سمعت ناس بتقول


فى كتير من الاحيان تلاقى حد طلع علينا بكلمه وبعدين ناس كتير اوى ترددها وراه
وهما مش واخدين بالهم منها بس بيرددوها وشويه كده تلاقى الناس كلها بتردد نفس الحاجه


حاولت كده المره دى اجمع شويه حاجات بتردد كتير وهتلاقوا كتير منكم فعلا ردد الحاجات دى وهو مش واخد باله منها

1- سمعت ناس بتقول
يا عم احنا مالنا ومال فلسطين احنا لاقيين ناكل علشان نديلهم اكل مافى عرب كتير معاهم فلوس احنا مالنا


الرسول عليه الصلاه والسلام بيقول
{المؤمن للمؤمن كالبنيان يشد بعضه بعضا}
{ليس المؤمن بالذى يشبع وجاره الى جانبه جائع}


2- سمعت ناس بتقول
يا عم يعنى عايزنا نحارب طب نحارب ازاى ده احنا هندبهدل اوى و مش هنقدر احنا مش قد اسرائيل


ربنا سبحانه وتعالى بيقول
{كتب عليكم القتال وهو كره لكم، وعسى أن تكرهوا شيئاً وهو خير لكم، وعسى أن تحبوا شيئاً وهو شر لكم، والله يعلم وأنتم لا تعلمون}.

ويقول سبحانه ايضا
{وقاتلوا المشركين كافة كما يقاتلونكم كافة، واعلموا أن اللَّه مع المتقين}

يعنى ربنا سبحانه وتعالى يعلم ان قتال الاعداء امر صعب ومش محبب
وسبحانه قال ان المشركين عايزين يحاربونا كافه وان كان الدور دلوقتى على فلسطين والدور هيجى علينا مكنش دلوقت يبقى بعدين
المشكله لو انت كمان من جواك مش عايز تجاهد


عن أبي هريرة رَضِيَ اللَّهُ عَنهُ قال، قال رَسُول اللَّهِ صَلَّى اللَّهُ عَلَيهِ وَسَلَّم:
{من مات ولم يغز ولم يحدث نفسه بغزو مات على شعبة من نفاق} رواه مُسلِمٌ

ويقول ايضا

{من سأل اللَّه تعالى الشهادة بصدق بلغه اللَّه منازل الشهداء وإن مات على فراشه} رواه مُسلِمٌ

يعنى مينفعش حتى ان امر الجهاد يبعد عن تفكيرك ده امر واقع لازم نفكر فيه ونعيشه

يعنى على الاقل اذا مكناش ناويين نحاب يبقى على الاقل يكون خيار مطروح نهدد بيه
ولا الخيار ده مبيطلعش عندنا

4-سمعت ناس بتقول طيب بعد الكلام ده كله اللى زى الفل تاعب نفسك ليه يعنى هتغير ايه مفيش حاجه هتتغير
احنا زعلانين بس هنعمل ايه يعنى؟؟؟

هقولك لا تحقر من فعل اخيك ولو كان صغيرا احيانا بيكون عمل صغير يغير من حياه امه باكملها

هقولكم مثال بسيط جدا لصحابى محدش يسمع عنه لكنه عملحاجه بسيطه انقذ بيها الامه الاسلاميه فى مرحله من مراحل ان الامه الاسلاميه كانت موجوده فى المدينه بس ومفيش مسلمين خارجها

وجات امه الكفر مجتمعه للهجوم على المسلمين
سيدنا سلمان الفارسى اشار على الرسول بحفر الخندق وبكده المسلمين دافعوا عن ارضهم من ناحيه قريش والناحيه التانيه كان مفروض ان اليهود موجودين فيها وهما متفقين مع الرسول على حمايه الرسول من الناحيه دى
لكن اليهود كعادتهم خانوا العهد واتفقوا مع قريش على خيانه الرسول

هنا اللحظه الفارقه الاسلام فى خطر ويواجه قريش من الامام وخيانه اليهود من الخلف

هنا جاء دور الصحابى الجليل نعيم بن مسعود الاشجعى
قام بدور بسيط جدا ولكن كان له فعل السحر
الصحابى هذا حديث عهد بالاسلام ولم يعلم المشركون بعد باسلامه
فذهب الى اليهود واطمانوا اليه وقال لهم ان قريش لو انتهزت اى فرصه او اى غنيمه اخذتها وتركت محمد لينتقم منكم فسالوه عن الحل اخبرهم ان الحل فى ان تاخذوا من المشركين عشر افراد رهينه
فاقتنعوا بالحل
وذهب الصحابى الى قريش واطمانوا اليه فاخبرهم ان اليهود اهل غدر وخيانه وانهم كما خانوا محمد سيخونوكم والدليل انهم سيطلبون منك عشر افراد رهينه

وبالفعل طلب اليهود من المشركين الرهينه واقتنع الجميع بكلام نعيم
واصبحت كل فرقه متخوفه من الاخرى الى ان ارسل الله عليهم الرياح التى اطفأت نيرانهم وخافوا من غدر الفرق الاخرى
فرحلوا خائبين
المهم انا مش بسرد احداث لغزه الاحزاب
لكن بوضح دور الفرد انه ممكن لفرد واحد يعمل كتير اوى
وممكن برضه للفرقه والخلاف تعمل كتير اوى ومش عايزين نختلف مثل قوم الاحزاب
عايزين نوحد كلمتنا ونوحد هدفنا علشان نقدر نواجه اعدائنا

خلاص طيب عايز مننا نعمل ايه دلوقت
خلاص تبقوا تستنوا الموضوع اللى جى علشان اكلمكم فى الموضوع ده


ولو حد فيكم سمع حاجه بتتردد كده ومش عجباه يريت يقولى ويعلق على الموضوع

ملحوظه بسيطه كده فى الاخر

الصور اللى انا حاططها دى من زمان اوى لقيتها عندى بالصدفه
يعنى الزمن بيتكرر وان اليهود زى مهما حتى من ايام الرسول صلى الله عليه وسلم










14 رأيك يهمنا:

dina 19 يناير 2009 في 7:44 م  

بسم الله
اولا هبتدى بحاجه بسمعها بتخنقنى جداااااااااااااااااااااااااااااااااااااااااا
تاكل مع يهودى ولا تاكل مع فلسطينى
حقيقى بتتقال تصوروا!
وفى ناس بتقول
هما اللى جابو لنفسهم
وناس بتقول انهم بيخونوا

ماهو ياناس حتى لو اخويا ندل وجبان وفى عبر الدنيا لازال اخويا بردو
متهيئلى الناس مش مستوعبه فعلا اننا كلنا اخوات
ولينا حق على بعض
ربنا سبحانه وتعالى قال "ان الله لا يغير ما بقوم حتى يغيروا ما بانفسهم"

انا شايفه ان ده الحل الاساسى ومفتاح الكلام
جمب كل الكلام اللى ناس بتقوله من مقاطعه وكده

وحقيقى الوضع وحش
لكن فى امل فى بكره
وسمعت من استاذ عمرو
طول ما ربنا ربنا يبقى فى امل

يلا قلت ادخل ارد فاصل من مذاكره العظام وسنعود
دعواتك

غير معرف 19 يناير 2009 في 10:07 م  

السلام عليكم يا دكتور
الموضوع جميل ربنا يوفقك
انا متفق معاك جدا
لان اللى بيقول احنا مالنا فى يوم ممكن يكون هو مكانهم وأكيد مش هيكون مبسوط لو كان اخوانه بيقولوا واحنا مالنا ولازم الكل يعرف ان اللى بيحصل لاخواننا انما هو حصاد أعمالنا......قال تعالى (أولما أصابتكم مصيبة قد أصبتم مثليها قلتم أنى هذا قل هو من عند أنفسكم إن الله على كل شىء قدير)00000000
وبالنسبة لموضوع الحرب فإنى على يقين أن أى فئة مسلمة- مهما قلت أو كثرت ومهما كانت عدتها- إذا قاتلت أعداء الله فإن الله سينصر جنوده0000ولكننا لم ننل هذا الفضل بذنوبنا ولأن الله لا يمكن إلا لعباده المخلصين0000قال تعالى(ولينصرن الله من ينصره)000وبالله عليك تصور لو نصر الله المسلمين على كل شعوب الكفر ماذا سيصنع المسلمون بهذه البلاد ؟ 000سينشرون التعامل بالربا والسرقة والرشوة00000000000
مصطفى ندا

غير معرف 20 يناير 2009 في 1:42 ص  

التوبيك هايل يا دكتور والواحد فعلا ياما سمع الكلام ده كتييييييييييييير
ربنا ينصرنا دايما على أعدائنا
(ان ينصركم الله فلا غالب لكم )
جميل جدا من حضرتك الدلائل من القران والسنة

محمد عبد الباسط 20 يناير 2009 في 5:08 ص  

باعو ارضهم
يستاهلوا
اول شحاتين فى العالم
مالنا ومالهم
دول اغنياء ياعم من كتر التبرعات
هتحارب مين ولا مين
هتقدر على امريكا؟؟؟

كلمة واحده ارد بها على كل المغالطات
((( اين الله ؟؟؟؟؟ ))))
بسم الله الرحمن الرحيم
كم من فئة قليلة غلبت فئة كثيرة باذن الله والله مع الصابرين صدق الله العظيم

بورك بك وبقلمك اخى الكريم

حلم كبير

مذكرات مشاغب 20 يناير 2009 في 3:27 م  

يا ريت يا محمد تلغي حكاية الكلمه التاكيديه
لانها امبارح بعد ما كتبت تعليق طويل عريض الكتابه بتاعتي كلها اتمسحت
والنهارده وانا في نصف التعليق اضطريت برده اني اقفل الكمبيوتر
مش عارف ايه الحكايه
ربنا يستر المره دي
نخش باه في الموضوع.
1-اتفق معاك كليا في النقطه دي.مفيش حاجه اسمها احنا مالنا.احنا كلنا عرب.مفيش فلسطين ومصر.
2-طبعا مفيش حاجه اسمها منحاربش.اللي يقول كده يبقى مش مستوعب الوضع.مش هناخد حقنا غير بالحرب.اللي اتاخد بالقوه مش هيرجع غير بالقوه.لكن انا اختلافي على كلمة القوه دي.انا شايف ان حقنا لازم ناخده بالقوه .مش بالحجاره او بصواريخ ضعيفه.طبعا حماس متقدرش تعمل حاجه اكتر من كده.وكتر خيرهم انهم صمدو المده دي كلها.بس انا قصدي بالقوه الحقيقيه.اتحادنا كلنا.فانا شايف ان انتصارنا في الحرب دي ممكن ومش مستحيل.لكنه يتطلب توحيد وتحييد.توحيد للصفوف الفلسطينيه والصفوف العربيه.والايمان الصادق.وتحييد لدول العالم المنحازه انحياز غريب لاسرائيل.يعني ممكن حد يتخيل ان امريكا تبعت لاسرائيل حاويات مليانه اسلحه اثناء المذبحه بتاعة غزه.يعني هي اسرائيل ناقصه اسلحه.
3-لم يستدل على مكانه.
4-لا انا بتهيالي ان احنا كلامنا ده كلعه غير مؤثر في صناعة القرار.وكمان غير مؤثر بيننا احنا.كل واحد فينا مقتنع بحاجه في دماغه.ومفيش حد عنده استعداد انه يغيرها.اما بالنسبه لموقف الصحابى الجليل نعيم بن مسعود الاشجعى فده لا يمكن مقارنته بكلامنا ونقاشنا.ده دوره كان حاسم في الحرب دي.

بس حلوه صورة شارون دي(وش بيغمز)
معلش انا كنت كاتب تعليقاتن كبيره في المرات اللي فاتت بس انا تعبت من الكتابه
حرااااااااااااااااااام عليك

تحياتي

غير معرف 20 يناير 2009 في 3:48 م  

فعلا دى فرصه كويسه ان احنا نتصدى للكلام اللى مش مظبوط
ولازم نعرف بيه
يعنى
سمعنا كتير
لا احد يستطيع ان يزايد على دور مصر فى المنطقه
اى دور يقصد؟؟؟؟؟؟؟
المهم جزاكم الله خيرا على الموضوع

د/عرفه 21 يناير 2009 في 7:49 م  

اولا بحب اشكر الزوار الدائمين للمدونه واتمنى زيارتهم على طول
واشكر برضه الناس اللى اول مره تعلق على المدونه

المهم ان انا فعلا كنت ناوى اكتب الحاجه دى اللى انتوا علقتوا عليها
ان ناس كتير بتقول يا عم دول ناس خونه
يا عم دول اغنيا من التبرعات
فعلا والله كنت ناوى اكتبها بس شيلتها لطول الموضوع

حتى ان صاحبى المشاغب كان دقيق الملاحظه
وخد باله ان مفيش النقطه3
والموضوع ده فعلا كان النقطه3

د/عرفه 21 يناير 2009 في 8:05 م  

بحب اعلق تانى على حبيبى المشاغب
تم اخد ملاحظتك الاولنيه فى الاعتبار
ثانيا
انا عايز اقولك متحاولش تقلل من اى عمل ولو بسيط
متعرفش العمل البسيط ده ممكن يوصل لايه؟؟؟؟؟؟؟

لان يهدى الله بك رجلا واحدا خير لك من حمر النعم
وفى قول اخر خير لك من النيا وما فيها

المهم انت ممكن تقنع واحد بفكره معينه ممكن ربنا ييسرله بعد كده ويكون زى صلاح الدين

المهم متحاولش تقلل من اى عمل

ممكن اتكلم ان شاء الله فى الموضوع ده الحلقه اللى جايه ان شاء الله

واتمنى اسمع رايك دايما

القلم السكندري 21 يناير 2009 في 8:31 م  

بوركت أحرفك أخي الحبيب

وجعلها الله في موازينك

إن تنقية الصف من المنافقين

وتنقية المعتقدات والمعنويات من تثبيطهم وتخذيلهم وآثارهم هي الخطوة الأولي نحو النهوض

وهي مسئولية كل من ينتسب لهذه الأمة..


جزاكم الله خيراً

د/عرفه 21 يناير 2009 في 8:58 م  

شكرا لزيارتك اخى الاسكندرانى

وربنا يعينا على النهوض ورفعه شان الامه

Unknown 21 يناير 2009 في 11:49 م  

اتفق معاك يامحمد فى كل كلمه بس فيه حاجه ان احنا مانسبش الناس دى تفضل تتكلم على الفاضى يعنى نحاول نفهمهم الموضوع ودى تكون ايجابيه وبصراحه اغلب اللى بيتكلم بيكون عدم معرفه بالموضوع كله او شايف من وجهة نظر واحده وبس وجزاك الله كل خير على الموضوع ده

اخوك احمد عبدربه

Unknown 22 يناير 2009 في 7:10 م  
أزال المؤلف هذا التعليق.
Unknown 22 يناير 2009 في 7:11 م  

الناس دايما هتقول
بس يارب ميجيش علينا احنا كمان اليوم ونبقى بنقول زيهم

نفسي اعيش واشوف اليوم اللي العرب فيه حكومة وشعبا متجمعين على كلمه واحده
ساعتها بس هعرف ان النصر قرب
لكن طول ما احنا كده
مفيش فايده

جميله جدا المدونه يا دكتور و يارب دايما مواضيعك كلها تكون احلى من بعضا كده على طول

manar 26 ديسمبر 2020 في 1:18 م  

الماهر
افضل شركة مكافحة الحشرات في الشارقة
شركة مكافحة الصراصير فى الشارقة

إرسال تعليق