اذا سكت الزمان


تخيلوا معايا فصل ابتدائى
أكيد بيكون فيه طالب أو إتنين شايفين نفسهم شوية
ولفرض سيطرته على الفصل
شاف طالب كده ضعفان
وإتعرض له
الطالب الضعفان ده هيتصرف إزاى
1-ممكن يقف له ويمنع الإعتداء عليه ويوقفه عند حده
اه ممكن ينضرب بس أكيد الطالب اللى شايف نفسه ده هينضرب هو كمان
وأظن بعد كده مفيش حد هيتعرضله بعد كده لأنه رافض لأى عدوان عليه
2- ممكن يروح يقول للمدرس فى الفصل
ووقتها
المدرس ممكن يقوله معلش يا ابنى متزعلش
ووقتها الطالب ده هيكون الفريسة السهلة لأى حد عايز يرسم نفسه فى الفصل
3- ممكن المدرس فعلا يضرب المعتدين
بس وقتها هيكون الطالب ده مكروه من بقية الفصل
وتبقى عليه وصمة الضعف وإنه مش عارف ياخد حقه لوحده
وهيحاول تانى أكيد فى أقرب فرصة يبعد فيها المدرس عنه
ده القانون الفطرى عند العيال الصغيرة

سيبكوا بقى من الكلام اللى مش مفهوم ده

من خلال تأمل للتصرفات المصرية خلال الفترة الأخيرة وجدت العجب
وخصوصا خلال حديث السيد الرئيس فى عيد العمال السابق
وجدته يتكلم بعنف شديد وبتهكم واضح على المقاومة باعتبارها تصرفات عنترية وأفعال غير محسوبة
وماذا فعل سيادته بتصرفاته الحكيمة على مدار .....عام؟؟؟
هل أخذنا حقوقنا....؟؟؟؟
هل نملك قرارتنا....؟؟؟
تأملت فى التاريخ كده
وجدت أن التاريخ دائما ما يمجد أبطال المقاومة
أصحاب المبادىء
فى مصر مثلا دائما ما نفخر بأحمد عرابى
رغم إن ثورته بأت بالفشل
ولكن لمجرد محاولته المقاومة فتلك المحاولة ربما تكون شرارة البداية
نال التقدير والإحترام والبقاء فى ذاكرة التاريخ

وبالمثل سعد زغلول ومصطفى كامل
ها ذكر التاريخ مثلا معرفش مين باشا اللى وصل للسلطة ........... ابدا
مثل هؤلاء الجبناء دائما ما تكون ذكراهم فى مزبلة التاريخ
الشاعر بيقول
من يهن يسهل الهوان عليه مالجرح بميت إيلام
وسبحان الله تصرفات مصر لم تكن مقتصرة على مجرد تصريحات بل تخطط لحملات إعلامية
تكرس فيها ترسانتها الإعلامية فى التشويش على الحقائق
مثلا أثناء الحرب على غزة
نجحوا فى إنهم يشغلوا الناس عندنا بمقتل الجندى المصرى على الحدود عندنا
ونسى الجميع ما يحدث من مجازر فى غزة فالكل مشغول فى
كيفية مقتل الجندى؟؟؟
وما الخبايا خلف ذلك ؟؟؟
وهل حماس تريد إحتلال سيناء؟؟
ولابد من منع هذا الإحتلال الحمساوى
وتشيع جنازته فى مشهد مهيب تناقلته وسائل الإعلام عندنا طوال يومين ويمكن ثلاثة
ولم تكن تلك المرة الوحيدة
وبالمثل
قريبا عندما أمسكوا بمجموعة من حزب الله عندنا فى مصر
أقاموا الدنيا ولم يقعدوها رغم إن هدفهم هو توصيل السلاح لرجال المقاومة فى فلسطين
وهذه تهمة رهيبة تستحق الشنق
وتناسى الجميع أن نصر الله هو الوحيد الذى تصدى لإسرائيل وحده فى وقت تخلى الجميع عنه وأكتفوا بمصمصة الشفاه
وإسمعوا الأغرب من هذا
أثناء تفجير ميناء إيلات _ الفيلم المشهور الطريق إلى إيلات _ وقتها عبر رجال المقاومة عندنا حدود الأردن بشكل غير شرعى
وساعدهم فى ذلك رجال المقاومة فى الأردن
وهذه هى نفس التهمة الموجهة لخلية حزب الله
والأغرب كمان
سمعت إن سيادة الرئيس نفسه تم توقيفه فى المغرب أثناء طيرانه بهدف مساندة المقاومة فى الجزائر
هذا الكلام سمعته فعلا خلال مقالات ابراهيم عيسى وفهمى هويدى

انا لا أقصد الدفاع عن أشخاص معينة ولا أدافع عن نصرالله ولكنى أرصد واقع

وهو إن تلك الحملات بالفعل نجحت فى التقليل من شعبية حماس وشعبية نصر الله فى مصر
حملات موجهة
تتناسى واقع وتهاجم بشكل شرسه لنيل رضا النظام
المتأمل لحال مصر يجد أن خلافتها لم تقتصر على هؤلاء
بل أمتدت لتشمل إيران وزعيمها أحمدى نجاد وهو الزعيم الوحيد الذى تخشاه إسرائيل وأمريكا
وهو الزعيم الوحيد الذى لديه المقدرة لأن يقول ما يريد ولمن يريد دون خوف
مش كده وبس
لا لا لا
ده خلاف مصر وصل لغاية قطر لا من أجل قطر
بل من أجل قناة الجزيرة
أكيد لأن الجزيرة ترفع شعار
نعم للمقاومة
أه انا عارف إن الجزيرة بتهاجم مصر كتير
بس مش كده يعنى

انا عارف إن كلامى ده ممكن يزعل ناس كتير منى
بس بجد والله ده
من حبى لمصر
واللى بحب دايما إن راسها تكون مرفوعة
وإنها تقدر تقول للغولة عينك حمرا
ومينفش ابدا نكون مسّلمين الراية على طول كده
مش مشكلة إن الفرد يموت
بس يموت مرفوع الراس مش كده
الحكمة بتقول
من لم يمت بالسيف مات بغيره
الكلام ده بمناسبة الذكرى ال61 على النكبة
ياترى هنعد نبكى حالنا كده لغاية إمتى
يارب أشوف اليوم واللى نحتفل بيه بذكرى الإنتصار مش ذكرى النكبة




معلش طولت عليكم
بس ياريت تسمعوا النشيد ده
بيلخص الموضوع


اذا سكت الزمان عن المظالم
فقاوم ثم قاوم ثم قاوم

وإن هدموا الديار على ذويها
فبالأنقاض قاوم والجماجم
وإن سفكوا الدماء على ثراها
فلون دماك قد نالوا الهزائم
وإن سجنوك لاتجذع لقيد
فإن السجن لى نيشان المقاوم
وإن حوصرت كى تعطى إعترافا
فلا تركن لطاغية وظالم
وإن عزّ النصير فلا تبالى
كفاك الله يارجل العزائم

إذا سكت الزمان عن المظالم
فقاوم ثم قاوم ثم قاوم

وإذا خرس السلاح وما تكلم
فسطر من قذائفك الملاحم
وإن تركوك فى وجه المنايا
فمت فى العز لكن لا تساوم
وإن سكتت حكومات الدنايا
كفاك الله يا رجل العزائم

إذا سكت الزمان عن المظالم
فقاوم ثم قاوم ثم قاوم


إن أجتثوك فوق الأرض حينا
ففى الأنفاق قد عشت العوالم
وإن زرعوا الجدار على رباك
فقلها إن زحف العز قادم
وإن حشدوا عليك بكل ساح
كفاك الله يا رجل العزائم

إذا سكت الزمان عن المظالم
فقاوم ثم قاوم ثم قاوم



62 رأيك يهمنا:

رحلتنا في الحياة 19 مايو 2009 في 1:16 ص  

كلامك مش بيزعل حد طبعا للاسف قدروا يوصلوا فكرة للشعب المصرى ان حزب الله وحماس واى عناصر للمقاومة فى اى بلد تانى دول مش عايزين غير الخراب للمصر ليه نوصل لحد ونعاملهم على انهم اعداء
انت قولتها كلمة التاريخ بيسجل فى صفحاته صور البطولات حتى لو لو فشلوا بس يكفى شرف المحاولة
الهجمة دلوقتى بقيت على حماس وحزب الله احنا ممكن نختلف معاهم فى امور فرعية بس الجوهر لا الجهاد فى سبيل الله مينفعش نختلف فيه

محمد عبد الباسط 19 مايو 2009 في 2:32 ص  

ابكانى هذا النشيد الرائع وجزيتم خيرا على موضوعكم الهادف والصحيح مئة بالمئة

حلم كبير

د. ياسر عمر عبد الفتاح 19 مايو 2009 في 2:36 ص  

متفق معاك في حاجات كثير
مصر بتخسر كثير أوي علي المستوي الدبلوماسي
ودورها في المنطقة بقي بيتراجع كل يوم

ايومي 19 مايو 2009 في 11:22 ص  

ماشاء الله,
كلام منسق ومتكامل جدا,
بس للاسف اغلب الشعب مش فاهم الحقائق دي,
واللي فاهم مش قادر يعمل حاجه بفهمه الا انه يفهم اللي مش فاهمين,
لكن نسأل الله أن يغير الحال,
حالنا اولا وعندما سيتغير حالنا سيتغير الوضع بالتأكيد ووقتها ستكون الغلبة لنا بإذن الله,
جزاك الله خيرا.

غير معرف 19 مايو 2009 في 1:18 م  

أخى الفاضل: د/ عـــــرفه
السلام عليكم ورحمة الله وبركاته
النظم العربية الحاكمة باعت القضية واشترت رضا الأسياد فى البيت الأبيض .
ولذلك انتفضت المقاومة الشعبية لتكون البديل الحقيقى للمقاومة الرسمية المتخاذلة وتجلت قوة وصمود هذه المقاومة فى لبنان حزب الله ، وفى فلسطين حماس
وأظهرت المقاومة الحجم الحقيقى للعدو الصهيونى الذى صوره لنا الرسميون ديناصوراً

فانكشفت عورة هذه النظم الحاكمة ومدى هشاشتها وهوانها فكان لزاماً شن الحرب عليها حفظاً لماء الوجه

أخى آسف على الإطالة
ولكن كلماتك حركت كل المشاعر المكبوتة بداخلى
فبارك الله فيك وأعزك
أخوك
محمد

wesoooooooooo 19 مايو 2009 في 2:13 م  

أختيار موفق جدا للنشيد
أختيار أكثر من رائع للموضوع والكلمات
وان شاء الله بإيدينا هيجى النصر وهنحتفل بإذن الله
أحييك على البوست

د.توكل مسعود 19 مايو 2009 في 3:12 م  

السلام عليكم ورحمة الله.. وبعد

فرائعة هى .... لكننى أشعر بل أوقن بأن:

من قاوم ثم قاوم ثم قاوم
سانده الزمان وقوته العزائم
ولانت له قناة الأكابر
وخرت عند قدميه المظالم

دمت بخير وعافية

ايومي 19 مايو 2009 في 5:14 م  

في خطأ غير مقصود في كتابة النشيد(شان)بدل (نيشان),
ومش عارفه في اخطاء تانية ولا لأ (:

۩ Nour ۩ 19 مايو 2009 في 9:18 م  

السلام عليكم..
الاوضاع بدأت من زمن طويل تتخذ منحنى متعجرج الملامج والذى نلاحظه بالفعل هو اتجاهه السفلى فى كل شىء وتزيف كل شىء يريد أن ينبت بذرة التغير وبغض النظر عن العلاقات الخارجيه والصعيد الدولى المتشابك وطرق الافاعى التى تزحف فى الخفاء فإن الحق لابد له من قوتين كما قال الامام الغزالى قوة عقليه وقوة تردع الهجوم ..
فيجب علينا أن ننظر خلاف الستائر المزركشه فان الحقيقه تختفى ورائها دوماً .. فهناك مؤمرات بها حبكه بارعة..وبتواجد الماسونيه والصهيونيه وغيرها من التى تدعوا الى السيطرة على العقل وقلب المفاهيم فان كل ما يدور حولنا مدبرا للابادة داخل الوطن الواحد..
وبغض النظر عن الاختلافات فى المقاومات ..لكن لابد من حركه فالنصر لا يولد فى ارض يحتلها السكون !!
ونسال الله صلاح الاحوال الى احسن حال..دمت بخير..

غير معرف 19 مايو 2009 في 11:49 م  

فعلا يابنى بدات مصر فى تهميش اى دور للمقاومة
اسلوب مش صح ولها فيه مآرب اخرى
طبعا فيه غلطات اصبحت تطفو على السطح للمقاومين
ولكن هذا لن يهدر مايقومون به
لم اتمالك نفسى عتد قراءة النشيد
سدد الله خطاك
وتقبل اول مرور لى على مدونتك
وادعوك لزيارة مدونتى
ولك تحياتى

عربي نيوز 19 مايو 2009 في 11:50 م  

السلام عليكم

اخي د.عرفة
لقد بات اهل فلسطين مشتتون في شتى بقاع الأرض
لهم مسمى معروف .. اللاجئ الفلسطيني

لن أعقب عما قلت .. فالحقيقة واضحة وضوح الشمس ولا تحتاج من يقول عن النار للطفل أنها نار وتحرق.؟!
حسبنا الله ونعم الوكيل في كل شخص علم حالنا ولم يهتم به ولم تحركه نفسه بالعمل

لا تنسوا اخوانكم في غـزة من دعائكم

||..بحـر الدموع..||

جارة القمر 19 مايو 2009 في 11:59 م  

وإذا خرس السلاح وما تكلم
فسطر من قذائفك الملاحم
وإن تركوك فى وجه المنايا
فمت فى العز لكن لا تساوم
وإن سكتت حكومات الدنايا
كفاك الله يا رجل العزائم

************

د/عرفة

أنت مبدع دائما وتناقش قضايا تهم الكثيرون وتناساها الكل

كل عنصر للمقاومة يطلق عليه لقب الارهاب اذن لنكن ارهابيين بمقابل الدفاع عن أرضنا وعزتنا

شكرا لوقوفك بجواري ودعاءك لوالدتي

احترامي

حياتى نغم 20 مايو 2009 في 12:33 ص  

السلام عليكم / تقبل الله كلماتك وأنشودتك الجميلة ، وبإذن الله الخير فى أهل مصر الذين قال عنهم صلى الله عليه وسلم أنهم خير أجناد الأرض .
اللهم ردهم إليك وكل المسلمين إليك رداً جميلاً .
جزاك الله خيراً .
واسمح لى أصحح : فإن السجن نيشان المقاوم .

د/عرفه 20 مايو 2009 في 6:24 م  

أهلا ايوشة
منورة المدونة
والفايس بوك كمان
ههههههههههه
الاعلام بتاعنا فعلا بقى مؤثر اوى وبيغير على حسب راى السلطة

اكيد ممكن نختلف فى قرارات صغيرةمع المقاومة
بس الجوهر مشتركين فيه
ومفيش حد كامل اكيد

تحياتى

د/عرفه 20 مايو 2009 في 6:31 م  

محمد عبد الباسط
اهلا بيك
حبيبى
ربنا يكرمك دكترة
وشكر لإطرائك

د/عرفه 20 مايو 2009 في 6:32 م  

د ياسر
اهلا بيك دكترة

اكيد مصر بلد مهمة وليها دور قيادى علشان كده
انا زعلان للحال اللى بنوصله ده
وحالة التردى الموجودة

تحياتى ليك
د ياسر

د/عرفه 20 مايو 2009 في 6:35 م  

أيومى
اهلا بيكِ
دايما بتنورينا بزياراتك دايما
وربنا يصلح حالنا
جميعا ونقدر نتغير للاحسن دايما ان شاء الله

تحياتى

د/عرفه 20 مايو 2009 في 6:36 م  

أستاذ محمد
اهلا بيك
ومنورنا

اكيد المقاومة
قضت على الشكل الاسطورى اللى بتتوهمه حكوماتنا دايما

ربنا يصلح الحال
تحياتى ليك

د/عرفه 20 مايو 2009 في 6:37 م  

وسام
اهلا بيك
ودايما بسعد بزياراتك
ربنا يسمع منك
ونعاصر اليوم اللى ممكن نحتفل فيه
وشكرا على الإطراء

د/عرفه 20 مايو 2009 في 6:39 م  

د/ توكل
أهلا بيك دكتور
سعيد جدا بزيارتك النهاردة
ومن زمان حضرتك منورتناش

تخريج جميل من حضرتك للنشيد
ربنا يكرمك دكتور

تحياتى

د/عرفه 20 مايو 2009 في 6:41 م  

أيومى
معذرة للخطأ
بس انا فعلا مش بعرف
اسمع الاناشيد والاغانى كويس
بخدها كده بالشبه والاحساس بس
ههههههههههههههه

وان شاء الله متكونش فيه اخطاء تانية

تحياتى

د/عرفه 20 مايو 2009 في 6:42 م  

نور
أهلا بيكِ

دايما بتوقف كتير امام تعليقاتك
وبصراحة التعليق لا يحتاج إلى تعليق بعده
تحياتى

د/عرفه 20 مايو 2009 في 6:43 م  

أم مالك
أهلا بحضرتك
سعيد جدا بزيارتك الأولى للمدونة
ويارب تتكرر
شكرا على الإطراء
تحياتى

د/عرفه 20 مايو 2009 في 6:45 م  

بحر الدموع
أهلا بيك
ومنورنا فعلا
أكيد الحقيقة واضحة وضوح الشمس
والمشكلة فيمن يتغافل عنها
ويحاول بشكل غبى اقناع الناس بعدم وجودها

ربنا يصلح الحال
تحياتى

د/عرفه 20 مايو 2009 في 6:46 م  

جارة القمر
أهلا بعودتك
ويارب تكون والدتك تمام دلوقتى


جزاكم الله خيرا
وشكرا على الإطراء الجميل ده

د/عرفه 20 مايو 2009 في 6:49 م  

حياتى نغم
أهلا اهلا
اكيد انا اتكلمت عن مصر لانى بتمنى ان مواقفها تكون قوية عن كده دايما

اكيد حضرتك خبرة فى الاناشيد
ومعذرة للخطأ
ولكنى فعلا مش بعرف اسمع الاناشيد كويس
وان شاء الله هحاول انه ميتكررش بعد كده
تحياتى

Unknown 20 مايو 2009 في 10:15 م  

السلام عليكم ورحمة الله تعالى وبركاته
عارف يادكتور عرفه زمان فى ابتدائى كانت
معاى بنت شاطرة اوى اوى ونفسها تدخل كلية
سياسة واقتصاد لاجل ما تبقى سفيرة ساعتها قلها
المدرس وتتعينى فى الامم المتحدة وتشرحى مشكلة فلسطين
عارف حصل ايه؟كل الفصل فى نفس واحد قلنا :وهى حتفضل مشكلة فلسطين لحد ما نكبر كده؟ده بأعتبار
الاوهام بتاعة قوتنا العسكرية التى لا تقهر
زىما كانوا مفهمينا!.مشكلة فلسطين وللاسف
زى ما هى بالعكس اضيفت اليها العراق
والصومال وجنوب السودان ووووووووو:(

نور الاسلام 21 مايو 2009 في 4:37 م  

السلام عليكم

المشكله يا اخى ان هذا الفريق باع نفسه من زمان للأجنده الامريكيه والإسرائيليه والتى بلا شك لا تصب الا فى مصلحتهم فقط ..ولا بقى يهمهم شكل البلد ولا حتى يهمهم شكلهم هما ...اصبح اللعب على المكشوف وخصوصا أثناء حرب الفرقان الأخيره على غزه .

والمشكله الكبرى أن قضية فلسطين كانت الاول قضيه اسلاميه ..وبعدين اختزلت القضيه الى قضيه عربيه متجاهلين كل البلاد الاسلاميه الغير عربيه ...الى ان اصبحت قضيه فلسطينه داخليه ((وإذا تدخل حد يقوللك كتر خيره ده واخد من وقته عشان خاطرهم وكأنه يمن عليهم ))..لا حول ولا قوة الا بالله ..

اما بالنسبه للسلام يا أخى ..نحن دينا يحث على السلام ..ولكن ما تتبعه هذه الحكومات هو استسلام وليس سلام ..كيف اعمل سلام مع ناس اخذوا منى أرضى بالقوه ..ازاى اسيب ليهم حقى واقول ده سلام ؟!!!

..وكما أشرت من يقرأ التاريخ جيدا ...يعلم أن ما يؤخذ بالقوه لا يسترد الا بالقوه ..

وأقسم برب العزه أن لا حل لقضيه فلسطين الا الجهااااد والجهااااااااااد فقط ..



جزاكم الله خيرا على النشيد ...ففريق الوعد اللبنانى من الفرق المفضله لدى ..


بارك الله فيكم ودمتم فى طاعة الله ..

غير معرف 21 مايو 2009 في 8:51 م  

المقاومة على عينا وراسنا

لكن الي بيحصل بالفترة الاخيرة لايطاق من انقسام داخلي وانقلاب وقتل ودمار

بطلنا عارفين مين الصح ومين الغلط

رينا يعطي كل واحد على حسب نيته

**

إذا سكت الزمان عن المظالم
فقاوم ثم قاوم ثم قاوم

وإذا خرس السلاح وما تكلم
فسطر من قذائفك الملاحم
وإن تركوك فى وجه المنايا
فمت فى العز لكن لا تساوم
وإن سكتت حكومات الدنايا
كفاك الله يا رجل العزائم

نشيد رائع تسلم ايدك

rabab elsanhory 21 مايو 2009 في 9:27 م  

الاخ العزيز د/ عرفه
أعجبنى مقالك كثيرا خاصه أنا هذه الافكار دائما ما تشغل على عقلي .. من الصح و من الخطأ ..من من المفروض أن نساعده ليبقى فى الصداره و من من المفروض أن نعوق تحركاته ليقف عن حدود معينه و لا يتخطاها أبدا ...
أولا ..أنا لا إنتمي لأى حزب سياسي ..أو غيره و لكننى فقط أعشق السياسه لكونها سياسه ..
تكلمت فى مقالك عن حماس و وصف مبارك لهابالعنتريه ..قد تكون هذه الكلمه ذاتها ..سياسيا غير محسوبه .. نعم و لكن بالفعل حماس تمتلك الكثير من العنتريه من وجهة نظرى و رغم أنني معهم و أقض مضجعي كما أقض مضجع المصريين جميعا ما يحدث على أرض فلسطين دوما و أحداث غزه مؤخرا ..
لانك إذا قررت أن تكون صاحب قرارا سياسيا ..لابد أن تتخذ القرار المناسب فى الوقت المناسب ..فجريمه إتخاذ القرار المناسب فى الوقت الخاطئ أبشع من أتخاذ القرار الخاطئ نفسه ..فهل ترى فى قرارات حماس الاخيره شيئا من العقلانيه ؟
هل ترى فى خلافات حماس مع فتح شيئا من الوطنيه ؟؟
هل ترى فى أن يرفع الاخ سلاحا فى وجه أخيه و يقتله شيئا من الرحمه أو العدل الانساني ؟؟
فالفنسبه إلى أن يموت طفلا بنران اسرائيليه خيرا من أن يموت بنيران فلسطينيه
أن ترى أما قتل إثنان من أطفالهما تقول حسبي الله و نعم الوكيل فى الاخوان المتقاتلون !!!!!!!
أين العقل من ذلك ...
و نأتي لحديثك عن الشيخ حسن نصر الله ..
ألم تتابعه على قناه الجزيره و هوه يرفع صوته لابد للجيش فى مصر أن ياخذ خطوه ضد قرارات القياده .. و يعود ليقول أنا لا ادعو الجيش للأنقلاب ..
هل ده مثلا على أساس اننا شعب بناكل رز و لبن كتير ؟؟
و نأتي لقناه الجزيره و كلنا يعلم أنه ليس هناك أعلام صادق تمام الصدق .. فأى إعلام يجعلك تعرف فقط ما يريدك هو ان تعرف ..
و لى أصدقاء و اقارب فى الكثير من البلدان .. تناقشت معهم فى هذا الامر من قبل ..كي لا تشعر بأنني أدعي .. و لا يخفى عليك الضجه التى حدثت نتيجه زياره ليفنى لاداره الجزيره .. لن نكون متسلطين حتي نمسك لهم على الواحده كما يقولون .. فهى تزور مصر الكثير ..و لكن بحكمها مسؤله فى الحكومه الاسرائيليه .. لا أقول أن الجميع كاذبون على طول الخط لكننى ايضا لا أهتم الجميع بالا يكونو إلا ملاكا قد هبط من السماء ...
و بالنسبه لما ذكرت عن معاداه مصر لقطر .. فأنا أعتقد أنك لو كنت تابعت موقف الدول العربيه جميعا .. إجتماعات قمه قطر و قمه الكويت و مافعلته السعوديه ..لن تجد أنهم ليسو الا ملائكه قد هبطوا فجأه من السماء ...
فجمع التبرعات و المزايده و المغالاه و الاعلان الذى تابعها .. و الصراع مابين فتح و حماس على من يتولى أعاده الاعمار ...
لقد كان الجميع فى 7غني عن أن يقتل طفل غزاوى أو ييتم أطفال ..
لكنهم أنتظروا حتي النهايه ليقيموا الكثير و الكثير من الحفلات الراقصه على جثث الشهداء ..
لست متحيزه لبلادي كما أنني لست معاديه لبلاد عروبتى ..
و اخيرا تحياتى

أحمد مصطفى درويش .............. دروى 22 مايو 2009 في 5:08 ص  

بصراحة كتاباتك ممتعة ورائعة
أدامها الله عليك من نعمه
وجعل عملك فى ميزان حسناتك

د/على خميس 22 مايو 2009 في 5:45 ص  

السلام عليكم و رحمة الله و بركاته
أخى د / عرفة
جزاك الله خيرا على هذا المجهود المبارك أسأل الله أن يجعله فى ميزان حسناتك
أتفق معك أخى فى ( معظم ) ما طرحت ..
أهنئك على اختيارك هذه الأنشودة المؤثرة..
بارك الله فيك و نفعك و نفع بك
تقبل تحياتى و إعجابى بمدونتك فى أولى زياراتى ..
إلى دوام التواصل إن شاء الله

بيروو 22 مايو 2009 في 2:23 م  

بجد الموضوع رائع
وكل تحياتى لقلمك الذى كتب مثل هذا الموضوع
وانى اشاطرك احساسك تجاة بلادك وانتمائك لها
وحقا هذا هى دمائهم حلال عليهم ما ارادوا وعلى غيرهم قد يكون محرما...............
تقبل مرورى سيدى

مذكرات مشاغب 22 مايو 2009 في 5:03 م  

معاك حق يا محمد

حسام غانم 23 مايو 2009 في 3:07 ص  

صح جدا

هدى التوابتي 23 مايو 2009 في 9:16 ص  

أعجبني جدا المثال الذي ذكرته وبجد فهمته...يعني الحمدلله المحلاوية عندهم شوية فهم بصراحة..
إحنا منذ الأزل ...أظن من أيام الفراعنة... من النوع الي بيدور على حد يشتكي له وخلاص ولو ملقيناش ..بنشتكي لربنا.. من غير ما نحاول إن إحنا نغير مع أن ربنا عز وجل قال "إن تنصروا الله ينصركم ويثبت أقدامكم"... طبعا إلا من رحم ربي.. وفعلا كلام الناس عن الي حصل في غزة بيفكرني بقوله تعالى.." قل لو كنتم في بيوتكم لبرز الذين كتب عليهم القتل إلى مضاعجهم وليبتلي الله ما في صدوركم وليمحص ما في قلوبكم والله عليم بذات الصدور"
وفعلا حكامنا قلبوا الحقائق على الآخر...فأوهموا الناس أن أعدائنا هما من يقولوا لا إله إلا الله وأن أحبابنا هم أحفاد القردة والخنازير"
ةبجد كلامك رائع جدا وصح جدا ربنا يجعلها في ميزان حسناتك ويجعلنا واياك من المقاومين في سبيله وحسبناالله ونعم الوكيل..

ghorBty 23 مايو 2009 في 10:09 م  

د/ عرفه

تحياتي وتقديري لهذه الكلمات وهذا الفهم الواعي

فعلا انت قلت كل الكلام واللي المفروض ان الكل يفهمه مش يردد كلام ليس له داعي ويقول احنا مالنا وااااازي هنقدر نقف قدام اسرائيل وبيحاولوا تقلل من دور المقاومه ودائما بيحاولوا تهميشها وتكسير المقاضيف ودا ليه لانهم ناس مش في دماغهم ان النصر بيجي من عند الله ويمكن ما يعرفوش ان النصر ليس بالعده ولا التعداد (كم من فئة قليلة غلبت فئة كثيرة بإذن الله ) احنا علينا بس الاستعداد والجهاد وربنا عز وجل وعدنا بالنصر لكن نقعد ونستسلم ولا ندافع عن حقنا المسلوب دا هو السلبيه بعينها ودا قله ايمان ...

اما قول الرئيس
والله انها لاقوال لتجن بسببها العقول باي حق تسلب ارضهم ويمنعوا من الدفاع عنها بل ونجد ملام عليهم لانهم بيدافعوا اذا كنتم لا تريدوا مساعده المقاومه فياريت ما تسمعونا صوتكم ولا نصايحكم اللي ان شاء الله هتكون ندم وحسره عليكم يوم الحساب علي التخاذل عن واجب محتوم وهو عون اخوانكم الذين عانوا من الكفره واليهود ..

د/ عرفه

اذا كان الحكام بتخاذلهم وسكتهم وتخميدهم للمقاومه افسدوا علي الكثير من الابرياء دنياهم..فقد افسدوا علي انفسهم اخرتهم حين يسألون عنهم ولن يجدوا اجابه ولا حجه فعلوها تشفع لهم امام الله ...


والنصر قادم ان شاء الله فهذا الحال لن يدوم ابدا
(كتب الله لاغلبن وانا ورسولي ان الله قوي عزيز)

ghorBty 23 مايو 2009 في 10:16 م  

عذرا الايه الاخيره
(كتب الله لاغلبن انا ورسولي اٍن الله قوي عزيز )

جنّي 24 مايو 2009 في 12:52 ص  

السلام عليكم

شكرا يا دكتور على مقالتك الرائعة وتحليلك الرائع ..

من تربوا على الراحة والدعة لن يفهمون كلامك .. ولا يفهمون معنى المقاومة وكيف كان يعيشها المصريون جميعا في القناة .. وفي الجزائر التي قدمت مليون شهيد من اجل التحرر ..
هؤلاء افضل لهم ان يعيشوا مستذلين ينتظرون عدة دولارات من اسيادهم الامريكان على ان يكون لهم شهيد ..

واما هجوم النظام الحاكم وحزبه الفاسد على حماس وحزب الله وايران لن يجدي مع العقلاء الذين فهموا مقصد النظام من اول يوم حاربوا فيه المقاومة ..

النصر قادم لا محالة ان شاء الله فدوام الحال من المحال ..

بنجاواتى 24 مايو 2009 في 7:59 ص  

السلام عليكم

بص يا دكتور هو لازم نميز بين المقاومة قبل التورط فى الحرب واثناء الحرب
يعنى لو كنا نختلف معاهم فى ادارتهم لغزة ومنعهم الحجاج مثلا من عبور المعابر لاداء فريضة الحج وبصراحة هما عليهم مآخذ كتيرة
لكن ساعة الحرب كان لازم كلنا ندعم المقاومة ولا نخذل اخواننا وده الشئ اللى بلوم بيه على الاعلام المصرى والقيادة

اما حسن نصر الله وايران فمليش تعليق غير أن لعنة الله على الظالمين
وموضوع ايلات ومشكلة المغرب لا يمكن مقارنتها بما يفعله حزب الله وان اعتبرناهااخطاء فى الماضى فهى لا تبيح لنا ان نكرر الخطأ فى الحاضر


تحياتى

د/عرفه 24 مايو 2009 في 6:03 م  

دكتورة نور
اهلا اهلا
كيفك دكتورة؟
فعلا الموضوع قديم اوى
والمشكلة هو احنا عارفين الحل المطلوب
ولكن للاسف هنقول لمين؟؟
لابنا يصلح الحال ونحتفل بذكرى الانتصار واحنا عايشين

د/عرفه 24 مايو 2009 في 6:06 م  

اهلا حمادة
سعيد بزيارتك
يارب يكون الموضوع عجبك
ومنتظرين رايك بعد كده
تحياتى

د/عرفه 24 مايو 2009 في 6:08 م  

نور الاسلام
اهلا بحضرتك
سعيد بوجودك
رايك تمام فلسطين مشكلة اسلامية ومش مقتصرة على اهل البلد بس
وربنا يصلح الحال

وكويس ان النشيد عجبك

تحياتى

د/عرفه 24 مايو 2009 في 6:12 م  

ميمى
أهلا بيكِ
سعيد بوجودك
وكنت هكون اسعد لو عرفت رأيك فى الموضوع
تحياتى

د/عرفه 24 مايو 2009 في 6:17 م  

نوارة
أهلا بيكِ
سعيد بوجودك
انا عارف ان المقاومة ليها اخطاء كتير
بس فكرتى بس هو انه مفيش حل غير المقاومة
مين بقى اللى يقاوم مش مشكلة
المهم يكون لينا عدو واحد عايزين ننتهى منه

تحياتى
ويارب تتكرر الزيارة

د/عرفه 24 مايو 2009 في 6:27 م  

رباب
اولا
بحييكى على زيارتك الاولى
ويارب تتكرر ونسمع رايك المفصل كده دايما
زى ما قولت
انا عارف ان المقاومة احيانا بيكون ليها اخطاء بس مش ده قصدى انى ادافع عنها
قصدى هو انه مفيش لينا حل غير المقاومة
اكيد الخلافات بينهم شىء مش مظبوط
بالنسبة لكلمة السيد حسن
اكيد هو قالها وقت حماسة بس
وزى ما انا معترض على مصر ده من باب انها دولة قيادية ومهمة
اما قطر دى مجرد حى واقل من انى اتكلم عليها واكيد اخطائها عظيمة
بس كلامى من حبى لمصر بس

فى الاخر انا عايز اوصل كلمة وهو اننا عمرنا ما هنعرف ناخد ارضنا بالحلول الهزيلة اللى احنا استعملناها قبل كده
اكيد مفيش غير المقاومة

تحياتى

د/عرفه 24 مايو 2009 في 6:28 م  

أديب درويش
اهلا اهلا
شكرا لزيارتك الاولى
وشكرا على الاطراء
جزاكم الله خيرا
ومنتظرينك دايما

د/عرفه 24 مايو 2009 في 6:31 م  

دكتور على

اهلا اهلا

سعيد بزيارتك دكتور
وانا كمان سعدت بزيارتى لمدونتك
واكيد هننتظر راي حضرتك معانا دايما

د/عرفه 24 مايو 2009 في 6:32 م  

بيروو
اهلا بيكِ عبير
واهلا بدخولك عالم التدوين
ويار دايما المواضيع كلها تعجبك
ومنتظرين رايك دايما

تحياتى

د/عرفه 24 مايو 2009 في 6:34 م  

مذكرات مشاغب
اهلا بيك يا احمد
كويس ان احنا متفقين

د/عرفه 24 مايو 2009 في 6:35 م  

حسام غانم
اهلا بيك حسام
وشد حيلك فى الامتحانات
وكويس انك مش معترض على الكلام
تحياتى

د/عرفه 24 مايو 2009 في 6:42 م  

دودى
اهلا بزيارتك الاولى
وشكرا على اطرائك على المحلاوية
اظن انا احنا متفقين كتير
شاكر لزيارتك
تحياتى

د/عرفه 24 مايو 2009 في 6:44 م  

غربتى
اهلا بيكِ

اكيد كلامك كالعادة موزون جدا
ومش محتاج تعليق بعده

جزاكم الله خيرا

د/عرفه 24 مايو 2009 في 6:47 م  

جنى
اهلا بزيارتك الاولى
ويارب تتكرر
وشكرا على الاطراء
انا كمان مش بدافع عن فئة معينة
انا بدافع عن المقاومة كطريقة لاخذ الحق
شاكر ليك
تحياتى

د/عرفه 24 مايو 2009 في 6:50 م  

بنجواتى
اهلا بيك
مصطفى حبيبى
انت نهيت قلبى النهاردة فى الكلية
ومش هعد اعيد كلامى ده تانى على المدونة
ههههههههههههههه
سلام

القمر الساهر 24 مايو 2009 في 9:38 م  

انا بلوم كل العرب

حتى فلسطين نفسها .. والخناقات اللى بتحصل بينهم

وبلوم مصر لانها كانت طول عمرها شجاعة .

كل العرب اصبحوا جبناء

واصحاب لسان بس

Beram ElMasry 26 مايو 2009 في 6:00 م  

د/عرفه
الاخ الدكتور يسعدني دائما مرورك واطمئنانك علي. واعتذر عن التاخر في الرد لانني لا اجد من يكتب لي.
واتمني ان نصحوا من غفلتنا وان نتسلح بالايمان والهمة لكي نزيح الكابوس ونخفف وطاة الطغيان والله المستعان
تحياتي والسلام عليكم ولا سلام مع اليهود

د/عرفه 27 مايو 2009 في 9:34 م  

القمر الساهر

أهلا أهلا
سعيد بزيارتكِ
وياريت تنورينا على طول
وانا معاكى طبعا انى الجميع
كان على درجة من الخطأ

وربنا يصلح الحال ان شاء الله
تحياتى

د/عرفه 27 مايو 2009 في 9:38 م  

استاذ بيرم
اهلا بيك
شاعرنا الجميل
يارب تكون افضل دلوقتى

ولا سلام مع اليهود

تحياتى ليك

جارة القمر 30 مايو 2009 في 1:51 ص  

د/عرفة

احترامي لك يكبر يوم بعد يوم

لك عقلية انحني امامها

ماناقشته صحيح ولكن من يرضى بالذل والهوان فلا يستحق ان يرفع رأسه

فسيظل مهانة طيلة مابقى من حياته


حال فلسطين ومايجري بها ذنب لكل شخص سمع ولم يتكلم ولم يصرخ


دمت عربيا رافضاً للذل والمهانة


احترامي

د/عرفه 30 مايو 2009 في 12:26 م  

شكرا جارة القمر
على زيارتك التانية لنفس الموضوع


بجد
ده إطراء جميل اوى

جزاكم الله خيرا عليه

deraz 22 نوفمبر 2020 في 12:20 ص  

خدمات المحترف للصيانة – الامارات
تركيب رخام راس الخيمة
تركيب سيراميك راس الخيمة

إرسال تعليق