أن تنهيها حضرتك بتحمسك لرأى معين
فعلى حسب الفرد
إذا كان صاحب همة عالية وإلتزام قوى فليأخذ بالرأى الأحوط وأن بيعد نفسه عن الجدال
وهذه إحدى درجات الورع
وإلا فليتبع الرأى الذى يستشعر أنه مناسب له طالما أنها أراء علماء ثقات
من خلال هذ المشهد أريد التحدث عن أكثر من نقطة
1-الكثير من هؤلاء الشباب مثلا تجده عاق لوالديه أوسىء الخلق لا يجيد التعامل مع الناس لإستشعاره أنهم جميعا على خطأ هذه نقطة هامة جدا فى الدين وهو أن ترتب أولوياتك
مثال
يعنى قراءة القرأن شىء جميل ولكن القراءة وقت الصلاة المكتوبة لا فالصلاة فى هذا الوقت أولى
مثال أخر
جاء أحد الطغاة الفاسقين لأحد الصالحين ويخبره بعزمه على ترك شرب الخمر فأخبره
فلتترك الخمر إذا كانت الخمر هى أسوء شىء تقوم به

2-هناك الكثير من الأمور تعلم أنها صواب ولكن فى نفس الوقت لا يجب الحديث عنها وإجبار الناس على إتباعها
مثال
واحد صاحبى كلمنى على تطبيق الشريعة الإسلامية
قولتله دى أمنيتى وأكيد هيكون شىء رائع ولكن لا يمكن تطبيقه حاليا وعلى تركيبة شعبا الآن يمكن نقدر نتكلم فى هذا الأمر فى ظروف أخرى
مثال أخر
الرسول عليه الصلاة والسلام قال
يا عائشة لولا أن أهلك حديثى عهد بجاهلية لأمرت بالبيت فهدم ...............إلى أخر قول الرسول
لأن الرسول كان يعلم أن هناك خطأ ما فى بناء البيت الحرام ولكن منعا للفتن لم يأمر بهدمه وإعادة بناءه نظرا لظروف المجتمع فى هذا الوقت

3-الإنسان المتعصب بيتكره بسهولة أوى وكمان بيفقد قدرته على إقناع من حوله
مثال
فكرت شوية كده
وقولت مين أكثر للعبى مصر تعصبا
لقيتهم نفسهم أكثر الاعبين المكروهين من جماهير الفريق المنافس
مشهد بسيط أوى
فى مباراة الأهلى والحرس الأخيرة لما خرج أحمد عيد من الملعب الجمهور كله فرح كأنما دخل هدف فى المرمى كل هذا لأنه لعب بعصبية شديدة جعلت مستواه قمة السوء بالإضافة الى كراهية الجماهير وسبابها له
نفس السؤال سألته لنفسى
لماذا تكره باقى جماهير مصر الأهلى بل إنها تشمت فيه أحيانا..؟؟
لقيت السبب المباشر هو عصبية جمهور الأهلى الزائدة وإعتبار فريقهم إنه فوق الجميع
وإن المفهوم ده ترسخ لديهم لدرجة إنهم لا يتقبلون أى نقد أو أى هجوم
وإن أى شخص يتعرض ليهم من قريب أو من بعيد ينال قدر لا بأس به من النقد والذى قد يصل للسباب

تنويهات هامة
أولا
حابب أقدم التهنئة لصاحبى وحبيبى عمر بمناسبة خروج والده من المعتقل
وإن شاء الله تكون الفترة اللى قضاها هناك تكون فى ميزان حسناته

وحابب أقدم التهنئة برضه لشاعرنا الكبير محمود أبو العزم بمناسبة تدوينته المائة
وعقبال الألف إن شاء الله

أخر شىء
منتظر ترشيحاتكم النهاردة وبكرة على المدونة هناك
لأفضل خمس مواضيع خلال الأسبوع الماضى
قبل إعلان النتيجة الجمعة إن شاء الله

اذا سكت الزمان

2009-05-18T23:54:00.002+03:00

تخيلوا معايا فصل ابتدائى
أكيد بيكون فيه طالب أو إتنين شايفين نفسهم شوية
ولفرض سيطرته على الفصل
شاف طالب كده ضعفان
وإتعرض له
الطالب الضعفان ده هيتصرف إزاى
1-ممكن يقف له ويمنع الإعتداء عليه ويوقفه عند حده
اه ممكن ينضرب بس أكيد الطالب اللى شايف نفسه ده هينضرب هو كمان
وأظن بعد كده مفيش حد هيتعرضله بعد كده لأنه رافض لأى عدوان عليه
2- ممكن يروح يقول للمدرس فى الفصل
ووقتها
المدرس ممكن يقوله معلش يا ابنى متزعلش
ووقتها الطالب ده هيكون الفريسة السهلة لأى حد عايز يرسم نفسه فى الفصل
3- ممكن المدرس فعلا يضرب المعتدين
بس وقتها هيكون الطالب ده مكروه من بقية الفصل
وتبقى عليه وصمة الضعف وإنه مش عارف ياخد حقه لوحده
وهيحاول تانى أكيد فى أقرب فرصة يبعد فيها المدرس عنه
ده القانون الفطرى عند العيال الصغيرة

سيبكوا بقى من الكلام اللى مش مفهوم ده

من خلال تأمل للتصرفات المصرية خلال الفترة الأخيرة وجدت العجب
وخصوصا خلال حديث السيد الرئيس فى عيد العمال السابق
وجدته يتكلم بعنف شديد وبتهكم واضح على المقاومة باعتبارها تصرفات عنترية وأفعال غير محسوبة
وماذا فعل سيادته بتصرفاته الحكيمة على مدار .....عام؟؟؟
هل أخذنا حقوقنا....؟؟؟؟
هل نملك قرارتنا....؟؟؟
تأملت فى التاريخ كده
وجدت أن التاريخ دائما ما يمجد أبطال المقاومة
أصحاب المبادىء
فى مصر مثلا دائما ما نفخر بأحمد عرابى
رغم إن ثورته بأت بالفشل
ولكن لمجرد محاولته المقاومة فتلك المحاولة ربما تكون شرارة البداية
نال التقدير والإحترام والبقاء فى ذاكرة التاريخ
وبالمثل سعد زغلول ومصطفى كامل
ها ذكر التاريخ مثلا معرفش مين باشا اللى وصل للسلطة ........... ابدا
مثل هؤلاء الجبناء دائما ما تكون ذكراهم فى مزبلة التاريخ
الشاعر بيقول
من يهن يسهل الهوان عليه مالجرح بميت إيلام
وسبحان الله تصرفات مصر لم تكن مقتصرة على مجرد تصريحات بل تخطط لحملات إعلامية
تكرس فيها ترسانتها الإعلامية فى التشويش على الحقائق
مثلا أثناء الحرب على غزة
نجحوا فى إنهم يشغلوا الناس عندنا بمقتل الجندى المصرى على الحدود عندنا
ونسى الجميع ما يحدث من مجازر فى غزة فالكل مشغول فى
كيفية مقتل الجندى؟؟؟
وما الخبايا خلف ذلك ؟؟؟
وهل حماس تريد إحتلال سيناء؟؟
ولابد من منع هذا الإحتلال الحمساوى
وتشيع جنازته فى مشهد مهيب تناقلته وسائل الإعلام عندنا طوال يومين ويمكن ثلاثة
ولم تكن تلك المرة الوحيدة
وبالمثل
قريبا عندما أمسكوا بمجموعة من حزب الله عندنا فى مصر
أقاموا الدنيا ولم يقعدوها رغم إن هدفهم هو توصيل السلاح لرجال المقاومة فى فلسطين
وهذه تهمة رهيبة تستحق الشنق
وتناسى الجميع أن نصر الله هو الوحيد الذى تصدى لإسرائيل وحده فى وقت تخلى الجميع عنه وأكتفوا بمصمصة الشفاه
وإسمعوا الأغرب من هذا
أثناء تفجير ميناء إيلات _ الفيلم المشهور الطريق إلى إيلات _ وقتها عبر رجال المقاومة عندنا حدود الأردن بشكل غير شرعى
وساعدهم فى ذلك رجال المقاومة فى الأردن
وهذه هى نفس التهمة الموجهة لخلية حزب الله
والأغرب كمان
سمعت إن سيادة الرئيس نفسه تم توقيفه فى المغرب أثناء طيرانه بهدف مساندة المقاومة فى الجزائر
هذا الكلام سمعته فعلا خلال مقالات ابراهيم عيسى وفهمى هويدى

انا لا أقصد الدفاع عن أشخاص معينة ولا أدافع عن نصرالله ولكنى أرصد واقع
وهو إن تلك الحملات بالفعل نجحت فى التقليل من شعبية حماس وشعبية نصر الله فى مصر
حملات موجهة
تتناسى واقع وتهاجم بشكل شرسه لنيل رضا النظام
المتأمل لحال مصر يجد أن خلافتها لم تقتصر على هؤلاء
بل أمتدت لتشمل إيران وزعيمها أحمدى نجاد وهو الزعيم الوحيد الذى تخشاه إسرائيل وأمريكا
وهو الزعيم الوحيد الذى لديه المقدرة لأن يقول ما يريد ولمن يريد دون خوف
مش كده وبس
لا لا لا
ده خلاف مصر وصل لغاية قطر لا من أجل قطر
بل من أجل قناة الجزيرة
أكيد لأن الجزيرة ترفع شعار
نعم للمقاومة
أه انا عارف إن الجزيرة بتهاجم مصر كتير
بس مش كده يعنى

انا عارف إن كلامى ده ممكن يزعل ناس كتير منى
بس بجد والله ده
من حبى لمصر
واللى بحب دايما إن راسها تكون مرفوعة
وإنها تقدر تقول للغولة عينك حمرا
ومينفش ابدا نكون مسّلمين الراية على طول كده
مش مشكلة إن الفرد يموت
بس يموت مرفوع الراس مش كده
الحكمة بتقول
من لم يمت بالسيف مات بغيره
الكلام ده بمناسبة الذكرى ال61 على النكبة
ياترى هنعد نبكى حالنا كده لغاية إمتى
يارب أشوف اليوم واللى نحتفل بيه بذكرى الإنتصار مش ذكرى النكبة

معلش طولت عليكم
بس ياريت تسمعوا النشيد ده
بيلخص الموضوع

اذا سكت الزمان عن المظالم
فقاوم ثم قاوم ثم قاوم

وإن هدموا الديار على ذويها
فبالأنقاض قاوم والجماجم
وإن سفكوا الدماء على ثراها
فلون دماك قد نالوا الهزائم
وإن سجنوك لاتجذع لقيد
فإن السجن لى نيشان المقاوم
وإن حوصرت كى تعطى إعترافا
فلا تركن لطاغية وظالم
وإن عزّ النصير فلا تبالى
كفاك الله يارجل العزائم

إذا سكت الزمان عن المظالم
فقاوم ثم قاوم ثم قاوم

وإذا خرس السلاح وما تكلم
فسطر من قذائفك الملاحم
وإن تركوك فى وجه المنايا
فمت فى العز لكن لا تساوم
وإن سكتت حكومات الدنايا
كفاك الله يا رجل العزائم

إذا سكت الزمان عن المظالم
فقاوم ثم قاوم ثم قاوم

إن أجتثوك فوق الأرض حينا
ففى الأنفاق قد عشت العوالم
وإن زرعوا الجدار على رباك
فقلها إن زحف العز قادم
وإن حشدوا عليك بكل ساح
كفاك الله يا رجل العزائم

إذا سكت الزمان عن المظالم
فقاوم ثم قاوم ثم قاوم

رأيك يهمنا

2009-05-15T01:49:00.004+03:00

انا عارف إن فى كتير من زوار المدونة دى
مش عارفين مدونتى التانية
والنهاردة فرصة فى إنكم تتعرفوا عليها
لإنى ناوى أعمل فيها فكرة جديدة
ومحتاج مشاركتكم فيها فعلا
الفكرة
والتفاصيل
والتعليقات
كلها
هناك

انا مش موجود هنا
النهاردة
هناك بس

تعقيب مهم

2009-05-12T21:30:00.001+03:00

فعلا كان لازم أكتب بوست تانى أوضح فيه كلامى أكتر
وكمان محاولة لإبراز البيان الختامى للمناقشات فى الموضوع الأخير
أولا
لازم أوضح شىء مهم أوى
كلامى فى الموضوع الأخير
عن ارتباط الناس وتعلقهم من خلال حوارات النت وما شابه مش عن نفسى ابدا
كانت فى تساؤلات كتير عن هذا المضمون
لا أنكر إعجابى الشديد بتعليقاتكم وإنى فعلا بستمتع بها وبنتظرها دايما
لكن هذا يبقى ارتباط بمجرد أفكار وأراء
وهذا ما كنت أعنيه بفكرة الشبح
ولكن أن تهفو نفسى ويتحرك قلبى فهذا بعيد عن الصحة تماما

طيب
كتبت الكلام اللى فات ده ليه
السبب هو إنى شوفت مواقف كتير وحالات مشابهة كانت البداية مجرد رد فى منتدى
أو حوار على الفايس بوك
وبالفعل يتطور الموضوع
خصوصا إنهم بياخدوا راحتهم على الشات وبيكون الموضوع متاح إنهم يتقابلوا بعد كده
وأكيد كل موقف من اللى كنت عارفهم إنتهى بنهاية شكل

المهم
انا فرحت جدا بتعليقاتكم ومساهمتكم على الموضوع ده
وبالفعل هناك الكثير من التعليقات كانت فوق الرائعة ونالت استحسان الجميع أكتر من الموضوع نفسه
وشاركنا المناقشة
أحمد سعيد بسيوني -د. ياسر عمر عبد الفتاح - عاشقه الاقصى - بحـــر الدموع - بنجاواتى- ايومي - ghorBty - fnoonh -
norahaty- احمد - amany - موناليزا - محمد عبد الباسط - المعتصم - محبة الرحمن - mohamed ghalia - حازم النبراوي
القدر و انا - تامر علي - خديجة عبدالله - نور الاسلام - د.آيه - غير معرف - غير معرف - إيمان- wesoooooooooo - وردة
arsenalwy - حارة سد - حياتى نغم - (أم البنين) - حقى أهرتل

هحاول أجمع الكلام كده
1-لا يوجد فصل نهائى بين الحوار أو الردود على النت أو على الطبيعة وما هو محرم هنا محرم هناك.
2-الفكرة أنه لا توجد حرمانية فى التعامل مع الجنس الأخر بدليل أن الرسول تعامل مع النساء وكانوا يسألونه ويجيب عليهم
ولكن تبقى الضوابط الشرعية التى تربط العلاقة وأن لا يخرج الكلام عن الأصول (يعنى الكلام مش عمال على بطال).
3- أن يكون لدى الفرد شىء من التحفظ فى ردوده وتعليقاته مع جميع الناس على السواء ومش لأن هناك أشخاص منفتحين ومتبسطين فى تعليقاتهم نتبسط مثلهم
لذلك يبقى المعيار الأساسى مرعاة ربنا وأن كل واحد يعلم إن ربنا مطلع عليه.
4-سؤال لازم الواحد يسأله لنفسه دايما
هل الكلام اللى هكتبه ده هيكون فى ميزان حسناتى أم ميزان سيئاتى..؟؟

سؤال لازم موجود فى ذهننا دايما ..
5_أكيد التوازن هو عنوانا دايما ولذا من الأحوط إختيار كلمات واضحة لا تحتمل التأويل
6- نأتى للنقطة اللى انا كنت قايلها وكتير فهموها غلط
انا لما قولت شبح لم أعنى أبدا التخفى فى الشخصية
وأظن إنى إتكلمت عن نفسى كتير قبل كده وقولت معلومات شخصية يعنى انا مش متخفى ولا حاجة
وأى حد ممكن يسأل عنى هيتعرف عليا بسهولة
إذن ليس هذا ما أعنيه ...
كل ما عنيته هو إن الواحد وهو بيتعامل على النت يحاول
يتعامل مع ما يكتب من أراء وأفكار ويكون هذا هو ما يتعامل معه
ويتناسى تواجد هؤلاء الأشخاص على أرض الواقع
وأين كانت هيئتهم على الطبيعة فالموضوع سيان
فهو يتعامل مع أفكار وأراء فقط
يمكن فكرتى هذه لم تعجب البعض وأعتبرها البعض غريبة نوعا ما

ولكن الأهم هو أنه علينا الإلتزام بالنقاط الخمسة الأولى التى ذكرتها فى البداية
وهو ما لا يختلف عليه أحد

الموضوع متاح للجميع لو أن هناك إقتراحات أخرى

الشبح

2009-05-08T01:25:00.001+03:00

انا مش قديم فى إستعمال النت يعنى تقريبا لم أكمل عامى الأول بعد
وهو بالفعل عالم آخر مختلف تماما

قبل كده انا كنت بعيد جدا عن الإختلاط
أه كليتنا مختلطة
بس تقريبا الروند بتاعى صبيان بس
ومش بحضر محاضرات ولا بقف كتير أمام الكلية
يعنى تقريبا كده إختلاطى الجنس اللطيف من بعيد أوى
وكده الوضع مريح جدا

الموضوع إختلف مع وجود النت
الإختلاط موجود ولا مفر منه
ممكن على الإيميل أو على الفايس بوك أو من خلال المدونات والمنتديات وما شابه
وعن الإختلاط ده سمعت أراء كتير
حتى أن بعضهم وجد أن هناك شبهة حتى فى الردود من خلال المدونات والمنتديات وليس فقط الكلام المباشر
انا لما سمعت الكلام ده زمان إستغربت كتير وقولت فى نفسى أكيد صاحب هذه الفتوى غير متعامل مع النت نهائى
وكمان معقد زيادة عن اللزوم
وده كان رأيى من زمان
ولكن من خلال خبرتى واللى مش كبيرة أوى برضه
لقيت إنه مع طول مدة التواصل والجلوس على النت
وجدت إن الموضوع ممكن بيشغل حيز من التفكير وجزء من حياة الفرد
ولقيت إنه مع تكرار كلمات الشكر والتحية والمدح والثناء
أكيد تلك الكلمات بتأثر وتفرق مع الناس
والأكتر من كده
إن كل واحد ممكن يجد الراحة من خلال التعامل مع بعض الأفراد على النت
وممكن يهفو قلبه لملاقاتهم والحديث معهم وجها لوجه
وخصوصا
إنه حتى الأخوات المحترمات يجدوا شىء من الحرية فى التعامل مع النت
وتراهم أحيانا يتركوا العنان لأنفسهم فى الحديث والكلام مع الطرف الأخر
مما قد لا يجدونه فى حياتهم الواقعية
بصراحة كده
لما المواضيع توصل لهذا الحد يبقى أكيد الموضوع فيه شبهة
طيب
والحل
لما أفكر كده إن إحنا نفصل ونمنع الإختلاط على النت
أكيد هيكون الحل ده درب من دروب الخيال
وصعب جدا تنفيذه
طيب
يعنى مفيش حل
لأ
فى الأول كده لازم الواحد يحاسب شوية فى كلامه
ومياخدش راحته أوى فى الكلام كما هو الحاصل الآن
بالنسبة ليا
فكرت بينى وبين نفسى لقيت إن الواحد لازم يفصل بين حياته اللى هو عايش فيها
وعالمه على النت
وإنه ممكن يتواجد على النت على هيئة شبح كيان هلامى
يعبر بيه عن شخصيته وأفكاره فقط
بعيدا عن كيانه المادى
الذى يتواجد عليه فى حياته الواقعية
وأكيد الشبح لما بيتعامل مع الأشباح اللى زيه
بيكون مش فارق بيتعامل مع ولد أو بنت
مش فارق البنت دى متجوزة ولا لأ
ولا فارق حلوة ولا وحشة
لأنه بيتعامل مع أشباح
وأكيد يا جماعة الشبح ده
مش بتظهر له صورة علشان هو شبح
وأكيد كمان مش بيطلع له صوت
علشان متخافوش منه
يعنى من الآخر كده إنه اللى بيكتب ليكم دلوقتى
مش محمد عرفة
لا لا لا لا
ده
الشبح محمد عرفة
عووووووووووووو

ذكريات قديمة

2009-05-01T01:36:00.000+03:00

النهاردة حابب أريح شوية من المواضيع التقيلة فى المواضيع الأخيرة
كنت حاسس إن دمها كان تقيل شوية

هحكى شوية ذكريات من أيام طفولتى وإن شاء الله كمان فترة كده هكمل ذكرياتى معاكم
كنوع من الريست بس
أممممممممممممم

كنت فى فترة الإعدادى ساعتها
وفى يوم عادى جدا
هرج ومرج فى الفسحة كالعادة وبعدها الطابور
وقفت فى طابور الفسحة وانا منهك جدا
طابور الفسحة بيكون دايما تقيل على قلبى جدا علشان بتكون الدنيا حر والشمس على آخرها وبكون زعلان على إن الفسحة خلصت
المهم وبعدين لاقيت مرة واحدة ناظر المدرسة واقف فى الإذاعة على غير المعتاد
لأ وكمان لاقيتهم بيحضروا فى هدايا وجوايز وكده
سألت أصحابى لقيتهم بيقولولى إن فى جوايز هتتوزع النهاردة
قولت فى نفسى يا سلام لو آخد جايزة من دول
ولاقيتهم بيقدموا للجوايز وكانت علشان إمتحانات الشهر اللى فات
قولت مش مشكلة ياترى مين اللى هياخد الجوايز دى
وبعد كده نادوا الأسامى وفوجئت إن إسمى أول إسم ينادوا عليه ومكنتش عارف ده
بصراحة إرتبكت جدا وكنت آخر واحد فى الطابور
فطلعت بسرعة
أممممممم
وبعدين فى نص السكة وقدام الطلبة كلهم إتكعبلت ووقعت فى نص الطابور
وبدل ما الطابور كله يسقفلى كله قعد يضحك عليا

وعلى العموم
كل ده وكانت الجايزة قلم جاف

أممممممممممم

طيب أحكى كمان قصة مشابهة

المرة دى كنا فى المعهد ( الدرس يعنى)
وكنت فى الإعدادى برضه
وكان يوم حر جدا وكنت زهقان على الأخر
وانا فى الدرس كنت قاعد و سايب (الشبشب) تحتى كده كنت خالعه من رجلى زهق يعنى
المدرس خد باله من اللى انا عامله ده
فقومنى علشان اجاوب سؤال
عادى مش مشكلة أقوم أجاوب عادى
فصاحبى اللى كان قاعد جنبى خد باله
فقام محرك الشبشب من تحت رجلى
فجيت أقوم ملقتش حاجة تحتى فضطريت أقوم أجاوب وانا حافى
وللمرة التانية المجموعة كلها تضحك عليا

كلمة أخيرة
كتير بتعرض لمواقف محرجة
وأحيانا بتكون سبب فى تعكير مزاجنا لمدة كبيرة
فلو عايز تستمتع بحياتك
ياسلام لو عملنا بتلك القاعدة
(لا تهتم بصغائر الأمور)

على إيه بقى نقعد نعذب نفسنا ونضايق ونتألم
علشان حاجات تافهة
وأكيد زعلنا ده مش بيمثل حل أبدا للمشكلة

المرة دى كانت ريست
هرجع أرخم عليكم تانى بمواضيع تقيلة متخدوش على كده

وماذا بعد...؟؟؟

2009-04-24T06:21:00.003+03:00

على نفس نهج الموضوع السابق

واحد صاحبى طرح عليّا سؤال
قالى وماذا بعد أن كتب ودونت وطرحت أفكرك...؟؟؟
فعلا سؤال مهم أوى...؟؟؟
قولتله أولا موضوع الدعوة ومحاولة نشر الفكر السليم ده أمر واجب ربنا سبحانه وتعالى بيقول
(كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنْ الْمُنكَرِ)
وهذه الصفة هى التى ميزت أمة الإسلام

وبعدين أنت مسئول عن الإجتهاد فى الدعوة ولكنك لست مطالب بالنتائج وفى وصف مشاهد الآخرة
يأتى النبى ومعه الرجل ويأتى النبى ومعه الرجلان ويأتى النبى وليس معه أحد
يعنى هناك أنبياء أرسلوا إلى بنيهم ولم يستجب لهم أحد وبالطبع لسنا أفضل من الأنبياء

وممكن أى كلمة تقولها تقنع بيها إنسان أو تهديه لطريق الخير تشفعلك يوم القيامة وتكون سبب فى دخولك الجنة بالطبع لا نعلم على أى حال سنكون

وبعدين ممكن تعتبره مجرد محاولة منى لو ربنا سبحانه وتعالى سألنى يوم القيامة عن مدى سلبيتى
وطبعا عارفين قصة القرية اللى ربنا أمر بهدمها كلها فردت عليه الملائكة بأن فيها رجل صالح
فقال لهم المولى عزوجل به فبدأوا
هذا لأنه كان يرى ما يفعلون دون أن يتحرك قلبه

أخر حاجة بقى سيبك من إنى أقدر أغير حاجة أو أعمل حاجة بلاش أفضفض شوية بدل ما أنفجر تلقائى فى البيت
ضحك صديقى العزيز
وقالى طيب لن تجنى من كلامك هذا سوى التعرض للمضايقات والمواجهات فى حياتك ومتعملش فيها بطل يعنى علشان مش هتقدر تستحمل حاجة
ضحكت وقولتله
ربنا سبحانه وتعالى بيقول
{أحسب أناس أن يتركوا أن يقولوا آمنا وهم لا يفتنون}
يعنى لا يوجد إيمان بدون فتن
أين كانت نوع الفتن دى
وبعدين أنت مش ملاحظ أن الناس كلها دلوقتى ماشية جنب الحيط لأ قصدى جوة الحيط
لو أستمرينا كده مش هنلاقى الحيط اللى نمشى جواه
وبعدين صديقى العزيز لو قرأت فى سير الأنبياء والصحابة
ستجدهم جميعا تعرضوا للفتن والمواجهات بشكل كبير جدا
وتخيل مدى التعب الذى عانوه كى ينتشر الدين فى الأرض
وطوال ما حيينا هنحلم بالعالم المثالى ده

وطبعا صديقى فى الأخر ضحك وقالى مش هعرف أقنعك
قولتله
طيب بص هقولك كلمات نشيد بحبه جدا
هيلخص كتير أوى من الكلام اللى أن عايز أقوله وهيوفر عليا مجهود كبير

يا دعوتى سيرى سيرى سيرى
كل الوفاء ليكِ وكل تقديرى
مايوقفك ظالم أو غدر شريرِ
وأنتى يا دعوتن فى الشدّة سلوتنا
يا دعوتى سيرى سيرى سيرى

يادعوتى إنتى روحى ووجدانى
كل البشر يفنى وإنتى اللى شىء تانى
بالدم أفديك أنا وإخوانى
نفديك بالملايين باقية ليوم الدين
يا دعوتى سيرى سيرى سيرى

يا إخوتى هيا هيا بنا هيا
خلوا القلوب صاحية خلوا القلوب حيّة
النصرة دى جايّة لو نخلص النية
هنكون أمام الله اللى ينوله رضاه
يا دعوتى سيرى سيرى سيرى

من غيره مولانا ينصرنا عارفينه
قرآنا دستورنا فى قلوبنا شايلينه
هنعاهده يا إخوانا يفضل كده دينه
يارب ثبتنا بارك إخوتنا
يادعوتى سيرى سيرى سيرى

بتمنى تسمعوا النشيد كمان

هنا

الملاكم

2009-04-17T10:42:00.001+02:00

كنت ماشى مع واحد صاحبى وطرح عليا سؤال
قالى بصراحة كدة "ممكن توصف الدنيا اللى أنت عايش فيها فى كلمة واحدة_ حياتك يعنى _ ؟؟؟"
قولتله
مجاهدة
كتير بحس إن الواحد طول حياته بيجاهد نفسه
ويدخل فى صراع بين الحاجات اللى هو عايزها ولكن مش مفروض يعملها
يعنى تقريبا فى صراع دائما مع هوايا
وبيكون محور الصراع ده فى العلاقة مع ربنا
بالظبط
مثل الملاكم داخل حلبة الملاكمة مع شيطانى وللأسف هَوايا بيكون "الكوتش بتاعه "
وكل يوم بيمر مثل الجولة
ممكن تنتهى الجولة وأحس إنى إنتصرت عليه أو على الأقل لم ينل منى
وأدعى ربنا إنه يقونى كده على طول ....
ولكن تأتى جولة بعدها وألاقيه شد حيله عليا جدا وللأسف بكون مش قادر حتى أدافع عن نفسى
وبطلع من الجولة دى مثقل بالكدمات والجروح والآلام ....
وأرجع "للكوتش بتاعى" ومعنوياتى فى الأرض وخايف أدخل الجولة القادمة تحسبا من أن تكون مثل سابقتها

أه بالفعل هناك عوامل مؤثرة فى المبارة
مثل الحرب الإعلامية
وضغوط الجماهير
ومكان المبارة نفسها
وهكذا تتوالى الجولات
إلى أن تنتهى المبارة "أقصد تنتهى حياتى"
ولكن فى النهاية
من اللى سيتحمل نتيجة المبارة......؟؟؟
لا أحد سوى الملاكم المتبارى" اللى هو أنا "
يااااااااااااااه
ياترى من سينتصر...؟؟؟
بحساب النقط
أم أن المبارة ستنتهى بضربة قاضية

ربنا يعديهالنا على خير إن شاء الله
ويتجاوزعن تقصيرنا وضعفنا

فى كلمات سمعتها فى وصف الدنيا
وتعتبر من أفضل ما سمعت فى التعبير عن فلسفة الدنيا

أرى الدنيا لمن هى فى يديه
عذابا كلما كثرت عليه
تهين المكرمين لها بصغر
وتكرم كل من هانت عليه
إذا إستغنيت عن شىء فدعه
وخذ ما أنت محتاج إليه

لدول الموت وأبنوا للخراب
فكلكم يصير إلى تباب
لمن نبنى ونحن إلى تراب
نصير كما خلقنا من تراب

ألا وأراك تبذل يا زمانى
ليا الدنيا وتسرع إلى إستلابى
وإنك يا زمان لذو صروف
وإنك يا زمان لذو إنقلاب

سأُسئل عن أمور كنت فيها
فما عذرى هناك وما جوابى
فإما أن أخلد فى نعيم
وإما أن أخلد فى عذاب

استقرار...أم ركود.....؟؟؟؟

2009-04-12T10:28:00.002+02:00

بنظرة متأملة قليلا للإنسان المصرى القديم نجد أنه نشأ بجوار النيل وارتبط به ولم يفارقه حتى الآن
فمن المعروف ان سكان مصر جميعهم يعيشون على مساحة لا تتجاوز 3 فى المائة من مساحة مصر
وهذه هى مساحة شريط وادى النيل
هل ما فعله المصرى منذ القدم هو حب للإستقرار أم هو الركود.....؟؟؟؟؟
نترك المصرى القديم ونذهب للمصرى الحديث ...
تعالوا نتأمل أنفسنا قليلا
مثلا
إذا أعلن الأب مثلا الإنتقال إلى منزل جديد لابد وأن تجد من الأسرة من يخاف الإنتقال بل يرفضه
حتى وإن كان المنزل الجديد أفضل

إذا نظرنا إلى لاعبى منتخبنا القومى نجده يمتلك مجموعة من أفضل لاعبى أفريقيا إلا أنهم نادرا ما ينجحون بالخارج
ويعودون سريعا إلى مصر

قبل إنتخابات الرئاسة الأخيرة
كان الناس جميعهم ساخطين على الوضع القائم
حتى موعد الإنتخابات وإتاحة الفرصة للتغيير
تجد كلام عجيب يتردد
اللى نعرفه أحسن من اللى منعرفهوش
إحنا خلاص عارفينه وإتعودنا عليه
ده كل وشبع غيره ما أكلش لسه

هل ما نفعله هذا هو حب للإستقرار أم ركود ....؟؟؟؟

محمد عبد الباسط صاحبى
فى موضوعه الأخير تحدث عن الصقر وكيف أنه كى يستمر فى حياته ويعيش أطول
لابد له وأن يضحى بكسر منقاره ومخالبه
عملية فعلا مؤلمة ولكنها ضرورة

العجيب أنك تجد أن هناك من يفضل أن يموت فى مكانه مستقر على أن يضحى بأى شىء ليبقى حيا

من الممكن أن تنتهج أسلوبا فى حياتك ويقودك إلى الفشل
ولكن من الغباء أن تظل متمسك بهذا الأسلوب باقى حياتك وتقول
لا أحب التغيير ........ انا بعشق الإستقرار

من الممكن أن تقود إدارة ما مؤسسة لأكثر من ربع قرن وتلقى بها فى فشل ذريع
ولكن من الغباء أن تظل متمسكا بتلك الإدارة وتقول
لا أحب التغيير.........انا بعشق الإستقرار

حابب أختم كلامى بكلمة سمعتها قريب لبلال فضل
بيقول سيد درويش أيام سعد زغلول كان بتغنى ويقول
قوم يا مصرى مصر دايما بتناديك ...........
لو كان سيد معانا دلوقتى كان هيقول
قوم يا مصرى نام على السرير
ده لأن المصرى بينام فى مكانه أمام التلفزيون