الشبح

انا مش قديم فى إستعمال النت يعنى تقريبا لم أكمل عامى الأول بعد
وهو بالفعل عالم آخر مختلف تماما

قبل كده انا كنت بعيد جدا عن الإختلاط
أه كليتنا مختلطة
بس تقريبا الروند بتاعى صبيان بس

ومش بحضر محاضرات ولا بقف كتير أمام الكلية
يعنى تقريبا كده إختلاطى الجنس اللطيف من بعيد أوى
وكده الوضع مريح جدا

الموضوع إختلف مع وجود النت
الإختلاط موجود ولا مفر منه
ممكن على الإيميل أو على الفايس بوك أو من خلال المدونات والمنتديات وما شابه
وعن الإختلاط ده سمعت أراء كتير
حتى أن بعضهم وجد أن هناك شبهة حتى فى الردود من خلال المدونات والمنتديات وليس فقط الكلام المباشر

انا لما سمعت الكلام ده زمان إستغربت كتير وقولت فى نفسى أكيد صاحب هذه الفتوى غير متعامل مع النت نهائى
وكمان معقد زيادة عن اللزوم
وده كان رأيى من زمان
ولكن من خلال خبرتى واللى مش كبيرة أوى برضه
لقيت إنه مع طول مدة التواصل والجلوس على النت
وجدت إن الموضوع ممكن بيشغل حيز من التفكير وجزء من حياة الفرد
ولقيت إنه مع تكرار كلمات الشكر والتحية والمدح والثناء
أكيد تلك الكلمات بتأثر وتفرق مع الناس
والأكتر من كده
إن كل واحد ممكن يجد الراحة من خلال التعامل مع بعض الأفراد على النت
وممكن يهفو قلبه لملاقاتهم والحديث معهم وجها لوجه
وخصوصا
إنه حتى الأخوات المحترمات يجدوا شىء من الحرية فى التعامل مع النت
وتراهم أحيانا يتركوا العنان لأنفسهم فى الحديث والكلام مع الطرف الأخر

مما قد لا يجدونه فى حياتهم الواقعية
بصراحة كده
لما المواضيع توصل لهذا الحد يبقى أكيد الموضوع فيه شبهة

طيب
والحل
لما أفكر كده إن إحنا نفصل ونمنع الإختلاط على النت
أكيد هيكون الحل ده درب من دروب الخيال
وصعب جدا تنفيذه
طيب
يعنى مفيش حل
لأ
فى الأول كده لازم الواحد يحاسب شوية فى كلامه
ومياخدش راحته أوى فى الكلام كما هو الحاصل الآن
بالنسبة ليا
فكرت بينى وبين نفسى لقيت إن الواحد لازم يفصل بين حياته اللى هو عايش فيها
وعالمه على النت
وإنه ممكن يتواجد على النت على هيئة شبح كيان هلامى
يعبر بيه عن شخصيته وأفكاره فقط
بعيدا عن كيانه المادى
الذى يتواجد عليه فى حياته الواقعية

وأكيد الشبح لما بيتعامل مع الأشباح اللى زيه
بيكون مش فارق بيتعامل مع ولد أو بنت
مش فارق البنت دى متجوزة ولا لأ
ولا فارق حلوة ولا وحشة
لأنه بيتعامل مع أشباح
وأكيد يا جماعة الشبح ده
مش بتظهر له صورة علشان هو شبح
وأكيد كمان مش بيطلع له صوت
علشان متخافوش منه

يعنى من الآخر كده إنه اللى بيكتب ليكم دلوقتى
مش محمد عرفة
لا لا لا لا

ده
الشبح محمد عرفة
عووووووووووووو


63 رأيك يهمنا:

أحمد سعيد بسيوني 8 مايو 2009 في 1:35 ص  

هو الموضوع قلب بهزار في الآخر كده ليه

هاقراه تاني وارجعلك

أحمد سعيد بسيوني 8 مايو 2009 في 1:42 ص  

بص يا سيدي

اختلف معاك تماما في حكاية الشبح دي

بل على العكس

انا اؤيد وبشدة فكرة التواجد الواقعي على النت باسمك وشخصك وفكرك

وباشوف ان اللي متخفي ده -من وجهه نظري البحتة- مش واثق في نفسه ولا في امكانياته وحاسس انه فيه حاجة مش كويسة وانه لازم يخفيها

سيدي الفاضل
الحل ليس في تحويل عالم الشبكة العنكبوتية الى عالم اشباح
ولكن الحل في وضع حدود وحواجز ومباديء وقيم -تكون عادة من الشخص لنفسه- تمنع ما اشرت اليه في موضوعك

كان معكم من خلف الكيبورد
احمد سعيد بلحمه وشحمه ودمه التقيل

لكن
شبحي ممكن تلاقيه في العالم السفلي

دعواتك يا شبح

أحمد سعيد بسيوني 8 مايو 2009 في 1:43 ص  

الا صحيح

هتنزل الجزء التاني امتى

*****
خبر فني :احمد عز هينزل جزء تاني من فيلمه الشبح1

أحمد سعيد بسيوني 8 مايو 2009 في 1:45 ص  

اية ده يا ربي

تلات تعليقات

هو انا ماورياش الا مدونتك ولا اية

د/عرفه 8 مايو 2009 في 1:48 ص  

هههههههههههههههههه
ما شاء الله
ايه الحلاوة دى يا احمد
منورنا

د. ياسر عمر عبد الفتاح 8 مايو 2009 في 1:55 ص  

ياماااااااا

كلامك مظبوط يا دكترة
الإختلاط أفة كبيرة جداً
ورغم عنا بنقع فيها
وربنا يعافينا

walaa rizk 8 مايو 2009 في 1:55 ص  

ااختلف معاك يادكتور

تقريبا بقالى فتره تعتبر اكثر من سنتين على النت

ومع التجربه اكتشفت اشياء كتيره

اهمها ان التوازن مطلوب فى كل حاجه

وان للردود حدود سواء هنا او فى منتدى الكليه عندى مثلا او الفاس بوك

اما الايميل

فى وجهه نظرى ان الاضافات يكون لها سبب منطقى يعنى ف ناس شغلها لا يتم الا بالايميل

كده يعنى

وبعدين انا واحده من الناس تواجدى ع منتدى الكليه كان مبهم واتعرف عن طريق النشاط فى الكليه

واسمى المستعار مش عشان مش عاوزه حد يعرفنى

لكن لعشقى للأسم

نحن نريد نفسنا على العالم الافتراضى بواقعيه

ربما نكون اسماء مستعاره لكن نتكلم عن حياتنا

ربما تضعنا بعض الاعمال للتعامل مع الآخر فى الحقيقه
وساعتها فعلا انا لا أجد اى مفر الا بالتوازن

هذا ما تعلمته ممن سألنهم

وبس

د/عرفه 8 مايو 2009 في 1:57 ص  

أهلا بيك دكنور ياسر
سعيد بوجودك
فعلا الاختلاط آفة كبيرة

د/عرفه 8 مايو 2009 في 2:03 ص  

عاشقة الأقصى
اهلا بيكِ
بس ده مش قصدى

انا قصدى بس
ان الواحد لما يجى يتعامل مع الطرف الأخر
وده شىء لا مفر منه على النت
ان الواحد يتعامل من خالال شخصيته بس
اه ممكن يكون فى اسم مش مشكلة
بس ميكونش حاطط فى دماغه اللى قدامه
وصورته وهيئته وكده
ويكون مش فارق معاه
وهذا ما قصدته
مع مزيد من الحرص فقط
تحياتى ليكِ

عربي نيوز 8 مايو 2009 في 2:08 ص  

السلام عليكم

أخي الكريم..د.عرفة
ربما يلامس كلامك عين الصواب
فالكلمة لها مكان بالقلب وان لم تشاهد صاحب الكلمة
لكن عندي اعتراض على نهاية كلامك
فالانسان منا ليس شبحاً في عالم الانترنت
اي ليس كل واحد من يلبس قناعاً مجهولاً يخفي خلفه شخصيته
افكارنا وكلامنا وتعليقنا هو اكبر دليل على ما نحمله من افكار،، وهو كفيل بمعرفة شخصية كل شخص فينا

بارك الله فيك وحفظك الله للاسلام والمسلمين

لا تنسوا اخوانكم في غزة من دعائكم

||..بحـر الدموع..||

بنجاواتى 8 مايو 2009 في 2:10 ص  

يا دكتور ايه الكلام اللى بتقوله ده؟؟
يعنى ايه اختلاطك قليل وده احسن؟؟؟ما لكش حق (وش شرير)

عندك حق يا دكتور فى ان الحاجات اللى بتتقال ما بتعديش من غير ما تسيب أثر

بس ما عندكش حق فى موضوع ان الواحد يكون شبح لان الانسان عنده قلب واحد
وما جعل الله لرجل من قلبين فى جوفه

يبقى عليك يا بطل انك تشوفلنا حل تانى-يعنى لو انتى بيوتك يكون كويس-

من ارض الاشباح سلامى

د/عرفه 8 مايو 2009 في 2:11 ص  

بحر الدموع
اهلا بيك
ودايما بسعد بوجودك معايا
بس
انا مش قصدى ان الواحد يخفى شخصيته
انا قصدى انه يخفى كيانه المادى بس
وليست شخصيته

ايومي 8 مايو 2009 في 2:14 ص  

انا حالا كنت باتكلم مع صاحبتي عن الموضوع
ده,وكانك كنت بتسمعنا,
وكنت فعلا بنتكلم ان في بنات محترمه وشباب ملتزمه بقت تعليقاتهم منفتحه اوي
وبقوا يتبسطوا زياده مع بعض,
وكنت على وشك نصح احدى البنات,بس تراجعت,بصراحة خفت تزعل مني,
بس انت وجهت دعوه عامه,
ويارب يقدرنا كلنا على اللي يرضيه,
كلمات المدح ليست حراما ولكن لها حدود,والطلب والنقد,والاستفسار مش حرام بس كل شيئ وليه قواعد,
والاعجب انك تجد اختلاف تعليق الفرد نفسه حسب الشخصيه,
ان كان من امامه منفتحا تجده منفتحا وان كان قاصرا تجده مقتصرا في الكلام,
يارب في ميزان حسناتك وينفعنا ويقدرنا.

د/عرفه 8 مايو 2009 في 2:22 ص  

أهلا أهلا
ببنجا الكبير
منور يا مصطفى

انا عارف ان الشبح ده ممكن ميكونش فعال اوى

بس مهو انت دكتور قد الدنيا انت كمان
دورلنا على انتى بيوتك فعال
هههههههههههه

منورنا يا مصطفى

د/عرفه 8 مايو 2009 في 2:27 ص  

أيومى
اهلا بيك
انا عارف ان الموضوع ده خصوصا واخد جزء من اهتماماتك
ويمكن تكونى سبب انى اكتبه
مع بضعة اسباب اخرى

فعلا
كده ولا كده
لازم نحاسب فى التعامل
ولازم كمان نفصل كيانا المادى عن ما نظهره على النت
تحياتى ليكِ

ghorBty 8 مايو 2009 في 2:28 ص  

السلام عليكم ...

موضوع يستحق التقدير ..ومواجهه لكل واحد فينا بجد ان يقف قدام نفسه ويعرف كويس ان اللي بيعمله في هذا العالم الافتراضي سيحاسب عليه كما وكانه في عالمه العادي

ولا يوجد انفصال ابدا بحجه ان هنا لا يري من الجهه الاخري او انه يعتبر شخص غير معروف الهويه الا من خلال كلمات تكتب يكفي ان الله يراه والملائكه تكتب ( وكل صغير وكبير مستطر ) وهذا هو الشئ المهم

فالذي يشعر بمعني الله الرقيب سيراقب نفسه ويضبطها في اي مكان كان والحدود المعروفه بين الرجال والنساء في الواقع يجب ان تكون هنا ايضا فليس هناك اي فرق الفرق فقط يكون في ذوات النفوس الضعيفه ولا يعلمون اي معني للحياء .. وكلما حاولت ان تنصح تجد الاجابه باننا اخوات مع بعضينا ولا حول ولا قوة اٍلا بالله
وتجد الكلام يتطور وعلي الملا والله الاخوات ما بيتكلموا مع بعض كدا ولا بيهزروا كدا ...

الحل لازم يكون نابع من داخل كل واحد فينا ويراقب نفسه وينصحها بما يحب ان يجده مكتوب في صحيفه اعماله يوم العرض علي الخالق ...

ولازم يكون كل واحد عنده مبدا ماشي عليه مش بيتكلم مع الاخوات الملتزمات بوجه ومع الاخريات بوجه اخر الصراحه انا لما بشوف كدا الاشخاص ديه بتنزل من نظري وانا اسفه اني اقول كدا وفي الاخر كل واحد حر يعمل اللي هو عايزه بس احنا لو اخوات بجد نعين بعض علي الشئ الصح اللي يرضي ربنا عنا ..

احنا هنا بنتعامل مع بعض وبنتعلم من افكار بعض لكن الكلام الزائد عن العادي والهزار والمجاملات المبالغ فيه لا تصح باي حال من الاحوال ودا كلام عادي بعيد عن الحلال والحرام لان الحرام والحلال واضح للكل وان كان البعض يتكبر عن فعله ..

ونسال الله ان يكون راضي عنا .. وما يجعلنا ممن يدخلون للتسليه وتضيع الوقت بما لا ينفع

بارك الله فيك .. واسفه للاطاله .. ولكن فتحت المجال لقول الكثير وربما يكفي ذلك حتي لا يقال اني انسانه معقده ..

والسلام عليكم ..

د/عرفه 8 مايو 2009 في 2:35 ص  

أهلا بيكِ
غربتى
انا برضه بقول كده
ان الواحد لازم يحاسب فى كلامه اين كان الشخص اللى بيكلمه
الموضوع شائك اكتر من كده كمان
والله
ومش عارف بعد ما كتبت حسيت انه موصلش للناس كمان زى ما انا عايز
بس انا فرحان انك فهمتى شوية انا عايز اقول ايه
وربنا يجعل كلامنا فى ميزان حسناتنا ان شاء الله

شاكر لزيارتك ومرورك الكريم

ghorBty 8 مايو 2009 في 2:39 ص  

السلام عليكم

اسفه لتاني تعليق بس مجرد طلب

بجد ياريت الموضوع دا مش يبقي مجرد ردود بفعلا عندك حق يكون فتح للحوار لنصل لنقطه يرتاح اليها الجميع ونجد فيها حل يرضي الله عنا ..

وجزاكم الله خيرا

ايومي 8 مايو 2009 في 2:40 ص  

حاولت انا ان اختصر قدر المستطاع,
فكانت كلمات صديقتي (غربتي) والتي كنت اتحدث معها عن الموضوع قبل كتابتك اياه,
كلمات افاضت فيها ما احببت قوله ولخصت كل ما يمكن ان يقال,
عن نفسي صعب عليا حكاية فصل كياني الواقعي عنه في النت,
ولكن بحاول ان اجعل هناك حدود,وان ما اتخذته من مبادئ في حياتي ان ارسخه واطبقه في اي مكان اتواجد فيه,
واسال الله العون لي ولكم.

د/عرفه 8 مايو 2009 في 2:45 ص  

فعلا معاكى حق غربتى
هو يمكن فعلا الموضوع فتح للحوار ولإيجاد حل
علشان احيانا المواضيع يتوصل لمرحلة شبهة فعلا
لما بعض الناس بتاخد راحتها

وياريت نقدر نوصل لحل مناسب

walaa rizk 8 مايو 2009 في 2:49 ص  

ايوه حضرتك عندك حاجه طبعا

التعامل تعامل افكار وليس شخصيات على النت

اللى بيدخل مدونتى مش هيقعد يمدح فى انا كشخصيه

ولكن هيعلق بالسلب او بالايجاب على فكر انا بعرضه وبس

د/عرفه 8 مايو 2009 في 2:49 ص  

أيومى
انا عارف انه يمكن الحل اللى انا اقترحته مش مناسب لناس كتير
بس يعنى انا بحاول لما بتعامل مع الناس على النت
مش بحاول اتصور حد فيهم
وبتعامل معاهم كلهم على انهم كيانات بس بعيدة عنى
فبيكون مش فارق معايا ظروفهم ايه

واكيد انه اول حل انه لازم
نحاسب فى تعاملنا شوية وده شىء اكيد
والواحد مش لازم ياخد راحته

د/عرفه 8 مايو 2009 في 2:51 ص  

اكيد عاشقة الاقصى
يعنى لما
اكتب عندك مثلا
ما يفرق معى كيانك المادى
ولكن اتعامل فقط مع ما تعرضينه من افكار واراء

والحمد الله ان فكرتى كده وصلت

ايومي 8 مايو 2009 في 3:03 ص  

معلش حابه اوضح حاجه,
وآسفة جدا جدا على كتر التعليق,
ماشي احنا كده كده بنتعامل مع افكار,لان اغلبنا ما يعرفش الاشخاص دول في الواقع,
بس حتى لو كده لازم يكون في حدود,
لان احد الاخوه قال مره لا مجال للفتنه بينا مادام اننا مش شايفين بعض ولا عارفين بعض,
وانا مش معاه,
وكمان مثلا مش معنى ان ذكر بيكلم انثى وحتى ولو في مقام والدته انه يتبسط او العكس,
قصدي ان لو حتى تصورنا وفكرنا في ان الشخص ده مستبعد لنا في الواقع ده لا يحل لنا اننا نتبسط معاه وناخذ ان العمر او بعد المكان او عدم اتاحة الوصول او الظروف حجة نتحجج بيها في احلال الحرام او التبسط فيه.

د/عرفه 8 مايو 2009 في 3:10 ص  

أيومى ولا يهمك من كثرة التعليق
هو ده بالظبط ما عنيته من كلامى
انه يمكن فى ظروف معينة حاليا مش هتشوف اللى قدامك
بس يمكن الامور تتبسط اكثر وتتاح فرصة انك تشوف اللى قدامك
خصوصا مع طول التواصل والحوارات
وخصوصا على الايميل
وهذا ما عنيته ان الواحد يحاول يفصل
وينسى انه ممكن يشوف او يقابل


علشان كده
اين كان من نتعامل معه
لازم نتحرص شوية
وانا بأيدك فى باقى طرحك للموضوع
او حتى ممكن تتاح الفرصة بكده

fnoonh 8 مايو 2009 في 5:42 ص  

اولا طبعا انا مش خوفت ولا حاجة
هههههههههههههه
انت عارف بابا مرة كلمني في الموضوع ده اول مادخلت عالم التدويين عشان يعرف ايه طبيعة العلاقة اللي بتكون بين المدونين وخصوصا اني قولت له انه في جنسين ممكن تتعامل معاهم مش جنس واحد
اتناقشنا في الموضوع واقتنع بكلامي لما قولتله ان عالم التدوين ده زي الخيال
اللي بيعلق عندك او بيكلمك انت مش تعرفه ابدا غير من بعض الكلمات البسيطة اللي مستحيل تحكم على شخص بعينة او تحدد شخصيته ويادوب بتكتفي انك تشكره على تعليقه او بتبدي اعجابك بكلامه اللي كتبه

يعني فعلا انا متفقه معاك انه زي الاشباح مافيش صوت مافيش صورة اذن مش ممكن قلبك يميل لشخص ابدا من مجرد كلمات بسيطة

بس ده طبعا مش يخلي الانسان يتعدى حدود الكلام
لابد انه يكون محترم مع الناس
وفي الاول ولا في الاخر ده بيدل على شخصيته واحترامة
ولابد لابد لابد ان كل واحد فينا يراعي مراقبة الله ليه حتى لو كنا فين يعني نتذكر الحكاية دي في كل الاوقات


بس بئة بالنسبة للمحادثة على الايميل او على الشات فدي انا قرات وسالت عنها وعرفت انها فعلا محرمة
لانها بتكون طويلة وممكن ساعتها يميل القلب من كتر الكلام مش مجرد تعليق ورد وسلام
لا دي اجابات واسئلة وممكن تتطور الحكاية لصوت فصورة ف ف ف ((والشيطان بيجرى في ابن ادم مجرى الدم في العروق))
فسدا للشبهات ومنعا للفتن انه الافضل الانسان يتجنبها

موضوعك مهم جدا تسلم ايدك
تقبل خالص تحياتي

Unknown 8 مايو 2009 في 7:57 ص  

السلام عليكم ورحمة الله تعالى وبركاته
وصباح الخير والخيرات صباح يوم الجمعة
خير يوم طلعت فيه الشمس من مشرقها
اقولك كلام مضبوط وصح وفعلا الانزلاق
الى (المعرفة الوثيقة )او اكتر حتى سهل
جداً على النت طيب الحل ايه ياطبيبة؟
نفسك ثم نفسك ثم نفسك !ان تفوقها كل
شوية لما هى مقدمة عليه من(التعود
او الاعتياد على كلام هذا الشخص او ذاك)
لازم كل شخص يعىّ خطورة الامر عليه وعلى نفسه!

Unknown 8 مايو 2009 في 7:59 ص  

بس كده انت حيرتنى
انت دكتور عرفة
ولا شبح الشيخ
عرررررررررفة

احمد 8 مايو 2009 في 12:44 م  

أخي د. عرفة
السلام عليكم ورحمة الله وبركاته
التوازن مطلوب والوسطية ضرورة ..
وجودنا بأشخاصنا الحقيقة ممتاز .. لكن أنا شخصياً ممكن أقول أشياء وأنا متخفي أحسن من وأنا معروف .. يعني فكرة الشبح تروقني لحدً ما .. والاختلاط بين الجنسين في المنتديات والمدونات قد يؤدي إلى ما هو أبعد .. ومن باب سد الذرائع يجب أن نكون حريصين كما ذكرت .. يعني كما قلت يحاسب في الكلام .. ويختار الكلمات الواضحة التي لا تحتمل التأويل . بارك الله فيك ووفقك لكل خير
أخوك / احمد

amany 8 مايو 2009 في 2:54 م  

ههههههههههه..ايه اللى حصل فى الاخر ده ؟؟ ههههههه
اتفق واختلف

موناليزا 8 مايو 2009 في 5:11 م  

طيب ياسيدى
اهلا بيك يا استاذ شبح

محمد عبد الباسط 8 مايو 2009 في 5:41 م  

الموضوع رائع لكن ليه التخفي مادمت انا صح ؟؟

المعتصم 8 مايو 2009 في 6:07 م  

بسم الله الرحمن الرحيم
السلام عليكم ورحمة الله وبركاته
د/عرفه
تحياتى
شبح مين وبتاع مين
احنا مش بنتهدد
والحلف بتاعنا هيحتل الحلف بتاعكم اياك تعملوا عفاريت حتى
ماتحاولش ياعرفه
ههههههههههه
...........
انا معاك فى موضوع انه الواحد لازم يفصل بين الواقع بتاعه والعالم الخيالى اللى على النت ده
ويحاول جاهدا انه مايمشيش ورا نفسه اللى ممكن تتعود على حد معين من اصحاب التعليقات او من الناس اللى بيتكلم معاهم على النت
لانه كده وبكل تأكيد بيعمل حاجه غلط واكيد ربنا هيحاسبه عليها
وعلشان كده لازم يكون فيه حدود واجب اننا لانتخطاها
موضوع جميل والكلام فيه بجد كلام مفيد وخصوصا التعليقات (او بمعنى اصح النقاش)اللى حاصل بينكم انت وايومى وغربتى وكل الناس اللى بتعلق عندك
وادينا متابعين وربنا يكرمنا ويبعدنا عن الغلط
اللهم امين
تحياتى يادكترة ودمت بكل خير وود
والسلام عليكم ورحمة الله وبركاته

محبة الرحمن 8 مايو 2009 في 6:37 م  

موضوع رائع يناقش قضيه شائكه

ارقتنى كثيرا كما ارقتكم

لدرجه اننى كنت فى احدى المنتديات لا ارد

الا بجزاكم الله خيرا

ودعاء للكاتب

صراحه احيان كتير لغاية دلوقتى بفكر

هل مجرد انى اتكلم

او اعلق على شىء

حلال

عجبتنى اوى فكرة الاشباح بفهمى ليها

وارجو من حضرتكم التوضيح

انا فهمتها على اساس

انى مش اتعامل مع الانسان الاخر كاخر

يعنى لو شاب بيعلق ع بنت مش يعلق على اساس انها بنت بقى

فيزوق التعليق ويخضع بالقول

لكن يتعامل على اساس ما كتبته لانه بيعلق

على موضوع بتشوفه وهتشوفه ناس كتير جدا

فلو الفكره كويسه يبقى هيدعمها

ولو فيها خطا ما يبقى هيقومها

هذا ما تخيلته لفكرة الشبح وعلى هذا الاساس

حاسه بانها فكرة متميزة

لكن مع وجود الضوابط الشرعيه

اللى منها الكلام بصيغه الجمع

والله اعلم

لكن مع كده ومع ان الفكرة متميزة

لكنها صعبه اوى فى التنفيذ

ربنا يجازكم خير

وما زلنا ننتظر موضيع متميزة

باسلوبكم الرائع

لانه نعمه كبيرة من الله

فلا تبخلوا باخراج صدقتها

جعل الله هذة المدونه فى ميزان حسناتكم

mohamed ghalia 8 مايو 2009 في 6:51 م  

ايه يا دكتور خلاص اتحولت لشبح
على العموم معاك حق فى جزء كبير
بس ممكن نعمل حدود للإختلاط بطرق أخرى
يعنى مش يكون فيه اى ايميلات من الأصل
مجرد تعليقات وبس
ربنا يكرمك ويسعدك
فى بداياتك كأنك كنت بتتكلم عنى

حازم النبراوي 8 مايو 2009 في 7:55 م  

انا تعليقى مختلف عن كل اللى علقوا

انا شايف انك كتبت كدة علشان تخرج من مأزق نفسي
(انت اتعلقت بحد من اللى بيعلقوا لك ) وعايز حاجة من الاتنين
- تقولها من وسط الكلام الرسالة
- او تبرر لنفسك وتلاقى مخرج

صح ؟؟؟ مش عارف لية حاسس بكدة

معلش اعذزنى يمكن انا فهمت غلط (لكن هو دة اللى انا حاسة من الكلام)

عموما انا مش شايف ان الموضوع فيه حرمانيه
لان اللى بتعلق لهم وبيعلقوا ليك ولا يعرفوك ولا عملاهم هيشوفوك ولا انت كمان

وكمان اللى بياخد راحتة فى تعليق فبيكون جوة الموضوع اللى انت كتبتة (يعنى انت اللى حددت نوع التعليق من الاول مش هم)

اختلاف الراي لا يفسد للود قضية ولا اية يا صديقى؟؟؟

تحياتى وتقديري واحترامي

د/عرفه 8 مايو 2009 في 8:25 م  

أفنان
هههههههههههه
بس احذرى ممكن تخافى بعد كده

كلامك مظبوط
وتقريبا هو ده بالظبط اللى انا عايز أقوله
تحياتى ليك
فنونة الفنانة

د/عرفه 8 مايو 2009 في 8:29 م  

أهلا
دكتورة نور
ومساء الفل
علشان انا بعلق دلوقتى بالليل
أكيد لازم نعى خطورة الموضوع ونحاسب من الأول

وبعدين
اكيد معاكِ دكتورة
شبح عرفة
هههههههههههه
واكيد مع اصحابى
محمد عرفة
لا فوزى
كمان
منورة دكتورة

د/عرفه 8 مايو 2009 في 8:31 م  

أهلا بيك
اخى احمد

فعلا لازم الواحد ياخد حذره كتير فى كلامه
ويكون متوازن
وانا مش قصدى التخفى
بقدر ما هو قصدى الفصل
بين الواقع والكلام على النت

تحياتى ليك
حازم

د/عرفه 8 مايو 2009 في 8:32 م  

أمانى
ايه
مخوفتيش فى الأخر ولا ايه
ههههههههههههه

اهلا بيك
بس كنت عايز اعرف رايك بس

د/عرفه 8 مايو 2009 في 8:33 م  

موناليزا
أهلا بيكِ
وحاسبى بعد كده من الشبح
هههههههههههههه

د/عرفه 8 مايو 2009 في 8:36 م  

أهلا بيك محمد
مش قصدى التخفى محمد
شكلك مشوفتش التعليقات
المهم
انا قصدى الفصل بين
حياة النت
وواقع حياتنا

تحياتى ليك محمد

د/عرفه 8 مايو 2009 في 8:40 م  

أهلا بيك
اخى المعتصم
بس اوعى
اشبحانا وحلفنا
اكيد هيضغى على حلفكم
واوعى الاشباح
ههههههههههههههه

فعلا
نقاش امبارح فعلا كان عاجبنى
وساعدنى فى انى اوضح فكرتى اكتر

تحياتى ليك
اخى العزيز ومنورنا

د/عرفه 8 مايو 2009 في 8:59 م  

محبة الرحمن
اهلا اهلا
اكيد
ده قصدى
وهو انه الواحد يرد على الناس
باعتباره بيرد على افكار واراء
ومش اشخاص موجودين يعنى مش فارق كتير بينهم

وربنا يحفظنا جميعا
تحياتى

د/عرفه 8 مايو 2009 في 9:01 م  

أهلا محمد
منورنا حبيبى

مش عارف انا حاولت بس اشوف حل كده
للمواضيع دى
وربنا يحفظنا جميعا

د/عرفه 8 مايو 2009 في 9:11 م  

حازم
اهلا اهلا
ردك حفزنى انى ارد بسرعة
وارد على كل الناس قبلك كمان
ههههههههه
المهم
انا زيك كده بالظبط
بحب التخمين كده
وبتوقع

بس فلتت منك المرة دى
اكيد الموضوع اللى انا كتبته
من خلال حاجات شوفتها قدامى

بس مش انا خالص اللى بتكلم عنى
انا بتكلم بشكل عام ومن خلال خبرة
عن نفسى بحب احلل كل حاجة قدامى

ويعنى تخيلت حل للموضوع
بس مش مبرر ابدا لحاجة معينة

بالنسبة للتعليقات وكده
انا اتكلمت ان الواحد يتحفظ شوية مش يسيب الموضوع على الاخر يعنى
وحكاية ان عمرك ما هتشوف اللى قدامك دى
انا اتكلمت على جميع انواع التواصل على النت
ايميل فايس بوك او من خلال المدونات وخلافه

ودول بالفعل ممكن تتاح فرص وسهلة جدا كمان انك تقابل اللى قدامك

ويمكن كمان ناس بتشوفها بعضها كل يوم
فى جامعة او ما شابه
بتكلم بشكل عام برضه
متفهمنيش غلط


سعيد بصراحتك حازم
وسعيد كمان ان احنا مشتركين فى حب التخمين والاستنتاج

القدر و انا 9 مايو 2009 في 12:53 ص  

د. عرفة
موضوعك مهم جدا
ممكن يخلى كل واحد يحاسب فى تعليقاته ..
بس صدقنى انا باقرا كل التعليقات على اى موضوع
وبحس ان الجميع مشاعرهم طيبة واخوية ..
واذا صدر اى تجاوز اعتقد بيكون بدون قصد
عموما هى نصيحة تؤخذ فى الاعتبار لاى فتى وفتاة
ربنا يصلح احوال كل شباب وشابات المسلمين

تامر علي 9 مايو 2009 في 1:28 ص  

الحكم الشرعي لا يتجزء ...سواء على الطبيعة أو في التليفون أو على النت أو حتى على الانتركوم:)

فيه ضوابط عامة حطها الشرع للرجل والمرأة الإلتزام بتلك الضوابط يجعل تعاملك مع أي شخص مباح وعدم الالتزام بها يجعله محرم ولو بالتفكير .... المسألة ليست سداً للذرائع ولكنها مسألة تواصل انساني له ضوابط ... وقد كان النبي صلى الله عليه وسلم يتواصل مع نساء زمانه ويسألونه ويعظهم وهو أطهر الناس قلباً وكذلك أمهات المؤمنين والصحابيات الجليلات كن ينقلن العلم ويتواصلن مع المجتمع بشكل رائع ولكن من خلال الالتزام التام بضوابط الشرع والمتأمل للتاريخ الاسلامي ومواقفه بتدبر سيجد الاف الحالات للتواصل الانساني بين رجال ونساء فالأمر في ديننا لا يفرض انعزالية تامة للطرفين ولكن تواصل غير مفتعل وبحدود شرعية متفق عليها .... كلمة السر هي التوازن ..
دمت بخير ايها الشبح :)

خديجة عبدالله 9 مايو 2009 في 1:55 ص  

ماشاء الله فى مشكلة معايا فى المدونة دى باخد وقت فى فهم الموضوعات ووقت اضافى كمان فى قراءة التعليقات الجميلة بجد والتى تبرز نقاا راقيا هادفا ربنا ينفع به إن شاء الله
من وجهة نظرى فى كذا نقطة فى الموضوع ده وشغلنى فترة جدا جدا لكن فى النهاية وضعت لنفسى بعض البنود : أولا: التعليقات إلى حد ما قد نتجاوز فعلا لكن وضع نمط معين منذ البداية يريح كل الأطراف
وثانيا:من وجهة نظرى مش عاجبنى حكاية الأشباح والعالم الافتراضى وكده لان بكده بحس بأنى مزدوجة فعلا
لكن أنا مع تحليل حضرتك عن إننا نتعامل مع الأفكار والموضوع محل النقاش وده مثمر أكتر
ثالثا: لانحمل الكلمات أكتر مما تطيق .. ولكل مدونة نمطها واسلوبها ولذا فلكل مقام مقال
بالنسبة للأشخاص الحقيقين فى ناس فعلا أتعلق بما يكتبون بدرجة كبيرة لكن لو وظفنا حتى الاعجاب وعبارات الثناء بصورة ترضى الله تعالى اعتقد ده حل مناسب يعنى المدونة تعكس شخصيات الافراد لكن ليس بصورة كاملة ولا شىء يمكنه الالمام بذلك فهى قلوب وسرائر لا يعلمها الا الله تعالى
ملحوظة " عجبنى جدا تعليق اختى غربتى لخصت صراحة :)

جزاكم الله خيرا جميعا استفدت من نقاشكم الجميل

نور الاسلام 9 مايو 2009 في 9:37 ص  

السلام عليكم

اولا انا اتفق مع الاخت غربتى تعليقها تقريبا لخص الموضوع كله .. وبالذات الجزء الاخير لانى فعلا لمسته فى بعض تعليقات اخوات واخوه ملتزميين وهى الكلام الزائد عن العادي والهزار والمجاملات المبالغ فيها ...فكل هذا ممكن ان يؤدى الى عواقب لا تحمد عقباها ....

وارى من وجهة نظرى ان عالم الانترنت مثله مثل العالم الخارجى ..فانت مُعرض ان تختلط بالأخرين فى العالم الواقعى سواء فى الجامعه او العمل او المدرسه ..ولكن هناك ضوابط كما تحكمك فى التعامل مع الجنس الاخر فى العالم الواقعى .تضع هذه الضوابط نصب عيينك ايضا فى عالم الانترنت ..
فالموضوع شائك جدا ..وما يحسمه ..هو الضوابط التى نضعها لانفسنا فى التعامل مع الاخرين وخصوصا من الجنس الاخر ..

وجزاكم الله خيرا ..وبارك الله فيك .

د.آيه 9 مايو 2009 في 9:54 ص  

بسم الله الرحمن الرحيم

كنت لسه هظبط في رد ..
لكن لقيت أول رد .. بتاع د. أحمد بسيونى كافي كافي فسكت ..
شفت هو قال إيه ؟!!
أهو أنا بقي رأيي كده بالظبط ...
Be brave..
و مفيش مانع إنك تخلي بالك في تعاملك مع البنوتات يا عم الشبح..
ههههههههههههه

أختك

غير معرف 9 مايو 2009 في 6:37 م  

تعرف ياعم الشبح,
مش عارف ليه انا كمان خمنت وفقا لاحساسي ان وزي ما حازم قال ان سبب كتابتك للبوست ده هو انك مش هقول اتعلقت بحد من المعلقين لأ انت ملت لحد فيهم او بدا حد فيهم يشغل جزء من تفكيرك اكتر من الباقي,
ورغم انك رديت على حازم الا ان احساسي راسه والف (شوز)ما يتغير,
وبما انك بتقول لحازم انك بتحب التخمين والتوقع فانا قولت اخليك تخمن براحتك واعرف شطارتك فيه
ههههههههههههه
وممكن تعتبر اني شبح لو تحب
هههههههه

amany 9 مايو 2009 في 10:49 م  

هههههه لا ماخوفتش وقلتلك رايى اتفق فى حاجات واختلف فى حاجات ..اتفق معاك بان لازم يكون فى حدود فى كلامنا ..بس ماينفعش موضوع شبح ده يعنى .. بتفق معاك اوى فى حته اننا بنتكلم بنعبر عن تفكيرنا وكان عقل وبيتكلم مع عقل تانى ..عامه موضوعك جميل وفكرت فيه كتير قبل كده ..اسال الله ان يوفقك الى مايحبه ويرضاه

غير معرف 9 مايو 2009 في 11:35 م  

أؤيدك ... و بشدة ,
لكن هل حقا نستطيع أن نقنع أنفسنا بأننا مجرد أشباح أو شحنة في ram , أم أن طبيعتنا البشرية ستطغى علينا ؟؟

إيمان 10 مايو 2009 في 4:45 ص  

عجبنى الطرح جداااااا
لأن الموضوع فعلا شاغلنى بشده
طبعا ولأن طبيعة شغلى بتفرض عليه الاختلاط
فالموضوع مش صعب قوى بالنسبالى رغم انى فى الجامعه
لم يكن لى اى اختلاط اطلاقا بالجنس الاخر
لكن بعدين مع ظروف الحياه الوضع اختلف والموضوع أخد منى وقت لحد موصلت لنفس رأى الزميل تامر على
فالمتأمل فى التاريخ الاسلامى يجد ان هناك تواصل بين الرجل والمرأه ولكن بشروط وضوابط وفى النهايه الانسان على نفسه بصيره ولو ألقى معاذيره
أعتقد ان النت ينطبق عليه نفس الراى
وأعتقد أيضا ان الانسان لما يكون غير معرف بيبقى على راحته وممكن يعك الدنيا
لكن لما بيكون معروف اسمه واصله وفصله بيخاف وبيحترم نفسه
أنا أتفق معك فى موضوع الشبح لو أنك تقصد ان كل واحد يلم خياله وبلاش سرحان وصور شخصيه وسهوكه
وخاصة فى الشات وما إلى ذلك
تحياتى الموضوع مميز جدااا

wesoooooooooo 10 مايو 2009 في 6:10 ص  

السلام عليكم
أنا معاك فى إن الواحد لازم ياخد باله فى التعامل يعنى يتعامل بحذر شويه
بس حكاية شبح دى إسمحلى أختلف معاك كل الإختلاف
بحيك ع الموضوع الصراحه جاى فى وقته بالظبط
دمت بخير

وردة 10 مايو 2009 في 2:33 م  

السلام عليكم دكتور عرفة
انا موافقة علي كلامك طبعا
انا كمان وقت الجامعة كان تقريبا مفيش اختلاط الا للظروف القوية سواء مشاريع جماعية او اي شئ لابد من الاختلاط فيه
وساعدني مجموعة من الصديقات علي ذلك
وبجد الموضوع بيكون مريح جدا
بنتكلم براحتنا بنهزر لان كلنا بنات ومفيش ولد معانا حنعمل حساب لوجدوه
اما لما دخلت عالم النت
فأولا كان الياهو
حاولت علي قد ما اقدر مكلمش شباب وطبعا ده سهل علي الايميل لانك بتضيف اللي انت عاوزة
دخل الفيس بوك
طبعا المجال اوسع
بس فيه حاجة
انا عن نفسي مش بضيف اي شباب علي الاكونت بتاعي علشان مفيش حوارات شخصية تدور بينا
ولكن في الجروبات اظن لو انا بختار جروب محترم فأي شاب حيكلمني فيه الكلام حيكون محترم وفي حدود الادب
وكمان الكلام كل الناس شيفاه
وكذلك المدونات
التعليقات كل الناس شيفاها
وكلمة احب اقولها يا اخي
"اللي بيحترم بيحترم نفسه في الاول قبل ما بيحترم اللي قدامه"
يعني انا اللي بجبر اللي ادامي علي احترامي
ولو الشخص الاخر تمادي او تعدي حدود يجب ان اكون قادرة علي وقف التهريج ده
ومعاك طبعا ان ممكن القلب يتحرك او يميل ناحيه اي انسان كتب تعليق او حسيت انو مهتم زيادة
وده بيحصل في حياتنا العادية مش في النت بس
اسألني انا
المهم اننا نحاول نراعي ربنا في كل كلامنا
"وما يلفظ من قول الا لديه رقيب عتيد"
بحييك علي الموضوع
واسفة علي الاطالة
سلام

arsenalwy 10 مايو 2009 في 5:42 م  

جامد يادوك والله

انا الكلام ده بالظبط من اسبوعين جه فى دماغى ومن بعدها ابتديت احاسب اوى فى كلامى

منقدرش نقطع نهائى بس نقدر نحجم الموضوع

بوست فى الجون يادوك

حارة سد 11 مايو 2009 في 4:34 ص  

لا أظن أن الأمر يعدو مجرد مراعاة صحيحة نقية مع الخالق قبل المخلوق

هي محااكة مع ضمير اما مستيقظ واما غافل...مهما كان الاساليب للتجنب .يبقى الضمير والتقوى هما الفيصل

الحارة سد

حياتى نغم 11 مايو 2009 في 6:57 ص  

السلام عليكم / موضوع مهم جداً وكثيراً ما فكرت فيه والسبب أنى أزهرية وانتهى الإختلاط بإنتهاء المرحلة الإبتدائية ، وظل الوضع كذلك بالجامعة أيضاً ولم أعمل ، وحدث الإختلاط بالمدونة ، وكثيراً ما تضطرك المدونة أو التدوينة إلى التعليق بأسلوب معين المهم هو إلتزام الآداب العامة وأيضاً وجدت ضرورة تبادل الزيارات ووو ...
نعم النت عالم ليس سهلاً ويحتاج لحرص وحذر أعاننا الله جميعاً على رضاه .
ويحتاج منا إلى وقفات ومراجعات مع النفس .
ولكنى لست شبحاً أنا أفكارى ومدونتى وتعليقاتى وكتاباتى وتنويهاتى وو ... والاسم فرصة لتسمى نفسك بمعنى يميل له قلبك .
وفقنا الله وإياكم وعافانا وعفى عنا آمين .

(صندوق الدنيا) 11 مايو 2009 في 5:20 م  

أخي الكريم
جزاك الله خيرا
فعلا الغرق في بحر الإنترنت خطير
ولكن:
المهم أن تكون شبحا له بصمة
وشبحا له أثر في نفوس الناس
وشبحا له الكثير من الحسنات

حقى اهرتل 11 مايو 2009 في 8:39 م  

من امتى كان الاسلام انك تقفل على نفسك اختار طريقك وما تفتحهاش ع البحرى ولا تعملها زنزانه

د/عرفه 12 مايو 2009 في 8:36 م  

معذرة يا جماعة كنت منشغل اليومين اللى فاتوا اوى
والحمد الله فضيت شوية
ربنا يعدى السنة دى على خير ان شاء الله

بحب ارحب بكل الناس اللى نورونا
القدر وانا
تامر على
خديجة عبد الله
نور الاسلام
اية
غير معرف
امانى
غير معرف
ايمان
wessooooo
arsenalwy
وردة
حارة سد
حياتى نغم
ام البنين
حقى اهرتل

بجد سعيد بتواجدك
وهرد على كل التساؤلات فى بوست لوحده

شاكر لزيارتكم

إرسال تعليق