خواطر على مشهد متكرر




مشهد متكرر كتير فى حياتنا
شاب ملتحى متحمس يجادل من حوله فى فرضية اللحية وتقصير الثوب والنقاب
ليس هذا الشاب فقط بل هناك بعض الشيوخ لا حديث لهم إلا فى مثل هذه الأمور الجدلية
هناك الكثير من الأمور فى حياتنا الدينية لن ينتهى عندها النقاش وسيظل الجدل يكثر حولها
رأيى أنه مثل تلك الأمور التى إختلف عليها العلماء لن تستطيع أن تنهيها حضرتك بتحمسك لرأى معين
فعلى حسب الفرد
إذا كان صاحب همة عالية وإلتزام قوى فليأخذ بالرأى الأحوط وأن بيعد نفسه عن الجدال
وهذه إحدى درجات الورع

وإلا فليتبع الرأى الذى يستشعر أنه مناسب له طالما أنها أراء علماء ثقات
من خلال هذ المشهد أريد التحدث عن أكثر من نقطة
1-الكثير من هؤلاء الشباب مثلا تجده عاق لوالديه أوسىء الخلق لا يجيد التعامل مع الناس لإستشعاره أنهم جميعا على خطأ هذه نقطة هامة جدا فى الدين وهو أن ترتب أولوياتك
مثال
يعنى قراءة القرأن شىء جميل ولكن القراءة وقت الصلاة المكتوبة لا
فالصلاة فى هذا الوقت أولى
مثال أخر
جاء أحد الطغاة الفاسقين لأحد الصالحين ويخبره بعزمه على ترك شرب الخمر فأخبره
فلتترك الخمر إذا كانت الخمر هى أسوء شىء تقوم به

2-هناك الكثير من الأمور تعلم أنها صواب ولكن فى نفس الوقت لا يجب الحديث عنها وإجبار الناس على إتباعها
مثال
واحد صاحبى كلمنى على تطبيق الشريعة الإسلامية
قولتله دى أمنيتى وأكيد هيكون شىء رائع ولكن لا يمكن تطبيقه حاليا وعلى تركيبة شعبا الآن يمكن نقدر نتكلم فى هذا الأمر فى ظروف أخرى
مثال أخر
الرسول عليه الصلاة والسلام قال
يا عائشة لولا أن أهلك حديثى عهد بجاهلية لأمرت بالبيت فهدم ...............إلى أخر قول الرسول

لأن الرسول كان يعلم أن هناك خطأ ما فى بناء البيت الحرام ولكن منعا للفتن لم يأمر بهدمه وإعادة بناءه نظرا لظروف المجتمع فى هذا الوقت

3-الإنسان المتعصب بيتكره بسهولة أوى وكمان بيفقد قدرته على إقناع من حوله
مثال
فكرت شوية كده
وقولت مين أكثر للعبى مصر تعصبا
لقيتهم نفسهم أكثر الاعبين المكروهين من جماهير الفريق المنافس
مشهد بسيط أوى
فى مباراة الأهلى والحرس الأخيرة لما خرج أحمد عيد من الملعب الجمهور كله فرح كأنما دخل هدف فى المرمى كل هذا لأنه لعب بعصبية شديدة جعلت مستواه قمة السوء بالإضافة الى كراهية الجماهير وسبابها له
نفس السؤال سألته لنفسى
لماذا تكره باقى جماهير مصر الأهلى بل إنها تشمت فيه أحيانا..؟؟
لقيت السبب المباشر هو عصبية جمهور الأهلى الزائدة وإعتبار فريقهم إنه فوق الجميع
وإن المفهوم ده ترسخ لديهم لدرجة إنهم لا يتقبلون أى نقد أو أى هجوم
وإن أى شخص يتعرض ليهم من قريب أو من بعيد ينال قدر لا بأس به من النقد والذى قد يصل للسباب









تنويهات هامة
أولا
حابب أقدم التهنئة لصاحبى وحبيبى عمر بمناسبة خروج والده من المعتقل
وإن شاء الله تكون الفترة اللى قضاها هناك تكون فى ميزان حسناته


وحابب أقدم التهنئة برضه لشاعرنا الكبير محمود أبو العزم بمناسبة تدوينته المائة
وعقبال الألف إن شاء الله


أخر شىء
منتظر ترشيحاتكم النهاردة وبكرة على المدونة هناك
لأفضل خمس مواضيع خلال الأسبوع الماضى
قبل إعلان النتيجة الجمعة إن شاء الله

73 رأيك يهمنا:

Arsenal Way 27 مايو 2009 في 9:11 م  

ازيك يا دكتور
بخصوص التعصب فهو مكروه في كل شيء مش في الدين بس
لا تكن صلبا فتكسر ولا تكن لينا فتعصر
أما بخصوص الملتحين المتعصبين
فالحقيقه هناك ايضا ناس ملتحين ومقصرين الثوب ومثال في الهدوء و الالتزام والتواضع والطاعه والبر إذا رأيتهم تحبهم
فالأولى ان ندعو الملتحين المتعصبين ان يأخذوهم قدوه ومثل بدلا من ان نضع المشكله في اللحيه وتقصير الثوب
طبعا انا عارف انك عارف الكلام ده كله
بس من باب قول الله
" فذكر فإن الذكرى تنفع المؤمنين"
وعشان الزوار ميفهموش قصدك غلط
--------------
اما بخصوص الأهلي بقى
مالك وماله؟؟؟؟؟؟؟
ده لسه واخد الدوري من كام يوم
ولا هو ملقيش في الورد عيب قال ده احمر الخدين ؟؟؟

ههههههههههههههه

تحياتي

د. ياسر عمر عبد الفتاح 27 مايو 2009 في 10:19 م  

التعصب منبوذ ومروفوض
رغم إني عاوز أعلق شوية علي الأمثلة
لأن فيه حاجات منها ..

المهم يا دكترة تسلم إيدك
معلش أصلي مرهق جداً فعلاً من الإمتحان بتاع النهاردة
ربنا يوفقك
ويبعد عننا التعصب

ايومي 27 مايو 2009 في 11:35 م  

الاستاذ مصطفى ابو زيد قال في الجزء الاول من تعليقه نوه عن اللي كنت عاوزه اقوله,
بس انا لو اتكلمت هيكون فيه توسع وتشتت علشان كده بلاش اتكلم احسن.

محمد عبد الباسط 28 مايو 2009 في 12:05 ص  

اعترض على الكثير
لكن لن اناقش الان لسبب ارهاقى الشديد اسئلك الدعاء


حلم كبير

غير معرف 28 مايو 2009 في 12:15 ص  

معك حق والله بكلامك واوافقك عليه

مش لاقية كلام اعلق بيه

لكن فعلا في ناس بتاخد الدين بتعصب وافعالهم بتسيء للدين جدا

الف شكر عالبوست

دمت بحفظ الرحمن

وردة 28 مايو 2009 في 12:23 ص  

السلام عليكم ورحمة الله وبركاته
ازيك يا دكتور
بشكرك جدا طبعا علي متابعتك لمدونتي
وكمان سؤالك عني
بجدربنا يكرمك ويشرفني تكون اخ ليا
موضوعك انهاردة يعتبر اساس لمعظم مشاكلنا
التعصب لرأي سواء رأي ديني او دنيوي
سمعت شيوخ كتير مش مقتنعين غير بالنقاب
الحجاب بالنسبة لهم شئ غير معترف بيه
ولقيت شيوخ بتشجع علي الحجاب وحتي لو البنت تبدأ الحجاب علي لبسها العادي وبعدين تتدرج
انا مع الرأي ان كل حاجة لازم تاخد وقتها
يعني زي ما حضرتك قولت المظهر مش كل حاجة
نصلح نفوسنا الاول ويكون معاها المظهر يكونو مع بعض علي التوازي
ونفس الكلام علي الشريعة الاسلامية
لازم الناس الاول تتغير وتتقبل الفكرة والشيوخ نفسهم يكونو فعلا قدوة ويتفقوا فيما بنهم علي رأي
خايفة اطول في الكلام
بس بجد هو موضوع مهم جدا
ربنا يكرمك ويوفقك
سلام

المعتصم 28 مايو 2009 في 1:46 ص  

بسم الله الرحمن الرحيم
السلام عليكم ورحمة الله وبركاته
د/عرفه
تحياتى
اولا ازيك انت واحشنى جدا
يارب تكون بخير وفى احسن الاحوال
ثانيا الموضوع جميل جدا
وفعلا بيناقش حاجه كلنا بنشوفها كل يوم
وهى حاجه فعلا بتضايقنى على الاخر
ووالله العظيم شوفت واحد من الجماعه دول شاتم والده (مش عارف ازاى قدر اصلا انه يعملها)وبعد كده قعد معانا فى العربيه واحنا مسافرين وعمل علينا انه الشيخ الشريب (كنت عاوز اضربه)بس انا اكتر واحد فى الدنيا يكره الجدل (انما ماسبتوش برضو واديتهمله)
.........
انما تعالى هنا ياعرفه
مالك ومال الاهلى بقى ؟؟؟؟؟
مش هتبطلوا اللى فيكم ده ؟؟
ههههههههههههههههههههههههه
هى دى مبروك ع الدورى
مش مهم
برضو هيفضل الاهلى عمهم وحابس دمهم
هههههههههههههههههههههههههههههههههه
وبعدين مين دول اللى يكرهوه
دا مشجعين الاهلى اكتر من 60مليون
هو فاضل كام مليون تانى فى مصر ؟؟؟؟؟؟؟؟
ههههههههههههههههه
تحياتى ودمت بكل خير وود
والسلام عليكم ورحمة الله وبركاته

Ehab 28 مايو 2009 في 10:02 ص  

بصراحه عجبني قوي عرضك للموضوع ده
بالذات فكرة التعصب لحاجه قد تكون صواب لكن الظروف والمجتمع غير قادر على تقبلها بسرعه كده
حاجات مثل النقاب واللحيه والجدل حولهم
حاجات كتير في حياتنا فعلا بتبقى غلط ولازم تتصلح ومع ذلك بنسيبها وندور على حاجه فرعيه نتخانق علشانها
مش معنى كلامي انا وانت اننا عايزين نسيب الذنوب الصغيره تكبر لحد ما هي اللي تضيعنا لكن المفروض نبتدي بالمهم فالذي يليه ومنسيبش حاجه ولو قدرنا على الذنب الكبير نبطله سهل جدا عزيمتنا تتقوى ونبطل الذنوب الأصغر
وياريت فعلا الجماعه بتوع الأهلي يبطلوا شتيمه بقيت بكرة فكرة الرياضه في مصر من كتر المهازل اللي بشوفها والكره بين الناس لا لشيء الا لأنتمائهم الكروي

جزاك الله خيرا على الموضوع الجميل تحياتي

اخوك ايهاب

سلااااااااااااااااام

arsenalwy 28 مايو 2009 في 11:05 ص  

ازيك يادوك

الاول مبروك للاهلى

معاك حق فى النقط اللى انت كاتبها ففعلا بتلاقى الاجتماعيات بتاعة الشخص المتدين مش قد كده لانه شايف انه على حق والناس كلها عالباطل

موفق يادوك

مستنيك فى الحملةن بتاعتنا وعايوك تقولى مقترحاتك

ghorBty 28 مايو 2009 في 2:02 م  

السلام عليكم ..

جزاك الله خيرا دكتور انا فاهمه حضرتك تقصد ايه وعايز توصل لنا ايه وانا عندي حسن ظن في حضرتك

الكلام اللي هكتبه مش موجهه لحضرتك خالص

ولكني اختلف في شئ .

او بالمعني الصحيح سؤال اود ان اطرحه علي كل واحد فينا.

لماذا نضع الملتحين والمنتقبات تحت المرصاد دائما ؟؟؟

كل فعل وكل كلمه تؤخذ عليهم وننسي انهم بشر يخطئون وليسوا ملائكه منزله علي الارض

ان كانوا طبقوا الظاهر فالباطن ربنا سبحانه وتعالي هو اللي بيحاسب عليه مش ربنا قال للرسول عليه الصلاة والسلام ( فإنما عليك البلاغ وعلينا الحساب)

ولو واحد منهم اخطاء او اسلوبه كان فيه شده تقوم الارض ولا تقعد شوفوا الملتحين بيعملوا ايه ويسوا ايه .. لا حول ولا قوة الابالله .. ليس هناك احد حجه علي الدين كل واحد حجه علي نفسه وان اساء فعلي نفسه مش علي الاخرين وبننسي انه بشر واخطأ وبننسي ان ربنا عز وجل هو بيده العقاب او العفو فمين احنا علشان نحاسب الغير ونراقب تصرفاتهم

لو فضلنا كدا نتكلم علي بعض وننقد بعض يبقي فين روح المحبه والالفه اللي المفروض تكون بينا لو واحد ملتحي اتكلم معاك في امر من امور دينك حتي ولوو اخطاا في الاسلوب او توصيل فكرته لك ليه تاخدها انه امر وانه بيشوف نفسه عليك ليه ما تاخدش النصيحه وتقول انه بيتمنلك الخير ..

واكيد الظاهر مش اهم شئ في حين انه مهم برضوه وطبعا الباطن والقلب اللي الكل بيتعلل بهم ويقول اهم شئ الباطن والقلب فهذا الصنف لو كان بجد القلب كويس كان صلح جميع عمله الظاهره والباطنه
(ألا إن في الجسد مضغة إذا صلحت صلح الجسد كله، وإذا فسدت فسد الجسد كله ألا وهي القلب)


الخلاصه : ربنا عز وجل قال اننا خير امه اخرجت للناس ليه

(كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ )

ومن هنا اخذنا الخيريه .. لكن لو نسينا الدور دا وبدانا ننقد في بعض ونطلع في بعض العبرر وننقسم مجموعات ومسميات كل واحد شايف انه الصح والاخرين دائما علي خطأ يبقي ربنا يرحمنا برحمته

فالواجب علينا زي ما امرنا الرسول عليه الصلاة والسلام ( لايؤمن أحدكم حتى يحب لأخيه ما يحب لنفسه ) فلو بجد بقت قلوبنا فيها ايمان كامل عمرنا ما نفضل ننقد في بعض ونظهر عيوب بعض

الرسول عليه الصلاة والسلام اد ايه تعب علشان توصل لنا رسالته وفي الاخر بدل ما نعمل بها او بمعني اصح نعين بعض علي الطاعه نقعد نتربص لبعض الاخطاء ونشيل جوانا ونتكلم علي بعض .. يا الله

فالاولي ان كل واحد ينشغل بنفسه ما دام الحال وصل لكدا ف ( كل نفس بما كسبت رهينه ) و(وَلَا تَزِرُ وَازِرَةٌ وِزْرَ أُخْرَى )

ربنا يرحمنا برحمته ويصلح الاحوال ..

ويرجعنا تاني قلوبنا علي بعض ونحب الخير لبعض ..

ونكون زي الصحابه وحالهم مع بعض ..

السلام عليكم

غير معرف 28 مايو 2009 في 3:23 م  

السلام عليكم ورحمة الله وبركاته

اخي في الله

هناك امور كثيره من امور الحياه تفرض نفسها علينا ونحن نختار ما يمليه علينا عقلنا وقلبنا
لكن حين التكلم الدين والقول بما انزل الله والقول بالأدله سواء من الحديث او من القرآن لا يجب ان يكون للعقل دور في التفكير او حتي التدبير بل يجب علينا ان نقووول سمعنا واطعنا
هناك امور اختلف عليها العلماء فيجب علينا ان نتبع فريق بعينه او عالم هو ما نأخد برأيه كمثل
لا نأخد من العالم الفلاني فتواه التي تحلل لنا هذا ونأخذ من عالم أخر فتوي أخري تحلل لنا اشياء قد حرمها العالم الأول
فيجب اتباع عالم فقط

ولما دائما نطن ان المظهر هو المرحله الأخيره للتدين وكأن صاحب اللحيه لن يخطئ وكأنه أعتصم من الخطأ بل احيانا ما يكون المظهر اول شئ فعله هذا الأنسان كخطوه نحو الألتزام ولم تتغير سلوكياته كامله بعد فنلقي النظر عليه ونضعه تحت المجهر ونمسك له كل اي خطء ثم نلقي الكلام على الملتحين جميعا كأقوال شهيره بيننا في الشارع المصري *(قال وعملي شيخ ومربي لحيته....ادي ياعم المشايخ.....قال بيقول قال الله وقال الرسول وهو حرامي )*
وهنالك المزيد والمزيد
اخي في الله هذا ليس لوم مني او عتاب او جرح واساءه الي شخصك المحترم
ولكني تنويه مني للعامه و وما يحدث بيننا في الشارع المصري

اسف للإطاله

دمت بكل خير

Darsh Basha 28 مايو 2009 في 4:00 م  

السلام عليكم
دا اول رد عندك ..ان شاء الله ويارب يبقى خفيف
لو تكلمنا على اللحية وتقصير الثياب..هو من الدين سواء على اختلاف العلماء فرض ام سنة..ام غيرة..فهى حاجة كويسة ..

فمن اكثر الاشياء الذى وجدتها ربط الملتحى بأنة ميعرفش حاجة عن بر الوالدين والتعامل مع الناس وغيرة..مع موافقتى فى ان من الممكن ان هو يبقى مقصر فى حاجات كتير ..الا ان فى ناس كتير جدا ملتحين ومحترمين ولهم علاقات بالناس ..وأناس رائعين بجد.

وعملية التعصب موجودة عند الشباب بكثرة ..فالبعض يتعصب للدين والاخر يتعصب للعلمانية ..واخر يتعصب للكفار..ويتعصب لفريق..والكل يقول لا للتعصب..

فقد يكون مربى اللحية..يأخد بأن اى شئ فى الدين يستطيع ان يفعلة فليفعلة...فقد يكون ملتحى ومقصر فى الصلاة...مش لازم يستنى لما يظبط الصلاة الاول وبعدين يلتحى..فهو يستطيع ان يلتحى الان ..وفى نفس الوقت بيبدأ يظبط نفسة فى الصلاة..فافعل الخير كلما قدرت على فعلة ..

وقد يكون مربى لحيتة ..ليكون لة شكل وهيئة مميزين ..فيقال ان هذا مسلم وهذا شكل المسلمين ..
وقد يكون مربيها شياكة

فلا تربط اللحية بأى شئ اخر
ووفقنا الله واياك الى مافية الخير

moonq8 28 مايو 2009 في 4:04 م  
أزال المؤلف هذا التعليق.
moonq8 28 مايو 2009 في 4:08 م  

بالفعل التعصب امر غير مرغوب فيه وهو امر خطير جدا ودائما يقطع أواصر التآخى والترابط بن الفرق المختلفة.
نسأل الله تعالى ان يبعدنا عنه
تقبل مرورى

د/عرفه 28 مايو 2009 في 7:08 م  

أهلا بيك
مصطفى
منورنا والله

أكيد انا معاك
واظن انك عارف انى بس بلوم التعصب
انا عارف ان فيهم ناس اكثر من ممتاز


ربنا يوفقك فى الامتحانات مصطفى
سلام

د/عرفه 28 مايو 2009 في 7:10 م  

د ياسر
اهلا اهلا
يارب الامتحانات تكون كويسة وربنا يعديها على خير ان شاء الله

كنت اتمنى اسمع ملاحظاتك
بس مش مشكلة وقت تانى ان شاء الله

وربنا يبعد عننا التعصب

سلام

د.ميريهان 28 مايو 2009 في 7:10 م  

السلام عليكم
ازيك يادكتور
انا لي تعليق على حديث حضرتك...
اولا...حضرتك تقول ان هناك شيوخ وعلماء وناس ليس لهم الا حديث الليحية والنقاب والتقصير...دكتور اليست تلك الأمور من امور ديننا...ثم ان هؤلاء العلماء معظمهم في دول تعلم غير هذا من امور الدين..اعني كمثال السعودية..فهي دولة محافظة دينيا والعلماء انما ينتقدون مايرون..وهذا اقصى مايرون عندهم..ولنأتي الى علماؤنا هنا فهناك قضايا اخرى تشغلهم غير هذه القضايا كل بحسب البيئة..
ثم لنأتي ان هذه الامور من امور الدين ومثلها في احكامها كأموور الدين الاخرى..لماذا اذن تركت كل الامور التي يتحدث بها العلماء وركزت على هذه النقاط؟؟
ثم نقطة ان بعض الملتحين او المنتقبات يعقون ووالديهم او يعصون الله في اي امور اخرى...انا اقول لك...اليسوا بشرا كغيرهم..؟؟؟ لماذا اذن اللوم عليهم فقط...طاعتهم لربهم في اللحية والتقصير والنقاب طاعة منفردة عن غيرها من الطاعات والمعاصي...لماذا تربط هذا بوجوب عدم عصيانهم لله...هم بشر كغيرهم ليسوا معصومين من الخطأ...اللوم في المعاصي للجميع..والتزامهم بأمور من امور الدين لاينفي كونهم بشر يخطئون ويتوبون..
اعني اخي ان الحديث عن هؤلاء كالحديث عن غيرهم...ولا يصح ابدا ربط كونهم هكذا بوجوب طاعتهم المطلقة لله...فالرسل ليسو معصومين..فكيف بنا..؟؟
ثم ان الحديث عن تلك الامور حديث في امر من امور الدين..ودرجات الاهمية تختلف من شخص لآخر كما ذكرت لك كمثال السعودية وغيرها..
اما حديثي عن النقاب وفرضيته واللحية وسنتها والتقصير ووجوبه... فهو حديث يطول..ليس له مجال هنا..وربما تتح لنا الفرصة للنقاش فيما بعد..

تقبل وجهة نظري ونقاشي..ولك مني السلام

د/عرفه 28 مايو 2009 في 7:12 م  

أيومى
أهلا بيكِ

تمام
وانا أإكيد مش معترض على كلام مصطفى

وأظن إن بعترض على شىء معين بس
وهو التعصب والتركيز على نقاط الخلاف

وأهلا بيكِ دايما
ومنتظر ترشيحاتك
هناك
تحياتى

د/عرفه 28 مايو 2009 في 7:16 م  

محمد عبد الباسط
أهلا بيك يا محمد

وكان نفسى اسمع اعتراضاتك
فعلا
سعيد بوجودك وتحياتى ليك

د/عرفه 28 مايو 2009 في 7:18 م  

نوارة
أهلا بيكِ
شاكر على تواجدك
وإطرائك على الموضوع

تحياتى ليكِ

د/عرفه 28 مايو 2009 في 7:24 م  

أهلا بيكِ
وردة
وسعيد بوجودك
وأكيد ده شىء يشرفنى جدا
بالنسبة للموضوع
اللى انا أقصده فى كلامى
هو إن الإنسان لازم يرتب اولوياته فى الدين
وان احنا مش لازم نتوقف كتير على نقط الخلاف
بين الشيوخ وتكون دى نقط خلافنا على طول

تحياتى ليك

د/عرفه 28 مايو 2009 في 7:35 م  

وعليكم السلام
أهلا اهلا
حبيبى
المعتصم
الف الف مبروك للاهلى
انا اقدر اقول حاجة علي كده
هههههههههههههههه
بس انت عارف
مش بحب التعصب ومش بحب حكاية فوق الجميع دى
هههههههههههههه
تحياتى
واهلا بيك على طول

د/عرفه 28 مايو 2009 في 7:38 م  

الشنكوتى الكبير
أهلا بيك إيهاب

بجد سعيد بزيارتك الاولى دى
ومنورنا
وكمان فرحان جدا بتعليقك
لانك فهمت انا عايز اقوا ايه بالظبط
ومش محتاج اعقب بعدك

تحياتى

تأثير الفراشة 28 مايو 2009 في 7:38 م  

السلام عليكم و رحمة الله و بركاته

مع حضرتك فعلا فى نبذ التعصب و الجدل،

و الدين المفروض يؤتى من جمييييييع جوانبه مش كل واحد ينقى اللى يعجبه و يسيب الباقى

و بالنسبة للرياضة، فسلوك التعصب و الضرب و الحاجات اللى بنسمع عنها بتكون بجد محزنة، و بيكون تعصب أعمى، و مش بس فريق ضد فريق لأ، ده الأكثر به و باستغرب منه ، إن مثلا لما فريق مصرى -أيا كان هو إيه- بيلاعب فريق أجنبى، فبعض المصريين يشجعوا الفريق الأجنبى ، بس علشان يشوفو منافسهم بيتهزم

!!!!!!!!!!!!!!!!!!!

طب المفروض إن الفريق ده فى الموقف ده بيمثل مصر ، يعنى بيمثلنا كلنا ، بصرف النظر هو اسمه إيه

و للأسف أذكر إن الموقف ده حصل لما الأهلى ما كسبش فى اليابان و بصراحة استغربت جدا

و فى رأى المتواضع إن لما الناس تعرف تتفاهم فى الكرة بدون تعصب يبقى ساعتها دى هتكون أول مؤشرات حدوث الوحدة العربية

طولت على حضرتك، ربنا يوفقك دايما لكل خير

جزاك الله خيرا

د/عرفه 28 مايو 2009 في 7:42 م  

أرسنالاوى
أهلا اهلا
واكيد مبروك للاهلى انا مقدرش اقول حاجة على كده ابدا

شكرا لزيارتك
واكيد هشوف الحملة دى
تحياتى

د/عرفه 28 مايو 2009 في 7:46 م  

غربتى
أهلا اهلا

تحياتى ليكِ

انتِ عارفة اكيد انى مش بهاجم فئة معينة
أو بنتقد حد معين
أكيد مش لازم ننتقد بعض
وهو ده بالظبط اللى انا اقصده تماما
وهو ان احنا مش لازم نعد ننقى العيوب
ونتجادل فى امور مختلف عليها ويكون ده بس هو اهتمامنا


اكيد انا مش معترض على كلامك اطلاقا
ومؤيده تماما

د/عرفه 28 مايو 2009 في 7:53 م  

غير معرف
أهلا بيك
وسعيد بوجودك واتمنى انى
اعرف اسمك ولو حتى بالرمز

اكيد فى الاموامر بتاعة ربنا علينا السمع والطاعة ولا نقاش فى ذلك
بالنسبة لأخد راى جبهة معينة اين كانت
فده انا معترض عليه شوية انا سمعت الكلام ده قبل كده
اه
معاك انه مينفعش ان احنا نتبع الاحكام الميسرة عن الجميع ونتبع الاسهل
ده شىء مش مظبوط
ولكن فى الامور المختلف عليها نحاول نحكم العقل ونجتهد فى اللى نقدر نتبعه

وبعدين انا مش بهاجم الشيوخ
لا ابدا
دول حتى اصحاب همم عالية وبيحاولوا بيتبعوا الاحوط

يارب تكون فكرتى وصلت
تحياتى

حياتى نغم 28 مايو 2009 في 8:16 م  

السلام عليكم /جزاك الله خيراً على هذا الموضوع نعم التعصب مرفوض وهناك الكثير من أمور الدين ترك الله لنا فيها مجالاً للعقل والتفكير ، وكذلك يوجد ما يسمى بفقه الخلاف ، وشريعتنا على أربعة مذاهب .
ومهم جداً قبل أن نخوض فى جدال على شىء يقبل الخلاف أن نكون قدوة بعبادتنا ومعاملاتنا .
رزقنا الله وإياك الثبات على دينه آمين .

Jannah 28 مايو 2009 في 9:14 م  

(( ادعوا الي سبيل ربك بالحكمة والموعظة الحسنة و جادلهم بالتي هي احسن))

فيه ناس لا عندهم حكمة و لا طريقة الموعظة الحسنة و لا أي شيء
سمعوا كلمتين أو تعلموا الدين في الكتب و عندهم حماس بس
و على هذا الأساس ماشيين
يا ما قلنا و عدنا انه ما يجب أن نبدا منه هو التربية على ثقافة الاحترام و التسامح و بعد هذا كل شي راح ييجي تلقائي بهدوء و ليونة من خلال القنوات الرسمية له يعني مو أي واحد
الكل لازم يفهم انه احنا عباد الله كلنا تحت رحمته و هو اللي راح يحاسبنا جميعا ماحد عنده خطوة على أحد
فقط المسؤولين عن الحقل الديني هم اللي لازم يقوموا بمهامهم بالحكمة و الموعظة الحسنة و المنهجية
الله يهدي الجميع

Unknown 28 مايو 2009 في 10:02 م  

السلام عليكم ورحمة الله تعالى وبركاته
مش عارفة الكلام اللى حأقوله ده داخل
فى الموضوع ولا لأ لكن انا حابه اقوله هنا
لانك فعلا تبشر ب(طبيب مستقبله باهر بأذن
الله تعالى)اقول اسمع عن المناقشات والمجادلات فى
اللحية والنقاب و(طول البنطلون)وخلافه من المواضيع واجد(غلطات إملائية شنيعة)فيما يُكتب لدرجة ان احدهم كتب اكثر من مره(اللة)هكذا!!
الا ترى معى دكتور عرفه أن الاهتمام بالكتابة
ومنع الغلطات الاملائية هى من قبيل اهتمامنا
باللغة العربية والتى هى لغة قرأننا الكريم

د.ميريهان 28 مايو 2009 في 10:14 م  

عذرا دكتور هناك اضافة... فأنا معك في ان التعصب مرفوض رفضا باتا في ديننا..بقول صريح في كتاب الله(لاتغلوا في دينكم.) وقد حذر الرسول صلى الله عليه وسلم من التنطع في الدين...
ولكن.. النقاب والتقصير واللحية ليسوا ابدا من التنطع في شئ..والا لماحدث عنهم الله ورسوله..

شكرا دكتور على هذا الحوار الشيق

rababelsanhory 28 مايو 2009 في 11:30 م  

الأخ العزيز د/ عرفه

للمره الثانيه ..أمر على مدونتك و يروقنى ما أقرأ فيها ...
إنها بالفعل احاديث دائما ما تجول فى خاطرى ...
كنت استمع كل صباح إلى إذاعه القرأن الكريم ..
و أحدهم يقول بصوت هين لين ...
الدين المعامله ...
فعلا لابد .. للمتدينين من أن يحببوا العامه فى الدين ..
لا أن يكرهوهم فى الدين .. بإدعاء الاسلام منه براء ..هناك منهم من إذا نظرت فى وجهه تشعر كم هي الدنيا صافيه و هناك منهم من اذا تكلم لعنت يوما رأيته فيه..
قابلت الإثنان و لكننى للحقيقه قابلت الاسوأ بالاعم ..
بالفعل تفكر ساعه خير من عباده شهر بأكمله ...
كنت أتحدث يوم إلى أحدي الزميلات ..و أخبرها بأن الاسلاام دين العقل ..فصاحت بي لا الاسلام ليس دين عقل ...
بالله ماذا تقول فى أمر كهذا ؟؟!!!
و على نفس الغرار اجد زملائى من الشبان يأتون بالبنطلون طويلا ليثنوه من أسفل...
ما الحكمه من ذلك !!
هل مثلا الحكمه من تقصير البنطلون .. هوه إعطاء منظر لا يليق و كفى ...
أم أن الحكمه التصدق بالزائد عن الحاجه ...
إن لم يكن هناك تصدق بالزائد عن الحاجه
فلم إذا التطبيق الاعمي ؟؟؟؟
إسعدني وجودي هنا ...
جارتك/ رباب السنهورى

د/عرفه 29 مايو 2009 في 2:12 ص  

mosooz
أهلا بيك مصطفى سعيد جدا بزيارتك الاولى للمدونة
وان شاء الله تنورنا على طول واكيد زيارتك جميلة

بس انا يا مصطفى مش بربط ابدا
بين اللحية وسوء الخلق
لا ابدا
على العكس انا بحترمهم جدا
بس قصدى هو انه مينفعش
يكون كلامنا كله ومجهودنا كله على نقط خلافية اختلف فيها العلماء
ولازم نظبط امورنا فى الامور الاساسية بس

وأكيد انا بحترم جدا الملتحين ومش قصدى الهجوم عليهم

منورنا مصطفى ومنتظرينك دايما

د/عرفه 29 مايو 2009 في 2:17 ص  

moonq8
أهلا بيكِ شادن
سعيد جدا بزيارتك الأولى
ربنا يبعد عننا التعصب
ومنتظرين مرورك دايما
تحياتى

د/عرفه 29 مايو 2009 في 2:24 ص  

د ميريهان
أولا سعيد بإهتمامك بالمدونة ومتابعتها
أكيد بسعد بمرورك

هرد على التعليقين

أكيد أمر اللحية والنقاب وكده
من الدين
ولكن هل ده فرض أو سنة ..؟؟
انا مش فقيه علشان أقل رأيى فى الموضوع
بس اللى أعرفه إنها نقاط خلاف بين العلماء
وإنه مش لازم يكون مجهودنا كله على نقاط الخلاف دى
وإن الخلاف ده إستحالة فرد واحد ممكن يحسمه
وممكن نوفره فى الاساسيات افضل

وباقى تعليقك انا متفق عليه
وانا مش قصدى هجوم اكيد هما زى اى فرد يصيبوا ويخطئوا مفيش مشاكل
وربنا يصلح حالنا جميعا
وشكرا لتعليقك مرة تانية

د/عرفه 29 مايو 2009 في 2:27 ص  

دكتورة نهى
أهلا أهلا بحضرتك
سعيد بتعليقك
أكيد الدين لازم يؤتى كله ولازم نطبقه كله
ده شىء اكيد ومفهوش كلام

بالنسبة للرياضة
ممكن اى حد يشجعه اى فريق بس بهدوء من غير اتباع أسلوب الشماتة والتريقة وما شابه
لأن ده أكيد شىء بيضايق جدا

تحياتى

د/عرفه 29 مايو 2009 في 2:31 ص  

حياتى نغم
أهلا بحضرتك
أكيد الدين بتاعنا دين العقل
وفى أمور عندنا مطروحة دايما للجدال وإختلف فيها العلماء
فمش لازم نتعصب لراى معين
واكيد لازم يكون الانسان الملتزم قدوة لمن حوله

شكرا لزيارتك

د/عرفه 29 مايو 2009 في 2:34 ص  

جنة
أهلا بيكِ
فى زيارتك الأولى
ويارب دايما

أكيد ده بالظبط اللى انا عايز أقوله
ربنا يصلح حالنا
ونقدر نتفاهم بسهولة مع بعض

د/عرفه 29 مايو 2009 في 2:42 ص  

دكتورة نور
أهلا أهلا بحضرتك
كيف حال الشقة دلوقتى
يارب تكون تمام

شكرا على الإطراء الجميل ده
بالنسبة للأخطاء الإملائية
إمممممممم
ممكن بس الناس بتكتب بسرعة
مش لازم نتعاتبهم عن نفسى كتير ممكن أغلط من السرعة بس

ربنا يصلح الحال
شكرا لتواجدك معانا

د/عرفه 29 مايو 2009 في 2:45 ص  

أهلا رباب
أهلا بجارتى العزيزة
ههههههههه
شكرا على الإطراء الجميل ده
وأكيد ده شىء يسعدنى
وانا متفق معاكِ تماما فيما تقولين
ومفيش حاجة أعقب بعدها

تحياتى ليكِ

تامر علي 29 مايو 2009 في 6:28 ص  

متفق معك لكن مثال تطبيق الشريعة ده مش في محله لأن لو الناس غير مؤهلة هم اللي يظبطوا نفسهم على الشرع مش الشرع اللي يظبط نفسه عليهم :)

لأن الشريعة وتعطيلها أكبر أسباب النكبات الحالية

أما باقي الكلام فمتفق معك تماماً فيه

تحياتي وتقديري :)

موناليزا 29 مايو 2009 في 7:41 م  

:) شكلك كده زملكاوى
وبعيدا عن هذا اتمنى ان يأخذ الناس الدين ككتلة واحدة فلا يأخذوا شئ منه حسب هواهم ويتركون الباقى

Unknown 30 مايو 2009 في 12:30 ص  

ما كان الرفق في شيء إلا زانه
وما كانت الشدة في سيء إلا شانه

ويبقى التواصل

هدى التوابتي 30 مايو 2009 في 4:12 ص  

السلام عليكم... أولا جزاك الله خير على مرورك عندي والتعليق بتاعك الأول موصلنيش ضاع يعني وأنا والله براءة بس مش مشكلة أعتبر أن هو وصل خير...ثانيا: التدوينة بتاعك دي فكرتني ببعض الأفكار التي أراها في الجامعة...يعني زي الناس الي رأيها إن التعليم لو ماكنش ديني بلاش منه عشان العقيدة متتزعزش... والناس الي يبصولك كأنك مجرم لأنك عارفة أن في حاجة أسمها النقاب ومش لابساها.. وبعدين في صبع من صوابع أيديكي ظهر وأصبح عورة وحرام... حاجات من دي ..بجد هما قصروا الدين على مظاهر ولكن لما للأسف تتعامل معاهم بتلاقيهم حاجة تانية غير الظاهرة أمامنا بس مش هاقول على الجميع كده البعض يعني...وفي حاجات مش هانكر بيكونوا صح فيها بس أسلوبهم بيؤدي لنتائج عكسية.. هما بيكونوا محتاجين حاجتين في رأيي 1- إن هما يتعلموا فقه الأولويات كويس... 2- يدرسوا الأسلوب النبوي في الدعوة برفق ولين جزاك الله خير على مواضيعك الي هيا بجد متميزة دعواتك عشان الأمتحانات ومعلش طولت عليك....

هدى التوابتي 30 مايو 2009 في 4:14 ص  

وعلى فكرة أنا محلاوية أبا عن جد....

اسماء واحلام فى وجدانى 30 مايو 2009 في 4:22 ص  

اسماء واحلام فى وجدانى

وانت تعرف السبب

اشكرك جدا على رسالتك التى قمت بردها لى والله انا سعيد جدا بيها واعتذر عن التاخير بس انا باحاول على اد ما اقدر ان ارجع وطبعا ده مش هيجىء مرة واحدة اشكرك جدا جدا

غير معرف 30 مايو 2009 في 9:21 ص  

والله فى امور الناس بتعتقد انها جدلية ليس لكونها كذلك ولكن لقلة معرفتهم بها وبالاحديث الصحيحة فيها
ومن قدر على اصلاح شئ فى نفسه ولو لم يكن فى وجهة نظره هو اكبر ذنوبه فليبدأ به ومن ثم سيصل لاكبر ذنوبه ليصلحها فلا تعلم اى شئ منهما الكبير او الصغير ان اصلحته سيصلح الاخر الاهم انه يعلم ان هناك رب ويجب طاعته
اما موضوع تطويل اللحية فهى من السنن المؤكدة باتفاق كل العلماء

ومن الامور الجدلية الاخرى كما يسميها البعض الاغانى والمعازف فحاليا ظهر من يحللها ويقول انها امور جدلية لكن الامور الجدلية هى التى لم يذكر فيها نص صحيح لا من القران الكريم او السنة او عدم ظهور حادثة مشابهة لنفس الواقعة لكن المعازف بها نص حديث صريح للرسول وصحيح عن بن عباس وفيها تفسير ايضا لابن عباس وغيره من الصحابة وكلها تحرمها فلا يعقل ان نقول انها محل خلاف كما يقول شيوخ الطلب


فمعظم المور الجدلية الان ليست جدلية فى حقيقتها وانما هى جدلية لنا لجهلنا بها وعدم معرفتنا بحكمها الصحيح

محمد سعد القويري 30 مايو 2009 في 10:53 ص  

أخي الفاضل :: د.عرفة ::
السلام عليكم ورحمة الله
وبعد
طرحٌ جميل لموضوعٍٍ هام وحساس ..
وعندي بعض الهمسات ...
الهمسة الأولى : إن التعميم مشكلة ، فعلاً قد يوجد من بعض الملتحين غلظة ونقص فهم في الدين فيظن أن قضية اللحية والثوب هي التي يبنى عليها أمر الخروج من الملة .. وإن كان عندي توجيه في هذه المسألة ... لو وجدنا شخصًا ملتحيًا وهو عاق مثلاً هذا لا يمنع أن نقبل نصيحته مع أن الأحرص والأروع أن يكون كاملاً ..أرجع وأقول أنه ليس كل الملتحين توجد لديهم هذه الظاهرة الجدلية ..
الهمسة الثانية : ما الذي يمنع من النقاش والحوار الهادئ ؟؟
فمثلاً أنت يا دكتور لا ترى في امر اللحية وأنا أرى في وجوبها ..
ما المانع أن جلس مع بعضنا ونتحاور بهدوء إما أن تقنعني أو أقنعك وإذا لم نقتنع فلتبق المودة وليبق الصفاء بيننا .
الهمسة الثالثة :أنا ضد التعصب بكل أنواعه إلا التعصب لما علم من الدين بالإجماع أنه حق .
أخيرًا ..
أظن أن هدفك السامي من هذه المقالة وصل ، ألا وهو :
أن الرفق واللين ما دخل في شيء إلا زانه وما نزع من شيء إلا شانه .

د/عرفه 30 مايو 2009 في 1:49 م  

تامر على
أهلا بيك تامر

منورنا

بالنسبة للشريعة ان متفق معاك انها امر واجب تنفيذها
بس يعنى يمكن محتاجة فترة انتقالية كده علشان الناس تتعود
مهى برضه لما نزلت زمان الاحكام مكنتش كلها مرة واحدة


على العموم
يارب تطبق اين كانت الكيفية


تحياتى ليك تامر

د/عرفه 30 مايو 2009 في 1:56 م  

موناليزا
اهلا بيكِ
منورة
اكيد الدين لازم يتاخد كله ده شىء مفروغ منه

واكيد زملكاوى طبعا
وقلبى ابيضانى كمان

تحياتى

د/عرفه 30 مايو 2009 في 2:45 م  

أستاذ معتز شاهين
منورنا فعلا
وكلماتك رائعة

تحياتى

د/عرفه 30 مايو 2009 في 2:47 م  

دودى
أهلا اهلا
بيكش
وبكل المحلاوية
وانا برضه ابا عن جد

كلماتك رائعة
ورأيك
سليم تماما

شكرا لزيارتك

د/عرفه 30 مايو 2009 في 2:50 م  

أسماء وأحلا فى وجدانى


إزيك يا أحمد
منورنا بزيارتك
فعلا

انا اللى أسعد يا احمد
وسعيد بصدقاتك
وبقلبك الحساس ده

تحياتى

د/عرفه 30 مايو 2009 في 2:59 م  

هند
أهلا بيكِ
ومن زمان منورتناش بيعليقك

سعيد بتعليقك
فعلا لازم الواحد يتعب شوية فى البحث عن المعلومة الصحيحة وياخد الراى اللى يحس انه اقتنع بيه
بالنسبة لإصلاح الذنوب
يعنى ده مثال بس انا قولته
بس مهم نرتب اولوياتنا فعلا

ونهتم بأساسيتنا والامور المتفق عليها أكتر

وانا مش مختلف كتير مع كلامك
وياريت اكون قدرت اوضح انا عايز اقول ايه
من خلال الموضوغ والتعليقات كمان

تحياتى

د/عرفه 30 مايو 2009 في 3:03 م  

محمد القويرى
ازيك محمد
منورنا والله
وهمسات رائعة طبعا

اولا
انا مش بعمم ابدا
انا بنكر موقف معين من متعصبين بس
ومش بعمم خالص
ثانيا
انا مش بنكر امر اللحية
بل على العكس تماما
ده انا مدحت الملتحى وقلت انه صاحب همة عالية
كمان

ثالثا
اظن ان قصدى وصلك فى الاخر
وسعيد بتعليقك الهادى الرزين
واللى انا بحبه دايما

تحياتى

القمر الساهر 30 مايو 2009 في 6:29 م  

سلام عليكم

انا فاهمة قصدك كويس

وانا اتفق معاك ان التعصب اولا بيخسر الانسان قضيته وبيخسره اللي حواليه وبيخسره نفسه

وكنت هانوه على شيء بس غربتي قالت فيها كل اللى عيزاه

والله بحس ان الدين بيشتكي وبيقولنا كفااااااااايا

ماسكين في صغائر الامور والامة مش محتاجة دلوقتي نعقد نتكلم في امور مختف عليها قد ما محتاجة اننا نطور من نفسنا ونعيش على مبدأ التنمية بالايمان

فامتنا بجد محتاجة اننا ننهض بيها مش ننزل بيها فى الوحل اكتر من كدا

جزاك الله خيرا

مذكرات مشاغب 31 مايو 2009 في 2:08 ص  

ايه ده ده الموضوع كبير والمناقشه ساخنه جدا
انا مليش دعوه يا عم
انا بس هعلق على حتة النادي الاهلي(بصفتي اهلاوي اوي)
اولا شعار الاهلي فوق الجميع المقصود بيه ان الاهلي فوق مصالح الجميع داخل النادي الاهلي
وده كان شعار اثناء الانتخابات بسبب وجود بعض المرشحين كانو بيضربو تحت الحزام فرفع حسن حمدي شعار ان مصلحة الاهلي فوق مصلحة الجميع داخل النادي الاهلي
بس المشكله ان كتير فهم الشعار غلط سواء عن عمد او دون عمد
والمشكله كمان ان انديه كتير اخدت الشعار ده بدون فهم لمعناه.

ثانيالما يكون فيه نادي عدد بطولاته اكبر كثيرااااااا من عدد بطولات جميع الانديه مجتمعه
ولما يكون نادي عدد جماهيره اكبر من عدد جماهير جميع الانديه مجتمعه
ولما يكون نادي تكون استثماراته وشهرته اكتر من جميع الانديه مجتمعه
فالمفروض ان ابسط حاجه ان يكون فيه اعتراف ان النادي ده هو الافضل
لكن لما تجد انكار لده واتهامات غريبه بمجاملة التحكيم وتلاقي كل الانديه وحوش قصاده فلازم بالطبع انك تستغرب وتسال عن السبب

ثالثا احمد عيد سبب غضب الجمهور منه انه ضرب احمد على لاعب الاهلي من غير كره ومن غير سبب ولا كانه كان هياخد كاس العالم وبالطبع معروف احمد عيد سلوكه عامل ازاي حتى في ماتش عمان بتاع النهارده كان هيعمل اومه من غير لازمه.

كفايه كده اصل انت متعرفنيش انا الكلام في الاهلي عامل فيه زي الحنفيه اللي من غير جلده.

تحياتي

MaNoOoSh 31 مايو 2009 في 3:56 ص  

انا حقيقى مبستوعبش ليه الناس بتسيب حياتها وحاجات مهمة قوي فيها وتمسك فى نقط قتلت جدلا.

وكمان التعصب بيخلى الاخر يكره المتعصب وميقبلش منه اى توجيه أو نصيحة.

الامثلة اللى انت قلتها كانت ناجحة جدا فى توصيل الافكار
تحياتي لك

Unknown 31 مايو 2009 في 5:17 م  

السلام عليكم ورحمة الله وبركاتة
اولا شكل حضرتككدا زملكاوى
هههههه
ثانيا مينفعش انك تقول على المتعصبين ان اغلبهم مش بار باهلة اومعندوش ترتيب للاولويات
معلش هكمل بعدين
اصل سلمى بتثبت وجودها
سلام مؤقتا

ناصــــر 31 مايو 2009 في 9:46 م  

السلام عليكم
تشرفت بزيارة مدونتك التي الأفكار الموضوعية البناءه

نحن في هذا الزمن ضاع منا الميزان
ضاع منا ميزان تحديد المسلم والمتأسلم
أنا أدعوك شخصية لزيارة مدونتي وقراءة " أستغرب"

وفقك الله

Beram ElMasry 2 يونيو 2009 في 2:07 ص  

والله يا اخي الكريم كان من الصعب علي ان اكتب او ارد فاعذرني والله انا بسعد جدا باهتمامك وودك الصادق.
تحياتي والسلام ولا سلام مع اليهود

Unknown 2 يونيو 2009 في 8:15 ص  

السلام عليكم ورحمة الله وبركاتة
انا جيت تانى
اكيد نورت البيت
المهم
انا مش مع المتعصبيين
ولكنى ضد اتهام اكثرهم بالتقصير فى حق اى حد
ممكن تقول بعض منهم ولكن لا تستطيع ان تقول اغلبهم
دا رأى
والاختلاف لا يوفسد الود قضية
ولا اية ؟؟؟؟؟؟؟؟؟؟؟؟؟؟
دمت بالف خير

د/عرفه 3 يونيو 2009 في 10:49 م  

القمر الساهر
اهلا اهلا
سعيد بزيارتك
وهو ده بالظبط اللى انا قصدته فى موضوعى
جميل ان الفكرة وصلتك مظبوط


تحياتى

د/عرفه 3 يونيو 2009 في 10:51 م  

أحمد صقر المشاغب

اهلا بيك يا احمد يا اهلاوى
واكيد مبروك على الدورى
لو كان المعنى كده
اكيد مكنش فى حد هيعترض
لكن المعنى المنتشر طبعا هو الاهلى فوق الجميع
وده الشعار اللى بيخلى كتير يرفضه
واكيد مفيش حد ممكن يعترض على ان الاهلى اكثر الفرق بطولات



ياريت كل الاهلاوية منطقيين زيك كده يا احمد
تحياتى

د/عرفه 3 يونيو 2009 في 10:52 م  

منووش
اهلا اهلا
سعيد بزيارتك الاولى ويارب تتكرر

اكيد كلامك مظبوط
وهو ده بالظبط اللى انا قاصده فى كلامى

تحياتى

د/عرفه 3 يونيو 2009 في 10:54 م  

المجاهد
اهلا اهلا
منورنا
وخصوصا انها زيارتك الاولى

رايك تمام
وانا قريت موضوعك
واظن ان احنا متفقين كتير مع بعض

وجزاكم الله خيرا

د/عرفه 3 يونيو 2009 في 10:55 م  

حتى تشرق الشمس

اهلا اهلا
واكيد منورة على طول مفيهاش كلام
سعيد بالزيارتين
وباهتمامك كمان
انا مش بتهم حد ومش بعمم
انا بعترض على مواقف معينة بس
انا بحترمهم
ومش مختلف مع كلامك كمان

تحياتى

د/عرفه 3 يونيو 2009 في 10:57 م  

أستاذ بيرم

اهلا اهلا
استاذنا الكبير

يارب تكون صحتك تمام دلوقتى
وبراحتك خلاص استاذنا
لو تعذر عليك التعليق والقراءة
فلا تتعب نفسك
احنا بنحبك على طول وحريصين على جميع كتاباتك
وفقك الله وحفظك
وشفاك
ولا سلام مع اليهود

محمد التميمى 6 يونيو 2009 في 12:36 م  

مهما كان الواحد على غعلم بحاجة
فمش لازم يفرض رايه على حد بداعى العلم
وضح رايك وخلاص انما متحاولش تفرضه على حد
وهو لازم يعنى عشان واحد متدين يبقى يفرض نفسه وصى على بقية الناس؟

النسر المهاجر 9 يونيو 2009 في 2:04 م  

أولا أشكرك يا دكتور على مدونتك الجميلة وبالنسبة لموضوع البوست فكلنا يعلم أن الدين يسر وما خير رسول الله بين شيئين إلا إختار أيسرهما وبالنسبة للحية فهى سنة عن الرسول عليه الصلاة والسلام فمن أخذ بها له ثواب ومن لم يأخذ بها لايجازى ولو كانت سنة مؤكده فإنه يعاتب ولكن فى مجتمعنا إطلاق اللحية يجعل الانسان فى وضع ليس محمود عليه يقال أنه أرهاب وجماعات ويدخل أمن دولة ومتاهات ما دامت أنها سنة ونحن فى مجتمع ظالم فمن الأيسر أن من يريد إطلاقها فله ذلك ومن لايريد فلا نعترض عى ذلك فقد يربيها رجل أعمال حر مصالحة بعيدة عن الحكومة إنما رج يعمل فى وزارة د تسبب له مشاكل
والذى يدعوا للحية بهذه الطريقة كمن يريد إن فعل صحيح فهو صحيح وإن فعل خطأ فهو صحيح .أرجوا ما دام المسألة خلافة فى الفقه أن يترك كل شخص وإختياره ويجب علينا ان نتخذ السلوك الإسلامى الصحيح. وجزاك الله خيرا

د/عرفه 9 يونيو 2009 في 6:51 م  

محمد التميمى

شكرا ليك محمد

انا معاك فى كلامك ده
ومتفق معاك طبعا
ومنتظرين تعليقاتك على طول

تحياتى

د/عرفه 9 يونيو 2009 في 6:52 م  

المهاجر

أهلا أهلا
ده من ذوقك بس

كلامك جميل
ومتفق معاك

ومنتظرين زياراتك عندنا على طول

تحياتى

Eren 26 أغسطس 2023 في 2:23 ص  

salt likit
salt likit
dr mood likit
big boss likit
dl likit
dark likit
JQQ1UC

إرسال تعليق