ضد الشعبيه

بمناسبه عيد ميلاد صناع الحياه واللى ذكرها أحد الزملاء فى تعليقه على الموضوع السابق وقال إن جمعيه زى صناع الحياه ممكن تعمل اللى عايزاه بدون صدام مع الحكومة
كنت عايز أقول يعنى إنه مفروض كانت تكون فى حمله لصناع الحياه ضد الفقر ولمنع التسرب من المدارس
الحمله دى فشلت ومكملتش نتيجه الضغوط الأمنيه عندنا فى مصر
فى مبدأ وهو إن الحكومه ضد أى حد له شعبيه أو ممكن تكون له شعبيه ومش معنى أن حمله المخدارات الحكومه موفقتش ضدها تبقى الحكومه بتاعتنا ممكن تسيبه كده على طول
رغم إن عمرو خالد بيتجنب الصدام مع الحكومه إلا إنه قابل مصاعب كتير أوى
بلاش عمرو خالد
معظم العلماء بتوعنا سابوا مصر وقعدوا فى بعض الدول العربيه ده طبعا لأن ليهم شعبيه جامده وأرائهم بتأثر فى الناس وليهم فكر متطور وطبعا على رأس العلماء دول الشيخ وجدى غنيم والشيخ يوسف القرضاوى
بلاش العلماء الكبار دول ده حتى عندنا فى المحله لما زادت شعبيه الشيخ محمد العباسى إمام مسجد قادوس جاله قرار إزاله من المسجد علشان يروح مسجد فى الأرياف زواره يتعدوا على الأصابع
ده حتى إمام المسجد اللى جانبنا علشان هو مجتهد وبيتعمق وبيناقش المواضيع والأحداث الجار
يه جاله فى الأول قرار منع تام وبعدين تم التخفيف لقرار {شحططه} كل جمعه فى جامع من شكل علشان محدش يتابعه ولايمشى وراه

خلاص خلاص مش هتكلم عن العلماء دول بلاش دول بيخلطوا السياسه فى الدين والحكومه وأشرار وحشين

بعد إنتخابات الرئاسه وظهر إن لأيمن نور شويه شعبيه كده الحكومه قلقت وربنا كرم أيمن نور بكام سنه سجن كده حلوين
وطبعا كلكم سمعتم عن الحكم اللى صدر ضد مجدى حسين أمين عام حزب العمل المنحل ورئيس تحرير جريده الشعب المتوقفه بالسجن لمده عامين
طيب أتكلم عن مين بعد كده سيبكم من الناس بتوع السياسه
دول
مفضلش حد غيركم أنتم
أظن أنكم أدرى منى بالمدوين اللى أتعرضوا لمشاكل قبل كده من إعتقال أو حجز أو...........

الناس دول يا جماعه مفروض يزعلوا أو يضايقوا
لا لا طبعا
شوفوا ربنا سبحانه وتعالى بيقول إيه
" أفحسب الناس أن يتركوا أن يقولوا آمنا و هم لا يفتنون" عايز أقول لأى حد أتعرض لضغوط إن ده دليل على إنك مؤثر وليك دور
وعمرك مهتكون من الذين آمنوا من غير ميكون فى فتن بتتعرض ليها
وده دليل بر
ضه إن ليك شعبيه
فكلما زادت شعبيتك زادت................
أصل مصر ضد الشعبيه

29 رأيك يهمنا:

مذكرات مشاغب 15 فبراير 2009 في 8:23 م  

معاك حق طبعا واضح جدا ان الحكومه ضد اي حد بيكون شعبيه وممكن يكون ليه تاثير على الشعب
ويهدد كرسي الحكم
بس انا شايف تصرف الدوله ده تصرف طبيعي لكنه خطا
يعني اي حكومه عربيه بتعمل كده واكتر
واي حد ممكن يحكمنا برده هيعمل كده
ظنا منه ان بيدافع عن الصح اللي هو وجهة نظره ضد الخطا اللي هي وجهة نظر لمعترض

ادعي ربنا كده يا محمد ان ميكونش ليك شعبيه في يوم من الايام عشان متتبهدلش
هههههههههههههه

تحياتي

مهندس / على درويش 15 فبراير 2009 في 9:10 م  

كلامك مظبوط الحكومه بتكره الشعبيه وبتحب الشعب جدااااا

حسام غانم 15 فبراير 2009 في 11:37 م  

اوباااااا

موضوع كامل تعليقا عالتعليق بتاعي

هو طبعا الحكومة ضد الشعبية دي ماختلفناش فيها

من أيام عمرو موسى

أنا كنت بتكلم عن الإخوان بالذات

عشان الإخوان بتدعو للتغيير من فوق

بينما منظمات تانية بتدعو للتغيير من تحت

وبالتالي

رغم إن الحكومة بتحارب ده وده

إلا إن اللي بيغييروا من تحت

هم الأقدر على إحداث فارق

لو انت في كليتك متسجل عند الأمن إخوان

مش هتعرف تعلق مثلا ورقة فيها آية أو ضد التدخين مثلا

بس انت لو طالب عادي

هتقدر تعمل ده

يبقى انت مستفدتش حاجة من صدامك مع الحكومة

salma mohamed 15 فبراير 2009 في 11:42 م  

السلام عليكم
كلامك صح جدا,خصوصا لما يبقى اللي ليه شعبية ده ممكن يقلب الناس ضدهم سواء بقى كانت الشخصية دينية او سياسية او اي حاجة تانية,وخصوصا بقى لو اتضح لهم ان الشخص اللي هما خايفين منه مش بيخاف منهم ولا بيعمل حسابهم,زي الشيخ محمد العباسي اللي قهروا قلوبنا بعد ما مشوه ):

غير معرف 15 فبراير 2009 في 11:47 م  

للأسف الكلام ده فعلا صحيح لكن المشكلة بتتركز ان الحاكم الفعلي لمصر هو القاعدة من جهاز امن الدولة واللي هم عبارة عن رتب قليلة زي شاويش أو صول يعني فهمهم على قدهم ياخدواالأوامر وينفذوا بغباء يعني ممكن عسكري أو شاويش يوصل لضابط كبير ان فلان ده مشاكس و بيعمل مشاكل وقلق على الأمن فما بيصدق يلاقي شغل يعمله

ghorBty 16 فبراير 2009 في 12:08 ص  

نسأل الله السلامه

ولا اقول الا

وسيعلم الذين ظلموا اي منقلب ينقلبون

يبعدوا العلماء ويخنقوا علي رجال الدين وكمان علي الملتزمين وممنوع اي مظهر ديني لكن عند اي شئ تاني تظهر الحرية الشخصيه والديمقراطيه المزعومه

وخلي اللي خايفين عليه ينفعهم يوم الحساب

غربتي

فشكووول 16 فبراير 2009 في 1:39 ص  

ازيك يا دكتور
انت مش خايف على نفسك ولا ايه
يا اخى انت من المحله الكبرى مدينة الابطال
خاف على نفسك شويه وما لكش دعوه بالحكومه
انت شفت اللى حصل لبتوع المحله وشفت احكام
المحكمه بتاعة طنيا
تحياتى لحضرتك

غير معرف 16 فبراير 2009 في 9:20 ص  

ربنا يستر ومايقلوش المدونات بتاعتنا لو عملت شعبية
انا بقرأ كل مواضيعك وكلها بتعجبني
مش بعلق بس بسبب ضيق الوقت اللي بدخل فيه نت والله
ربنا يوفقك ويكرمك و يسدد قلمك

محمود أبوالعزم

Abd-Allah ibn Aadam 16 فبراير 2009 في 2:32 م  

عندك حق و الله يا دكتور ,

و قبلهم كمال الجنزوري رئيس الوزراء ,
اللي في عهده الاقتصاد بتاعنا وصل لمرحلة ما وصلهاش في أي رئيس وزراء سابق ,

البلد فعلا ضد الشعبية , علشان لما حد ييجي و يقول ... و لا بلاش :) خلينا في السليم أحسن :D

نبض الحياة 16 فبراير 2009 في 7:43 م  

ربنا يبارك فى كل من يستطيع ان يبنى فى هذه الأمة وحسبنا الله فى كل من يهدم .
بس كنت شوف امبارح فى برنامج القاهرة اليوم المهزلة التى اصبحت تقال فى حق شيوخنا وكمان كثرة الفتاوى والتى اصبحت كثيرة ولك رأيه . ربنا يوقظ الأمة على من يكونون حقا نعم الرجال .تقبل مرورى

موناليزا 16 فبراير 2009 في 9:02 م  

اللهم كن معنا ولا تكن علينا
اللهم استخدمنا ولا تستبلنا
يارب احمى واحفظ كل من يساهم فى نهضة بلادنا

د/عرفه 17 فبراير 2009 في 12:40 ص  

اهلا بيك صاحبى المشاغب
شرفت الموضوع انا معاك
بس كده تدعى عليا
يا عم انا موافق اتبهدل مش مشكله بس يكون ليا شعبيه






اهلا بيك مهندس على طبعا الحكومه بتحب الشعب جدا جدا

د/عرفه 17 فبراير 2009 في 12:45 ص  

اهلا بيك يا حسام ومستنى دايما تعليقاتك علشان توحيلى بالافكار
وانا مقتنع ان الاصلاح مش من فوق بس او من تحت بس لازم يكونوا بالتوازى
وشكرا لاهتمامك بمواضيعى


اهلا بيكى يا سلمى دايما
وطبعا كلنا زعلنا على الشيخ العباسى
بس هو انتى طلعتى من المحله معانا
على العموم اهلا بيكى مره كمان على خاطر انك محلويه بس

د/عرفه 17 فبراير 2009 في 12:53 ص  

اهلا بيك غير معرف
للاسف البلد بتاعتنا بقت بلد أمنيه
كل حاجه محكومه بالامن ربنا يرحمنا




اهلا بيك يا باش مهندس ابراهيم معاك حق
خليك انت فى الساف سيد واحنا نتحط فى وش المدفع

د/عرفه 17 فبراير 2009 في 1:01 ص  

اهلا بنبض الحياه وشرفتى المدونه
بس انا للاسف مشوفتش حلقه عمر اديب
وربنا يستجيب لدعئك





اهلا بيكى موناليزا
ويارب آآآآآمين
للدعاء بتاعك

إيمان 17 فبراير 2009 في 7:44 ص  

وبعديييين بقه
هتخلينا نقول كلام مش عايزين نقوله
شعبية ايه وحكومة أيه مين إللى قال إن الحكومه
مش بتحب الشعبيه ...ده حتى الأغانى كلها دلوقتى
بقت شعبيه .. وسايبين المطربين يغنوا أغانى شعبيه
وقت ما يحبوا الحكومه شعارها (هبهبه أه .. مصلحه لأ)
ودى كانت نهاية كل مواطن تسولوا نفسه إن يكون ليه
لازمه فى البلد دى السجن التام أو العلقه التمام
خلى بالك من شعبيتك

د/عرفه 17 فبراير 2009 في 7:49 ص  

فعلا عنك حق جدا ايمان
مختش بالى فعلا
لا لا انا هغير رأيى
ده الحكومه بتحب الشعبيه الشعبيه اوى الشعبيه جدا

د/عرفه 17 فبراير 2009 في 1:15 م  

معلش انا نسيت اعلق على استاذ فشكول
وبرحب بيك فى اول زياره ليك على المدونه
وفعلا دايما المحلاويه مش بيخافوا وربنا اللى بيستر




ونسيت اعلق على حبيبى المبدع محمود ابو العزم
وانا عرفت ليه انت بتخاف ان مدونتك تتشهر
وربنا يكرمك يا محمود وتنزل ديوان مش مدونه وخلاص
وتعلق فى اى وقت براحتك المهم ان الموضوعات تعجبك

آلاء محى 17 فبراير 2009 في 1:57 م  

حسبنا الله ونعم الوكيل

Abd-Allah ibn Aadam 17 فبراير 2009 في 2:18 م  

صحيح كان عندي سؤال يا دكتور عرفة ,

ما تعرفش حد في صناع الحياة أو رسالة ؟؟

أصلي بصراحة عاوز أشارك فيهم من زمان بس مش عارف ,

لو تعرف حد أو تعرف إزاي - غر إني أروح أسأل :) - ياريت تقول لي ..

د/عرفه 17 فبراير 2009 في 6:38 م  

آلاء محي معاكى حق ده أبلغ تعليق




معلش يا باش مهندس ابراهيم انا فعلا معرفش حد من صباع الحياه
بس وانا بقلب على النت كده عرفت شويه حاجات
اولا ده موقع عنهم على النت
http://lifemakers.amrkhaled.net/
وعرفت من على الفايس بوك ان عندهم لقاء تجميعى بكره لبدء نشاط العام القادم وده العنوان
صناع الحياة بالجيزة
60 ش عمر بن الخطاب-ميدان القومية-امبابة

وبما انك من الغربيه
فده لينك لجروب بتاع الجمعيه على الفايس بوك عندنا فى المحله
http://www.facebook.com/group.php?gid=23803726127&ref=mf

وبتمنى دوام التواصل معاك يا هندسه
وياريت تضفنى على الايميل

غير معرف 17 فبراير 2009 في 7:53 م  

د.عرفه
أنا مع رأى د.فشكول...
و تقريبا الناس كلها عارفة الكلام ده..
لأول مرة هختلف معاك..
يا ريت تكتب حاجه تقدر تغير فيها فعلا..
أو تنصح بحاجة كويسة..
انت هنا بتقرر واقع ..صح ..معاك ..
لكن انت بتعرض نفسك لخطر ليس له داعى..
ابقى عرض نفسك لخطر .. بس مش بالطريقة دى..
لو بس هتعمل حاجه ايجابيه..
تحياتى..

خديجة عبدالله 18 فبراير 2009 في 1:10 ص  

صح واتبهدلنا فى صناع وغيره :(
كشف الأعضاء ده ودى وده ودول اشطب وبره الجمعية اوت خالص .. عادى بلاش الاسماء وخلينا من بعيد
نو برده جت واحدة كده طنط وكانت واخدة بالها جدا جدا من كله بس على مين ولا حتى ده بيوقف :)
المهم فى حاجة لفتت نظرى غالبا بحب أقرأ التدوينة بالتعليقات فلفت نظرى بس جملة فى تعليق الأخ حسام غانم وهى : أنا كنت بتكلم عن الإخوان بالذات

عشان الإخوان بتدعو للتغيير من فوق

بينما منظمات تانية بتدعو للتغيير من تحت

الاخوان بيدعو للتغيير من فوق .. قمة الهرم وكده
صراحة والله صدقا أول مرة أعرف إن منهج التغيير كده ده أنا شكيت فى نفسى :) وقعدت أقول يا بت هوة فى ايه اللى حصل
عامة خير بالتأكيد غلطة مطبعية بلوجرية


أخيرا : سرنى جدا تعليق حضرتك رغم أنه ما قل ودل وربنا يجازيك خير ويرضيك

Tamer Diab 18 فبراير 2009 في 1:32 ص  

أولا ليا تعليق علي الأستاذ حسام غانم
مين قال أن الأخوان بتدعوا للأصلاح من فوق؟
بالعكس الأخوان بيقولوا أن تغيير قاعدة الهرم هي الي هتغير الي فوق
وانا شايف أن الموضوع لازم يمشي فوق وتحت وفي النص كمان لو ينفع
لكن مينفعش من تحت بس ولا من فوق بس
بالنسبة بقي لموضوع البوست
فده طبيعي جدا
مستني ايه من حكومة هز الوسط بتاعتنا
ومستني ايه من حكومة تصدير الغاز
ومستني ايه من حكومة الأعتقال للجميع مش القرأة
ومستني ايه من حكومة تبرأة هاني سرور بتاع اكياس الدم
وتبرأة ممدوح اسماعيل بتاع العبارة الي اهلها خلاص اتنسوا وكأنهم شوية كلاب
خلاص يعني هي دي الي مضيقانا
يا استاذنا البلد دي بتاعتنا شكلا وبتاعتهم موضوعا

Abd-Allah ibn Aadam 18 فبراير 2009 في 8:39 ص  

شكرا جزيلا يا دكتور عرفة على البحث و التنقيب :) ,
و لو إني صؤت أكثر كسلا من أن أدور بنفسي ,

على العموم ربنا يجزيك خيرا ,

و أن اضفتك على الميل و في انتظار إضافتك ,
بس أنا للأسف مش بدخل قد كده .. غير لما ببقى مخنوق !!! زي اليومين دول يعني :)

*البت المشمشية *حلوة بس شقية * 18 فبراير 2009 في 6:07 م  

هههههههههههه
انا ماليش دعوة بيك ايه الكلام ده كلو
انتا ايه مش خايف ليكون حد بيسمعنا من ورا المدونة ولا ايه
بس انتا عارف والله كلامك صح كلو صح لحد ماالبلد خلاص فى الباى باى بس انا متفائلة خير
بشكرك على زيارتك لمدونتى
ونرنى تانى

د/عرفه 18 فبراير 2009 في 10:18 م  

اهلا بيكى ساندى دايما ومتخليش قلبك خفيف اوى كده
ومرحب بيكى على طول



اهلا بالاخت خديجه
وانا بسعد بتعليقك على طول ويارب تشاركى معانا فى كل المواضيع دايما




اهلا بتامر الفنان
تعليقك جميل وطبعا منطقى ومش هزود عليه
وربنا يشيل عنك اى هم وحزن




اهلا بوليد عضو الرابطه
ومرحب بيك فى اى وقت
وربنا يقدرنا دايما لنشر الخير

أحمد سعيد بسيوني 19 فبراير 2009 في 8:32 م  

عجبني الموضوع ودخل دماغي جاااااامد

تسلم

د/عرفه 20 فبراير 2009 في 10:47 ص  

كويس أنه عجبك يا احمد
وشكرا لزيارتك
انت اللى تسلم

إرسال تعليق