التاج 3 مرات


فى البداية بحب أشكر صاحب فكرة تدوينة التاج دى
وعلشان الناس تعرف التاج ده عبارة عن بضعة أسئلة شخصية لازم يتجاوب عليها بصراحة
التاج ده وصلنى ثلاث مرات لحد الآن
فى البداية وصلنى دون قصد من فتافيت
وبعد كده وصلنى كإهداء من إثنين من المدونين اللى انا بعتز بيهم جدا
إيمان
ووصبنى مرة أخرى أمس من المهندس على درويش
قبل إجابتى على الأسئلة
لاحظت أن فى بعض المدونين إعتبروا التاج ده ذنب أو مسئولية حتى تلاقوا إجابتهم على الأسئلة مثلما إجابتخم على أسئلة صح وغلط
كان نفسى يجابوا مثل إجابة طلبة طب
أكتب ما تعرفه عن _ ما يتعلق بالموضوع من قريب أو بعيد_
دى فقط ملاحظتى حتى تتنوع الإجابات بقدر الإمكان لأنى لاحظت تشابه كبير فى بعض الإجابات
نبدأ الإمتحان

إسمك؟؟
محمد فوزى عرفة

والمشهور بيه وسط إصحابك؟؟
فوزى على طول حتى فى ناس كتير أوى من أصحابى لم يتعرفوا على عرفة إلا من خلال المدونة والفايس بوك
أما إسم الدلع وانا صغير مادا ومفيش حد يسأل يعنى إيه

سنك؟؟
22 وكام شهر كده

إسم المدونة ؟؟
1aim
وقولت يعنى هدفى الأسمى فى النهاية وهو دخول الجنة
وهدفى فى الدنيا هو التغيير للأفضل
اتمنى انا أتغير دايما للأفضل
أتمنى ما حولى من رفاق يتغير للأفضل
أتمنى مصر وما يجوارها من عالم إسلامى يتغير للأفضل
يارب آمين

مجال دراستك؟؟
الطب وان شاء الله انا فى عامى الأخير 6 يعنى
ربنا يعديها على خير وأقدر أجيب التقدير اللى انا محافظ عليه السنين الخمس الماضية
اه كنت أتمنى أدخل هندسة بس خير انا مش بكره الطب بحب فيه كتير برضه

الصورة الرمزية لمدونتك بتعبر عن إيه؟؟؟
للوهلة الأولى يظن المطلع عليها أنها لأنى فى طب
ولكن للصورة أسباب أخرى أوضحتها سابقا فى موضوع بأكمله ياريت تشوفوه

هل فكرت فى إغلاق المدونة؟؟
لا لا أبدا
أولا انا بقال حوالى 3 شهور بس يعنى مش كتير
وممكن بس بشعر أحيانا بالحاجة لبعض الراحة من المدونة والمدونات
ومن الآن بفكر هعمل إيه فى فترة الإمتحانات
خصوصا إن إمتحاناتى مش إسبوع أو إتنين دى ممكن توصل ل4 شهور متواصل
ساعتها ربنا يبقى ييسر

هتعمل إيه لو حد قل أدبه عليك فى التعليق؟؟؟
بصراحة انا لم أحذف أى تعليق إلا تعليق واحد صاحبى جدا فى بداية مواضيع على المدونة
دخل ورخم عليا كنت ممكن أسيب تعليقه وبعدين لقيته إتعرض لأسمى وأتريق شوية كمان
والله على ما أظن إنه لو كتبه حاليا ممكن أسيب تعليقه يمكن انا شيلته بس علشان كنت لسه بادىء
وإعتذرتله بعدها
وأكيد لو فى حد استعمل كلام خارج أكيد هشيل التعليق بس هرد علي كلامه
اما لو مجرد إختلاف عادى طبعا هنتناقش عادى طبعا

أسوء مدونة ؟؟
هو بصراحة لم أصادف تلك المدونات ولكنى أعلم أنها موجودة
وطبعا أى مدونة تتطاول على تعاليم الدين فهى تحمل لقب الأسوء على الإطلاق

هيحصل إيه للإيميل بتاعك لعد ما تموت ؟؟
أكيد هينتهى ويندفن معايا
بس أظن إن كل اللى عليه هيعرفوا بموتى من خلال المدونة أو الفايس بوك أو الكلية

أديت الباسورد لحد قبل كده؟؟
لا طبعا
هو مش عليه اسرار
بس الباسورد بتاع اى شىء تانى محفوظ على الجهاز أى حد ممكن يدخل عليه عادى

السفر بالنسبة ليك؟؟
فرصة جديدة إنى أتعلم حاجة جديدة وأكتسب خبرات

مودك إيه ؟؟
يعنى بحاول أكون مستقر إلى حد ما
المود الأغلب متفائل ومرح
بس لما حد بيعصبنى مش برجع بسهولة

بتعمل إيه فى وقت فراغك ؟؟
على النت أكيد
بلعب فيفا وكنت غاوى جدا بلايستيشن
بحب الرياضة جدا إما كورة أو جرى أو مجرد سويدى فى البيت
بحب أقعد مع إصحابى على القهوة _ محدش يفهم غلط انا مش بشرب _

الأكلة المفضلة ؟؟
معظم الأكل بحبه
بس بحب محشى ورق العنب وبحب الفاكهة
وبحب الحلويات كمان
بس مزاجى اليومى كُباية الشاى مع كيك بالشيكولاتة

الصفات اللى أنت ورثتها من والدك ؟؟
كتير بشعر إنى مختلف كتير مع والدى بس
إتعلمت منه الإلتزام والمحافظة على الصلاة فى المسجد وصلة الرحم

الصفات اللى ورثتها عن والدتك ؟؟
طيبة القلب وحسن الخلق بالإضافة للتعامل بمنطقية مع المواقف ومواجهتها وليس الهرب منها

أكتر ست حاجات بتكرهها؟؟
معصية الله
الظلم
الحقد _القلب الأسود_
النفاق
عدم تنفيذ الإلتزامات
الحزن والهم

أكتر ست حاجات بتحبهم ؟؟
الحب فى الله
عمل الخير
الإيجابية
سماع القرآن
طلب العلم
الأمل

شخصيتك نوعها إيه ؟؟
طبعا مش هعرف أمدح نفسى
هقول بس أبرز عيب عندى
هو إنى متسرع وبحاول أعمل ميت حاجة فى وقت واحد

أجمل كلمة قيلت فى وصف مدونتك؟؟
واحد من المدونين الأعزاء قال
دى من أفضل المدونات اللى دخلتها لواحد من الناس
هو بقاله فترة منورناش على المدونة يظهر إنه مشغول شوية الفترة الأخيرة
وبيسعدنى جدا تعليقات الزوار الغير مدونين واللى انا مش عارفهم كمان
بشعر أنهم بيتابعوا ويقروا فقط من أجل المتابعة والإهتمام يعنى بشعر بكثير من الصدق

أهمية التعليق بالنسبة ليك ؟؟
مثل الماء للسمك تمام
وأقدر أعرف هل فكرتى وصلت ولا لأ
لذلك بتمنى يكون رايكم صادق خالى من المجاملات

أحسن بوست كتبته ؟؟
والله انا بعتز بيهم جدا كلهم تقريبا
بس أول بوست له معذة خاصة خصوصا إنه نال استحسان الجميع وكانت بدابة قوية
مصر من غير هدوم
وكمان البوست اللى انا نوهت عنه الموضوع اللى فات
لم يكن سهلا علىّ على الإطلاق كتابته
النصف المفقود

أفضل بوست قرأته؟؟
هتتعجبوا كتير من إختيارى
بس بجد موضوعين كانوا جامدين جد جدا
اللى عجبنى فيهم إن الفكرة كانت جديدة جدا أول مرة أسمع عنها
والأحلى أسلوب العرض والتشويق فى الموضوع
رغم إن اللغة عامية
وأحيانا عامية جدا
مش إعجابى بالموضوعين عرضت الموضعين لكتير من إصحابى وعجبهم يارب يعجبكم إختياراتى دى
الموضوع الأولانى
أفراح بلدنا عند خيخة
64 حصان بلا وكسة ده سيسي يا أخوياااااااااااا عند فتافيت

أفضل مدونة ؟؟
بصراحة ده أصعب سؤال
بس انا بحب مدونات كتير جدا وبكون حريص على زيارتها
بس معذرة للجميع مش هينفع أكتبهم كلهم بس هختار 3 مدونات فقط
غربتى
وبحر الدموع
والقلم السكندرى
بصراحة مدونات رائعة كلمات جميلة جدا
بشعر إن عندهم إبداع ولغة قوية وحرص على توصيل شىء قيم للناس
ومستوى المواضيع كلها عالى جدا
ومعذرة لباقى مدونات حبايبى مدوناتكم موجودة على القايمة هناك واكيد بحب مدوناتكم برضه

لماذا دخلت عالم التدوين ؟؟
بصراحة حاسس إنى عايز أقول حاجة للناس
ومش بيحب أن مفهوم غلط يكون منتشر
ممكن كلمة أقولها ربنا يهدى بيها إنسان أو أقدر أغير بيها رأى عنده
ده هيكون أكتر شىء يسعدنى
وبصراحة أحمد سعيد صاحبى
ومحمد عبد الباسط
يعتبروا سبب رئيسى فى دخولى عالم التدوين
وبصراحة متخيلتش إنى ألاقى فى هذا العالم ده نفسى بهذا الشكل
ولقيت فيه من الراحة الكثير

الإنترنت بالنسبة ليك إيه ؟؟
عالم تانى مختلف جدا
بس انا مش بحب أتعلق بحاجة جامد كده
وبعدين انا لما بقعد على الحهاز كتير كده بيعترينى الإكتئاب

تمرر التاج لمين؟؟
حابب أمرره لكل المدونات السابق ذكرها فى الموضوع
بالإضافة إلى 4 من زوارى اللى انا بعتز بيهم جدا
سلمى محمد
ابراهيم سلام
المعتصم
norharty

تعليق
لم أكن أتخيل إن الإمتحان سيكون شبيه بإمتحانات الطب كده
طويل أوى

حتى إنى جاوبته فى فترة طويلة أوى
حتى نكمل الموضوع إمتحانات الطب دائما ما يتبعها إمتحانات شفوى وعملى
وانا جاهز لمواجهة تلك الأسئلة فى التعليقات
من الممكن أن لا تكفى أسئلة النظرى على التقييم بشكل كافى
ملحوظة
أتمنى أن تبتعد التعليقات عن جميل وحلو وكويس
بل تشارك بإيجابية فى الإمتحان
فرصة لن تتكرر
وهى أنى جاهز لأى سؤال
مذاكر النهاردة كويس
تحديث
كلمة أخيرة
بصراحة تعليقاتكم على الموضوع أثلجت صدرى
ولكنها فى نفس الوقت حمّلتنى مسئولية شاقة جدا
وبعض التعليقات زادت من مدحها
لدجة إحمرار جبهتى خجلا من هذا الكلام
لذا انا مضطر أعيد نفس الدعاء اللذى ذكرته فى المدونة الأخرى
{اللهم لا تؤاخذنى بما يقولون واغفر لى ما لا يعلمون وإجعلنى خيرا مما يظنون}
جزاكم الله خيرا


68 رأيك يهمنا:

wesoooooooooo 2 أبريل 2009 في 12:43 م  

ولا صعب ولا حاجه مانت جاوبت وبامتياز كمان اهو
ربنا يوفقك فى الامتحاناتيارب وتجيب امتياز كل مره
دمت بكل الخير
تحياتى

وردة 2 أبريل 2009 في 1:49 م  

لا يادكتور
بالراحة علينا
انت كده اخت الامتياز من المدونين
اجابتك حلوة جدا وصادقة
ربنا يوفقك
وان شاء الله نباركلك علي التخرج قريب
سلام

Unknown 2 أبريل 2009 في 2:32 م  

تاج لذيذ.. ومدونة جميلة.. تسلم إيدك يا دكتور.

مصطفى أبوزيد 2 أبريل 2009 في 2:39 م  

جميل يا محمد
ربنا يكرمك ويعينك
دعواتك ليا

د. ياسر عمر عبد الفتاح 2 أبريل 2009 في 4:32 م  

حلوة إجاباتك يا دوك
ربنا يوفقك فى دراستك

د/عرفه 2 أبريل 2009 في 4:40 م  

ههههههههههههههه
يظهر أن فى شخص معجبوش أنى مزورتش منونات مش ظريفة
ومعجبهوش كمان حكايةإنى حذفت تعلق صاحبى بس

فكتب الشخص ده وربنا يهديه ويهدينا
تعليق ودعوة لزيارة مدونته
اللى هيا مش مناسبة أبدا
وتستحق عن جدارة أن تكون أسوء مدونة انا زرتها
وبعتذر لو كان فى شخص من زوار مدونتى شاف السوء ده
بجد مش قادر امسك نفسى من الضحك ومتعجب جدا من اللى حصل ده
ربنا ما يوعدكم بزيارة من دى

د/عرفه 2 أبريل 2009 في 5:02 م  

وبعدين مفيش حد طرح أسئلة ليه
مفيش حد عايز يقوم بدور دكاترة الشفوى ولا ايه
...........................................
............................................

وسام أهلا بيك
كنا مفتقدين تعليقك من فترة
بس بجد مش صعب بس لأ ده كان امتحان طويل جداربنا يسمع منك يارب واجيب امتياز

د/عرفه 2 أبريل 2009 في 5:03 م  

وردة أهلا بيكِ
لا لا
الإمتياز ده بس من ذوقك
ربنا يكرمك
وان شاء الله نعزمكم كلكم عند التخرج

د/عرفه 2 أبريل 2009 في 5:15 م  

مصطفى أبو زيد
منورنا يا هندسة
يارب يوفقنا جميعا
.................................................
.................................................
دكتور ياسر
منورنا يا دكتور
بس مش هتنازل عن عزومة تخرجك
أنت هتتخرج قبلى ان شاء الله
سلام

د/عرفه 2 أبريل 2009 في 5:17 م  

حسام مصطفى
انا سعيد بزيارتك جدا
يارب تنورنا على طول استاذ حسام
ومنتظرين رايك

Tamer Diab 2 أبريل 2009 في 6:16 م  

والله مش مبالغة هي من أفضل المدونات بتاعة الناس
ربنا يكرمك يا دكتور ونشوفك حد جاكد كده وبيخدم الاسلام صح.

الملاك الحزين 2 أبريل 2009 في 7:45 م  

تسلم إيدك يا دكتور
اجابتك جميلة جدا
تقبل مرورى
اتمنى زيارتك

إيمان 2 أبريل 2009 في 7:51 م  

جميل وحلو وكويس

لا بجد عجبنى جدا ان اجاباتك كلها واضحه وصريحه
وكافيه .. شكلك بتجيب تقديرات
انا طبعا كان نفسى اكون إجابيه واشارك لكن انا جاوبت على كل الأسئله قبل كده
ربنا يكرمك ويوفقك ويجعل القرأن ربيع لقلبك

salma mohamed 2 أبريل 2009 في 8:45 م  

يارب تكون مذاكرتك للطب واستعدادك للاسئلة بنفس القوة والحماس ده (:
ويعجب الدكاترة باجوبتك زي اعجاب الناس بتعليقاتك,
اما بقى انك اهديتني التاج ده فامري لله كده بقى تاني حد يهديه ليا,
انا بس مش بحب الناس تبقى عارفه عني كل حاجه,
بس برضه مش هكسفكم وهحله قريب ان شاء الله.

حياتى نغم 2 أبريل 2009 في 8:53 م  

السلام عليكم / باركَ الله فيك دكتور عرفه وإن شاء الله تكون دكتور فى القلب ، فى تشابه بينا كتير ربنا يرضى عننا جميعاً آمين :)

حازم النبراوي 2 أبريل 2009 في 9:41 م  

جميلة جدا اجاباتك
ربنا يوفقك والى الامام دائما

Ebraheem Aadam 2 أبريل 2009 في 9:52 م  

أيواااااااااا ,
محمد فوزي , كده العملية معروفة :)
تصور سألت عليك " محمدات " معاكم في سنة 6 , و زمالكاوية كمان , و ما عرفوش انت مين :( ,

بس طالما محمد فوزي , يبقى اتعرفت يا عم , ملفك عندي :) :) :)

و شكرا على تمرير التاج يا محمد

المعتصم 2 أبريل 2009 في 10:35 م  

بسم الله الرحمن الرحيم
السلام عليكم ورحمة الله وبركاته
دكترة
تحياتى
شكلك كده موس ياعرفه
امتياز مرة واحده
ماشى ياعم
بس بقولك ايه
انسى موضوع التاج ده
انا مش بجاوب على تاجات خالص
انا من اخر مرة اتعمل فيا المقلب ده وانا قلت توبة من دى النوبه يامعلم
اختك غربتى واختك زينب كانو دبسونى فى تاج قبل كده وجاوبت عليه لو تحب تقراه ده الرابط بتاعه
http://wwwmosharef.blogspot.com/2009/01/blog-post_21.html
وبعدين هى ايه الحكايه
الكل عاوزنى اجاوب على التاج ده ليه ؟؟؟
ايوشه كمان اهدتنى التاج
وبسمه
انتو كولكو عليا ولا ايه ؟؟؟؟
بص ياعمنا ماتزعلش بس بجد يامحمد مش فاضى اليومين دول
وكمان صحيا تعبان شويه
يعنى من كل النواحى
سماااااااااااااااح بقى
على فكرة يامحمد انت بجد انسان جميل جدا
تحياتى ودمت بكل خير وود
والسلام عليكم ورحمة الله وبركاته

عربي نيوز 2 أبريل 2009 في 11:43 م  

السلام عليكم

أخي العزيز د.عرفة
قد احسنت وأبدعت الكتابة والاجابة سوياً
فالله أسأل أن يكتب هذه الحروف في ميزان حسناتك
وأن يبارك للك في وقتك


لا تنسوا اخوانكم في غـزة من دعائكم

||..بحــر الدموع..||

أحمد سعيد بسيوني 2 أبريل 2009 في 11:51 م  

بسم الله

كتير بشعر إنى مختلف كتير مع والدى بس

احيي فيك صراحتك
لو حد تاني كان كتب خدت منه الجمال والوسامة والطول والثقة والقوة وال ال

***

انا سعيد انك سعيد ومرتاح في العالم التدويني

***

شوية اسئلة بقى على الماشي

1 اية سبب حبك وتشجيعك للزمالك ؟؟
2 مواصفات زوجة المستقبل ؟؟
3 احب الناس الى قلبك -غيري طبعا وغير الوالد والوالدة-؟؟

ولو في اسئلة تانية هابقى اخش اقولهالك

صحيح
عاوز اشوفك الاثنين الجاي ضروري ، اصل ماتشنا في دورة الكلية الساعة الواحدة بعد الظهر ، وانا عارف ان وشك حلو علي
واوعى تجيب جمال مبارك معاك ، اصل الموضوع وشوش وإرف -وش بيغمز-

دمتم بخير

Unknown 2 أبريل 2009 في 11:59 م  

السلام عليكم و رحمة الله و بركاتة
ياةةةةةةةةةةة
هو انا اتاخرت اوى كدة
طب انا احجز مكان و اروح اقرأ و بعدين اجى اعلق

رحلتنا في الحياة 3 أبريل 2009 في 1:52 ص  

اجابات جميلة يادكتور ربنا يوفقك وتنهى الدراسة على خير وربنا يوفقك دايما

Unknown 3 أبريل 2009 في 1:55 م  

امتياز مع مرتبة سفنج
10/10
مدونة رائعة
ويبقى التواصل

ghorBty 3 أبريل 2009 في 4:37 م  

السلام عليكم

ما شاء الله اجابات وفيه وشافيه

ربنا يجعل ما تخطه يداك في ميزان حسناتك ان شاء الله

وان شاء الله تتخرج علي خير وبتفوق كمان

ومتشكره اوي علي رايك في مدونتي اسعدني كثيرا نسال الله القبول

دمت بكل خير

بدور علي اسئله مش لاقيه :) سماح المره ديه

السلام عليكم

Unknown 3 أبريل 2009 في 4:58 م  

كده يادكتور محمد فوزى عرفة
عملتها فىّ كده تيجى منك انت!
يازميل النقابة عن قريب
طيب يامحمد فوزى عرفة طيب!
دبستنى واللى كان كان:)
انا كان ممكن امشى واعمل
نفسى مش شايفة لكن اهوة
تدبيسة واللى كان كان!

Unknown 3 أبريل 2009 في 5:00 م  

طيب طيب طيب
يادكتور عرفة طيب
اجيب انا منين اجابات
مترتبة ومتوضبة زى حضرتك ؟
لكن ولو حأمخمخ واكتبلك
شوية ردود انما هى
استنى علىّ يازميل !

د.توكل مسعود 3 أبريل 2009 في 5:00 م  

السلام عليكم ورحمة الله... وبعد

فقد اتفقنا قبل ذلك أن تكون الأول... على دفعتك... وإنه ليسير على من يسره الله عليه..... اتعب قليلا... ترتاح أخيرا... والله معك

د/عرفه 3 أبريل 2009 في 6:06 م  

تامر دياب
بجد ربنا يكرمك أوى
مش لاقى كلام اعبر بيه عن سعادتى بتعليقك مرة أخرى
وانا بعتبرك زى اخويا الكبير ربنا يديم التواصل ما بينا دايما

د/عرفه 3 أبريل 2009 في 6:09 م  

الملاك الحزين
سعيد جدا بزيارنك وربنا يكرمك
وزى ما قولت فوق انا بسعد جدا بالتعليقات
اللى انا مش عارف اصحابها وكمان مش مدونين
يارب دايما نشوف تعليقك
تحياتى

د/عرفه 3 أبريل 2009 في 6:11 م  

إيمان بجد انا سعيد بتعليقك جدا
ربنا يجازيكِ خير على دعائك
وربنا يديم التواصل معاكم دايما

د/عرفه 3 أبريل 2009 في 6:14 م  

سلمى محمد
شكرا لزيارتك
وطبعا لازم تجاوبى على التاج
حكاية الحماسة دى
تعالى شوفى حالى قبل الامتحان بيوم بيبقى شكلى كرب
بس الحمد الله قبل الامتحان على طول بحاول اغير مودى وبحاول اكون متحمس
سعدنا بتعليقك

د/عرفه 3 أبريل 2009 في 6:20 م  

حياتى نغم
تحياتى ليكِ كتير
بجد ده شىء يسعدنى انى اكون شبه حضرتك ده شرف ليا
شكرالزيارتك

د/عرفه 3 أبريل 2009 في 6:25 م  

حازم شكرا لزيارتك
انت اللى مدونتك جميلة
وحوارك كان متميز بجد
تحياتى

د/عرفه 3 أبريل 2009 في 6:28 م  

باش مهندس ابراهيم
شكرا لزيارتك
يلا امرنا لله فضحنا الإسم
مش مشكلة وبعدين بتسأل عليا ليه
عايز تبلغ عنى ولا إيه
هههههههههههههههههههه
منتظرين التاج بتاعك

د/عرفه 3 أبريل 2009 في 6:31 م  

المعتصم
سعيد بتعليقك اوى
وانت اللى انسان جميل بجد
وبعدين الرابط اللى انت كتبتهولى مش شغال
والف سلامة عليك
ومنين متسترد صحتك لازم تلبس التاج
هههههههههههههه
وإلا تورينى التاج القديم
قديم قديم مش مشكلة

د/عرفه 3 أبريل 2009 في 7:32 م  

بحر الدموع
سعيد بزيارتك أخى كتير
ويارب أكون عند حسن ظنكم دائما
تحياتى ليك
ويارب النصر لإخوانا فى غزة

د/عرفه 3 أبريل 2009 في 7:46 م  

إزيك يا أحمد
يارب تكون رحلة النهاردة جميلة
تعليقك جميل يا أحمد
وجميل أوى مشاركتك فى الإمتحان
نبدأنجاوب
أولا تشجيعى للزمالك
هقولك طبعا إنت عارف إنى كنت صغير
بابا كان زملكاوى وعمى كان أهلاوى
والغريب إن عمى كان متحمس أكتر إنى أكون أهلاوى
وبابا مكنش عايزنى أشجع كورة أساسا
والعجيب إن سبب زمالكاويتى لا هذا ولا ذاك
كان زوج عمتى كان زمالكاوى شديد جدا جدا
وهو متيسر الحال قليلا
بعد إمتحانات سنة أولى كنت معاه فى المحل عنده
وكان نهائى ماتش الزمالك فى نهائى أفريقيا
ويوميها الزمالك كسب وأحضر من المحل عنده
طقم جميل
وكان دايما بيحفزنى على تشجيع الزمالك بحكم تواجدى مع عمتى كتير


مواصفات زوجة المستقبل ؟؟
والله يا أحمد عندى شرطين مهمين جدا
أولا تكون ملتزمة جدا وتكون فهمة الدين صح مش مجرد
صلاة وصوم وعبادات فقط
الشرط التانى
تكون مطيعة وهادية
بصراحة مش بحب العناد والصوت العالى
أى شىء بعد ذلك ممكن يكون فيه كلام



أحب الناس لقلبى خلاف أسرتى ؟؟؟

انا قولت قبل كده يا أحمد
إنى بحب إصحابى جدا وهما أقرب لقلبى بعد أسرتى
وطبعا إصحابى المقربين

تحياتى ليك أحمد وشكرا لتفاعلك مع الموضوع
وربنا يكرمك يوم الإتنين
بس انت عارف يعنى الإتنين يا أحمد
وش بيغمز أكتر من الوش بتاعك

Ophelia - cfd 3 أبريل 2009 في 7:48 م  

ما شاء الله :)

ربنا يوفق حضرتك فى كل حاجه حلوه نفسك تعملها

لدينك ولأمتك ..

-----

أما الأخ اللى لف على مدوناتنا كلها فربنا يهديه

فعلاً وحسبيا الله ونعم الوكيل فيه

د/عرفه 3 أبريل 2009 في 8:51 م  

حتى تشرق الشمس
متأخرتيش ولا حاجة
منتظرين شروق رأيك دايما علينا
تحياتى ليكِ

د/عرفه 3 أبريل 2009 في 10:36 م  

شكرا أيوشة
ربنا يكرمك
ويارب يسمع منك

د/عرفه 3 أبريل 2009 في 10:37 م  

أستاذ معتز شاهين
تحية خاصة لزيارتك الأولى بتمنى دوام التواصل معاك
ان شاء الله
بس الأول عليك انت المرتبة السفنج دى
انت دبست نفسك

د/عرفه 3 أبريل 2009 في 10:42 م  

غربتى
أهلا بيكِ
ربنا يسمع منك واقدر اكون عند حسن ظنك على طول
وده رأيى فعلا فى مدونتك
وعلى فكرة مش بعرف أجامل خالص

د/عرفه 3 أبريل 2009 في 10:44 م  

دكتورة نور
بجد كلامك ده كتير عليا أوى
وأكيد إجاباتك هتكون أفضل
وأكثر مرحا
منتظرينك وإنتى لابسة التاج
تحياتى ليكِ

د/عرفه 3 أبريل 2009 في 10:47 م  

دكتور توكل
بجد مش لاقى كلام أوصف بيها سعادتى بزيارتك
وبجد متتصورش كم حزنى وضيقى عند علمى بخبر إعتقالك ربنا يفك أسرك
بالنسبة لحكاية الأول ده أظن إنه شاق جدا
بتمنى بس أحافظ على تقديرى مش أكتر
بس الله المستعان إدعيلنا بس الله يكرمك

د/عرفه 3 أبريل 2009 في 10:52 م  

زهرة الأمل
شاكر لإهتمامك بالمدونة وبالمواضيع
نورتينا بزيارتك
وربنا يوفقنا لفعل الخير ان شاء الله واقدر اكون عند حسن ظنكم

بالنسبة لذلك الزائر فعلا ربنا يهديه

المعتصم 4 أبريل 2009 في 3:16 ص  

بسم الله الرحمن الرحيم
السلام عليكم ورحمة الله وبركاته
د/عرفه
تحياتى
بص يادكترة
ماتتلككش
لو الرابط مش شغال ممكن تدخل المدونة عندى عادى وتفتح الارشيف هتلاقى التاج فى شهر يناير
اسمه التاج لغربتى والاسئلة للعبد لله
ابقى اقراء وعيش بقى براحتك ياعم
انما انا ماليش فيه
ههههههههههههههههههههههههههههههه
وبعدين بقيت زملكاوى علشان طقم
لالالالالالالالالا
مكنش العشم يامحمد
طب كنت قلت لعمك الاهلاوى كان ظبطك
طقم على بنطلونين على جزمة وكام تى شيرت وكام قميص وكنت بقيت اهلاوى واهى كلها مصالح برضو
هههههههههههههههههههههههههههههه
تحياتى ودمت بكل خير وود
والسلام عليكم ورحمة الله وبركاته

د/عرفه 4 أبريل 2009 في 11:52 ص  

أخى المعتصم
شوفت الموضوع بتاعك
تقريبا كنت متوقع كتير من الإجابات رغم إنى فوجئت بالبعض الأخر
بس الجميل إن الأسئلة متنوعة شوية
حكاية تكرار الأسئلة فة كل المدونات دى
يعنى ممكن تسبب شوية ملل
المهم إجاباتك كانت جميلة
وبعدين مين قالك إن عمى محاولش معايا
والله حاول بس كان أخره معايا
أيس كربم أو حاجة ساقعة
موصلش أبدا لطقم ولبس وكده
هههههههههههه
وطبعا الطقم يكسب
ههههههههههههه
تحياتى ليك ومتشكرين لإهتمامك

ريمان 4 أبريل 2009 في 6:35 م  

السلام عليكم

كل تاج وانت طيب

انا لسه برضه مجاوبه على نفس التاج


ربنا ينجحك ان شاء الله فى كليتك وتبقى دكتور كبير قد الدنيا

د/عرفه 4 أبريل 2009 في 10:51 م  

ريمان
شكرا لزيارتك وأحسبها الأولى
فتحية خاصة
وربنا يكرمك
ونتمنى نشوف تعليقك معانا على طول

نور الاسلام 5 أبريل 2009 في 2:56 م  

السلام عليكم

بجد وبدون مجامله اجابات جميله ..جعلها الله فى ميزان حسناتك ..وربنا ينجحك وينفع بيك الامه ..

دمت بعز وبارك الله فيك.

فتــافيت (رحاب الخضري) 5 أبريل 2009 في 4:39 م  

هههههههههههههههههه
هههههههههههههههههههههههههههه
عاجبك السيسي كده.. خده والله ما يغلا عليك
اقولك ادفع بس مقدم وقسط الباقي مافيش مشسكلة
احنا لازم نقف جنب الشباب في الازمة ديه
طبعا عامية جدا ديه انا عااااااااااا
مبسوطة اوي ان ليا بوست عجبك ولسه فاكره
وانت مدونتك من المدونات القريبة جدا لقلبي
وتعلقك بقى والله من غير مبالغة بستناااااااه

Naglaa El Gafary 5 أبريل 2009 في 9:36 م  

شكرا علي شعورك الطيب
ربنا يخليك
شكرا لك
يا دكتور عرفه
موضوعاتك شيقة

جارة القمر 5 أبريل 2009 في 11:07 م  

هنا أنحني احتراما وأصفق لك
فعلا انت رائع جدا .. نادر من هم مثلك
بالتوفيق وربنا معك بالامتحانات
موفق يارب
احترامي

د/عرفه 6 أبريل 2009 في 12:20 ص  

نور الإسلام
ربنا يكرمك
ده من ذوقك بس
نورتينا

د/عرفه 6 أبريل 2009 في 12:22 ص  

فتافيت
سعدنا بزيارتك
فعلا كان بوست متميز وغريب
علشان كده رشحته
نورتينا فتافيت متحرمناش من فتفتك دايما

د/عرفه 6 أبريل 2009 في 12:23 ص  

نجلاء نورتينا
تحية خاصة على زيارتك الاولى
مدونتك انتى كمان جميلة
نتمنى متابعتك للمواضيع عندنا دايما

د/عرفه 6 أبريل 2009 في 12:26 ص  

جارة القمر
ده كتير اوى عليا
بجد مدح زايد بلاش كده وشى بيحمر
المهم نورتينا جدا
ومدونتك بالفعل رائعة

وليد 6 أبريل 2009 في 11:36 ص  

ربنا يكرمك يا دكتور عرفة ويحفظك يارب ويارب نشوفك دكتور قد الدنيا

القدر و انا 6 أبريل 2009 في 3:42 م  

د. عرفة
سعيدة جدا بصراحتك ووضوحك واتزانك
ربنا يبارك لك

إسراء توكل مسعود 6 أبريل 2009 في 10:09 م  

وإن كنت أحياناً بعترض على التاج حينما يتضمن أسئلة شخصية .. ولكن معظم أسئلة هذا التاج جيدة

حفظكم الله ..

د/عرفه 6 أبريل 2009 في 11:28 م  

وليد
ربنا يخليك
انا سعيد بزيارتك
وياريت تدعيلى دايما
تسلم حبيبى

د/عرفه 6 أبريل 2009 في 11:29 م  

القدر وانا
سعيد جدا بزيارتك
وتحية خاصة جدا لزيارتك الاولى
ويارب تنورينا دايما

د/عرفه 6 أبريل 2009 في 11:32 م  

إسراء توكل
انا زيك برضه
احيانا كنت بحس انها مملة جدا
أسئلة ثابتة
وإجابات متوقعة
علشان كده كنت حابب انى أفضفض شوية
عديهالى البوست ده
انا مش بحب اتكلم عن نفسى كتير اساسا
بس قولت ممكن يكون البوست فرصة كويسة تتعرفوا عليا اكتر
سعيد بزيارتك جدا
والف مبروك لبابا
منتظرين متابعتك للمدونة دايما

همس 11 يناير 2010 في 12:54 ص  

السلام عليكم كنت بمر على مدونه دموع الورد وشفت اسم مدونه حضرتك هناك بقى لى 3 ساعات بتابع المدونه بجد شيقه اويه اسلوب جميل وصراحه حلوه بس معرفناش حضرتك جامعه ايه وعدى طلب السنه الجايه هتكون فى الامتياز ارجوك كلمه لكل زمايلك من خلال مدونتك تناشدهم فيه بعوده الضمير فى المستشفيات العام فى مهازل كتير بتحصل وتقبل مرورى

د/عرفه 12 يناير 2010 في 2:43 ص  

همس

سعيد جدا بزيارتك
وسعيد اكتر باهتمامك بالمدونة
هو انا فعلا ان شاء الله هبدأ إمتيازى فى شهر 3 بعون الله

وربنا يسهل ونعمل اللى يقدر عليه
بس طالب الامتياز اصغر سلطة فى المستسفى كلها
وصعب ان هو اللى يعدل حال المستشفى لانه مش شخص مسئول

بس اللى اقدر اوعدك بيه ان احنا نقدر نعمل اللى ربنا يقدرنا عليه دايما ان شاء الله



سؤال خبيث بس الاول
هل همس غير ديالا صاحبة دموع الورد...؟؟
ولا واحد

همس 12 يناير 2010 في 4:44 م  

لاهمس غير ديالا ربنا يرحعها بالسلامه
وكمان خلاص من باقى القراءه عرفت انك جامعه طنطا
ولما قلت كلمه لبتوع الامتياز لما شفت المهازل اللى بتحصل فىالفتره المسائيه لما بيكون حد بيموت والدكتور النباطشى اللى هو طالب امتياز او متخرج جديد نايم ولا همه اى شئ فى الدنيا ربنا يصلح للجميع الحال

د/عرفه 13 يناير 2010 في 12:08 ص  

اهلا
بيكى همس


فى الاول كده
عندى رجاء

طالما انتى تعتبرى اخدتى جولة شبه كاملة فى المدونة

يبقى اكيد كونتى وجهة نظر نقدية للمدونة ككل ولكل المواضيع

اتمنى اعرف رايك التحليلى فى بوست الحصاد
علشان بس اقدر استفيد واقدر اقيم اللى فات بشكل مناسب

او على الاقل خالص
تشاركى فى الاستفتاء المصغر ده

http://spreadsheets.google.com/viewform?formkey=dEtpRkRSbXkycUpyUHRzanI2YWloMUE6MA



بالنسبة للامتياز والشغل وكده
انا لسه مجربتش الحياة العملية
ان شاء الله فى شهر 3
واكيد فى اى مهنة هناك خلل
والمشكلة عندنا فى مصر عدم وجود نظام عام يمشى عليه المجتمع فكل واحد بيعمل اللى على مزاجه وكل واحد وضميره

وان شاء الله اكيد الواحد هيحاول يعمل اللى ربنا يقده عليه

مهندس مصري بيحب مصر 15 يناير 2010 في 3:56 م  

كده انا اتعرفت عليك بشكل أكبر
و تشرفت بمعرفتك يا دكتور
و دي كل التاجات اللي جاوبت عليها قبل كده
http://egyptioneng.blogspot.com/search/label/%D8%A7%D9%84%D8%AA%D8%A7%D8%AC%20%D8%B9%D9%84%D9%8A%D9%86%D8%A7%20%D8%AD%D9%82

إرسال تعليق