خواطر على الأسبوع الماضى

فى البداية أنا حابب أعرفكم إنى عملت بنصيحة أحد الأصدقاءفى إنى أفصل النت من عندى وفعلا نفذت النصيحة دى لأسباب شخصية وعائلية
ويمكن كمان علشان أكون عملت أول تمرين من تمارين لتزداد قوة وأكون فعلا طبقت الموضوع على نفسى فعلاده خلاف التمارين التانية اللى عملتها
ده لإنى مش بحب أكون متعلق بشىء زيادة عن اللزوم
المهم إنى مش حابب أبدا أقفل المدونة دى لأنى بكون سعيد جدا بالتواصل معاكم لكن المدونة التانية أكيد هتتوقف عن العمل
وكمان بطلب منكم إنكم تقبلوا إعتذارى فى إنى مش هعرف أبدا أتابع مواضيعكم إلا فيما ندر لإنى هكون بكتب من بره إما من عند واحد صاحبى أو من الكلية
وهكون سعيد جدا لو لقيت متابعتكم للمواضيع زى ما هيا لأن ده هيكون مقياس حبكم للمدونة فعلا لأنكم هتابعوا المدونة وإنتم متأكدين إنه صعب جدا أتابع مدوناتكم وبشكر مقدما الناس اللى هتهتم وتابع المواضيع إن شاء الله
كانت عندى خاطرة كده بسيطة
مشهد إتكرر معايا السنة دى حوالى 3 مرات لغاية دلوقتى
ليلة الإمتحان فى إتصال هاتفى مع واحد صاحبى
-ألو إزيك حبيبى إيه أخبار إمتحان بكرة إن شاء الله
-لا تمام الإمتحان سهل جدا وتمام كل الداكترة كويسين جدا ماعدا فلان الفلانى بس ده اللى كانت درجاته وأسئلته صعبة كتير
-شكرا منتحرمش منك أبدا
فى اليوم التانى زحمة وأنا واقف مستنى لجنة الإمتحان وبعدين ألاقى الدكتور فلان الفلانى بتاع إمبارح ماشى فى الطرقة ويدخل المكتب بتاعه وبعدين ينادى الدكتور المعيد من رقم كذا لرقم كذا عند الدكتور فلان الفلاني وأكيد طبعا رقمى معاهم وأدخل اللجنة نفس الهيئة كل مرة
دكتور فوق الستين صوته مبحوح نظرته صارمة ملامحه جامدة جدا لا تعبيرات على الإطلاق وبمجرد إنه يبصلى بس أنسى الكلمتين اللى كنت مذاكرهم ويسألنى سؤال عادى مش صعب فعلا المعلومات تدخل فى بعض وأطلع شوية كلام مش مرتب أبدا وأحاول أرتب أفكرى تانى إستحالة تترتب وهو يزداد قرف فوق قرفه أساسا وميعجبهوش الكلام طبعاويتخنق منى وبعدين أطلع من اللجنة وأشوف كل زمايلى اللى دخلوا معايا نفس اللجنة وكتير منهم متميز ولكن ألاقى كل واحد منهم بيطلع بنفس الوجه كل مرة
سألت نفس سؤال بسيط كده إذا كان ده حالنا وإحنا مستعدين ومذاكرين كويس ومجرد عبد من عباد الله يعمل فينا كده ويرهبنا ويخلينا ننسى الكلمتين اللى إحنا مذاكرنهم أساسا
أمال الإمتحان الحقيقى واللى بحق وحقيقى مش خايفين منه ليه ولا كمان بنستعد له خالص
مع إن الموقف أصعب بكتير أوى
(عجبا لحال الإنسان يخشى من عبد مثله ولا يخشى الخالق سبحانه)


يا جماعة محتاج مساعدتكم شىء فى شىءمحيرنى جدا و مؤرق مضجعى طوال الأسبوع الماضى والظاهر إنه مش أنا بس اللى بسأل
لا
بل الرفاق حائرون يتسائلون
ياترى شريط عمر الجديد الأحسن ولا شريط تامر ..؟؟
يا جماعة حد يساعدنى أنزل أشرى أنه شريط كده مش هينفع خالص
بس هو أنه الأحسن تسريحة عمر ولا تامر أظن إن تسريحة عمر المرة دى مفيهاش شىء مميز
لا بس واضح إن الجيم عامل شغله مع عمر أوى المرة دى ما شاء الله والفانلة الكات كمان شديدة
ولا إنتوا رأيكم إن بدلة تامر البيضا هى الأحسن بس واضح إنه يا عينى خس شوية وبطل يروح الجيم ولا البدلة بس هى اللى مغطية على عضلاته
ياترى يا جماعة إيه المنتدى اللى إنفرد فى إنه ينزل الألبوم الأول شكله منتدى شديد وصاحب سبق خطير ..؟؟؟
وياترى مين من إصحابك كان له السبق فى إنه يعرفك أول ما الألبوم نزل على المنتديات ..؟؟
يا أهل العلم والذكر
أقصد يا
أهل المغنى والرقص
أفيدونى يرحمكم الله



ملاحظة صغيرة
يبدو إن فيه ناس فهمت سؤالى غلط
أنا قصدت من سؤالى بس إنى أستنكر الإهتمام الشديد بالألبومات الجديدة
ده وإمتى هتنزل وكده
والأغرب من كده هو إن كل جمهور كل مغنى يبدأ يهاجم المغنى الأخر
زى ما بيشجعوا فرق الكورة تمام
خلاص الناس مش بتتقبل الأخر حتى فى الغنا
ربنا يكرهنا فى الغنى والأغانى

25 رأيك يهمنا:

محمد عبد الباسط 3 يوليو 2009 في 12:28 ص  

كان خبر مفاجئ جدا وغير متوقع لما سمعته منك فى الكلية انك هتفصل النت
لكن احب اطمن السادة المشاهدين والمتاعبعين ان الموضوع مش هيطول وترجع بالسلامة ان شاء الله

بالنسبة للجان الشفوي الحقيقة انت ضربت رقم قياسى يافوزى فى دخولك للدكاترة اياهم
واحب برده اطمن كل السادة المشاهدين ان فوزي دخل للدكتور الجهجاوي وخد ولا بلاش اقول الدرجه يلا
ههههههههههههههههههههه

بالنسبة للاستاذ عمرو والاستاذ تامر فربنا يعدينا منها على خير

تقبل تحياتي وانا قاعد اتلكع فى الكتابة عشان مكنش اول تعليق اصلى بتكسف هههه

حلم كبير

ديالا 3 يوليو 2009 في 12:33 ص  

بامانه بقي الاتنين اوحش من بعض

بجد وانت لما تسمعهم هتعرف كده

تقبل مروري

ناصــــر 3 يوليو 2009 في 12:39 ص  

أخي د/عرفه

اتخذت قرار صعب وهذا يدل على قوة إرادتك

مادمت ستبقى على كتابة المواضيع في المدونة فالحمدلله

أما عن موضوع عمرو وتامر فالحمدلله أنا لا و لن اسمعهم مادام الشيخ مشاري و مسعود كرتيس حيين

على العموم أسأل الله أن يوفقك و يحفظك

تحياتي

بنجاواتى 3 يوليو 2009 في 12:39 ص  

يا ترى مين اللى قالك افصل النت؟؟؟

عموما ربنا معاك فى الامتحانات وتكون اللى جاية احسن من اللى فاتت

لكن بيقولوا شريط تامر اجمد من عمرو لكن الحمد لله لم الوث آذانى بهذا السفه
الحمد لله الذى عافانا مما ابتلى به هؤلاء وفضلنا على كثير ممن خلق تفضيلا

تحياتى

حلم بيعافر 3 يوليو 2009 في 12:44 ص  

ايه ده؟
فصلت النت ليه؟
المهم
عمرو وتامر بيلتوا ويعجنوا فى الفاضى وبيحكوا فى المحكى
مفيش جديد

المعتصم 3 يوليو 2009 في 1:20 ص  

بسم الله الرحمن الرحيم
السلام عليكم ورحمة الله وبركاته
د/عرفه
اخى الحبيب
ربنا معاك ويوفقك وينجحك ويحققلك كل ماتتمنى ان شاء الله
كتير والله بنسأل نفسنا فى اى موقف بنتعرض له قدام واحد من البشر وبنكون مرتبكين
اذا كان الحال كده مع شخص مجرد عبد من عباد الله
فكيف سيكون الحال مع رب كل العباد
نسأل الله العفو والعافيه والسلامه
اما بقى بخصوص الاسطى عمرو والاسطى تامر
فمعلش انت فاجئتنى بالسؤال ده
يبقى تصبر عليا يومين تلاته كده
هسألك العيال بتوع التكاتك اللى بيسمعوهم وابقى اقولك
بس انا من رأيى تشترى تامر علشان انا مش بحب اسم عمرو ههههههههههههههههه
تقبل مرورى وتحياتى
اه والنبى يامحمد ابقى خلى التعليقات فى صفحه لوحدها علشان انا الموضوع بتاع التعليق اللى فى نفس الصفحه ده بيتعبنى خالص (شكلكم عاوزينى اموت رفيق وترتاحوا مننا احنا الاتنين)
ودمت بكل خير وود
والسلام عليكم ورحمة الله وبركاته

موناليزا 3 يوليو 2009 في 1:40 ص  

اللهم ارزقنا خشيتك فى الغيب والشهادة
اما عن موضوع المقارنة بين شرايط عمرو وتامر فللاسف مش هقدر افيدك
بس رايى الشخصى وبعد ما شوفت البوسترين مش عاجبنى اللى لابسه عمرو وحاسة ان بوستر تامر مسروق لانه مش استايل مصرى خالص

amrgwele 3 يوليو 2009 في 2:07 ص  

السلام عليكم
د/ عرفة
متابع معك إن شاء الله وربنا معاك ويوفقك
تقبل مرورى

لاسع افندى 3 يوليو 2009 في 4:37 ص  

تفصل النت ...تبيع الكمبيوتر كله..مش مشكله
المهم تستمر فى التدوين


تحياتى

beautiful mind 3 يوليو 2009 في 9:20 ص  

د عرفه
معلش هي الظروف كدا ومفيش حاجه بتفضل علي حالها

وطبعا هنفضل متابعين مدونتك وهنرد علي كل مواضيعك ان شاء الله

بالنسبه للاخين اللي في الاخر

ربنا يهدي الجميع

تقبل مني خالص التحيات

غير معرف 3 يوليو 2009 في 5:17 م  

انا قلبي معاك يا محمد وفعلا انت بتكون متوتر داخل اللجان الشفوي مش عارف ليه خليك زي كده بارد واعصابك في الفريزر واتعلم مني وان شاء الله تكون اخر اللجان الصعبه
اخوك محمد فايز

mohamed ghalia 4 يوليو 2009 في 12:47 ص  

هدى بس اعصابك وبإذن الله خير
أما بالنسبة للأغانى مليش فيها
دمت فى سعادة

أنا حر 4 يوليو 2009 في 2:41 م  

قيت كل التعيلقات والحقيقة استغربت لما عرفت ان محدش سمع يط تامر او عمرو
عموما انا اقدر افيدك
شريط عمرو دياب جامد جدا احسن بكتير من شريط تامر
لان شريط عمرو فيه كلمات اغاني جديدة والوان لحنية جديدة اول مرة يستخدمها حد في الموسيقى الشرقية اما شريط تامر فبصراحة كان وحش قوي لانه تقليدي جدا
اما موضوع البوستر مش تشغل بالك بيه لانه مش مهم قوي يعني
اتمنى اكون افدتك ونصيحة اشتري عرو دياب الهضبة
تحياتي

محبة الرحمن 5 يوليو 2009 في 2:31 ص  

يا الله

انتوا اخذتونا من حال الى حال

الاول ربنا يصلحلكم الحال ويوفقكم لما فيه خيرى الدنيا والاخرة لكم باذن الله

موضوع التقديرات ده خلاصته انه حاجه فى ايد ربنا وحده بيسيرك لطريقك اللى هتكمل فيه وهتكون سعادتك فيه

طالما بزلتم الجهد

ربنا باذن الله هيوفقكم للافضل

اما بالنسبه لموضوع الامتحان

بجد سؤال صعب اوى استغرقنى التفكير فيه

يا الله الحال صعب بجد

يا رب ارحمنا

وبجد هوة ده الامل الوحيد ان ربنا يرحمنا

اما اخر نقطه فى موضوعكم

فلم يخبرنى احد شيئا عن هؤلاء

اللى بحس كتير اوى انهم واللى زيهم وبال جاى علينا علشان يبعدنا اوى عن الطريق الصح

واللى يغيظ ان فيه بنات هبله بيموتوا لما يسمعوا سيرة حد منهم

والله انا ما شوفت هبل اكتر من كده

ربنا يهدى شبابنا وبناتنا ويستعملنا ولا يستبدلنا

و يصلح لكم الحال وترجعوا للمدونه من جديد

اسفه ان كنت تغيبت عن المتابعه بسبب الامتحانات

لكن باذن الله ساتابعها باستمرار

(ان لم يتم فصل الخدمه عنى )

مدونتكم رائعه ومتميزة بالفعل

والمواضيع على قد ما هيه سهله وبسيطه وطالعه من القلب

على قد ما بيكون فيها من التذكرة والتاملات

اللى بتصحصح الناس

وانا بحب جدا الاسلوب ده فى الدعوة بصفه عامه

ربنا يجعلها فى ميزان حسناتكم

دمتم مؤمنين

محبة الرحمن 5 يوليو 2009 في 2:36 ص  

انا كنت كتبت تعليق طويل

وبعدين النور قطع

هبقى احول اكتبه فى مرة تانيه

معذرة

TIMMY !! 5 يوليو 2009 في 7:54 م  

إيه ده !!

تصور أول مرة أشوف صورة شريط تامر و عمرو الجديد !!

بس صراحة تامر شكله يفطس من الضحك ,
مين اللي شار عليه يبقى زي شارلي شابلن كده :)

و عمرو كالعادة فرحان بالكام عضلة اللي طالعين له في دراعة :)

TIMMY !! 5 يوليو 2009 في 7:56 م  

و ربنا يكون في عونك في امتحاناتك يا محمد ,

الحمد لله الذي عافانا :) و خلصنا خلاص :)

ربنا يوفقك و تنتهوا على خير إن شاء الله

saheda.com 6 يوليو 2009 في 2:25 ص  

كن معا (الحملة الدولية للافراج عن النواب المختطفين )
بسم الله الرحمن الرحيم

الى السادة اعضاء مجلس الشعب
الى الاحرار فى كل مكان
الى الاخوة المدونين
الى من اتخذ قضية فلسطين
قضية عقيدة
الى من لديه كل جهد وامل
قادر ان يساهم معنا
لقد اقيمت
الحملة الدولية للافراج عن النواب المختطفين
من هذا المنطلق ندعوا الكل
الى السعى للافراج عن النواب الفلسطنين من سجون الاحتلال الصهيونى
كلا منا يساهم بكل طاقته
ارجوا من السادة نواب مجلس الشعب
تصعيد الحملة
فى مجلس الشعب
وفى البرلمنات الاوربية
من الاحرار فى جميع انحاء العالم
توعية الشعوب
والضغط على الحكومات
من الاخوة المدونين تفعيل الموضوع فى المدونات
ومراسلة
المدونات والمنتديات
وخصوصا الغربية
لتفعيل الحملة
وهذا جزء من حديث
الاستاذ مشير المصرى
رئيس الحملة
الدولية للافراج عن النواب المختطفين

اسماء واحلام فى وجدانى 6 يوليو 2009 في 10:24 ص  

قرار ابتعادك المؤقت بشىء مش عايز تتعلق به او اتعلقت به وكنت تعمل كنترول عليه ده صعب جدا لانى حاولت لاقيتها صعبة بس اكيد فى محاولات تانية
وجودك معانا كان بيخلينى اتابع مدونات كتير علشان ارشح الافضل كتابيا وكنت باستنا يوم الخميس بفروغ الصبر علشان اقول رايى الحماس ده كله راح بعد قرائتى لهذا البوست انا باتمنا اكون فهمت غلط
اما بالنسبة لعمرو وتامر فهما بشر زينا
واللى شجعهم على كده ناس مننا

محمد سعد القويري 6 يوليو 2009 في 10:17 م  

الأخ الفاضل :: د.عرفه ::
بعد التحية

خاطرة جميلة

فعلاً ..

فرق كبير بين الخوفين ..

وبالنسبة للألبومين

فرسالتك وصلت :)

Unknown 7 يوليو 2009 في 6:17 م  

بإذن الله ده مرض وحيعدي بسرعة ومتخفش

ويبقى التواصل

د/عرفه 7 يوليو 2009 في 11:40 م  

شكرا لكل الناس اللي علقت وفرحت جدا بردودكم
ومعذرة مش هاعرف أرد على كل واحد

ويارب دائما كده متابعين المواضبع

مجرد مدونة 16 يوليو 2009 في 1:32 م  

جميل جدا بجد .. ربنا يكرمك ويوفقك فى الامتحانات ويوصلك بورسعيد بالسلامة ;)

أحلى حياة 5 أغسطس 2009 في 12:49 ص  

السلام عليكم
بجد يادكتور حضرتك ماتتصورش الموضوع دا استفزني قد ايه بشكل شخصي من كتر اللي شوفته وقريته بنفسي ع النت وخصوصا الفيس بوك من خناقات وتراشق بالألفاظ واستخدام ألفاظ بذيئة بين محبي الاتنين، تامر وعمرو :S
بجد حاجة مستفزة بشكل لا يوصف
ربنا يعفو عنا وعن المسلمين يارب

تحياتي لحضرتك وللمدونة المتميزة ما شاء الله بكل موضوعاتها
جزاك الله خيرا

manar 24 نوفمبر 2020 في 4:12 م  

هاند ميد
فك وتركيب ورق حائط دبي
فك وتركيب ورق جدران دبي
تلميع وجلي رخام وحجر وسيراميك دبي

إرسال تعليق