أنا وهو و.............


نرتاح شوية من المواضيع المثيرة للجدل بصراحة تعبت من المناقشات فى المواضيع الأخيرة دى
وبعتذر للأخوة الملتحين والأخوات المنقبات لو كانوا زعلوا منى فى الموضوع الأخير
أكيد أنا لم أقصد الهجوم أبدا ولكن كلامة من منطلق حبى ليهم وإنى بتمنى دايما إنهم يكونا قدوة حسنة لباقى الناس
وبعتذر كمان لأصحابى الأهلاوية اللى زعلوا
أكيد الأهلاوية كالعادة مش بيحبوا أى حد يتكلم عنهم
هحكى شوية معاكم شوية ذكريات قديمة
كنا فى أجازة الثانوية تقريبا
فى الصيف برضه
بس الجو كان جميل أوى بعد صلاة العشاء
قعدت مع محمود صاحبى ولعبنا دورين شطرنج حلوين فى الشقة بتاعتى _ اللى بقعد فيها على طول_
وكنت فرحان أوى إنى كسبته وطلعت فوق الشقة عندنا بعد ما خلصنا
لقيت بابا وأختى بيبصولى وبيضحكوا كده ضحكة خبيثة مكنتش فاهم حاجة وقتها
ولقيت بابا بيقولى أختك زى ما يكون كده شافت حاجة فى البلكونة
قولت هيكون فيه إيه يعنى
ودخلت زى العبيط
وأول ما دخلت على طول لقيتهم قفلوا الباب ورايا على طول وبإحكام كمان
بصيت قدامى لقيت اللى بيبصلى
بصيت حواليا لقيت جيرانا معظمهم واقفين فى البلكونات _ صيف بقى والجو فى البلكونة جميل _
بصيت وراى لقيت الباب إتقفل جامد خلاص
مفيش هروب
البحر أمامك والعدو خلفكم
ومفيش قدامى خيار لازم أواجهه
وأضرب يمين ويهرب
شمال ويهرب
شوية وينط على الجدار
طاخ ............ طاخ..............طاخ
المهم الحمد الله عرفت أموته فى الأخر



أكيد طبعا مكنش فار أمور زى ده
ده كان ما شاء الله
ربنا كان مبارك فيه

المهم
فى حاجات كتير أوى فى حياتنا لما نيجى نتخيلها نقول إستحالة نعرف نعملها
لا لا مش أنا اللى أعرف أعمل ده
لكن لما الموضوع يكون واقعمفاجىء ومفيش هروب
وقتها مدى ثباتك هو اللى بيفرق معاك
وممكن تلاقى نفسك عارف تعمله وكويس جدا كمان
على فكرة دى طريقة بيعالجوا بيها مرضى الفوبيا وهو إنهم يواجهوهم مرة واحدة
أمام الأمر الواقع واللى بيخافوا منه
ومع شوية دعم كتير منهم بينجح وبيتخلص من مرضه للنهاية
على فكرة
بعد حوالى ست سنين من القصة دى
إتكرر الموضوع
ولكن وقتها
قالولى فى فأر فى البلكونة ومستنيك علشان تموته
وطبعا أنا بقيت خبرة ودخلت المرة دى وانا عارف إنى هقدر أموته إن شاء الله ومفيش مشاكل خالص
كل واحد فينا عنده إمكانيات مختفية محتاجة الظروف بس علشان تظهر ويقدر يكتشفها


كلمة أخيرة
سعيد بنجاح فكرة الترشيحات اللى موجودة فى المدونة التانية
واللى أكيد ناجحة بيكم وبمشاركاتكم الإيجابية
مستنى ترشيحاتكم النهاردة وبكرة إن شاء الله
سلام

63 رأيك يهمنا:

ha198000 3 يونيو 2009 في 11:13 م  

اله يسمحك دعست الفار

د. ياسر عمر عبد الفتاح 4 يونيو 2009 في 3:51 ص  

هههههههههههههههههههه
بتخاف من الفيران
هههههههههههههههههههه
تبقي تعالي عندنا الكلية وغنت تاخد عليهم خالص

رحلتنا في الحياة 4 يونيو 2009 في 5:26 ص  

فااااااااار انا بخاف من الفيران انا مش بخاف فى الدنيا دى غير من الفار وتقولى يعالجوا مريض الفوبيا انه يواجه مرضهم يااااسلاااااااااام
طيب ما هما هيجيبوا فار امور زى الفار ده وطبعا مش دى الفيران اللى البيوت
الحمد لله الفيران متقعدش تهوب ناحية بيتنا بس كل مرة اكون فيها عند خالتى اصادف فار :(

المعتصم 4 يونيو 2009 في 10:57 ص  

ههههههههههههههههههههههههههههه
كنت بتخاف من الفيران ياعرفه
هههههههههههههههههههههههههههههههههههههههههههههه
ياراجل حرام عليك
ده حتة بتاعه قد كده
دوس عليه او اخبطه باى حاجه وخلاص
وهو هيموت لوحده
عارف انا مرة راكب ميكروباص فى القاهرة
وانا قاعد لقيت حاجه ماشيه على رجلى
ببص كويس لقيته فار
ضحكت
الاخ اللى قاعد جنب منى بصلى كده واستغرب انا بضحك على ايه وبص لتحت لما لقينى امال ارفع وانزل فى رجلى
هههههههههههههههههههه
وبعيد عنك جاله ذعر
انا موت الفار وكنت قاعد جنب الباب
ففتحت الباب ورميته
والراجل يقولى انت قتلته ازاى
هههههههههههههههههههههههههههههههههههههههههههههه
مش عارف انا ايه ده ؟
فيه حد يخاف من الفيران ؟؟؟
.................
الاهلويه مش بيزعلوا لما حد يجيب سيرتهم
لو عندك نقد موضوعى قوله ومافيش اى زعل
انما تقولى ان الاهلويه متعصبين وكل الناس بتكرههم علشان كده
ده مش كلام
طب ماالزمالكويه متعصبين والاسماعيلاويه متعصبين وزياده عن اللزوم
خليك حقانى يامحمد
ســـــــــــــــلام

تأثير الفراشة 4 يونيو 2009 في 11:24 ص  

جميلة جدااا فكرة البوست ده يا دكتور

و فعلا الانسان ممكن يكون مش مكتشف إمكانياته الحقيقة غير لما يتحط فى الموقف و يواجهه

و طريقة علاج الفوبيا اللى حضرتك ذكرتها ، هى فعلا إحدى طرق العلاج للحالات اللى مش قوية قوى

كلام حضرتك عن الفار ذكرنى بسكاشن الكلية ، كانت أوضة الفيران جنب المكتبة !!!!!! مش عارفة ليه؟؟

بوست مبدع ما شاء الله يا دكتور

بالتوفيق دائما

ايومي 4 يونيو 2009 في 12:18 م  

عن نفسي دايما كنت بعالج نفسي العلاج ده من وانا صغيره من قبل حتى سن المدرسه كنت بحط نفسي في المواقف اللي بخاف منها واعد اقنع نفسي انها مش بتستدعي الخوف ده,
وفعلا الحمد لله دايما كان علاج ناجح,
لكن بصراحه عمري ماقتلت الفار مش علشان الخوف علشان القرف.

وردة 4 يونيو 2009 في 2:19 م  

موت فار يادكتور
ياقلبك
هههههههههههههههه
بصراحة انا مش بخاف منهم وبس انا بخاف من اي شئ له روح سواء فار بقي قطة عصفورة متفرقش وكمان الفيران ممكن تزود عليها القرف شكله ايه اخر جمال
بس انت شجاع والله
ربنا يكرمك
سلام

احساس طفلة محبة للرومانسية بس واقعية 4 يونيو 2009 في 3:28 م  

فار صورصار
نملة عنكبوت

اى حشرة او كائن حى من النوعية دى
استحالة اشوفهم وافضل فى مكانى دا انا انط من البلكونة لالالالا استحالة دى فوبيا
بس استحالة تتعالج ولو بمليون صدمة

بس ممكن حاجات تانى بنخاف منها نقدر نواجها زى مواقف او اشخاص معينة بس كاكئنات حية ذوات اربع او اثنين او بدون خالص لا ملهومش حل نهائيا
:)

تقبل مرورى

Unknown 4 يونيو 2009 في 5:58 م  

ليه بس فكرتنى؟
لما شرحت الصرصار:(
وكمان شرحت الارنب :(
فى (اعدادى طب)زمااان
ربنا رحمكم منها ....
ياباختــــــــــكم:(

kiko 4 يونيو 2009 في 6:09 م  

السلام عهليكم ورحمة الله وبركاتة
إزيك يادكتر أخبارك إية
واحشنى بقالى كتير مشفتكش
موضوع الفيران دة موضوع خطير وخطير جدا كمان خصوصاً لما يكون صغير وسريع ويستخبى تحت سرير ولا فوق الدولاب ولا فى أى حتة متعرفش تشوفو فيها وكمان أصعب حاجة لما تكون نايم وتسمع خروشة بقى تحت السرير وتكتشف إن فى فار الساعة تلاتة باليل وإنت مبتعرفش تنام طبعا وجانبك فار على السرير ومضطر تقاتل هذا الفار عشان تعرف تنام أو تضطر تنام فى الصالون او بقة تفرش بقة قدام البيت [وأنا متعود طبعا على كدة من أيام الجيش لما كنت بروح الخدمة وانام على الرمل وسط الكلاب والتعالب والفيران .....ألخ . وما خفى كان أعظم]
المهم موضوع جميل يادوك ونتمنى المزيد
ومع السلامة

جارة القمر 5 يونيو 2009 في 1:12 ص  

قد نقلق من أشياء كثيرة في حياتنا
ولكن بالمواجهة ينتهي القلق والخوف

اعطيتنا مثالا بسيط ممكن يتكرر مع اي حد فينا

لكن كان وراه هدف وصلنا منك

رائع جدا

شكرا

جارة القمر 5 يونيو 2009 في 1:22 ص  

قد نقلق من أشياء كثيرة في حياتنا
ولكن بالمواجهة ينتهي القلق والخوف

اعطيتنا مثالا بسيط ممكن يتكرر مع اي حد فينا

لكن كان وراه هدف وصلنا منك

رائع جدا

شكرا

نور الاسلام 5 يونيو 2009 في 2:20 ص  

السلام عليكم

(:
(:
(:أضحك الله سنك ..

واتفق معك كثيرا ان احنا ممكن نتخيل حاجات ونقول لا يمكن قدر اعملها مستحيل ..لكن لما يبقى مافيش قدامك مفر خلاص غير المواجهه...وده والله حصل معايا فى مواقف كتير وخصوصا قبل ما يبقى معايا جنى وسما كنت اقول معقول انا هقدر أشيل مسئوليه تربيه والكلام ده (دى حاجه كبيره عليا جدا) .وكنت مرعوبه جدا طول فترة الحمل واجيب كتب وأقرأ لعلى اهدأ من نفسى شويه ...
ولما أهدأ الا لما جت جنى وتمت مواجهة الامر ...واكتشفت انه مش بالصعوبه اللى انا كنت متخيلاها ..واكتشفت فى نفسى حاجات لم اكن لإكتشفها الا بها ..

جزاكم الله خيرا كثيرا

لاسع افندى 5 يونيو 2009 في 4:53 ص  

شجاعة المضطر


تحياتى

تامر علي 5 يونيو 2009 في 5:23 ص  

الفار ده مخلوق ذكي جداً ومش بيموت بسهولة :))

لما بضطر أواجهه نسبة الادرينالين بترتفع لأقصى درجه :)

ربنا يوقفك وتموت كل فئران المنطقة :)

تحياتي

عمر 5 يونيو 2009 في 7:20 م  

بسم الله الرحمن الرحيم

المرة دي - مع إنه من الذكريات - بس موضوع جميل

والأجمل إنك خرجت منه بعبرة جميلة وهي
إن لو الواحد حط في دماغه حاجه أو وضع أمام الأمر الواقع فيستغلب على الحاجز النفسي الذي وضعه هو لنفسه

يعني مثلا
أنا مستحيل أجيب امتياز أو مستحيل أحفظ القرآن لو وضعت في ذهنك إنك هتقدر تجيب امتياز وهتقدر تحفظ القرآن إن شاء الله ربنا هيعينك وهيسر لك أمرك

وحتى لو ماوصلتلوش هتوصل قريب منه

تحياتي لك ولزوارك

The illusionist 5 يونيو 2009 في 11:37 م  

مساء الخير
قصتك جامده جدا والله
وبجد انا مكنتش هعلق خالص لولا ان القصه حصلت معايا اول امبارح
وانا حاليا لسه مخلص ثانويه وبحب الشطرنج جدا
زى ظروفك يعنى
لكن يومها بقى مش فى البلكونه
كان فى الاوضه
وقالولى خش اوضتك عشان نقولك كلام مهم
ودخلت
وعملوها معايا
كان يوم ملون
بس اكتر شئئ سئ انك تموت الفار
بيوسخ المنطقه اللى بيموت فيها
خصوصا لو اللى بيموته واحد غشيم
زى حالاتى
ذكريات زى الفل والله
تقبل التعديه البسيطه دى

د/عرفه 6 يونيو 2009 في 11:58 ص  

هبة اهلا بيك
منورة فى اول زيارة عندنا

صعبان عليكِ الفار
ههههههههههههههه
ماشى

د/عرفه 6 يونيو 2009 في 12:01 م  

د/ ياسر
اهلا بيك دكترة

لا يا عم مش زى بتاع الكلية خالص
دى بتاع الكلية دى زى العسل

وبعدين خلاص بخاف مين
ده انا مموت فارين لغاية دلوقتى
ههههههههههههه

سلام

د/عرفه 6 يونيو 2009 في 12:03 م  

أيوسة
اهلا بيك

انتى بتخافى
لا لا لا
لازم تتعودى
المهم فى طريقة تانية بيعالجوا بيها الفوبيا وهى انهم يتعرضوا للشىء بالتدريج

وربنا يبعد عنك الفيران
ههههههههههه

د/عرفه 6 يونيو 2009 في 12:05 م  

المعتصم
اهلا بيك
يا عم انا اقدر اهوب ناحية الاهلى
انتوا الاغلبية يا عم
انتوا الحزب الوطنى



لا بس انت طلعت وحش
موت الفار فى اليكروباص كمان
هههههههههههه
لا
بطل

شكرا حبيبى

د/عرفه 6 يونيو 2009 في 12:08 م  

د/ نهى
اهلا بحضرتك

وما شاء الله انتى اللى مواضيعك جميلة
اكيد طبعا مكنش زى فيران الكلية
هههههههههههه

مرضتش اقرفكم طبعا

شكرا للاطراء دكتورة
سلام

د/عرفه 6 يونيو 2009 في 12:12 م  

أيومى
اهلا بيك
فعلا طريقة فعالة جدا
انا برضه بتقرف علشان كده معروف عندنا انى ممكن اموت اى حاجة
مش انا اللى بشيل جثتها
هههههههههههههه
سلام

د/عرفه 6 يونيو 2009 في 12:14 م  

وردة اهلا بيك

لا
حاسبى
مش الفار مقياس شجاعتى
مش هتقوى على الفار بس يعنى
لا انا الحمد الله
تحطينى فى اى حرب تلاقينى اول واحد هربان
ههههههههههههههههه
بهزر طبعا

سلام

محمد التميمى 6 يونيو 2009 في 12:18 م  

صباح الخير يادكتور
ساعات الواحد بيبقى خايف من حاجة اكتر من اللازم ومكبرها قوى
انا كنت بخاف من الكلاب ومرة كنت راجع بالليل ولاقيت نفسى فجاة ف وسك 5 كلاب
لسههجرى يدوب رفعت رجليا الكلاب هما اللى هربوا
فكرونى هضربهم
خوف اللى بتخاف منه وانت متخافش

د/على خميس 6 يونيو 2009 في 3:28 م  

السلام عليكم و رحمة الله و بركاته
أخى الكريم د / عرفة
فعلا سعدت بزيارتى هذه لمدونتك الجميلة

أول حاجة أنا ملتحى فذهبت على طول للموضوع السابق و ملقتش حاجة تزعل خالص ...رأيك ( تقريبا ) نفس رأيى
و أنا مش أهلوى ففرحت بكلامك عن الأهلى علشان أنا لو فيه فى مصر 1000 نادى فترتيب الأهلى عندى فى المحبة هيكون 1001
مع غنى مش زملكاوى و لا اسمعيلاوى بس بصراحة بحس إن الأهلى عامل فتوة و بيفكرنى بالحزب الوطنى يعنى عافية ذوق هنكسب...

نيجى بقى لموضوع الفار ..
عجبنى جدا تناولك لموضوع مسلى قد يمر على الكثيرين مرور الكرام بهذا العمق و التحليل ..
فعلا لازم نكون عندنا ثقة إننا نقدر ..

بارك الله فيك أخى
تقبل تحياتى

د.ميريهان 6 يونيو 2009 في 5:00 م  

فكرة معالجة الفوبيا بالموجهة جيدة...ولكنها لم تثبت فعاليتها حتى الآن نظرا لحداثتها..
ما أعجبني أكثر دكتور..هو خروجك من موقف كهذا بتحليل رائع مثل الذي ذكرت..وهذا مايفترض ان نكون عليه الجميع...يجب ان نستفيد من المواقف ولو بملاحظة صغيرة او تجربة دقيقة ومن الخطأ او العيب ان تمر المواقف هكذا دون اي افادة..حقيقة هذهضمن مشاكل اعاني منها في هذا الجيل...خواء العقول..

أسعدك الله دكتور

د/عرفه 6 يونيو 2009 في 9:25 م  

إحساس طفلة محبة للرومانسية بس واقيعة

أهلا اهلا
منورانا

انتِ بتخافى
يبقى ممكن تجربى طرق تانية خلاف الصدمة دى
زى ممكن مثلا تتعرضى للحاجات دى بالتدريج
صور وبعد بلاستيك وبعد كده على الطبيعة
يعنى
دى طرق تانية

منتظرين رايك على طول معانا

د/عرفه 6 يونيو 2009 في 9:28 م  

دكتورة نور

أهلا أهلا

لا والله
انا فعلا شرحت ضفادع وطلعت قلبها كمان
وكمان مسكنا فيران بس بيضا طبعا مش زى دى

بس فعلا الموقف اللى فات ده كان صعب فعلا


نورتينا يا دكترة

د/عرفه 6 يونيو 2009 في 9:30 م  

اهلا اهلا
كيمو
ازيك حبيبى
ياريت تنورنا كده على طول كيمو

بس يا عم الحمد الله مفيش حاجة دخلت البيت

والحمد الله ربنا تاب عليك من الجيش وسنينه

تحياتى

د/عرفه 6 يونيو 2009 في 9:34 م  

جارة القمر

أهلا أهلا

شكرا على إطرائك الجميل ده

منتظرينك دايما

تحياتى

د/عرفه 6 يونيو 2009 في 9:38 م  

نور الإسلام

اهلا بحضرتك

اكيد طبعا كلامك مظبوط
ده فى امثلة كتير اوى

مثلا اول روند تلاقى نفس داخل المشرحة كده

هتكون مضطر تحط راسك جوة الجثة علشان تفهم وياريت نفهم كمان
ههههههههههههه
ولما نلاقى الروند كله ماسك الضفدعة ويقطع فيها
هتكون مضطر تهرس الضفدعة انت كمان وتطلع احشائها

فى امثلة فى حياتنا كتيرة اوى
فعلا

تحياتى


وشكرا على ترشيحاتك واهتمامك
ويارب دايما مشاركانا

د/عرفه 6 يونيو 2009 في 9:40 م  

لاسع افندى

فعلا كده
بس بتكون بتتعود عليها بعد كده وتكون شىء عادى



اهلا بزيارتك الاولى ويارب دايما

تحياتى

د/عرفه 6 يونيو 2009 في 9:41 م  

تامر على

اهلا بيك يا تامر منورنا والله

بس ايه اموت كل فيران المنطقة دى

هو انا هشتغل فى مصلحة المجارى ولا فى هيئة النظافة
هههههههههههههههههه


منورنا دايما
تسلم

د/عرفه 6 يونيو 2009 في 9:43 م  

عمر
اهلا بيك عمور

ياااااه
اخيرا نورتنا
عقبال ما تنورنا هناك ان شاء الله
مكنتش متوقع ابدا ان الموضوع يعجبك


فعلا مبسوط انه عجبك
وياريت متكونش لسه زعلان من الموضوع اللى فات
ههههههههههههه

سلام

د/عرفه 6 يونيو 2009 في 9:47 م  

The Illusionist


اهلا اهلا

فعلا فرحان بتعليقك
ويارب كل المواضيع كده تعجبك وتعلق معانا على طول


انت عملوها معاك برضه

لا بس انا مكملتش
مهو تعبنى فعلا ودوخنى
ولبهدلت الدنيا انا كمان وكسرت القلة اللى كانت موجودة ساعتها
وضربت ديله وجاب دم كمان
وكانت شغلانة
حاجة قرف


شكرا على تعليقك
تحياتى

Ramy Seada 6 يونيو 2009 في 11:42 م  

تعرف يا عرفة مع انى ليا كلام مش هيعجبك فى المواضيع اللى قبل كده

بس عشان العيش والملح اللى بينا امتنعت عن الرد

البوست دا أسلوبك فعلا عجبنى
------------
إتكرر الموضوع
ولكن وقتها
قالولى فى فأر فى البلكونة ومستنيك علشان تموته
------------
تقبل تحياتى

هدى التوابتي 7 يونيو 2009 في 1:47 ص  

مع اني والله بخاف من الفيران ولو عملوا فيا العملة السودة دي وحبسوني مع فار ...هختار أني أنط من الشباك أحسن.. بس الهدف من الكلام جميل جدا وربنا يجزيك خير ويجعله في ميزان حسناتك... وفعلا والله الواحد بيطلع أمكانيات ومواهب في الأوقات الحرجة مبيكونش واخد باله منها...

انا مش معاهم 7 يونيو 2009 في 12:39 م  

ياعم انا بخاف من الفيران

أنا حر 7 يونيو 2009 في 3:01 م  

عايز ابلغك بمدى انبهاري بيك بجد والله مش بتريق على قدرتك على مواجهة الفار لاني بخاف منه مرة وبقرف منه مليون مرة
انا لو اتحطيت في الموقف ده اكيد رد فعلي كان هيبقى محاولة النزول من البلكونة باي شكل بغض النظر عن الاصابات اللي كانت ممكن تحصل
:)
تحياتي

جارة القمر 7 يونيو 2009 في 11:12 م  

أتمنى أن تكون بخير شد حالك بدراستك

ربنا معك يارب


اشتقنا لجديدك


احترامي

orangaea 8 يونيو 2009 في 7:32 ص  

هههههههههههههههه
انا بخاف من الفار ده جدا ونفسى افهم ليه بنخاف منه

د/عرفه 8 يونيو 2009 في 7:40 ص  

محمد التميمى

أهلا بيك محمد

فعلا معاك حق طبعا

ياريت تنورنا على طول

تحياتى

د/عرفه 8 يونيو 2009 في 7:42 ص  

دكتور على

ازيك دكترة

متتصورش انا فرحت برايك وتعليقك قد ايه

فعلا فرحتنى خصوصا ان الناس احبطتنى البوست اللى فات

وزى ما قولتلك قبل كده
يبدو ان احنا متفقين الى حد كبير

تحياتى ليك دكترة

د/عرفه 8 يونيو 2009 في 7:44 ص  

د/ ميريهان

شكرا لإتمامك
بجد زياراتك دايما بتسعدنى

وجزاكم الله خيرا على الإطراء الجميل ده

تحياتى

د/عرفه 8 يونيو 2009 في 7:46 ص  

رامى سعدة

ازيك دكترة

كنا نتمنى نعرف ملاحظاتك واعتراضاتك على المواضيع اللى فاتت

المهم جميل ان الموضوع ده عجبك ومنتظرين زياراتك دايما

تحياتى

د/عرفه 8 يونيو 2009 في 7:49 ص  

dody

أهلا اهلا

بس تنطى ايه بس ده المحلاوية دايما مش بيخافوا ابدا ودايما بيعرفوا يواجهوا
هههههههههههههه

شكرا على اهتمامك
ومنتظرينك دايما
تحياتى

Unknown 8 يونيو 2009 في 7:49 ص  

السلام عليكم ورحمة الله وبركاتة
هههههههههه
دا انا دماغى راحت لبعيد
افتكرت ان نظرة باباك واختك كان علشان شافوا بنت الجيران بتتفرج على دور الشطرنج او بنات
ممكن اية المشكلة
هههههههههههههههههههههه
طلع فى الاخر فار
مش البنت كانت ارحم
هههههههههه
دمت بالف خير وشجاعة

د/عرفه 8 يونيو 2009 في 7:51 ص  

انا مش معاهم

اهلا اهلا

منورنا بزيارتك لينا
خصوصا وانها الاولى


اكيد لما تواجه الموقف ان شاء الله مش هتخاف وينتهى
موضوضع الخوف ده خالص

تحياتى

د/عرفه 8 يونيو 2009 في 7:53 ص  

انا حر

مش اوى كده يعنى

ده انا مش بطل زى ما انت متصور

اكيد لو كنت مكانى كنت هتعمل زيى واستحالة تعرف تنط

احنا فى الدور التالت
هههههههههههههه


سعداء بزياترتك ومنورنا

د/عرفه 8 يونيو 2009 في 7:55 ص  

جارة القمر
اهلا بزيارتك التانية
انا الحمد الله

بالنسبة لامتحاناتى انا لسه بدرى اوى

مواعيدنا غير الجميع

احنا كده فى نص السنة تقريبا

وان شاء الله الموضوع الجديد كمان يومين كده

تحياتى
وشكرا للاهتمام

د/عرفه 8 يونيو 2009 في 7:56 ص  

شمس

اهلا اهلا

بتخافِ ليه بس

اظن انه عادى واجهيهم بس وانتِ مش هتخافِ ابدا


تحياتى

د/عرفه 8 يونيو 2009 في 7:57 ص  

حتى تشرق الشمس

اهلا بحضرتك


بنت الجيران
يا سلاااااااااام

ياريت والله

بس للاسف طلع فار فى الاخر

شكرا لزيارتك ويارب دايما
تحياتى

د.توكل مسعود 8 يونيو 2009 في 11:23 م  

السلام عليكم ورحمة الله.. وبعد

أقول لك يادكتور أنا قتلت إيه ؟؟؟؟

فيران ماتعدش..... قط كان بياكل الفراخ الصغيرة اللى كانت بتربيهم... قطين والله.... كم حنش على الماشى.... وأخيرا عقرب فى صحراء نجد بالسعودية

يالله حصلنى بقى يا....


طبعا مايصحش نكلم فى البراص والصراصير ... مش مستوانا


أضحك الله سنك

النسر المهاجر 9 يونيو 2009 في 2:10 م  

للاسف يا دكتور امواجهة مع بنى البشر أصعب من المواجهة مع الفارولكن لا بد من المواجهة

د/عرفه 9 يونيو 2009 في 5:47 م  

أهلا بيك دكتور توكل

بتنورنا دايما وسعداء بزيارتك جدا

ما شاء الله
فيران_ قطط _ حنش

ما شاء الله حضرتك بطل كبير

احنا لسه بقى على قدنا

تسلم دكتور

د/عرفه 9 يونيو 2009 في 5:49 م  

أهلا بيك
أخى الكريم

فعلا مواجهة البشر صعبة أوى
وخصوصا لو كان سلطة ومتحكم فيك

إسألنى إمتحانات الشفوى ما يعلم بيها ألا ربنا

وبيكون لازم ندخل مفيش مفر

اعشق فى الليل ضوء القمر 10 يونيو 2009 في 12:09 ص  

هههههههه والله جميل البوست بجد
بس الفار ماله ومالك شكلك كده عامل معاه عقد موت
ههههههههه
بس كلامك صح و الله يا ريت نعمل بيه

د.آيه 10 يونيو 2009 في 11:47 ص  

ههههههههههه
فكرتني يا محمد ..
و يا سلام بقي على بنات الجيران و هم بيشجعوا البطل الهيرو الفظيع قااهر الفئران..
و بعدين و انت بتقول بيعالجوا مرضي الفوبيا فكرتنى بمصطفي قمر في الفيلم ههههههههه أوعى تعمل زيه هتودي الناس في دهيه..
عايزينك بقي تهر أعداء الإسلام مش حتة فار .. و ابقي خدنى معاك ..

متنساش تبقي تحكيلهم في موضوع بعد كده عن الخفافيش اللي فوق اللمبه .. ههههههههه

سلاااااااااااااام

عطش الصبار 15 يونيو 2009 في 7:40 م  

دكتور عرفه
موضوع الفار ده فكرنى بأبنتى لما دخلت كليه الطب البيطرى فى يوم لقيتها قافله حجرتها عليها ولما فتحت لقيتها هات يا عياط ف وعرفت ان عندها بعد يومين سكشن تشريح للضفدعه وفضلت اليومين تبكى ازاى هتحط الدبوس فى راس الضفدعه ولم تستطيع فعل ذالك
ماعرفش نجحت ازاى
ودلوقت لما راحت امريكا وحبت تعمل معادله
من شروط المعادله تقريبا او ده اللى فهمته
انها لازم تعمل جراحه لحيوان عشان تدخل المعادله
المهم انها لحد دلوقتى مش قادره تواجه خوفها
ولو الانسان قدر يواجه مشاكله او خوفه حاجات كتير هتتحل
مبروك انتصارك على خوفك
شكرا على زيارتك مدونتى
تقبل تحياتى

د/عرفه 16 يونيو 2009 في 12:19 ص  

أعشق فى الليل ضوء القمر

أهلا بحضرتك

شكرا على الاطراء

خلاص بقى انا بقيت متخصص
هههههههههه
هيعملوا ايه من غيرى


شكرا على الزيارة

د/عرفه 16 يونيو 2009 في 12:21 ص  

أية

موتينى من الضحك والله

طبعا اخوكى طول عمره بطل هيرو
هههههههههههههه


الخفافيش
لا دى كان يوم سهل مش زى الفار
هههههههههههه


ربنا يوفقك فى امتحاناتك
سلام

د/عرفه 16 يونيو 2009 في 12:26 ص  

عطش الصبار

اهلا بحضرتك

اه احنا كمان كان عندنا ضفادع والله كان موقف صعب برضه

فضلت روندين اتفرج
الروند التالت قولت لازم اشتغل بايدى

والحمد الله انى اشتغلت بايدى
لان تشريح الضفدع ده جالى فى الامتحان اخر السنة
لازم الواحد يواجه خوفه علشان يعرف يعديه


شكرا على الزيارة والتعليق
اهلا

إرسال تعليق