مصر من غير هدوم


اثناء حواراتى مع اصحابى
طرحت عليهم سؤال معين
تخيل لو انت ماشى فى منطقه مقطوعه وطلع عليك حرامى هددك
الاجابات كلها فى انهم ناويين فى الاستغناء عن اى شىء للحرامى ده
للاسف دى كانت اراء شبابنا بس اللى زاد الطين بله ان مش بس شبابنا
ده هو ده المنهج اللى ماشيه عليه مصر مبدا خد اللى انت عايزه وسيبنى فى حالى
نرجع تانى للحرامى نتخيل ايه اللى ممكن يحصل بعد كده
هل الحرامى ده هيبطل تعرض للناس ؟؟؟؟؟؟؟
طيب لو الحرامى ده شافك بعد كده هل ممكن يسيبك فى حالك؟؟؟؟؟؟؟؟
طيب لو انت بتمشى من الطريق ده كل يوم هتمشى فيه بعد كده؟؟؟؟؟؟
طيب لو الحرامى بعد كده ملقاش معاك حاجه خالص هيسيبك؟؟؟؟؟؟؟
هو ده بالظبط اللى بيحصل مع مصر احنا مش بنواجه المشكله ولا حتى بنهرب منها
مش المره دى بس ده من زمان.........
لغايه لما وصلنا للمرحله دى
مصر فقدت هيبتها وسط العالم
مصر اللى هى ام الدنيا علمها بيتحرق فى كل انحاء العالم
مصر مش قادره تتحكم فى قرارها
مصر مش قادره حتى تمنع البترول عن عدوهابلاش تمنعه طب تبيعه حتى بسعره الطبيعى
مصر مش قادره حتى تتحكم فى المعبر اللى هو على ارضها
طيب الحرامى هيفضل ياخد من مصر ايه تانى؟؟؟؟؟؟؟؟؟؟
والله انا خايف اصحى الاقى مصر من غير هدوم.................

21 رأيك يهمنا:

Unknown 10 يناير 2009 في 8:57 م  

مقاله جميله يا دكتور
بيعجبني النوع ده من المقالات
انك تشوف ان الصغيره ممكن توصلك للكبيره
والتهاون مع الصغير ممكن يوصلك للي اكبر منه
مرة تانيه مقال في الجون
وان شاء الله ستزدهر المدونه وسيذيع صيتها قريب اوي
وشرفني اني اول من ارد فيها

Unknown 10 يناير 2009 في 8:57 م  

مقاله جميله يا دكتور
بيعجبني النوع ده من المقالات
انك تشوف ان الصغيره ممكن توصلك للكبيره
والتهاون مع الصغير ممكن يوصلك للي اكبر منه
مرة تانيه مقال في الجون
وان شاء الله ستزدهر المدونه وسيذيع صيتها قريب اوي
وشرفني اني اول من ارد فيها

۩۝۩ Dr. Flavio ۩۝۩ 10 يناير 2009 في 9:45 م  

هل بعد ده كله تعتقد ان لسه هدومها عليها ؟؟

والله انت طيب

غير معرف 11 يناير 2009 في 7:04 ص  

جزاكم الله خيرا يا دكتور على الموضوع الجميل ده
وفعلا يارب يستر مصر اصل اكتر من كده عيب اوى

Khaled Selim 11 يناير 2009 في 3:28 م  

أنا دايماً مستغرب
إيه سبب الضعف الرهيب اللي فيه أصحاب القرار في مصر ده ؟؟

بجد حاسس إن كل الناس ماسكة لمصر ذلة

كل حاجة ضدنا تمشي
وكل حاجة في صالحنا تقف

شيء غريييييب

dina 11 يناير 2009 في 3:55 م  

بسم الله الرحمن الرحيم
اولا مبروك على المدونه ويارب تكون خير عليك

ثانيا
بالنسبه للتوبيك
مش هنكر ان وضع مصر والعرب صعب اوى ويمكن مش عارفين حالنا هيتصلح امتى
بس لازلنا هنتمسك بالامل ويقين فى الله ان النصر والفتح جاى والحل المهم ان كله يحاول يصلح من نفسه

نفسى قبل ما نتكلم عن حالنا السيئ ندى حلول
ونقول ان فيه امل
طول ما ربنا ربنا يبقى فى امل

ده راى

بالنسبه لمصر
كل واحد فينا بيتكلم من وجهه نظره وبالمعلومات اللى عارفها
لكن
احنا مش مكان المسئولين ولا نعرف شغلهم ولا ضغوطهم
ولا احنا مسئولين عن اكل او شرب او حمايه
70 مليون مواطن
ومش نعرف سياسات العالم
ولا حتى حقيقه اللى بيحصل
الحقيقه الحقيقه

اخيرا

يارب لا تسلط علينا من لا يخافك

وشكرا

دينا

غير معرف 11 يناير 2009 في 5:13 م  

حلوه يا محمد واعتقد اننا بالفعل وصلنا لمرحله الهدوم وانكشفنا على العالم ولا عزاء للكرامه

د/عرفه 11 يناير 2009 في 8:14 م  

شكراdr
على الرد وانا فعلا سعيد انك اول شخص يرد على المدونه
ويارب دايما اكون عن حسن ظنك

د/عرفه 11 يناير 2009 في 8:19 م  

شكرا فلافيو _ومبروك للاهلى_
بس انا اعتقد ان مصر لسه عليها شويه هدوم كفايه انها لسه قادره تستنكر
المرحله اللى جايه مش هتقدر
وانا معاك فعلا خالد
انا حاسس ان فى حد ماسك لمصر ذله
بس طالما اثبت ضعف فى مواقف سابقه قبل كده
يبقى العدو منتظر منك الضعف ده على طول
وشكرا لمرورك خالد واتمنى ان المدونه تعجبك على طول
وشكرا د/غير معرف ومستنى رايك دايما

د/عرفه 11 يناير 2009 في 8:25 م  

شكرا لمرورك د/دينا
انا عارف ان قرار المسئولين لازم تروى فيه
وان احنا ممكن ننساق لعواطفنا
بس الضعف اللى احنا وصلناله ده مش ممكن
احنا مش قادرين نعمل اى حاجه
ده فنزويلا عملت اللى احنا مش عارفين نعمله
اظن ان فى قرارات مش محتاجه تفكير وابسط بكتير من احنا نستنى عليها
ومستنى رايك دايما

محمد عبد الباسط 11 يناير 2009 في 10:06 م  

الف مبروك يا محمد على المدونة
عشان كده كنت غايب النهارده ولا ايه ؟؟
ههههههههههههههههههههههه

بالنسبة للموضوع بقى هعلق بعدين لا تنسانا من صالح دعائك

غير معرف 11 يناير 2009 في 10:51 م  

الف مبروك المدونه الجديده
اما بالنسبه للموضوع فبصراحه عندك حق والله
بعدين اكمل اصل الزمالك حرق دمى النهارده

غير معرف 12 يناير 2009 في 1:24 ص  

على الرغم إنى قرأت معظم التعليقات المكتوبة إلا إنى لى رأى أخر اللى انت بتتكلم فيه يا دكتور مش ضعف من مصر على انها مش عارفه تاخد قرارات ولا حتى مش قادرة تمنع الغاز الطبيعى اللى بتصدره معنى اللى احنا بنقوله هقولة فى خطوات
1-مصر بلد كبير ومش لازم نضغط عليها اكتر من كده دى برضه بلدنا
2-هناك افتراءات على مصر وانها مش عارفه تاخد قرار وده معناه ان مصر بلد كبيرة والكل معتمد عليها فى اخذ القرار
3- تحكم مصر فى المعبر يحكمه مسئوليات وقرارات دولية هو اه فى ارضنا وبتاعنا واللى يقول غير كده احط صوابعى فى عينيه الاتنين لكن مش تنسوا ان المعبر ده بيودى على اسرائيل ودى بلد مش بتعرف تتعامل وبتقول ان مصر بتسرب سلحة لفلسطين عن طريقه عشان كده مصر اكتفت بنقل الجرحى وارسال المساعدات
4- اللى بيحرقوا علم مصر دول زى مانت بتقول يادكتور دول ناس اصلا ماننظر اليهم لانهم مش يستاهلوا يتبصلهم هو احنا ياجماعة لو حاربنا اسرائيل الاخوة اللى بيحرقوا اعلامنا من عرب هيحاربوا معانا ههههههههههه ماظنش
5-حماس بتلعب من تحت لتحت وعايزه المعبر يتفتح ليل نهار وده ماينفعش يادكترة اسرائيل شايفة ان حماس اشخاص ارهابيين لابد من القضاء عليهم
لو حماس شافت ان المعبر مفتوح لعبور الاشخاص هتخش هى كمان لمصر واسرائيل تضرب فيهم فين بقى هههه فى مصر واحنا ساعتها مش هنسكت ما الاردن فيها معبر ماتفتحه هيا كمان
6- اتفاقية الغاز اللى بينا وبين اسرائيل لو احنا فسدناها بمعنى بطلنا نصدر غاز عن اسرائيل فى الوقت الراهن ده معناه اعلان الحرب عن اسرئيل فا
7- وفى الاخر هقول تعليق غير التعليق اللى سيادتك كتبه مع احترامى الشديد لرأس الموضوع بتاعك
(مصر التى اردت ثوب الفخر واستردت كرامتها وارضها فى 73 وضحت بأكثر من 120.000 الف شهيد يتحدثون عنها وكأنها لم تفعل شئ وعجبى)
للمراسلة
tots_20042004@yahoo.com
(

غير معرف 12 يناير 2009 في 7:01 ص  

بما ان مصر كبيره فالكل مستنى دورها
انا سمعت يهود باراك بيقول ماذا تفعل لو كنت فلسطينى
رد وقال كنت انضميت للجماعات الارهابيه قصده حماس او اى فصيل مقاومه
يعنى من الاخر مصر بتقول غير اللى هى عايزاه علشان مش قادره تعمل ده

غير معرف 12 يناير 2009 في 7:15 ص  

we miss you gamal 3abd el naser although ur unforgetable mistakes

محمود ابوالعزم 12 يناير 2009 في 1:11 م  

موضوع جميل أوي
الف مبوك عليك المدونه
يارب دايما عامرة بأفكارك و مقالاتك
استم..ربنا يوفقك
محمود أبوالعزم

غير معرف 12 يناير 2009 في 11:23 م  

مبروك ياحبي ع المدونة
يجعلها قدم الخير عليك يارب
ولو انك ماقولتلناش يعني كنت هتعمل ايه لو طلع عليك الحرامي ده اللي طلع على اصحابك ؟؟
خلاص مش مشكلة ابقى قوللي على انفراد ولو اني عارف كنت هتعمل ايه
ههههههههههههههههههههههه
سلااااااااااااااااام

د/عرفه 13 يناير 2009 في 7:22 ص  

اولا بحب اشكر كل اللى ردوا
محمود ومحمد وصالحوdead
عايز اقوا حاجه بس لغير معرف
بقتبس من كلام محمد صبحى لعمرو اديب
لو كان فى ممثل اتعرض عليه سيناريو فيلم قراه وعجبه والفيلم فشل
بعد كذا سنه اتعرض عليه نفس السيناريو قراه وبرضه فشل
وبعد كذا سنه اتعرض عليه نفس السيناريو ورغم كده عمله برضه وطبعا فشل
طيب نقول ايه للممثل ده؟؟؟؟؟؟؟؟
طبعا زى معمرو اديب رد ذكى جدااا
ياريت نقدر نعرف مين هو عدونا وهو عايز مننا ايه

مذكرات مشاغب 14 يناير 2009 في 1:00 ص  

لا لا لا حرام عليك تظلم الحرامي وبالنسبه لاجابات الاسئله:
1-واللهي لو انت كنت اديته حاجات كتير يباه مش هيسرق حد.
2-واللهي ده يتوقف على اخلاقه.بس ممكن برده يسيبني.
3-على فكره باه مفيش حرامي بيسرقمن نفس الحته مرتين(خبره باه)
4-طبعا هيسيبني امال هيسرق مين بعد كده.
ههههههههههههههههههه لا طبعا انا بهزر معاك

بس بجد باه انا مختلف شويه مع التشبيه بتاعك
بتهيالي انه عسكري بيحميه الناس كلها وهو اللي بيسرق الحرامي
انت عارف لو اسرائيل دي لو العالم حيادي شويه معاها ومش محطوطه على الحجر
صدقني مكنش زمانها فضلت لحد دلوقتي ابدا
المشكله انها في نظر العالم الطفل البرئ
والفلسطينيين هم الوحوش
اسرائيل دي مش مجرد عسكري دي لواء كبير كمان والشعب كله بيحبها وهي اللي بتسرق الحرامي

تحياتي ليك والف مبروووووووووك على المدونه الجديده

حسام غانم 25 يناير 2009 في 4:50 م  

والله هو الحل المنطقي إنك تقف للحرامي ده وتردعه عشان حتى ميكررهاش في المستقبل

بس الفكرة إن محدش بيفكر في المستقبل

المهم دلوقتي

المهم سلامتي

المهم الكرسي بتاعي

مهندس مصري بيحب مصر 15 يناير 2010 في 3:58 م  

مصر قلعت هدومها فعلاً

إرسال تعليق