وجهة نظر مختلفة

تابعت مثل الكثير حادثة مقتل الدكتورة مروة فى ألمانيا وواضح إنها ليست الحادثة الأولى من نوعها فى العالم فقد سبقها الكثير والكثير من الأعمال المسيئة والمهينة للمسلمين ووالواضح كذلك أن رد الفعل واحد مع الجميع
عندنا فى الطب الدكتور المتميز هو من يعالج سبب المرض وليس من يعالج أعراضه فقط
والمشكلة إنه علاجنا دايما بيكون للأعراض فقط ولذا يكون العلاج مؤقت وبعد فترة تعاود الأعراض للظهورمرة أخرى
مثلا بعد كل حادث مسىء للإسلام أو للمسلمين نجد إن رد الفعل منحصر على أعمال رفض وإستنكار وممكن بعض المظاهرات والجميع يتعامل مع الموقف من منطلق ولن ترضى عنك اليهود والنصارى حتى تتبع ملتهم وهكذا نكن لهم الكره والبغض
أنا حبيت أشوف الموضوع من زاوية تانية خالص يعنى مثلا أنا شايف إنه إحنا مثلا مسئولين وبنسبة كبيرة على عدم توصيل الصورة السليمة للإسلام للعالم يعنى هذا الشاب الذى إعتدى على الطبيبة وزوجها أظن إنه السببب الرئيسى فى كده هو فكرته السيئة عن الإسلام والمسلمين وإنهم إرهابيين وقتلة ويستحقوا عقاب لما يفعلونه
سؤال بسيط كده
لماذا يلقى اليهود تعاطف كبير من العالم الغربى رغم إنهم معتدين وبشكل لا يقبل التشكيك فيه..؟؟؟
أكيد طبعا لأنهم عرفوا ينشروا أفكارهم وعرفوا يظهروا بصورة الضعيف الذى لا وطن له ويحتاج للرعاية ويحتاج لمقابل لما حدث لهم أثناء هتلر
يعنى عملوا بالمثل القائل
(ضربنى وبكى وسبقنى وإشتكى)
يعنى مش كل مرة نقول هما بيكرهوا الإسلام ونعد نشتم فيهم وكده
لإنهم كرهوا الإسلام لإنهم معرفوش الإسلام أساسا
لأ
نحن نتحمل جزء من المسئولية لإننا مطالبون بنشر الإسلام وفقا لمقدرة كل فرد

كمان فى نقطة مهمة بالنسبة للإخوة الملتزمين
لما تشوف إنسان عاصى أو إنسان من دين أخرمثلا متتصورش نفسك أعظم منه أو أفضل منه وتأنف من التعامل معه أو مخالطته لأنك أعظم منه أو ما شابه
لأ أبدا المفروض إنك تحمد ربنا إن ربنا خلقك من أبوين مسلمين وفى بيئة نقيمة سليمة وعرفت تكون إنسان ملتزم خلالها
وهذا الإنسان العاصى ربما يكون أفضل منك فى يوم من الأيام لا تعلم بأى حال ستكون نهايته وربما يوفقه الله بعمل صالح يدخله الجنة فى حين إنك لا تعلم هل ستستمر على إلتزامك هذا أم لا وعلى أى هيئة ستكون نهايتك
الخلاصة هو إنه علينا أن نتعامل مع الإلتزام هذا بإعتباره نعمة
(وأما بنعمة ربك فحدث)
وأن يكون تعاملك مع الأخر من منطلق حب الخير للغير وليس بغض وكره
أخر شىء
بجد سعيد جدا بإستمرار متابعتكم للمدونة
ويارب كده دايما ومش هقدر أقولكم أكتر من جزاكم الله خيرا
وإن شاء الله المدونة الأخرى ستعود للنشاط الشهر القادم

33 رأيك يهمنا:

mohamed ghalia 8 يوليو 2009 في 12:59 ص  

معاك حق إحنا بنعالج أعراض مش بنعالج المرض
بعدنا كتير عن الصح
ربنا يصلح حالنا
نورت مدونتك من جديد

Ahmed Faris 8 يوليو 2009 في 1:11 ص  

أنت اللي جزاك الله خيراً عالتدوينه الجميلة دي اللي بتعبر عن وجهه نظر موضوعيه وشاب مسلم يحب عقيدته بحق
وفعلا عبرت عن وجهه نظر هامه جداً
تسلم

موناليزا 8 يوليو 2009 في 3:01 ص  

وجهة نظرك تحترم جدا
فنحن جميعا سفراء لديننا شئنا أم أبينا ونصر الاسلام مسئوليتنا جميعا

حلم بيعافر 8 يوليو 2009 في 3:19 ص  

اول حاجة لازم نبص لها هى الناس دى بتكرهنا ليه؟
وكلامك صح يادكتور خصوصا فى الجزئية التانية بتاعة نظرة الارف والاستعلاء اللى المتدينين بيبصوا بيها للناس

غير معرف 8 يوليو 2009 في 6:24 م  

انا معك بوجة نظرك

وبزيد على كدا انه معظمنا بقينا مسلمين بالاسم لكن افعالنا عكس ذلك

المفروض نتبع اخلاق الرسول وتعامله مع الاخرين بحسنة مش بالتعصب ونعطي للعالم كله صورة مشرفة عن الاسلام والمسلمين

ربنا يهدينا ويصلح حالنا

عمرو جويلى 8 يوليو 2009 في 8:07 م  

د / عرفة
السلام عليكم
أنا أؤيد حضرتك فى النظرة الشاملة للموضوع حيث أنك تناولت جانب من الممكن أن يكون خافى على الكثيرين منا ولكن يا صديقى العزيز حالنا هذا سببه الضعف والهوان الذى نعيشه أما إسرائيل فهى تحرك الآلة الإعلامية الغربية لصالحها زد على ذلك اللوبى اليهودى وتأثيره فى الغرب أما نحن فقد تفرعنا لتصفية الحسابات بيننا
تقبل أخى تقديرى وإحترامى

Unknown 8 يوليو 2009 في 9:16 م  

السلام عليكم ورحمة الله وبركاتةوجهة نظر جيدة جدا
وولحضرتك كل الحق
بس معلش انا ممكن اسأل سؤال
اصل انا الفترة اللى فاتت كنت شبة مغيبة عن الدنيا
ما هى قصة الدكتورة
دمت بخير
معلش سلمى بتزن

هدى التوابتي 9 يوليو 2009 في 2:27 ص  

السلام عليكم ..كلامك صح جدا يادكتور...وبجد إحنا بنعالج الأعراض فقط أو بنعيش على المسكنات ونسيب السبب الأساسي..وأكيد إحنا السبب في الصورة السيئة..جزاك الله خير على العرض المتميز للموضوع ويارب يصبح خطوة من ضمن الخطوات والجهود القائمة فعلا لتصحيح صورة الإسلام عند غير المسلمين بشكل عام..دمت في طاعة الله

محمد سعد القويري 9 يوليو 2009 في 2:33 ص  

إنا لله وإنا إليه راجعون

لا يوجد عندي زيادة

فما قلته يا د.عرفه

فيه بركة

ولكن هل من يسمع ؟؟؟

ثورة 10 يوليو 2009 في 2:30 ص  

يسعدني التفكير المتعمق في الأمور، وعدم النظر للوجه الخارجي أو السطحي منها

وأحييك على هذا التفكير والتأمل، وأنا معك أن علينا مسئولية في توصيل الصورة الصحيحة عن الإسلام.

صحيح أن هناك من قاموا بمحاولات لا بأس بها بهذا الشأن لكن تبقى صورة المسلم الغالبة في ذهن الآخر هي صورة الإرهاب والفوضى والسلبية والجهل.

وأختلف معك في نقطة، أن اليهود يلقون تعاطفا من الغرب لا لأنهم مجتهدون في توصيل صورة مزيفة عن العرب وعن أنفسهم تظهرهم بمظهر الضحية فقط،

وإنما السبب الأكبر هو عملهم الدءوب والمتواصل وتخطيطهم وسيطرتهم الاقتصادية.

إنه العلم والإنتاج يا أخي الفاضل، وليس الإعلام فقط.

لو أردنا حقا تصحيح الصورة فعلينا أن نكون قدوة بحالنا، فدعوة الحال أقوى من دعوة المقال.

وتقبل تحيتي
:)

GiGi world 11 يوليو 2009 في 4:15 ص  

طبعا وجهه نظر حضرتك تحترم جدا
لكن اعتقدان الامر مش ايوه كره للاسلام
لكن فى النهايه هى سيده وحامل
من اي دين اومن اي مله مش هتفرق
الانسان اللى حضرتك عايز تعذره بصراحه فى الموقف ده انا مش بعذره اطلاقا
سيده وحامل كفايه
ولا ايه راى حضرتك

محمد عبد الباسط 11 يوليو 2009 في 10:33 م  

ولا يزالون يقاتلونكم حتى يردونكم عن دينكم ان استطاعوا

طيب الاتحاد الدولي الفيفا منعت السجده ليه ؟؟؟

رغم ذلك وجهه نظرك صحيحه لازم ننشر اسلامنا بادينا ولساننا احنا مش بلسانهم هم

دمت مبدعا

حلم كبير

"النجم القادم" 12 يوليو 2009 في 4:40 ص  

===========================
جديد مدونة اوعى تخاف
رسالة من م . أسامة محمد سليمان
أحد المعتقلين على ذمة القضية المعروفة بقضية فارس بركات
الذى القي به ناجى الجمال ضابط أمن الدولة بدمنهور من الدور الرابع

فقط وحصريا على مدونة اوعى تخاف

مهندس / على درويش 12 يوليو 2009 في 12:05 م  

أحب الأول اسلم عليك وأتمني أن تكون في أتم الصحه والعافيه

اما ثانيا:
كلامك مظبوط جدا كلنا مسؤلين عن نشر الاسلام

تحياتي

د/عرفه 13 يوليو 2009 في 12:41 م  

محمد غالية
اهلا بيك يا محمد وشكرا على الزيارة الجميلة

بالنسبة للعودة والله
انا بكتب من برة
لسة النت موصلش تانى
ادعيلنا يوصل
ومنتظرين زياراتك دايما

د/عرفه 13 يوليو 2009 في 12:43 م  

أحمد فارس
كيفك ؟ يا احمد ازيك

وشكرا على الاطراء الجميل ده

ومعذرة لانقطاعى الفنرة اللى فاتت

ويارب دايما كده يا احمد منورنا

د/عرفه 13 يوليو 2009 في 12:48 م  

موناليزا
اهلا بيك
وبيسعدنا اهتمامك بالمدونة دايما
وفعلا نحن جميعا مسئولين على نشر الدين

تحياتى

د/عرفه 13 يوليو 2009 في 12:58 م  

نوارة
اهلا نوارة كيفك

متفق معاكِ جدا
ربنا يقدرنا ان احنا نكون صورة حسنة دايما للاسلام

د/عرفه 13 يوليو 2009 في 1:09 م  

اللؤلؤة
عمر الجويلى
اهلا بيك
وشاكر لزياراتك جدا
وفعلا لازم نركز اهدافنا ونوحد جهودنا
زى ما عدونا بيعمل

تحياتى
ويارب تنورنا دايما

د/عرفه 13 يوليو 2009 في 1:17 م  

حتى تشرق الشمس
ازى حضرتك
ده موضوع كبير تناولته وسائل الاعلام
وهو ان الدكتورة كانت رافعة قضية على شاب كان نزع منها الحجاب وكسبت القضية ورفع استئناف لكن برضه خسر وهو فى المحكمة طعنها 18 طعنة وكمان طعن جزها 3 طعنات فى المحكمة ولما الشرطة تدخلت اصابت الزوج برصاصة هو كمان

موضوع مؤسف للغاية
فعلا

ولنا الحق ان نعترض على ده بشدة ولكن كمان علينا تحمل المسئولية

تحياتى
وشكرا على الزيارة الجميلة

د/عرفه 13 يوليو 2009 في 1:24 م  

دودى
شكرا للزيارة الجميلة
وسعيد باهتمامك بالمدونة

واهلا بيكِ دايما
وربنا يقدرنا على نصرة الاسلام دايما

د/عرفه 13 يوليو 2009 في 1:29 م  

محمد سعد القويرى

ازيك يا محمد
شكرا على تعليقك محمد

وربنا يقدرنا على الخير دايما

د/عرفه 13 يوليو 2009 في 1:35 م  

نورة
انا مش مختلف كتير عن الكلام اللى قولتيه

فعلا اليهود بيخططوا كويس ومرتبين نفسهم
وكمان العمل اكثر تاثيرا من الكلام
بس كلامى فوق برضه موجود وهو انهم مجتهدين اوى فى تطهير نفسهم
وانا قولت ننشر الصورة الحسن
واكيد النشر بالقول والعمل

شكرا لزيارتك الاولى
ويارب تنورينا دايما

د/عرفه 13 يوليو 2009 في 1:40 م  

جيجى

اهلا بيكِ
منورة المدونة

انا مش بجيب عذر له طبعا
ده مفروض يتعدم طبعا
انا بتكلم بس
علشان نفكر فى اسباب حقيقية
وكمان علشان نحاول نعمل حاجة ونحس ان احنا مسئولين احنا كمان مش اكتر من كده

ومنتظرين تعليقاتك دايما

مجرد مدونة 16 يوليو 2009 في 1:31 م  

اللهم بارك .. كلام جميل .. وفعلا ينبغى ان الاخوة الملتزمين لا يحقروا إخوانهم .. والحمد لله أنا معرفش حد ملتزم بيبص لحد عاصى نظرة دونية أبدا بفضل الله .. لكن على النقيض سبحان الله تلاقى كتيييير من العصاة هم اللى بينظروا للملتزم نظرة دونية مع الأسف .. ربنا يهدينا جميعا

جارة القمر 19 يوليو 2009 في 1:31 ص  

ربنا يجزيك كل الخير


تفكيرك رائع جدا

ومعك كل الحق


احترامي

وردة 19 يوليو 2009 في 3:05 م  

د/ عرفه
اولا انا عارفة اني مقصرة اليومين دووول
معلش
وحرجع اكيد تاني اعلق علي البوست
انا جيت بس اقولك
كل سنة وانت بخير
بمناسبة الاسراء والمعراج
سلام

Unknown 22 يوليو 2009 في 12:21 م  

بسم الله ماشاء الله
ربنا يزيدك كمان
وكمان ويبارك لك فى علمك وعملك
ويكثر من امثالك وينفع بك والديك والمسلمين
فعلا علينا جزء كبير من (النظرة الخاطئة)للاسلام
فى العالم الغربى .اقولك واحدة قريبتى كانت عادية هنا هى وزوجها واولادها وبمجرد هجرتها الى استراليا
التحى زوجها وتنقبت هى وحصروا انفسهم فى بيتهم فقط والمحل الذى يعمل به زوجها !!لا الوم عليها هذا ولكن الم تكن تعلم هى وهو بالمجتمع المهاجرين اليه؟الا تعلم ان(السمات الخارجية)لتدينهم هذا
قد لا يفهم صح فى مجتمعهم الجديد؟

Unknown 22 يوليو 2009 في 12:26 م  

من جهة اخرى
اليست كل اموال
البترول وغيرها كافية
بعمل محطة تلفزيونة ووكالة
انباء محترمة وقادرة على جذب
اهتمام المشاهد والمستمع الاجنبى
بالطريقة والكيفية التى تجذب بها
الوكالات المغرضة اهتمامه وتبث فيه
ما تريده من إعلام؟

تأثير الفراشة 25 يوليو 2009 في 8:26 ص  

السلام عليكم و رحمة الله و بركاته

أتمنى أن تكون بكل خير بإذن الله

بالنسبة للبوست، فحقيقى بوست ممتاااز ، اتفق مع حضرتك تماما فى كل كلمة قلتها، و بإذن الله ربنا يوفقنا جميعا و ينصلح حالنا و حال المسلمين أجمعين

جزاك الله كل خير، و وفقك لما يحب و يرضى

غير معرف 25 يوليو 2009 في 11:06 م  

د/عرفة

اتمنى انك تكون بالف خير

ليك وحشة والله

ربنا يوفقك ويسعدك

:)

Dr. Ibrahim 28 يوليو 2009 في 11:30 ص  

تمام يا دكتور

المشكلة ان احنا بنعطى
symptomatic ttt

وكمان

ultrashort

فى ثوانى ترجع ريمة لعادتها القديمة وأحب أضيف بالاضافة الى انهم لا يعلمون شيئاً عن الإسلام ومن يعلم منهم يشرح قلبه له

ولكن منهم من لن يرضى حتى يردوا المسلمين عن دينهم

تحياتى لك

Unknown 31 يوليو 2009 في 11:03 م  

السلام عليكم ورحمة الله تعالى وبركاته
جئت للاطمئنان والسؤال عليـــك
كيف حالك وحال امتحاناتك؟
ارجو لك وللجميع النجاح
والتوفيق باذن الله
سبحانه وتعالى

إرسال تعليق