قلوب مجروحة



النهارده إن شاء الله ناوى أتكلم عن موضوع طويل ولكنه حيوى
موضوع يؤرق الشباب من الجنسين طبعا مش حب الشباب ولكنه بالفعل حب الشباب
عن فشل بعض العلاقات العاطفية
انا إتكلمت عن نفسى قبل كده ولكن النهارده ناوى أتكلم عن إصحابى
الفكرة إنى لقيت الموضوع بيتكرر كتير ومش هينتهى وبيسيب أثر جامد
ممكن نحاول نفكر مع بعض كده
صاحبى الأولانى
اتعرف على بنت فى سنه أولى وفضلوا مرتبطين عاطفيا لغاية سنة رابعة كده
وأى حد يشوفهم رايحين جايين مع بعض يقول يا سلام على الحب وبعدين فى سنة رابعة البنت جالها عريس واتخطبت له
وعادى جدا ولا أكن كان فى حاجة موجودة وطبعا صاحبى أتأثر جدا ويعينى قلبه إتجرح جامد
صاحبى التانى
ميفرقش كتير
إتعرف عليها فى سنة خامسه وهو من أوائل الدفعة برضه واتعلق بيها كتير وجابلها ورق ومذكرات ووعدها بالخطوبة بس فى الإمتياز
لغاية كده مفيش مشاكل لغاية قرب الإمتحانات كده
قالتله فرصة سعيدة إنى أتعرفت عليك وانا موعدتكش بحاجه وطبعا صاحبى أتأثر كتير خصوصا أنه إتصدم فى وقت إمتحانات ودى كانت أول بنت يكلمها ويتعرف عليها ولكن الحمد الله ربنا سترها معاه فى الإمتحانات ومتأخرش كتير فى الترتيب وربنا يكرمه السنه دى
صاحبى التالت
ده بقى اللى كانت صدمته أكبر من سابقيه برضه إتعرف عليها فى الكلية وكانوا متفقين على كل شىء تقريبا ولكن بما إنها كانت ميسورة الحال طبعا كان لازم يتقدم وهو واقف على رجله هو كمان بعد الكلية حفر فى الصخر وسافر فى الخارج _فى الخارج جدا _ علشان يقدر يكون واقف على رجله
ولكن لظروف بصراحه مش عارف تفاصيلها أوى
البنت أتخطبت قبل رجوعه من السفر
ورجع لقى كل شىء انتهى
القصص تقريبا متشابهة كتير وهتقلولى إنى متحامل على البنات ده بس من منطلق إن أصحابى أولاد وأوفياءكمان
وعلشان خاطركم هتكلم عن شكل آخر وده
صاحبى الرابع
فى الكلية كان بيتعامل بشىء من البساطة مع الأولاد والبنات يعنى كان له أصحاب بنات كتير وهو كان واخد الموضوع عادى ولكن فى بنت اتعلقت بيه جدا وصرحت له بالموضوع ولكن هو إتفاجىء بالموضوع وبالطبع مكنش فى دماغه حاجه
بس معرفش يصدمها وفضل ماشى معاها باقى السنة
لغاية وقت التخرج
قالتله تعالى كلم بابا بقى
قالها انا لسه متخرج ومش بشتغل قالتله ربنا يسهل إتقدم بس و تبقى تشتغل اى حاجه

قالها معنديش شقة
قالتله مش مشكله ممكن أعيش مع والدك ووالدتك وحتى بابا ممكن يساعدك وهو ميسور الحال
لكن صاحبى مكنش عنده استعداد اساسا إنه يتقدم فى الوقت ده ومش جاهز لتحمل المسئولية
طبعا الموضوع ده ترك عند البنت جرح كبير
تعالوا نحاول نشوف بعض الأسباب والحلول للمواضيع دى
انا عارف ان كلامنا هيكون نظرى وتنفيذه مش سهل
وانا عارف برضه إن كل شىء قسمه ونصيب
بس أكيد فى حاجات ممكن نتناقش فيها

ومثلما يقولون الوقاية خير من العلاج
1- هنلاقى فى عامل مشترك للقصص دى كلها وهو إن كلهم بدأوا حكاياتهم وهما فى الكلية وقبل ما يكون فى شىء رسمى ودى أولى خطوات فشل العلاقة

2-الظروف الإقتصادية طبعا ليها عامل أساسى أن الشاب بيكون قدامه فترة بعد التخرج على ما بيكون جاهز للخطبة وطبعا مفيش بنت بتستنى والمشكله دى ملهاش حل غير أن الأسره تكون متيسرة من الأول

3-تقليد اللى بيحصل يعنى مثلا تيجى تتمشى فى الجامعه تلاقى كل ولد قاعد جنب واحده وكده طبعا كل واحد بيقول فى نفسه إشمعنى انا تفتح التليفزيون تتفرج على المسلسلات تلاقى قصص الحب والغرام تقول اشمعنى انا
تفتح الراديو تلاقى أسامه منير قاعد بيسمع فى قصص الحب
وأول سؤال انتى مرتبطة
يعنى عندك قصة حب ومش يعنى مخطوبة أو متجوزة
أكنها أجرمت لو كانت مش مرتبطة
أو إن الطبيعى إن كل واحد أو واحدة لازم يكون عنده قصة حب

4-يمكن أصحابى عاطفيين بزيادة شويه وللمشكلة دى
اسمعوا الرسول قال إيه

{أحبب حبيبك هوناً ما ، عسى أن يكون بغيضك يوماً ما ، وأبغض بغيضك هونا ما ، عسى أن يكون حبيبك يوماً ما}

يعنى ياريت بلاش الإندفاع فى العواطف
ويا سلام لو نرتب أولوياتنا زى ما انا إتكلمت قبل كده يعنى لازم تكون لينا أهداف وأولويات محتاجة مجهود وتضحية أولى من المشاكل العاطفية دى أسود عريضوحابب أعيد حديث الرسول اللى كنت قولته قبل كده
((إِنَّكَ لَنْ تَدَعَ شَيْئًا للهِ إلاَّ أَبْدَلَكَ اللهُ بِهِ مَا هُوَ خَيْرٌ لَكَ مِنْهُ))



5- آخر شىء حابب أقوله ياريت نحاول نقيس كل شىء بنعمله من وجهة نظر الدين الأول يمكن كلامى فى شىء من المثالية شوية بس انا بحاول اناقش معاكم وأذكر نفسى وياكم علشان انا عارف ان المواضيع العاطفية دى كتير بتكون مؤلمة ياريت تحكولنا عن قصصكم واقترحاتكم عن هذا الموضوع الشائك جدا جدا جدا

100 رأيك يهمنا:

محمد سعد القويري 26 مارس 2009 في 1:16 م  

بداية أخي د.عرفة
السلام عليكم
وبعد
موضوع جميل
ولكن ما يحدث عندنا في السعودية مختلف تمامًا
وأذكر أنني في الحج الماضي تناقشت مع دكتور مصري حول قضية الحب قبل الزواج
صرح لي بأنه تعرف على ستين فتاة وفي النهاية تزوج من واحدة هو يحس الآن بأنه ليس مرتاحًا معها ..
مسألة الحب قبل الزواج هي مسألة فارقة بين مجتمعي ومجتمعك ..
ففي مجتمعنا يكفي أن تسأل عن الفتاة ودينها وأخلاقها وتنظر لها نظرة شرعية وبعدها يحدث الزواج ..
قد أكون ابتعدت عن المحور الأساسي لموضوعك ..
لكنني أحببت أن أبين اختلاف الثقافات بين مجتمعاتنا .

تحياتي
وأسعد بالتواصل مع مواضيعكم

د. ياسر عمر عبد الفتاح 26 مارس 2009 في 1:23 م  

الموضوع يمكن شائك شوية
وأنا الحمد لله مليش خبرة شخصية فيه
لأنى بحاول ابعد عن السسكك دى على قد ما أقدر
لكن بنشوف وبنسمع حكايات
الله أعلم بصحتها .. ومقدرش أحكم عليها
بس اللى أقدر اقوله إن دى فتنة كبيرة جداً
وربنا يعافينا منها

حسام غانم 26 مارس 2009 في 1:44 م  

موضوع جميل يا عرفة

أنا شايف إن أي خد بيرتبط بواحدة

وهو مش مستعد للجواز

فده غلط

الواحد يجهز نفسه وبعدين يبدأ يشوف بقى بنت الحلال

إنما غير كده يبقى تسلية

غير معرف 26 مارس 2009 في 2:12 م  

السلام عليكم
فعلا موضوع جميل جدا يادكتور وبيناقش قضيه مهمه فى مجتمعنا واكيد اى واحد يرتبط باى واحده ويوعدها بالزواج او انه يرتبط على الاقل من غير خطوبه وهو مش مستعد اكيد طبعا مش هاينفع والمفروض ان مفيش اى حد انه يرتبط بواحده ويكن بينهم حب الا بعد اما يتخطبوا علشان هما اكيد مش ضامنين انها هاتستناه ولا لا واكيد ان اكتر البنات لما بيجى لها اى عريس مناسب ويمكن يكون احسن من اللى هى مرتبطه بيه اهلها هايوافقوا وممكن يغصبوها على ذلك فده المفروض ان اى شاب واى بنت تتفادى انها ترتبط باى شخص الا بعد الخطوبه وبالتوفيق للجميع ان شاء الله وربنا يهدينا جميعا

Unknown 26 مارس 2009 في 2:46 م  

السلام عليكم ورحمة الله تعالى وبركاته
انا بثبت حضور فقط واقرأ براحتى واعلق
كمان بعد (بصراحة بصراحة بصراحة الغدا:)!
اتفضلوا معانا بالهنا والشفا.
(احمدك يارب هم فى المحلة:)

غير معرف 26 مارس 2009 في 3:04 م  

اولا موضوع حضرتك جميل يا دكتور كالعاده
انا اتكلمت مع زميل ليا على الايميل من فترة
قبل كده مكنش على الايميل
بس بداية لازم ابين اني عمري ما كنت كلمت زمايلي في الكليه بالطريقه اللي بنشوفها دي
لكن ممكن عايزه ورقة الغياب بحث حاله اي حاجه زي كده
لكن حصل اني كنت بعلق له على صفحه له على المنتدى
بداية طبعا هو شخص محترم جدا جدا كمان
بس حصل انه طلب ايميلي
معرفتش اقوله لا يمكن طبيعه فيا اني احس اني هزعل اي حد لو قلت له لا بقلة زوق ولاني عارفه انه شخص محترم في الكليه قلت مش مشكله عادي هنتكلم في ايه يعني اكيد عن الكليه
بعدين قعدت فترة طويلة اوي مدخلش على الايميل بعدها او ادخل انفيزيبل
بعت يسالني مبتدخليش ليه قلت له عادي بدخل حضرتك مبتكنش قاعد المهم عشان ما اطولش
كلمته ايام الامتحانات وكنا بنصبر بعض على الامتحان ويسالني عملت ايه ونسال بعضنا الدعاء للبعض
وخلاص
بعدين الموضوع اتطور انتي منين بتعرفي تعملي كذا (طبخ يعني) اصلي عايز اتعلم ؟؟؟ قلت له عادي بتتعمل كده وكده
حسيت من كلامه انه عايز يقول انه عايز يخطبني او كده المهم طبعا ما اتكلمتش ولا قلت حاجه ولا عرفت اقوله نبطل كلام عشان زي ما قلت مش بعرف احرج حد خالص بعدين قاللي بصراحه بقى وكده بس مش صراحه اوي على فكرة
بس في نفس اللحظه قلت له بابا عمره عمره ما هيوافق اتجوز في بلد تانيه قال ربنا يسهل
المهم جه شخص كويس قبل كده عمري ما اتكلمت معاه في الموضوع الزواج بره البلد او كدهبس لما جه الشخص التاني ده واصلا كان بييجي قبله ناس تانيه برضه
المهم بابا ارتاح له وانا صليت استخاره وارتحت له وفي نفس الوقت بقى لما الموقف اتحطينا فيه بابا قاللي عمري ما هوافق على شخص غريب ان شاء الله وزير
المهم نهيت الكلام بينا فجأة عشان لو وافقت على الشخص التاني مبقاش بكلمه برضه
طبعا قال الكلام اللي حضرتك قلته ده يا دكتور
على فكرة مكلمتهوش في الكليه غير كل حين ومين في حاله ولا حاجه
لان روندي
وكذا مرة حاولت انهي كلامي معاه كلية قبل ما افكر اتخطب اصلا
بس مش عارفه كنت بخاف اجرحه بس لما الموضوع بقى جد بطلت اكلمه
طبعا قال الكلام اللي انت قلته ده
نهياة كلامي طبعا معدش يفيد الكلام
لاني بحب خطيبي الحمد لله ومقتنعه بيه
بس نصيحه لكل البنات والولاد يبعدوا عن الطريق ده خالص
وميدخلهوش لاني عشت فتره كبيره من الاكتئاب
وهو كمان يعني
بس انا مش عارفه اعمل له ايه
انا متاكده ان بابا هيرفض هيرفض
اكيد مش كلامي بس عشان ابرر لنفسي
وكمان بصراحه حكاية الغربه صعبه عليا
بس انا قلت انا ممكن اتعود بس بابا اللي هيرفض
خلاصة كلامي نفسي اسمع رايكم في الحكايه دي
وادعوله وادعولي

غير معرف 26 مارس 2009 في 3:47 م  

ياريت يا دكتور بعد ما حضرتك تقرا الرد بتاعي
يوم وتمسحه ولك جزيل الشكر
انا بس عايزة اقول كلمه كمان
ان هو يمكن استلكفني مع ان مكنتش بكلمه مقلتش حاجه
بس هو اللي دخل نفسه حياتي يعني مش زي بعض البنات بيصاحبوا ولاد عشان يضمنوا عريس
كمان عايزة اقول ان انا كنت واخده عهد على نفسي محدش يدخل قلبي الا لما يكون خطيبي على الاقل
لانه فعلا مش مضمون ان الحب او العلاقه دي تستمر
وقلت له كده على فكرة مرة بس بطريق غير مباشر
لاني برضه مكنش كلمني بطريق مباشر
يارب يكون طلعني من دماغه ويارب يكون الاكتئاب زال من عنده بس فعلا غصب عني
يا ريت بجد الردين دول يتمسحوا بكرة بالكتير
بس تقول راي حضرتك الاول
وحضرات الزوار اللي بيشوفوا المدونه وبعدين يتمسح لحسن يشوفه ولا حاجه

مش عارفه ايه اللي خلاني اتكلم انا كنت نسيت الموضوع
بس هو زي هم في قلبي وعايزة ازيحه عني
وعايزة حد يقولي انتي مغلطتيش
او غلطتي حتى لانك كلمتيه من الاول
وانا فعلا غلطت بس مكنش قصدي كل ده يحصل

سلامو عليكم

نبض الحياة 26 مارس 2009 في 3:49 م  

لقد فتحت مناقشة فعلا لموضوع شائك وما أكثر هذه القصص والحكايات هذه الأيام
وسواء الشباب او البنات فكل حد منهم بيعمل كدة فدة بيكون استهتار لجرح مشاعر الآخر وما اقسى ذلك عندما يجرى المرء وراء مصلحته الشخصية ولا يلقى بالا لما يحدثه فى الاخرين
وارجع واقول زى ما قولت فى بوست ليا قبل كدة ان الانسان اللى مش بيتقى ربنا فى الناس ليه حق يعمل اكتر من كدة وما اكثر هؤلاء
هنحاسب مين ولا مين ....
اذا الولد لقى بنت كويسة وناس كويسين ومتساهلين فى طلباتهم يفتكر انه ملكهم وللأسف ما يحاولش يصون النعمة دى بل بالعكس ...
ولو البنت حبت شخص كويس بس حاله مش متيسر وجالها عريس ميسور الحال بسرعة تروح وتبيع ....وربنا يهدى ويرجع الحق لأصحابه ....

د/عرفه 26 مارس 2009 في 4:17 م  

محمد سعد القويرى
اهلا بيك وسعيد بتواجدك معانا
بالنسبه للموضوع هو مش كل المصريين كده ولا حاجه
ولكن الموضوع فعلا منتشر خصوصا بين طلبة الجامعه
واكيد اللى يحب قبل ما يتجوز ستين بنت اكيد صعب يرتاح فى جوازته علشان ده انسان عنيه زايغه
تحياتى ليك

د/عرفه 26 مارس 2009 في 4:19 م  

د ياسر
سعدنا بتواجدك معانا واهلا بيك
احسن شىء انك بعيد عن الحوارات دى بجد
ومثلما يقولون ابعد عن الشر وقنيله
يعنى اجعل بينك وبينه قنايه
وربنا يحفظ شاببنا وبناتنا

د/عرفه 26 مارس 2009 في 4:22 م  

حسام غانم
اهلا بيك دكتره
نورتنا وسعدنا بمقابلتك امبارح
وانا مع رايك طبعا
ان الواحد ميحولش يدور او يرتبط غير لما يكون جاهز فعليا
خلاف كده
ممكن يسبب مشاكل عاطفيه كبيره
هو ممكن ميكونش تهريج اوى بس المشكله فى مشاكله الكتير
تحياتى ليك

د/عرفه 26 مارس 2009 في 4:24 م  

دكتوره نور
سعدنا بتواجدك
ومنتظرين
رايك وخبرتك فى الموضوع علشان تثريه وتزيدى من قوته

غير معرف 26 مارس 2009 في 4:33 م  

كلامك جامد وحلو بس هو لازم نجيب من الاساس المشكله هى الصراحه مع النفس اولا كل واحد بيدخل علاقه مش بيبقى عارف هو ناوى على ايه ومش مصارح نفسه بنواياه المستقبليه ولا بيصارح اللى قدامه وبالتالى عند اول امتحان يكرم الواحد منهم او يهان انما لو كل واحد عارف اللى عايزه الامور هتبقى واضحه ومفيش صدمات
تانى الامور وهو ان قوه الاراده والعزيمه لو انته بتحب فعلا وبجد وصادق فيه هتحارب فيه انما لو مجرد ارتباط عشان البنت عايزه تبقى قفا راجل والواد عايز يعيش قصه حب زى اصحابه وبالتالى مش حب قوى ينهار امام اى عقبه بسيطه او اغراء قوى بس ونبقى نكلمل بعدين عشان ما تزهقش منى

د/عرفه 26 مارس 2009 في 4:40 م  

غير معرف
اولا انا سعيد جدا انك مهتميه بالمدونه
وسعيد أكتر بمشاركتك الايجابية
ولكن عندى طلب واحد ان تعليقك يبقى فى المدونة
ولا يمسح
انا بستسمحك الاول اهو
حتى علشان الناس تقدر تشوف او ترد على تعليقك وقصتك
بصراحه انا أتأثرت كتير أوى بالقصة
ومثل تلك القصص تماما هو ما عنيته فى موضوعى
عايز اقولك حاجة
لازم تكونى صريحه جدا معاه ومع نفسك
يعنى اللى فات انتهى واظن انك موعدتهوش بحاجه
اما لو كنتى وعدتيه فده شىء غلط جدا
او انك حتى رضيتى بوعده ليكِ
وبعدين لازم تكونى قادرة على المواجهة ولازم كنتى تقوليله انك اتخطبتى ولازم نبعد علشان كده اكيد مينفعش المهم كنتى لازم توضحى وجهة نظرك له
ده انا بتمنى انه يشوف كلامك علشان يحاول يبدأ حياة جديده
ويعرف انك كنتى بتقدريه بس كل شىء قسمة ونصيب
انا عارف ان البنات مش بيكون باديها القرار
المهم
طالما اتخدتى قرارك بالاستمرار مع خطيبك ربنا يوفقك ويكرمك
وان شاء الله ربنا يعوضه خيرا
بس طبعا لازم الناس يكون واضح عندها مدى الالم اللى ممكن يتسسبب فيه معرفة ما قبل الخطوبة
ولازم الواحد يكون واضح وصريح جدا فى المواضيع دى
المهم ربنا
يرزقك بالزوج الصالح
ويرزقه بالزوجة الصالحة

د/عرفه 26 مارس 2009 في 4:47 م  

غير معرف اللى بعد كده
حبيبى نورتنا دايما
شىء كويس انك مهتم بمواضيعى دكتور محمد
كلامك منطقى وواقعى جدا
وانا موافق عليه تماما
تحياتى ليك
ويارب تنورنا على طول

د/عرفه 26 مارس 2009 في 5:02 م  

نبض الحياة
يا مرحب بيكِ معانا
وأسعدنا ردك القيم على الموضوع
طبعا أصعب شىء أن الواحد بيدور على مصلحته دون مراعاه لمشاعر الأخرين
تحياتى

غير معرف 26 مارس 2009 في 5:25 م  

الى الانسه المخطوبه مبئيا مبروك وربنا يوفقك ومش بسبب ان قولتى ياريت حد يقول انى صح لكن بالفعل انتى صح الصح وجبنه بريزدن كمان اولا الانسان زميللك ده هو حتى هذه اللحظه مقالش ولا اتكلم فى شى ولا اى حاجه اذن هو مجرد زميل كلامه معاكى يحتمل الكثر والكثير منها انه مع احترامى الكامل له ولا حترامه فهو انسان يعنى بيحب انه يتعرف على الجنس اللطيف من باب المعرفه من باب الصداقه من باب انه ميحسش انه الوحيد اللى مش بيكلم بنات من باب انه بيثبت حاجه لنفسه من هذا الطريق او اى شىء الاخر لا يعلمه الا الله انما الخلاصه ان الباشا لا يوصف باكتر من انه بيتسلى مش اكتر لانه معملش اى خطوه عشان يثبت جديته فعلا ولو من باب المحاوله حتى لعل وعسى وانما اكتفى بالتلميح فقط وده ميجبش عيش وبالتالى فانتى عندك كل الحق وانسانه محترمه وربنا يبارك ليكىو لخطيبك وياريت تكونى حازمه معاه لانك ممكن تتعرضى لبعض الضغط النفسى بما انك حساسه يعنى فلازم تضربى بيد من حديد ممكن شكللك يبقى قاسى او حاده بس لازم ده والسلام ختام

Abd-Allah ibn Aadam 26 مارس 2009 في 5:53 م  
أزال المؤلف هذا التعليق.
غير معرف 26 مارس 2009 في 7:11 م  

السلام عليكم / جزاكَ الله خيراً دكتور عرفه على هذا الموضوع الخطير جداً .. فعلاً خطير لأن ممكن يحصل أكتر من جرح القلوب وهو الزواج العرفى أقصد الزنا والضياع والفساد والخيانة وفشل الزواج إن حدث و و و .....
وفعلاً الإعلام كان له دور بشع فى نشر الحب والرفقة والصحوبية وغير ذلك من العلاقات التى حرمها الله تعالى ، سبحانه يريد المحافظة على القلوب والنفوس والمشاعر .
الحب ليس حراما وله وجود اعترف به رسولنا الكريم حينما قال { لا أرى للمتحابين إلا النكاح }
ولكن طريقة الحب والهدف منه واختيار الحبيب والوقت المناسب وو...
أحييك على تجربتك العاطفية التنى لم تندفع ورائها لأن الغيب يحمل لنا الكثير .
واللهم اهدى شباب المسلمين واحفظهم آمين .

حارة سد 26 مارس 2009 في 7:30 م  

بداية هذه الزيارة الأولى لي لمدونتك..وهي رائعة بالعفل

ثانيا أكاد أجزم بأن أحدا لا يستطيع التحكم في مشاعره وعواطفة وجياشة قلبه

الا أنه من ناحية أخرى الإنجراف وراء تلك الأهواء من أكثر الأخطاء ضراوة

كل شيء يأخذ من الوسط
لا نريد أشخاصا بدون قلوب ولا نريدهم منجرفين وراء مشاعرفهم فتهوى بهم

كما ذكرت أهم ما في الأمر تريب لتلك الأولويات

الحارة سد

غير معرف 26 مارس 2009 في 7:54 م  

هيا فعلاً مشكله ومعقده كمان

بس متهيألى الشباب لو عرفوا إن ما بنى على غلط

أخرته غلط برضه .. كان الحال مبقاش كدا

يعنى إيه كل اتنين زملا يمشوا مع بعض فى الجامعه

وبعدين يحبوا بعض اكيد علاقتهم هاتبقى فاشله لأنى مفيش مقومات للنجاح

ولأنهم مبداوش صح ..

الجواز مش قرار سهل ليه حسابات كتير من ضمنها الحب

وليس كلها الحب ..

ربنا دلنا ع الطريق الصح علشان منتجرحش لكن احنا اللى بنصمم نجرح نفسنا وقلوبنا بإيدينا

بمخالفة الطريق دا ..

salma mohamed 26 مارس 2009 في 8:18 م  

حراااااااااااااام,
دي ثالث مره اكتب التعليق ويضيع,
انا زهقت خلاص والمهم اني بكتب كلام كتير وابقى مش عارفه اكتبه تاني,
دي اخر مره هعلق ولو ضاع مش هعلق تاني كفايه اني كنت هاحرق الباتيه اللي كان في الفرن والحمد لله لحقته في الوقت المناسب,

ممكن كلام كتير يتقال في الموضوع ده,
زي مثلا ان الولد مش يواعد البنت الا لما يكون جاهز,
والبنت مش تواعد الولد وهي عارفه انها ممكن ما تقدرش على الوفاء بالوعد,
بس الاهم واللي عاوزه اقوله:
(ومن يتقي الله يجعل له مخرجا ويرزقه من حيث لا يحتسب)
يعني احنا نتقي الله في اعمالنا من الاول ومفيش اي حاجه من المشاكل دي هتحصل,
يعني احنا مأمورين ذكور وإناث بغض البصر ,واللي عدمه هو اساس المشاكل دي,
لان النظره تدعو الى اعادة النظر وبمعاودة النظر الشيطان يجمل الشخص في عين اللي قدامه فيعجب بيه وبعدين يميل ليه وبعدين يحبه,
طيب من الاول منبصش,
وكمان من اهم الامور اكثر تسبب للمشاكل دي الاختلاط,
يعني نحاول نبعد عنه قدر الامكان ولو اضطررنا يبقى نبعد عن الاحتكاك,
يعني التعامل يكون مع نفس الجنس,وميجيش واحد يطلب المساعده من البنت او العكس بحجة انه شاطر وكده,كل واحد يدور على بني جنسه وبناقص الحاجه لو هتخلي الواحد يكلم الجنس التاني,لان في حين انك هتستغنى وتمشي بمبدا ومن يتقي الله يجعل له مخرجا ويرزقه من حيث لا يحتسب,هتلاقي الحاجه اللي محتاجها هتجيلك لحد عندك من بني جنسك ومن غير ما تعصي ربنا,
اما لو حصل والشيطان ضحك على الواحد يحب خلاص,يبقى يجاهد نفسه على التخلص والبعد,اكيد صعب بس اكيد برضه اسهل واهون من الجرح الدنيوي والعذاب الأخروي,
ولو مش عارفين نبعد مانستسلمش ونفضل نجاهد وندعي ربنا انه يخلصنا وندعي بان ربنا لو عارف ان الخير لينا مع الشخص ده يجعله من نصيبنا من غير ما نعصيه,
ومهم جدا اننا ما نعترفش للشخص الاخر الا اذا كان الشخص جاهز انه يتقدم ووقتها مش هو اللي يقول المشاعر لا لازم يكون في طرف زي اخته مثلا او قريبته يعني حد من نفس جنسها وتكون محرم ليه,
اما بقى اللي على علاقه حاليه فلازم يعرفوا انهم حتى لو مفيش جراح وكله ماشي تمام فربنا مش هيبارك ابدا في الحرام ولازم هيقابلهم اللي ينغص عليهم حتى ولو اتجوزوا,فلازم كل طرف يقدم على خطوة الفراق ويعرف انها مهما صعبت فهي اوهن من عذاب الاخره,
اما اللي انجرح فيعرف ان ده درس اتعلمه ويخليه خبره مفيده في حياته ويستغفر ربنا ويدعي ربنا يعوضه,
وكده كده اللي بيترك شيئ لله ربنا بيبدله بشيئ خيرا منه.
معلش طولت وعوضت التعليقات اللي ضاعت (:

غير معرف 26 مارس 2009 في 8:18 م  

د/ عرفه
انا قلت له فعلا اني اتخطبت
مش قلت له قلت له هتخطب يعني قبلها
قلت له احتمال اتخطب
بس كده كده مش هنتكلم تاني
انا كنت واضحه معاه جدا اهه
بس هو شاف ان دي قسوة اكتر بصراحه معرفتش اعمل له ايه عشان مبقاش قاسيه عليه بس هو كان غلط من الاول والحمد لله اني طلعت منه
لكنه دلوقتي بيقول بقى اني بعته مع اول مطب وكلام كبير كده
ربنا يهديه

غير معرف
انا فعلا ضربت بيد من حديد وبطلت اكلمه
بس طبعا ردوده على منتدى مشتركين فيه
بتبين انه لسه متضايق واني خاينه ومعرفش ايه وده مضايقني
اصلا مش هكلمه تاني ولا اي حد
الا في امور علمية بحته
هو بصراح هقاللي مرة بس بجد بطريق غير مباشر
وانا اللي سالته عايز مني ايه
لولا كده فعلا عمره ما كان هيقول
انا حاسه كده
وياريتني ما سالته
بس مش عارفه هو قاللي انه مش بيتسلى ولا حاجه الله اعلم بلاش نقول عليه كلام يمكن لو قراه يزعل اكتر
هو فعلا من الشخصيات المحترمه في الكليه
على العموم الموضوع انتهى فعلا واللي حصل حصل خلاص وبحاول افتح صفحه جديده
يمكن سايب عنده اثر
وانا كمان
عشان كده حبيت اقولكم عشان محدش يحاول يقرب من الطريق ده
وكمان عشان اعرف رايكم لاني مقولتش لحد
بس شكرا لردودكم عليا بجد

نهاية
بطلب دعاؤكم ليا ولخطيبي بالخير
لاني خايفه لا يكون هو بيدعي عليا
يعني دعواتكم معايا
وادعوله يلاقي اللي احسن مني برضه

بجد عمري ما كنت هحط نفسي في موقف كده لولا هو اللي دخل حياتي
ولا كنت اتخيل نفسي في الموقف ده

موناليزا 26 مارس 2009 في 8:34 م  

البداية تكمن فى عدم الرجوع الى شرع الله
يعنى بيتناسوا تماما"ولا متخذات اخدان" لانها بتبدأ كده زمالة لا صداقة لا لا اخوة وفى الاخر بيطلقوا عليها صحوبية وادى النتيجة الدائمة جرح لاحد الطرفين
عافانا الله واياكم من هذا

غير معرف 26 مارس 2009 في 8:36 م  

هو لازم يعني تسيبه
انا بقول حضرتك تشيله احسن
طيب ممكن تسيبه يومين بدل يوم
مش عارفه بس حاسه انه لو شافه هيتضايق اكتر
وكمان انا عايزة انسى !!!!!
انا كنت بفضفض معاكو شوية

طيب مش عارفه
يعني انا واثقه من راي حضرتك طبعا
بس صفه فيا التردد
ممكن كمان كام عضو يقولوا اسيبه ولا ما اسيبوش
يعني لو شايفين انه ميزعلوش لكن يعرفه ردي او اللي جوايا لو شافه
مع اني ما اظنش انه يشوفه بس مين عارف يمكن يدخل يشوفه

معلش يا دكتور عرفه ياريت مش تزعل مني
يعني انا بس مترددة
مش عارفه
كنت عايزة امسحه
بس براحتكم

إسراء توكل مسعود 26 مارس 2009 في 9:38 م  

ممممم.. لا أعلم من أين أبدأ .. ولكن أسأل الله أن يحفظ قلبي من مثل هذه الجراح .. ولكم بالمثل إن شاء الله ..


أما بالنسبة لقصة الفتاة "غير المعرف" قصتك تشبه قصة أعرفها .. ولكن في رأيي أنك قد أخطأت أولاً بكلامك معه .. ولكن آخراً طالما أنك كنت صريحة معه فأنت غير مخطئة .. ولكن إذا كنت وعدتيه فأنت مخطئة لأنه وعد من لا يملك ولا أستطيع أن أقول لمن لا يستحق لأنى لا أعرف إن كان يستحق أم لا .. ولا أريد أن أظلم أحد .. فأنت لا تملكين القرار لا لأنه بيده الأهل وليس لك سلطة .. فبالتأكيد لن يزوجوك غصباً .. ولكن أنت لا تملكين أصلاً اعطاء واعد كهذا ..

مبروك خطوبتك وربنا يسعدك .. بس نصيحة منى لك اتركي المنتدى الذي يكتب فيه .. ولا تقولى علم ومصلحة .. فهذا مدخل من مداخل الشيطان يفتحها لك .. اتركيه أيضاً لكي تعطيه الفرصة لكي يضمد جراحه إن كان به جراح .. اتركيه أفضل لك وله ..
وتذكري "أن التردد لا يأتي بخير "

تقبلي تحياتي



في مدونة "بلاوطن" .. كتب الدكتور توكل مسعود أولى تدوينات من بين القيود .. تدوينة "هكذا يكون الجيران(1)" .. لا تحرمونا من التواصل .. والدعاء

salma mohamed 26 مارس 2009 في 10:00 م  

هو ده الاخراج الصحيح للحديث اللي ذكرته:
(إنك لن تدع شيئا اتقاء الله, جل وعز, إلا أعطاك الله خيرا منه) .
توصلت لده بعد بحث وتنقيب.

د.آيه 27 مارس 2009 في 12:36 ص  

إيه الجو ده عايز تركيز كده في الرد..
بس أنا عايزة أقول إن أى كلام بين الولد و البنت (لمدة ) لإن لو كلام عادى زى معاد سكشن الحاجات دى و مرة واحدة بيكون مش مشكلة..
لكن لما بنت أو ولد يكلموا بعض كذا مرة و لو كان في البداية بيقولوا زمالة و ده إنسان محترم و الحاجات دى غلط جدااااا..
لإنه بيولد نوع من الألفة اللي بتتقلب بعد شوية بحاجه تانيه.. و لو لطرف واحد .. فالبعد أفضل من الأول..
نسأل الله السلامة

د/عرفه 27 مارس 2009 في 1:29 ص  

يااااااااااه
مش هعرف ارد عليكم كلكم
بكره بقى اكون فايق شويه
بس اللى اقدر اقوله كده النهارده
ان انا مش مألف الأحاديث دى
انا كنت سامع نصها
ودورت عليها وجايبها بالنص من مدنتيات ومواقع دينيه
هى الاحاديث يمكن مش مشهوره
بس مكتوبة فى بعض المنتديات كده بالنص
هدور واتاكد تانى من مصادرها بس ان شاء الله احاديث صحيحه

المعتصم 27 مارس 2009 في 1:46 ص  

بسم الله الرحمن الرحيم
السلام عليكم ورحمة الله وبركاته
صديقى العزيز د/عرفه
تحياتى
عامل ايه يادكترة ؟؟
يارب تكون بخير وفى احسن الاحوال دايما
البوست حلو يامحمد
بس احيانا مايكونش السبب فى فشل قصة الحب انهم ابتدوها وهما طلبه او تكون الظروف هى السبب
يعنى مثلا اخوك ابتدى قصة حبه وهو عنده 27سنه واول مااتعلقت بيها طيران على ابوها صحيح انا مش من عيلة غنيه انما وقتها كنت اقدر اتجوز وافتح بيت وعندى شقه وانا وهى هنكمل ونكافح مع بعض
انما تقول ايه للطمع لازم بنته تتجوز واحد مظبط الامور وبيشتغل فى دول النفط ومعاه دولارات ويعيشها فى القاهرة او اسكندريه مش فى بلدنا فى الصعيد ويكون عنده عربيه وذو مركز مرموق
وقد كان
مهندس شاب زميل اخوها فى السعوديه وبقاله هناك فتره يعنى معاه مبلغ كويس وكمان لسه هيكمل
يبقى هوووووووووووب هاتو المأذون قواااام
.....
بس عارف الجرح ده بيبقى صعب قووووووووى
صحيح بقى تقولى اولويات ومش عارف ايه
الموضوع ده لما بيخبط على الباب العقل بينط من الشباك
كفايه كلام علشان مايبقاش دمى تقيل
ولو انى ماعلقتش
تحياتى يادكترة ودمت بكل خير وود
والسلام عليكم ورحمة الله وبركاته

Unknown 27 مارس 2009 في 3:24 ص  

السلام عليكم ورحمةالله تعالى وبركاته
(ياريت نحاول نقيس كل شىء بنعمله
من وجهة نظر الدين الأول)
طبعا انت عارف الكلام سهل لكن التنفيذ صعب
لان كل حاجة حواليك بتدعوك الى (الحب واشباهه)
فى السن ده!الجو المحيط بك من راديو وإذاعة وتليفزيون وسينما ومجلات وجرائد و(زملاء
وزميلات)وكمان تغيراتك الجسدية بتفرض
عليك اشياء ولو حتى مش عايز لكن
عامة اللى اقدر اقوله او اللى
شفته فى عمرى كله أن ولا واحدة
من قصص الحب بتاعة الكلية
او المدرسة(كللت بالزواج)
الا قصة واحدة وكانت
حالة خاصة جداً جداً
لابن وحيد(لمليونير)
وفعلا اتجوزا واحنا
فى سنة 3!!تصدق دى!
المهم نيجى للجزء التانى
برضه فى الحياة وهو الزواج اللى تم
بعد التخرج و(تأثيث النفس والبيت)بناء
على قصة حب عاقلة وواعية !المهم فى حياتى اعد
لك ممكن 4قصص وفعلا اتجوزوا واحنا بنشتغل وبقينا
فرحانين جداًبهم لكن كام (كام جوازة من دول)
مستمرة للان؟1وحياتك يادكتور عرفة واحدة
فقط !وعارف انا برجع سبب استمرارهم
لايه؟انهم من اول ما تجوزا سافروا
(للعمل بالسعودية)قصدى بعيد
عن تدخلات الاهل وكده فى
بداية حياتهم لانهاممكن
بتبقى سلاح
ذو حدين!

وردة 27 مارس 2009 في 3:32 ص  

د\عرفه
الكلام حلو فعلا وواقعي
بس انا انا شايفة ان الولاد مش رومانسيين اووي كده
والكلام عن تجربة
الولد بيكون حلو اووي ورومانسي وحالم
اول ما يسمع كلمة مسئولية يفتكر انو وراه مستقبل ومفيش شقة ومفيش ومفيش
طيب كل ده كان فين وقت الحب والسرحان والكلام الجميل
ونفس الكلام للبنات برضو انا مش بعفيهم من المسئولية
يبقي نصبر لما نلاقي نفسنا جاهزين وندخل البيوت من ابوابها
نعيش شوية علي ارض الواقع ونأجل الحب لبعد الاتباط
وربنا يكرم الجميع
سلام

fnoonh 27 مارس 2009 في 7:59 ص  

جزاك الله كل خير فعلا والله يادكتور لو كل واحد قبل مايعمل حاجة يعرف ان ربنا مطلع عليه وشايفه والله هيتكسف يعمل حاجة تغضبة
احنا سيبنا حب الله وحب الرسول وجرينا ورى شهوات الدنيا وملزاتها
ثم انه الحب قبل الارتباط ممكن يكون حلو وبيفرح بس اكيد بيغضب ربنا (فمن ترك شئا لله عوضه الله خيرا منها)
فيها ايه لو البنت قعدت في بيتها وراحت جامعتها وعاشت حياتها من غير مايكون لها صديق او حبيب
واستنت نصيبها يجيلها لحد عندها
يكون شخص محترم ناوي جد مش لعب او هزار
ثم انه كما تدين تدان لو حبت يجيلها انسان محترم وملتزم لازم تكون كده
وكمان حكاية اتخاذ الصديقات دي اوالاصدقاء
فعمر ماكان حد من الصحابه متخذ صديقة ولا وحده من الصحابيات رضوان الله عليهم كانت متخذه صديق
ولا عمر الاسلام صرح بالحكاية دي
ولا جتى لو كانت علاقة اخوة الاخوة في الاسلام ماتعنيش انهم يكونو اصدقاء ويمشوا مع بعض وياكلوا مع بعض وضحك وحجات تانيه كتير
عموما ربنا يهدي الجميع ويشغلنا يارب يارب بحبه وحب رسوله ويهدينا ويهدي شباب المسلمين يارب العالمين

تقبل تحياتي وتقديري واحترامي

نور الاسلام 27 مارس 2009 في 9:10 ص  

السلام عليكم

اولا فعلا الموضوع ده شائك جدا لأن الاختلاط ليه حدود...يعنى كما قال الله تعالى((ولا تتبعوا خطوات الشيطان))فما ينفعش اصلا اصاحب بنت وكذلك للبنت تصاحب ولد وتقول اصله صحبى أو هو يقول صحبتى هنا لازم تتحط المبه الحمرا لازم يكون فيه حدود... ودى وقايه من الوقوع فى مشاكل ممكن تحطم القلوب زى ما حضرتك نبهت ..وكما قال الله عز وجل ((ولا متخذات اخدان)) اخدان تعنى اصحاب ..وهذا قول الله وهو الذى خلقنا ....فوالله لو كل واحد سمع كلام ربنا ..لأرتاح فى الدنيا وفى الأخره)
قال تعالى ((الا يعلم من خلق وهو السميع العليم))..

جزاكم الله خيراعلى البوست ..وعذرا على الاطاله.

Ebraheem Aadam 27 مارس 2009 في 10:03 ص  

آآآآآآآسف جدا يا محمد ,
معلش " أفتيت فيها " قبل ما أبحث ,
الحديث الثاني صحيح عن رسول الله
بص , أنا همسع التعليق القديم و أضيفه مرة تانية أحسن حد يقرأ الأولاني و يسيب التاني ..

و شكرا للأستاذة سلمى على التنبية

Ebraheem Aadam 27 مارس 2009 في 10:06 ص  

السلام عليكم و رحمة الله و بركاته ,

بصراحة هو موضوع شائك جدا يا محمد لكن بصفتي " خريج " فخليني أقول إنه شائك لفئة معينة , هي فئة " الطلبة " فقط ,

كان واحد زميلي في كلية ألسن اتعرف على واحدة برضه و و قعد يقول لي ده مش اختلاط و مش الشيطان ثالثنا و لا حاجة ده احنا بنتفق نقرأ الأذكار و نقرأ قرآه و نرن على بعض ساعة الصلاة و ....
و بالنسبة للإمكانيات الشقة موجودة , و الحاجات التانية هنعملها واحدة واحدة و ....

و بعد ما اتخرج قابلته فقلت له عامل إيه و إيه أخبارك خطبت الآنسة اللي كنت قايل لي عليها ؟؟

ثال لي : آنسة مين ؟؟ قصدك المدام !!! ما اتخطبت و اتجوزت كمان !!

لقت واحد جاهز , أكبر منها اتخرج قبلها و عرف يكون نفسه ,

بص يا محمد , هي المشكلة ليها نقاط عديدة

- أولا : بداية القصيدة الاختلاط هو اللي بيعمل المشكلة دي من الأول , و إن واحد يكلم بنت و الشيطان شاطر يخليهم يحبوا بعض ,

- ثانيا : الفرااااااااااااااغ العاطفي ,
البنت و الولد كلاهما بيكون مش لاقي عاطفة كفاية في البيت , فبيدور عليها من مصدر آخر , و بيوهم نفسه إنه بشبع العاطفة دي , بينما هو بيوقدها أكثر و أكثر ,

- ثالثا : إنهم أصلا قد بعض , بالتالي في فترة ما بعد التخرج اللي البنت بتكون فيها بتنتظر الجواز , بيكون الشاب لسه مش قادر يخطب أصلا فضلا عن إنه يتجوز , و لسه قدامه فترة على ما يكون نفسه ,


- رابعا : خلاص علشان أنا طولت


----------------

خارج الموضوع ,
معلش يا محمد , لأن حديث رسول الله أمانه , وجب التنبيه على أن مقولة ( أحبب حبيبك هونا ما ... ) هي ليست حديثا و لكنها من قول الإمام علي بن أبي طالب رضي الله عنه ,

164077 - أحبب حبيبك هونا ما عسى أن يكون بغيضك يوما ما وأبغض بغيضك هونا ما عسى أن يكون حبيبك يوما ما
الراوي: أبو هريرة المحدث: ابن حبان - المصدر: المجروحين - الصفحة أو الرقم: 1/446
خلاصة الدرجة: إنما هذا قول علي بن أبي طالب فقط



و جزاك الله خيرا

د/عرفه 27 مارس 2009 في 11:18 ص  

غير معرف _ دكتور محمد_
شكرا على ردك على غير معرف صاحبة المشكله
ونتمنى مزيد من التواصل بينا دايما
تسلم دكترة

د/عرفه 27 مارس 2009 في 11:20 ص  

حياتى نغم
شكرا لزيارتك واسعدنا مرورك
انتى اتكلمتى على مشكلة خطيرة جدا
بس الحمد اله مش منتشره اوى عندنا فى الجامعه يعنى انا مشوفتش ولا حاله كده
ربنا يحمى شبابنا
تحياتى

د/عرفه 27 مارس 2009 في 11:23 ص  

معذرة انا كنت نسيت ارد عليكِ رانيا
طبعا كلامك مظبوط
وشكرا على اهتمامك
نتمنى رؤية تعليقك على طول تحياتى

د/عرفه 27 مارس 2009 في 11:27 ص  

حارة سد
اسعدنا تواجدك معانا فعلا
ويارب دايما المواضيع تعجبك
انا معاك ان مفيش حد يقدر يتحكم فى مشاعره
واظن الكلمه دى كانت واضحه اوى وانا بتكلم عن نفسى كنت اتمنى ان تقرا الموضوع
بس ما بعد ذلك هى دى المشكله؟؟
اهم شىء ان الواحد يعرف مصير حبه ده ايه
واتمنى ان ربنا يحمى شبابنا كلهم
تحياتى ليك

د/عرفه 27 مارس 2009 في 11:30 ص  

زهرة الامل
اسعدتنا زيارتك لينا
طبعا كلامك منطقى جدا
فعلا الجواز بتكون له شروط تانيه
يمكن الحب واحد فيهم
بس مش كل شىء
كلام مظبوط جدا
تحياتى

kiko 27 مارس 2009 في 1:47 م  

السلام عليكم
أخى الحبيب والعزيز د/عرفه...
الموضوع جميل جداً وبيلمس حاجه أصبحت متواجده فى مجتمعنا بصوره كبيره جداً لحد ما الواحد زهق وطهق وهيخرج من هدموه (أناة لسه مخرجتش من هدومى بس لسه هخرج قريب )والحلول إلى حضرتك طرحتها جميله بس هيا مش حلول هى من باب وذكر فإن الذكرى تنفع المؤمنين .
وبجد الأحاديث إلى إنت ذكرتها جميله جدا ورائعه.. والحديث الأول {أحبب حبيبك هوناً ما ، عسى أن يكون بغيضك يوماً ما ، وأبغض بغيضك هونا ما ، عسى أن يكون حبيبك يوماً ما}
جميل أوى وبصراحه يمكن أول مره أقرأه بس بجد يدل عل أن الرسول حل المشكله إل إحنا بنواجها النهارده دى من زمان
وأخيراً......
أعتذر إليك بشده عن العمل إلى إنت كنت مكلفنى بيه وأنا لم أقوم بيه لظروف خارجه عن إرادتى الشخصيه وأطلب منك الصفح عنى ومسامحتى ....
والسلام عليكم ورحمه الله وبركاته

إيمان 27 مارس 2009 في 1:59 م  

{أحبب حبيبك هوناً ما ، عسى أن يكون بغيضك يوماً ما ، وأبغض بغيضك هونا ما ، عسى أن يكون حبيبك يوماً ما}

هذه الكلمات من اروع ما قرأت عن الحب صلى الله عليك وسلم يا رسول الله

تعرف اهم سبب فى فشل العلاقات اللى ايام الكليه هى زى ما ذكرت انهم بيبدأوا أصلا غلط بعيد عن رضا ربنا سبحانه وتعالى .. والحب الحلال أجمل نعمه فى الحياه ونعمه بالروعه دى لا تهدى لعاصى
خير متاع الدنيا الزوجه الصالحه وأكيد الزوج الصالح وكلمه صالح يعنى صالح فى كل شئ
وبعدين اللى البنات عملوه فى القصص الأولى صدقنى عين العقل لأن الزواج للبنت من الزوج المناسب ستره
وهو الأولى بالأخذ لكن الإخلاص لعلاقه أصلا لا تجوز شرعا
لا أعتقد انه فيه من العقل اى شئ
بجد موضوع تحفه و رايك تمااااااااااام جدا
ربنا يكرمك
ويجعله فى ميزان حسناتك

د/عرفه 27 مارس 2009 في 7:20 م  

سلمى محمد
شكرا لاهتمامك بمواضيع وبالمدونه
بجد بتنورينا على طول
وكويس ان الباتيه متحرقش_مع انى مش عارف هو ايه اصلا_
المهم كلامك جميل ومعقول جدا وبيكمل الموضوع
شكرالردك الطويل ده

د/عرفه 27 مارس 2009 في 7:25 م  

غير معرف
شكرا لردك مره تانيه
وشكر كمان على اهتمامك بالموضوع
فعلا ياريت كل واحد قرا الموضوع استفاد من تجربتك دى
واظن انك ادركتى ان الى حد ما انك كنتِ غلطانه قبل كده
المهم ربنا يسعدك فى حياتك المقبله اللى انتِ اخترتيها
وياريت تكونى اكثر جديه بعد كده فى المواضيع اللى زى كده
واتمنى انك تبعدى خالص عن المنتدى
واظن ان الانسب انه يشوف رايك وكلامك ده
ولو هو محترم زى ما بتقولى مش هيحاول يكلمك او يبصلك مره تانيه
يعنى بستئذنك تانى ان تعليقك يفضل خصوصا ان كانت فى ردود عليه
وربنا يباركلك فى خطيبك ويسعدكم
ونتمنى نسمع رايك فى باقى المواضيع

د/عرفه 27 مارس 2009 في 7:28 م  

موناليزا اهلا بيكِ
وبيسعدنا دايما تواجدك معانا
فعلا الامور دايما بتبدأبسيطه وبعد كده بتزيد
فالحريق بيبدأ من مستصغر الشرر
تحياتى

د/عرفه 27 مارس 2009 في 7:32 م  

اسراء توكل
اهلا بيكِ
وربنا يفك أسر الدكتور ان شاء الله
ويرجع ينورنا دايما وربنا يصبرك ويصبر الاسرة
بالنسبه ارايك طبعا مظبوط وتمام
وشكرا لاهتمامك بالرد على غير معرف كمان
وانا معاكِ فى الرأى
تحياتى

د/عرفه 27 مارس 2009 في 7:34 م  

سلمى شكر تانى لاهتمامك بالحديث
ممكن فعلا تكون دى رواية للحديث
بس انا اظن ان اللى انا ذكرته رواية اخرى
شكرا وانا هدور تانى ان شاء الله

د/عرفه 27 مارس 2009 في 7:37 م  

اية أختى
اهلا بيكِ يا آيه
كلامك مظبوط
بس برضه زى ما شوفتى كلام غير معرف
ان الموضوع كانت بدايته بسيطه مجرد اهتمام وردود على المنتدى
ومثلما يقولون الوقاية خير من العلاج
يعنى متزعليش لما اعد ازعقلك او اتضايق
هههههههههههههه
سلام وربنا يحفظك

د/عرفه 27 مارس 2009 في 7:39 م  

اخى المعتصم والله وحشتنى بجد
حتى انى حلمت فى يوم انك رديت صحيت الصبح لقيتك كاتب بوست بتعتذر فيه
المهم يظهر ان كلامى قلب عليك المواجع
ولا يهمك بجد
هى اللى كانت متستهلكش
وده اللى قاله الرسول ونهى عنه لا يخطب احدكم على خطبه اخيه
انا مش متذكر الحديث اوى بس ده معناه
وربنا يسعدك فى حياتك
تحياتى ليك

خديجة عبدالله 27 مارس 2009 في 10:32 م  

الحمد لله وصلت للآخر الحمد لله .. ينفع كده جهازى يعطل يومين ألاقيكم عملتوا هجوم تدوينى :) ربنا يبارك فيكم ولكم إن شاء الله
بالنسبة للموضوع ولأن التدوينة تناولت هى والتعليقات جوانب عدة لعلى لن أحصيها كلها مؤكد لكن ربما : من منظور عام الفطرة انجذاب ولكن لابد من هدف للحياة وللحب ومن منظور مجتمعى ظاهرة التقليد والفضول للتجربة نوعا ما ومن منظور طبى "لانتشار الظاهرة بين طلاب الطب" يمكن طول الفترة الدراسية السبب مثلا :)
ومن منظورشخصى أعتقد أن بإمكانى أن أهدى الكثير من الأشياء للجميع لكن قلب ومشاعر وما إلى ذلك فله فقط ..أعتقد أن فكرة أنا مش هعمل كده لأنال واحد برده كان كويس وبيغض بصره فكرة جميلة لكن مع التدرج ستجد أننا لا نفعل ذلك ليس فقط عشان يكون كويس ولكن لأن ما لدينا غال لا يستحقه أى مار وأذكر كلمات كنت كتبتها بهذا الصدد منها
مرورك بحياتى لا يكفى لصنع بصمة دائمة بها فهو فى النهاية مرور وفقط وليس لكل السائرين آثار
حل وسط : مابين طموح وواقع مسافة أحدنا يجتازها زحفا والآخر عدوا وتسرعا لذا فلنتوازن أكثر
مثلا واجب عملى : بلاش أسامة منير بيجبلى شلل ربنا يسامحه وبلاش ستار أكاديمى وبلاش فيديو كليب
وفى حل جميل تانى : نكتب نفضفض لمذكراتنا وطبعا الدعاء أهم حاجة
ماسبق طبعا حلول على مستوى فردى على سياق ابدأ بنفسك
عذرا للإطالة وأسعد الله قلوبكم جميعا إن شاء الله
وجزاك الله خيرا لمجهودك الطيب ونفع الله بك وتقبل منك

رحلتنا في الحياة 28 مارس 2009 في 1:24 ص  

كلامك صحيح ودايما انا بشوف ان مرحلة الجامعة دى اصلا مش مرحلة حد يرتبط بيها بحد المفروض الانسان مش يفكر فى الحب الا لما يكون واثق انه هيرتبط انما اللى بيحصل ده سلطة يحب بتاع اربع خمس بنات قبل ما يقرر يخطب والبنت كذلك ولما يقابل الانسان اللى هيكمل معاه حياته ش هيلاقى اى مشاعر يديهاله
ربنا يصلح الاحوال

فتــافيت (رحاب الخضري) 28 مارس 2009 في 1:45 ص  

طيب انا كنت داخلة اسلم عليك
بس مش هاعرف ارد على البوست ده بقصتي او اقتراحي، علشان ما احبطش حد معايا بجد
بس انا لا كنا صحاب في الامعة ولا كان حب مراهقة
ده كان حب ناضج وخطوبة محترمة.. ونهاية عبية كالعادة باسم الحب طبعا بلا خيبة

المهم عجبني اوي اخر حاجة قولتها .. اننا نقيس اي حاجة بنعملها بالدين

كمان نحدد اولاوياتنا

بوست جميل.. ولو لاقيت شجاعة عندي هادخل واحكي

سلااااااااام

د/عرفه 28 مارس 2009 في 10:51 ص  

معذره يا جماعه مش عارف ارد على الناس النت
كل يوم يفصل منى
ارد على واحد وبعدين يفصل منى
ربنا يستر
دكتوره نور
اهلا بيك وبزيارتك التانيه للموضوع
بنستنى تعليقك على طول
المهم طبعا كون ان احنا نقيس كل شىء بالدين
صعب بس لازم الواحد يضحى باى حاجه بيحبها لو فيها مخالفه للدين
وان عارف طبعا ان الزواج بتكون له مقومات تانيه خلاف الحب
رب يرزق شبابنا بالشريك الصالح
تحياتى دكتوره

د/عرفه 28 مارس 2009 في 10:56 ص  

ورده اهلا بيك
ويسعدنا تعليقك دايما
لا فعلا فى صبيان رومانسين جدا
خصوصا لما يكون مش مش متعدد العلاقات النسائيه
بيكون جاد فعلا انه يرتبط
بس اظن انه ممكن الحب يبدأ قبل الجواز عادى بس لما يكونوا جاهزين
تحياتى ورده

د/عرفه 28 مارس 2009 في 10:59 ص  

أفنان أهلا بيكِ
ومنوره الموضوع
طبعا كلامك مظبوط وياريت كل شاب وفتاه يقدروا يلتزموا بالكلام ده
جزاكم الله خيرا تحياتى

د/عرفه 28 مارس 2009 في 11:00 ص  

نور الإسلام أهلا بيكِ
وسعدنا بتعليقك جدا
كلامك مظبوط طبعا ان احنا لازم نبعد من الاول
والوقاية خير من العلاج
ومفيش احسن من الالتزام بكلام ربنا
تحياتى

د/عرفه 28 مارس 2009 في 11:03 ص  

اهلا بيك باش مهندس ابراهيم
شكرا لاهتمامك بالموضوع وعلى اهتمامك كمان بصحه الاحاديث
وقصتك دى فى زيها كتير جدا
واقتراحاتك اللى قولتها جميله جدا
تحياتى هندسه

د/عرفه 28 مارس 2009 في 11:07 ص  

كريم صاحبى
ياااه انا فرحان جدا بتعليقك بجد
وسعيد باهتمامك بالموضوع وبالمدونه وياريت متحرمناش من تعليقك بعد كده
طبعا كلامك مظبوط
وبالنسبه للحاجه اللى انا كنت طالبها منك
ولا يهمك كيمو الموضوع انتهى خلاص
وانا عارف انه طالما انت معرفتش تعمله يبقى مكنش اصلا فى امكانك ده او فى ظروف
المهم ولا يهمك انا مش زعلان نهائى
تحياتى ليك كيمو ومستنينك على طول

د/عرفه 28 مارس 2009 في 11:10 ص  

ايمان اهلا بيكِ وشكرا لاهتمامك بالموضوع
وبجد الاطراء ده انا سعيد بيه جدا
ويارب دايما المواضيع تانل اعجابكم
وفعلا اى خطوه فيها معصيه لازم الواحد يبعد عنها من الاول
وشكا على اطرائك
تحياتى

د/عرفه 28 مارس 2009 في 11:15 ص  

خديجه عبد الله حمدا لله على سلامه الجهاز وعلى عودتك
كنا مفتقدين تعليقك
كلامك جميل جدا وموزون
بس بعلق على حكايه طب بس
ان المشكله بتزيد علشان هما اكثر جديه ومش غاويين تهريج
والسنين كتير شويه
وعجبتنى اوى كلمتك
مرورك بحياتى لا يكفى لصنع بصمة دائمة بها فهو فى النهاية مرور وفقط وليس لكل السائرين آثار
كلمه جميله فعلا
تحياتى ليك ومنتظرين تعلقك دايما

د/عرفه 28 مارس 2009 في 11:17 ص  

ايوشه اهلا بيك
وسعدنا بتعليقك
اكيد الواحد لازم يحافظ على مشاعره شويه
علشان تكون فى الحلال
علشان بصراحه انا بشوف ان اسعد العلاقات الزوجيه هى بين الناس الملتزمه صح
واللى كانوا محافظين على نفسهم قبل ازواج
تحياتى ايوشه

د/عرفه 28 مارس 2009 في 11:19 ص  

فتافيت
اهلا بيك فتافيت
بنسعد بتعليقك جدا وشكرا على متابعتك للمدونه
بس بجد عايز اسمكع قصتك دى جدا
عايزين ناخذ منها العبره
زى ما سمعنا فى التعليقات قصص كتير
القصص الواقعيه دى بتكون جميله بجد
شكرا على اطرائك
بس لازم تحكى
تحياتى فتافيت

فتــافيت (رحاب الخضري) 28 مارس 2009 في 6:43 م  

مسير احكي يا دكتورنا اكيد
بس المهم دلوقتي.. انت كنت اول تعليق من اول شخص ما تمررش له التاج اللي عندي
فكده انت ادبست فيه
خد التاج يلا زي الشاطر وجاوب عليه
يلا يا ابني.. مش هافضل الصحي فيك للصبح
يلا الباص هايفوووووتك

اغمض عيني وافتح ابص لاقي التاج عندك ومتجاوب

انا غمضت اهو

افتح ولا لسه؟؟

؟؟

خلاويص؟؟

د/عرفه 28 مارس 2009 في 7:53 م  

مرسى كتير فتافيت على التاج
بس ارد فين

ghorBty 29 مارس 2009 في 9:17 م  

موضوع جميل بالفعل وقلت كل حاجه

انا الصراحه مش عارفه اقول ايه بس راي في الموضوع دا دايما بقول فيه

ان الزواج بنيان وبربطه بالايه اللي بتقول

َ( أفمن أسس بنيانه على تقوى من الله ورضوان خير أم من أسس بنيانه على شفا جرف هار فانهار به في نار جهنم والله لا يهدي القوم الظالمين)

كل لما تكون العلاقه فيه تقوي لله كل لما يكون فيه التسهيل والخير والعكس

وربنا يهدي الجميع

جزاك الله خيرا

Mohamed 29 مارس 2009 في 10:26 م  

السلام عليكم يا د.عرفة
كلام سلليم وتدوينة رائعةو الله اي علاقة بعيدة عن ما امرنا به الله و رسوله الكريم ما فيها بركة و ما فيها غير وجع و الم و الواحد شاف قصص كتير زي الامثلة الي زكرتها
جزاك الله خير
سؤال بعيد عن الموضوع
هو المنتخب المصري عمل ايه معا زامبيا النهاردة (: ؟؟

د/عرفه 30 مارس 2009 في 12:06 ص  

غربتى
تحياتى ليكِ
ودايما تعليقاتك جميله زى كتاباتك
آيه جميلة اوى اللى انتِ ذكرتيها
ربنا يثبتنا دايما على الحق

د/عرفه 30 مارس 2009 في 12:15 ص  

استاذ غريب
شاكر لزيارتك كتير
ويارب دايما مواضيعى تنال اعجابك
واقدر اكون عند حسن ظنك على طول
بالنسبه للماتش للاسف اتعادلوا
ربنا ييسر فى الباقى ان شاء الله
متحرمناش من تواجدك معانا على طول استاذ غريب

م/ الحسيني لزومي 30 مارس 2009 في 7:41 ص  

شارك في الحملة من أجل إطلاق سراح
المدون دكتور / توكل مسعود

حازم النبراوي 30 مارس 2009 في 9:02 ص  

انا مش من انصار حب الجامعات مع انى ايام ما كنت فى الجامعة كنت بعمل كدة (بحب على روحي) لكن مع الوقت والخبرة اكتشفت ان كل دة كلام فاضى لان مفيش مقومات تساعد على تحويل الحب دة لعلاقة رسمية( يعنى كلة تضييع وقت ومشاعر وخلاص)
عموما الموضوع دة شيق جداً ... تسمح لى اتكلم عنة فى مدونتى الصوتية؟؟؟؟ انتظر الموافقة.. وشكرا

hasona 30 مارس 2009 في 2:40 م  

السلام عليكم

حضرتك أنجزت وأوجزت
وخصوصا في الخمس نقاط التي ذيلت بها الموضوع


موضوع مهم
يؤثر علي نشأة شبابنا وبناتنا
وعلي مستقبلهم وتقبلهم للحياة فيما بعد

تحياتي

القلم السكندري 30 مارس 2009 في 6:03 م  

جزاك الله خيراً يا دكترة

موضوع في الجون بصراحة
سلمت يمينك

د/عرفه 30 مارس 2009 في 8:32 م  

باش مهندس الحسينى
انا بالفعل مشارك
واظن انى كتبت اكتر من موضوع
هناك فى مدونة الدعايا
متحرمناش من زيارتك هندسة واهلا بيك

د/عرفه 30 مارس 2009 في 8:35 م  

تحياتى ليك حسونه
بس بجد متحرمنيش من فضولى عايز اعرفك بجد
يعنى انت مدون ولا معانا فى الكلية
المهم بشكرك على اهتمامك
ويارب اكون عند حسن ظنك

د/عرفه 30 مارس 2009 في 8:39 م  

الباش مهندس حسام _ القلم السكندرى_
انت اللى تسلم بجد
كذا موضوع عندك ورا بعض
احلى من بعض
بجد بحييك عليهم اوى
وبشكرك على متابعتك للمدونه
تحياتى

Mahmoud Ibrahim 31 مارس 2009 في 12:47 ص  

كلامك جميل قوي يا دكتور واستفدت منه جدا

بس أقولك أنا كنت بكلم ناس كتير عندي في الكلية

بس صدقني الاحساس اللي جوايا دلوقتي لخطيبتي مختلف جدا

رغم أني عمري ما كلمتها قبل ما أتقدم لخطبتها

وعايز أقول حاجة تانية

الحلال طعمه حلو قوي يا دكتور

عقلك ميروحش بعيد الحمد لله مجربناش الحرام لكن عمره ما

هيكون أجمل م الاحساس اللي أنا فيه دلوقتي

شكرا أنك بتفكرنا باللي المفروض نعمله

وبالسلبيات اللي المفروض نبعد عنها

سلام يا صاحبي

shimaa 31 مارس 2009 في 9:35 ص  

انا مبسوطه جدا انك زرت المدونه بتاعتى وانا حاسه ان احنا مش هنختلف ولا حاجه بالعكس انا متفقه معاك جدا فى كل كلمه كتبتهاوكل دى حاجات انا شفتها بتحصل فعلا
بس انا صعبان علياصاحبك اللى صاحبته قالتله انا ما وعدتكش بحاجه مش المفروض ان بنت تقول كده ده كلام رجاله ولا ايهوالله اول مره اشوف بنت تقول كده

د/عرفه 1 أبريل 2009 في 12:13 ص  

زيدان منورة المدونة
أهلا بيك
طبعا الحلال طعمه أحلى
ربنا يهنيك انت وخطبتك ويتتم ليكم بخير
ويرزقكم بالزرية الصالحة

د/عرفه 1 أبريل 2009 في 12:15 ص  

اهلا بيكِ شيماء
كويس جدا انك مش معترضه على الكلام بتاعى
امال انا كنت معترض شوية على كلامك ليه
هههههههههههههه
ربنا يديم التواصل
ومنتظرينك دايما

TIMMY !! 1 أبريل 2009 في 6:39 ص  

ههههههههه

و الله ما أنا عارف أقول لك إيه يا د.عرفة ,

الموضوع ده منتشر جدا في الكليات بالذات , و بيقل بعد التخرج جدا لما الجميع يصطدموا بالواقع ,

بس بصراحة صعب جدا تقنع واحد عايش وهم إنه يتخلى عنه , خاصة إن كان هذا الوهم ممتعا ,

الواحد بيحمد ربنا إنه عافاه من داء الحب هذا ,
و إنه عدى الكلية بسلام :)

hasona 1 أبريل 2009 في 1:43 م  

السلام عليكم

د / عرفة
حبيت أنوه أني لست مدون ولا أملك مدونة
لكني أحب القراءة
لذلك أتابع القراءة الحية (المدونات ) من آن لأخر
واذا حبيت أن أضيف تعليق-أكتب اميلي(علي جوجل) واكتب ما يجول بخاطري وأرسله

والمفاجأة أني ما أعرفش مين حسونة اللي بيظهر ده-لأن أسمي محمد
احتمال أكبر انه عيب من الموقع نفسه
مع ذلك وجدت انها لن تفرق كثيرا

تحت أي أسم
،،،
شكرا لك كتير
لكن علي الاقل عرفت انك زورتني وانا ماكنتش موجود-الباب مفتوح دائما

المحاولة لا تندرج تحت جناحي النجاح أو الفشل -لكنها تعني الاصرار والامل

بصراحة مافيش وقت لأكون صاحب مدونة ودي مسئولية كبيرة

وفي نفس الوقت مش أحب أنافق أحدا أو حد يجاملني أو يهاجمني وموضوع التاجات ده كمان

ما أقوله من القلب الي القلب

وسأُتابع قدر الامكان

بأعتبر نفسي عابر سبيل

هذا التعليق جاهز وأكرره كثيراً - لنغلق باب الفضول والغموض

تحياتي لك وشكرا

تامر علي 1 أبريل 2009 في 5:29 م  

بصراحة أنا ضد العلاقات العاطفية بين الطلبة من السن الواحد لأن 99% منها بيفشل لأن الولد بيكون لسه قدامه كتير لما يجهز والبنت بتبقى خلاص متقدرش تستنى ... يعني الإكتفاء بالعلاقات المحترمة في نطاق غير مصطنع تكون أفيد للطرفين بدل وجع القلب :(

* أنا قريت ردك على موضوعي وان شاء الله هغير شكل المدونة (علشان خاطرك) :)

تحياتي

د/عرفه 1 أبريل 2009 في 8:24 م  

TIMMy
منورنا يا هندسة
شكرا على ردك
والحمد الله إن ربنا عفاك من الموضوع ده
يارب تنورنا على طول
شكرا ليك

د/عرفه 1 أبريل 2009 في 8:27 م  

حسونة
قصدى محمد
هههههههههههه
بجد انا فرحان جدا على متابعتك وعلى ايجابيتك كمان
وعلى فكرة متابعة المدونات أولى خطوات التدوين
ههههههههه
الموضوع مش صعب ولا حاجة أظن انك هتكتب كويس جدا لو عملت مدونة كمان
على العموم براحتك ونتمنى تتابع مواضيعنا على طول

د/عرفه 1 أبريل 2009 في 8:37 م  

تامر على
أهلا بيك وسعدنا بزيارتك الاولى هنا على المدونة دى
ان شاء الله هكتب مدونتك فى القايمة علشان اتابعك على طول فعلا مدونتك جميلة اوى
ومش عارف اقولك ايه على تفاعلك مع تعليقى
اعذرنى بقى
انت عارف الدكاترة كلهم بنضارات
ههههههههههههه
تحياتى ليك تامر

Unknown 2 أبريل 2009 في 8:43 ص  

السلام عليكم ورحمة الله وبركاتة
الموضوع جميل جدا
وةبيحدث كتييييير جدا
بس هوا لو فى غض بصر مكنش كل دا حصل
ولو مكنش فى اختلاط مفرط
مكنش دا حصل
واو مكنوش الاولاد والبنات كمان فضيين مكنش دا حصل
لان نفسك ان لم تشغلها بالطاعة شغلت بالمعصية ودا حقيقى
وعادى فى بنات كتير دخلوا الجامعة ومعملوش علقات انا واحدة منهم
واخواتى 3 بنات فى كليات مختلفة
محصلش كدا معاهم الحمد لله ربنا عفانا
ومن الاول احنا كنا بنبقى شلة بنات بس ومش اى بنات لا بنات ملتزمة بنتجمع على طاعة الله ونفترق على طاعتة
ربنا يتقبل
ويرزقنا الاخلاص
انا بس قولت علشان محدش يقول انى انطوائية ولا حاجة
دمت بالف خير
وربنا ميحرمناش من موضيع حضرتك المميزة

غير معرف 2 أبريل 2009 في 3:23 م  

السلام عليكم
معلش انى مش رديت من فتره بس الانقطاع كان على الكل
الموضوع صعب شويه ولو اتكلمنا فيه الكلام هيطول وهنختلف
لكن انا راى ان احنا لو حاولنا دايما نعمل الصح
مهما كان صعب
مهما كان مؤلم
اكيد هنحس بالسعاده بعدين
حتى لو بعدت
نحاول نتقى الله دايما فى قلوبنا لان القلب هو الانسان

دينا

د/عرفه 2 أبريل 2009 في 5:20 م  

حتى تشرق الشمس
سعدنا بتعليقك كتير
طبعا انا عارف ان فى بنات محترمه كتير
وفعلا افضل شىء ان الواحد يتخد وقاية من تلك المشاكل
تحياتى

د/عرفه 2 أبريل 2009 في 5:23 م  

دكتورة دينا
شكرا لزيارتك بيسعدنا تعليقك دايما
كنت منتظر اسمع وجهة نظر اختلافك معايا
على العموم كلامك اللى ذكرتيه فى تعليقك طبعا مش معترض عليه ابدا
بل موافق عليه تماما

orangaea 4 أبريل 2009 في 3:20 م  

كلام جمييل ومافهويش نقاش الصراحه ممكن الناس تأخدها دقه قديمه ومش فكر متحضر والحاجات دى كلها بس فى ارض الواقع هيا دى الحقيقه
فى راى كبنت بشوف بنات كتير ده مش حب اسمه لعب عيال او ممكن فراغ عاطفى شئ ويعدى بس حب بجد لا
والحلال طعمه احلى وربنا يبارك فيك

همس 12 يناير 2010 في 5:14 م  

السلام عليكمورحمه الله
هما فين الشباب دول اللى بيتاثروا لما البنت تسيبهم او فين الشاب اللى اد كلمته والله البنات طيبين اوى وبطبيعه الحال البنت بيبقى نفسها فى اى كلمه حلوه فعشان كدا دايما بلاقى البنات هى اللى بتنجرح اكتر الا قله من الشباب اللى لسه عندهم صحوه ضمير

د/عرفه 13 يناير 2010 في 12:02 ص  

وعليكم السلام همس

انا ذكرت القصص بتاعتى لانى الشباب الاولاد اصحابى

وانا متاكد ان البنات اللى اتجرحوا اكتر


بس انا ذكرت امثلة للاستفادة العامة
ولو كانت عندى قصص للبنات كنت قولتها ولكن للاسف مش عندى امثلة لكده

محمود . 27 مايو 2010 في 5:11 ص  

والله موضوعك حلو يا دكتوره وعجبني وفعلا كلامك صحيح مو لازم حتى بعد المعرفه تكون بداخل الجامعه فقط بغيره
حبيت اشاركم بس قلت كل ما الواحد قال بينه وبين الله حسبي الله ونعم الوكيل كسب اجر والله يكون وياه
ومشكوره مره ثانيه على الطرح المميز

zizo 5 سبتمبر 2010 في 10:48 ص  

تعالوا فى منتداى هيعجبكم اوى http://ahlaelnogoom.yoo7.com وهذا الموضوع جميل اوى

د/عرفه 9 سبتمبر 2010 في 6:11 ص  

شكرا لزيارتك محمود
ويارب دايما تنورنا
على المدونة

وتشوف فيها دايما مواضيع تعجبك


زيزو
نورتنا بزيارتك
ومعذرة
مش غاوى اوى زيارة منتديات وكده
وان كنت ناوى ان شاء الله اشوف منتداكم الجميل

غير معرف 14 فبراير 2011 في 7:19 ص  

يعطيك العافية

غير معرف 14 فبراير 2011 في 7:22 ص  

ما عند امك سالفة بس برظه مشكور

غير معرف 10 أبريل 2016 في 12:21 م  

انا حبيتها من أول ما قابلتها بس خدت وقت كبير على ما قولت لها مشاعري والله ما قلت لها بحبك ولا بيني وبين نفسي اكلمنا كنت واعدها في سنة رابعة هخطبها فضلنا تكلم 190 يوم 6 شهور كنت فاكر أن هنكمل لليوم الي كلمتها فيه كان بئلنا سنة بس قالت إنها ممكن تتخطب فيىالصيف ومعندهاش مانع فكرت بتهزر وقالت لي أنها موعدتنيش ومبنفعش تعمل حاجه من ورا أهلها قالت نقل كلامنا ولو في نصيب ربنا هيعمله سابتني مش استنتني كنت محتاجها متسبنيش لوحدي غيرت فيا كتير هيا حبتني كلامها كتير بين كدا بس كلامنا كدا مستخبي غلط قلت لها لما أهلي يجوا هجيلك بس بتقول لسع بدري عليك وقدامك جيش سابتني بتجهزني عشان متصدمش لما الاقيها اتخطبت

غير معرف 18 يناير 2018 في 2:58 ص  

السلام عليكم
يا اخواني انا اكتشفت اليوم أن صاحبي حاول يكلم اختي في التليفون ولكن هي رفضت ارجو معرفة رد فعلكم لو انتو مكاني هاتصرف معاه ازاي
مع العلم ان أخت صاحبي ده أتعرض عليا اني اكلمها ورفضت تماماً عشان صاحبي وفوق ده كلو اني رافض الفكرة عشان كما تدين تدان
و لحين تيسر الأمور
ارجو الافاده اخواني في الله

إرسال تعليق